Энэ жилийн тэмцээнд манай эмэгтэй бөхчүүд гялалзтал хүч үзэж, хоёр мөнгө, нэг хүрэл медаль авсан амжилтаар багаараа гуравт орсон юм. Түүнчлэн ОУХМ Б.Насанбурмаа Лондоны олимпийн эрхээ авлаа. Манай бөхчүүд Стамбулын дэвжээнд хэрхэн барилдсаныг сонирхуулья.

ЭМЭГТЭЙ БӨХ

48 кг (40): 1.Обара Сакамото (Япон) 2.Мария Стадник (Азербайжан) 3.Жао Шаша (БНХАУ), Жулдыз Ешимова (Казахстан) 5.Кэрол Хюн (Канад), Идалго Кастильо (Колумб) Японы алдарт бөх, 30 настай Сакамото ДАШТ-ээс найм дахь алтаа авлаа. Харин 2009 онд Хернингийн дэвжээнд өнгөлсөн Стадник мөнгө дээр буусан байна. Хятадын Шаша сүүлийн хоёр ДАШТ-ээс хүрэл медаль зүүжээ. Гавьяат тамирчин Ц.Энхжаргал эхлээд гоц мөргөж, нэг ялагдсанаар жиндээ 32-р байр эзлэв.

51 кг (23): 1.Замира Рахманова (ОХУ) 2.Даваасүхийн Отгонцэцэг (Монгол) 3.Патимат Багомедова (Азербайжан), Жессика Макдоналд (Канад) Д.Отгонцэцэг Азербайжан, Герман, Энэтхэгийн бөхчүүдийг дараалан ялж, финалд шалгарсан тухай бид өмнө нь мэдээлсэн. Харамсалтай нь тэр аваргын төлөөх барилдаанд Оросын Рахмановад дийлдлээ. Отгонцэцэг эхний үед 1:0- ээр хожигдож яваад оноог тэнцүүлсэн төдийгүй дэвжээний захад шахаж эргүүлэн хожлын оноог авсан. Харин дараагийн хоёр минутад алдаа гаргаснаар 5:0-ээр ялагдсан юм. Улмаар шийдвэрлэх гуравдугаар үед хоёр бөх хэн хэнээсээ оноо салгаж чадсангүй. Дүрэм ёсоор шодолт хийхэд орос бүсгүй барьц сонгохоор болсон юм. Уг нь Отгонцэцэг барьц алдчихаад даацтай хариу мэх хийсэн боловч өмнө нь дэвжээн дээр суусан гэдэг шалтгаанаар эсрэг бөхөд оноо өгчээ. Ингэснээр манай бөх мөнгөн медаль хүртэж, Рахманова алт дээр буулаа. Сонирхуулахад Рахманова чөлөөтийн ДАШТ-д түрүүлсэн анхны орос эмэгтэй болжээ.

55 кг (41): 1.Саори Ёшида (Япон) 2.Тоня Уэрбек (Канад) 3.Тетьяна Лазарева (Украин), Ида-Терес Нерелл (Швед) 5.Мария Гурова (ОХУ), Хелен Луис Мароулис (АНУ) ДАШТ-д анх удаа оролцож буй Б.Номин-Эрдэнэ Грекийн Мария Преволаракиг 1:0, 2:1-ээр хожиж 16-д үлдсэн. Тэрбээр эхний үед шодолтоор барьц сонгож 1:0-ээр хожсон бөгөөд дараагийн үед ард нь тойрч гаран 1:0-ээр давамгайлж байсан. Гэвч цаг дуусахаас арав гаруй секундын өмнө ардаа алдсанаар оноо тэнцжээ. Хэрвээ барилдаан энэ хэвээрээ дуусвал сүүлийн оноог авсан гэдгээр грек бүсгүй ялах байв.

Харин Номин-Эрдэнэ үлдсэн богинохон хугацаанд өрсөлдөгчийнхөө хөлд орон дэвжээнээс гаргаж чадсанаар ялалтын оноог авчээ. Гэвч залуу бөх дараагийн даваанд Канадын Уэрбект 5:0, 2:0- ээр ялагдсан байна. Түүнийг хожсон канад бөх цааш явсаар финалд шалгарсан тул түүнд дагаж барилдах боломж олдов. Харин дагах барилдаанд Оросын Гуровад 1:0, 4:4-ээр дийлдэн жиндээ 17-р байр эзэллээ. Хоёрдугаар үед манай бөх 2:0-ээр давамгайлж яваад өрсөлдөгчийнхөө давхар хамах мэхэнд орж, гурван оноо алдсан. Үүний дараа зоригтой дайрч, толгойг нь уургалсан байдлаас эргүүлж шидэн хоёр оноо авсан ч мэхээ т ө г с г ө х д ө ө орос бөхийнг ардаа алдчихав.

Ийнхүү оноо 4:4 болон тэнцэж, сүүлийн оноог авсан Гурова ялагч болжээ. Хэрвээ түүнийг хожсон бол олим пийн эрхийн төлөө барил дах байлаа. Я п о н ы Ёшида аргагүй л өнөө цагийн босоо бөх болохоо харуулж, дэлхийн дэвжээнээс ес дэх алтаа авсан байна. Түүний ц у г л у у л г а д үү нээс гадна о л и м п и й н хоёр, Азийн наадмын гурван алт бий. Тэрбээр 2002 онд дэлхийн аварга болсноос хойш дөрвөн жил гаруйн хугацаанд олон улсын тавцанд нэг ч яладаагүй. Энэ хооронд тэрбээр 119 барилдаанд дараалан ялжээ. Үүний дараа Дэлхийн цомын багийн тэмцээнд Америкийн бөхөд дийлдсэн ч том тэмцээнд аваргалдаг уламжлал нь хэвээр.

59 кг (21): 1.Ганна Василенко (Украин) 2.София Маттсон (Швед) 3.Такако Саито (Япон), Сона Ахмади (Азербайжан) Гавьяат тамирчин Д.Нармандах эхний даваанд Шведийн Маттсонд цэвэр ялагдсан. Швед бөх цааш финалд шалгарсан болохоор манай хүн дагаж барилджээ. Улмаар дээрх шатанд Туркийн Л.Метинийг 7:1, 1:0-ээр ялсан ч хүрлийн төлөө Ази тивийн аварга Японы Татако Саитод 4:4, 5:0, 3:0-ээр хожигдож, тавдугаар байр эзэллээ. 2009 оны ДАШТ-ээс хүрэл медаль авсан Украины Василенко анх удаа дэлхийн аварга болсон бол тухайн үед аваргалж байсан Маттсон мөнгө дээр буужээ.

63 кг (45): 1.Каори Ичо (Япон) 2.Мариана Састин (Унгар) 3.Очирбатын Насанбурмаа (Монгол), Жин Руиши (БНХАУ) 5.Ким Ран Ми (БНАСАУ), Елена Приожков (АНУ) 2008 оны ДАШТ-д 69 кг-д барилдаад хүрэл медаль хүртэж байсан ОУХМ О.Насанбурмаа энэ удаа жин хасч, олимпийн жинд барилдаад тэрхүү амжилтаа бататгасан нь яах аргагүй том амжилт байлаа. Ингэснээр Насанбурмаа чөлөөтийн тамирчдаас анхны олимпийн эрхийг авчирсан байна. Тэрбээр эхлээд Румыний М.Панаитыг 1:0, 3:0-ээр, дараа нь Оросын бөх, ДАШТий гурван мөнгө, нэг хүрэл медальт Любовь Волосоваг 1:0, 0:1, 1:0-ээр давамгайлжээ.

Улмаар Венесуэлийн Г.Завала Лугог 1:0, 2:1, 4:3-аар хожсон ч мөнгөн медалийн төлөө Унгарын Састинд 2:0, 5:2-оор ялагдсан байна. Түүнийг хожсон унгар өмнө нь ДАШТ-ээс мөнгө, хүрэл медаль авч байсан юм. Харин дагах барилдаанд Ардчилсан Солонгосын Ким Ран Миг 1:0, 1:0-ээр хожиж, дэлхийн дэвжээнээс хоёр дахь медалиа авсан төдийгүй Лондонд зодоглох эрхээ халаасалсан юм. Энэ амжилтаараа тэр өөрийгөө гавьяат тамирчин цол авах эрхтэй гэдгээ дахин нотолж байна. Японы К.Ичо Стамбулын дэвжээнд босоо байснаар дэлхийн аваргын долоо дахь алтаа өөрийн болгосон юм. Тэрбээр мөн Афин, Бээжингийн олимпод өнгөлсөн билээ.

67 кг (14): 1.Ши Луожуома (БНХАУ) 2.Банзрагчийн Оюунсүрэн (Монгол) 3.Ёшико Иноүэ (Япон), Аделин Грэй (АНУ) Өнгөрсөн жил тивийн аваргад аман хүзүүдсэн Б.Оюунсүрэн энэ удаа дэлхийн дэвжээнд үзүүрлэлээ. Тэрбээр Украины А.Махиняг 1:0, 1:0-ээр, Японы бөх, Ази тивийн аварга Иноүэг 1:0, 2:0-ээр ялж финалд үлдээд Хятадын бөхөд 1:0, 1:0- ээр дийлдсэн юм.

72 кг (31): 1.Станка Златева (Болгар) 2.Екатерина Букина (ОХУ) 3.Али Бернард (АНУ), Василиса Марзалиук (Беларусь) 5.Гузел Манюрова (Казахстан), Аннабел Лауре Али (Камерун) Азийн наадмын аварга Г.Наранчимэг Унгарын К.Годиг 1:0, 1:0-ээр ялж, гараагаа сайхан эхэлсэн ч дараа нь Оросын Букинад 1:0, 4:0-ээр хожигдсон байна. Улмаар дагах барилдаанд Камеруны Алид 6:0, 1:1, 2:0-ээр дийлдэж, жиндээ 14-р байр эзэллээ. Энэ жингийн босоо бөх Златева ДАШТ-ээс тав дахь алтаа авлаа. Ноднин нутгийнхаа дэвжээн дээр хүрэл медаль хүртсэн Оросын Букина тэрхүү амжилтаа ахиулсан юм.

БАГИЙН ДҮН

Улс Алт Мөнгө Хүрэл Оноо

1.Япон 3 - 2 52

2.Канад - 1 1 33

3.Монгол - 2 1 32

4.АНУ - - 2 32

5.ОХУ 1 1 - 31

6.Азербайжан - 1 2 31

7.БНХАУ 1 - 2 29

8.Украин 1 - 1 28

9.Швед - 1 1 17

10.Беларусь - - 1 16

ЭРЭГТЭЙ БӨХ

55 кг (45): 1.Виктор Лебедев (ОХУ) 2.Радослав Великов (Болгар) 3.Дуалет Ниязбеков (Казахстан), Хассан Рахими (Иран) 5.Михран Жабурян (Армен), Николас Симмонс (АНУ) Гавьяат тамирчин Б.Наранбаатар Испанийн Ф.Санчесийг 3:0, 1:0-ээр ялсан бөгөөд дараа нь барилдах Йорданы Х.Коурша дэвжээнд гарч ирээгүй тул гар амар хожил авсан юм. Гэвч удаах учраа болох Ш.Юмотод 6:0, 5:3-аар хожигдсон байна. Япон бөх дараагийн өрсөлдөгчдөө ялагдсанаар манай бөхийн тэмцээн дуусаж, жиндээ 10-р байрт жагслаа. Оросын В.Лебедев өнгөрсөн жил дэлхийн аварга болсон амжилтаа бататгасан бол дэлхийн аварга, олимпийн хүрэл медальт Великов түүнд хожигдон мөнгө авсан юм.

60 кг (47): 1.Бесик Кудухов (ОХУ) 2.Фрэнклин Гомес (Пуэрто Рико) 3.Кеничи Юмото (Япон), Даурен Жумагазиев (Казахстан) 5.Дидье Паис (Франц), Малхаз Зарука (Гүрж) Азийн наадмын аварга Г.Мандахнаран тэгшитгэлд орж, Солонгосын Сен Чул Ли-тэй эхний барилдаанаа хийсэн. Гэвч түүнд 2:0, 1:0-ээр хожигдсоноор 45 бөхөөс 40-р байрт оржээ. Оросын Б.Кудухов 2006 онд Гуанжоугийн ДАШТ-ээс мөнгөн медаль авснаас хойш дэлхийн дэвжээнээс дөрөв дэх алтаа өөрийн болголоо. Бээжингийн олимпод түүнтэй зэрэгцэн хүрэл медалийн тавцанд зогссон Японы Юмото дэлхийгээс анхны медалиа авав.

84 кг (46): 1.Шариф Шарифов (Азербайжан) 2.Ибрагим Алдатов (Украин) 3.Дато Марсагишвили (Гүрж), Алберт Саритов (ОХУ) 5.Армандс Звирбулис (Латви), Норман Сандерсон (АНУ) Залуу тамирчин П.Өсөхбаатар Пуэрто-Рикогийн Ж.Еспиналд 5:1, 2:1-ээр хожигдон 28-р байр эзлэв.

96 кг (41): 1.Реза Яздани (Иран) 2.Серхат Балчи (Турк) 3.Руслан Шейхау (Беларусь), Жек Уорнер (АНУ), Синиви Болтик (Нигери), Таймураз Тигиев (Казахстан) Н.Золбоо Мексикий И.Риосыг 3:0, 0:1, 1:0- ээр илүүрхээд Словакийн Ж.Жаловиарт 0:6, 3:0, 0:1-ээр хожигдсоноор 41 бөхөөс 16-д орлоо. Өчигдөр эрэгтэйчүүдийн 66, 74, 120 кг-ын барилдаан болсон. 66 кг-д 31 бөх зодоглох мэдүүлгээ өгснөөс ОУХМ Б.Батзориг Японы Т.Ёнэмицүтэй барилдах сугалаа татаад байв. Мөн 74 кг-д хүч сорих П.Өнөрбат дэлхийн хошой аварга Оросын Д.Царгуштай эхэлж тулах оноолт гарчээ. ОУХМ Ж.Чулуунбат (120 кг) бас амаргүй сугалаа татсан. Түүний эхний учраа нь дэлхийн гурван удаагийн аварга Оросын Б.Махов юм.

Г.БАЯРСАЙХАН

"Монголын мэдээ"