Аймаг гэдэг ”компани”-ийн Төлөөлөн удирдах зөвлөл нь Нутгийн зөвлөл болжээ

2011-10-15

УИХ-ыг гишүүн болсон ноёдын зарим нь Нутгийн зөвлөлийн дарга хэмээн гуншинтай. Х.Бадамсүрэн гишүүн Өмнөговийн,

Б.Чойжилсүрэн Увс аймгийн Нутгийн зөвлөлийн дарга байх жишээтэй. Тэгэхдээ туйлын сэтгэл хангалуун байдаг нь нууц биш. Нутгийн зөвлөл бол өдгөө улс төр, бизнесийн маш нарийн "хор найруулдаг" аппарат болсон гэх нь бий. Бүрэлдэхүүнд нь эгэл малчин, ажилчин бус дарга ноёд л багтдаг.
Гэвч энэ одоо сонин биш. Зүгээр л дашрамдуулан дурдаж мөдхөн өгүүлэх зүйлийнхээ урьтал болголоо. Манай улс төрчдийн дотор хачин сонин санаа сэдэл агуулдаг төрийн түшээд бий. УИХ-ын гишүүдийг улс төрч хэмээн тодорхойлдог боловч тэдэн дунд жинхэнэ нь цөөхөн. Олонхи нь ердөө л кноп дарж санал өгөхөөс хэтэрдэггүй, хөдөөгийн нэг хээв байдлын малчин шиг дунхайж л байдгийг сонгогчид нь андахгүй. Харин тэднийг хөдөлгөдөг, санаачлах хуулийн сэдлийг нь зааж өгдөг нэг газар бий. Тэр бол аймаг болоод сумдын Улаанбаатар хот дахь Нутгийн зөвлөл билээ.

Эхэндээ орон нутгийнхаа ашиг сонирхол, оршин суугчдынхаа эрх ашгийн төлөө эвлэлдэн нийлж, хамтран ажиллаж бүтээн байгуулах зорилгоор энэ "ШБОС" буй болсон юм. Одоо бол тэр агуулга нь орхигдож, хэн нэгний пиар явуулах, дарга болох, алдар цол хүртэх конвейер буюу дамжлага баазын үүрэг гүйцэтгэдэг газар болон хувирчээ. Нутгийн иргэд гэхээсээ илүүтэй орон нутгийн дарга, түшмэд өөрсдийн эрх ямбаа хадгалахын төлөө хэн нэгэн төрийн түшээ сайд, даргад тал засан дулдуйдаж аймгийнхаа нийслэл дэх Нутгийн зөвлөлийн дарга болохыг гуйдаг, шалдаг, шаарддаг, ятгадаг нь үнэн. Нутгийн зөвлөлийн дарга болсон товарищ яаж зүгээр суух вэ, бага сага ажил өрнүүлнэ. Одоо бол мөнгө уутлах, албан тушаалд дэвших, сонгуульд нэр дэвшин төрийн түшээ болох дамжлага бааз болон хувирчээ.

Хэзээ ч жирийн нэг багш юм уу эрдэмтэн багшийг энэхүү Нутгийн зөвлөлийн даргаар сонгож байсангүй. Сонгох ч гэж дээ, шууд оноочихно. Эсвэл өнөөх амбицтай товарищ өөрөө гүйж ирээд бөөн явдал босгон байж дарга нь болдог зуршил тогтжээ. Өнөөдрийн улс төр, бизнес холилдсон төр, засгийн сүлжээний системийн нүдээр шагайх юм бол аймгийн Нутгийн зөвлөл нь нэг ёсондоо Монгол улсын нийслэл Улаанбаатар хот дахь сайд ихсийн ар талыг хамгаалах, тэдний пиар сурталчилгааг явуулах кампанит ажлыг зохион байгуулдаг төрийн бус байгууллага нэртэй улс төрийн клуб, мөнгө хүүлдэг хоршоо болон хувирсан байна гэвэл яах вэ? Зарим хүний ярьж байгаагаар нийслэл дэх аймгуудын Нутгийн зөвлөл нь тухайн аймгийн Засаг даргын тамгын газраас том эрх мэдэл, нөлөөтэй байгууллага болж хувирсан ажээ.

Тийм ч учраас аймгуудын Нутгийн зөвлөлийг Улаанбаатар дахь тухайн аймгийн улс төр, бизнесмэнүүдийн карьерыг тодорхойлох компанийн Төлөөлөн удирдах зөвлөл боллоо гэцгээж байгаа юм. Хараад байхад Нутгийн зөвлөлд жирийн ажилчин, багш, эмч, инженер багтдаггүй харин компанийн эзэд, дарга сайд нар жагсдаг нь ч ортой. Яагаад гэхээр тэд өөрсдийнхөө төлөө хүчлэн зүтгэхээс нутгийнхаа иргэдийн амьжиргааг дээшлүүлэх гэж зүдрэхээс татгалзаж түдгэлздэг. Өөрөөр хэлбэл, Нутгийн зөвлөл гээч нь помещикуудын хамтлаг, хөрөнгөтнүүдийн клуб, улс төрд шунагчдын баар болж хувирсан аж.

УИХ-ын сонгууль болоход хэн нэр дэвшихийг нам мэдэх ёстой байтал Нутгийн зөвлөлийн амыг хардаг нь ердийн жишиг болчихов. Аймгуудын намын дарга нарт өөрийн мэдэх юм огт алга. Өнгөц харж байхад аймгийн Засаг дарга, намын хорооны дарга гэсэн нэртэй хэдий ч нийслэл дэх Нутгийн зөвлөл хэмээх Төлөөлөн удирдах зөвлөлийн шийдийг зайлшгүй хүлээнэ, сонсоно. Дур мэдвэл "Сраз майор" гэдэг шиг сэнтийнээсээ шууд арчигдана. Нөхцөл байдал ийм болоход улс төрчдийн түншлэл хамгийн ихээр нөлөөлсөн бөгөөд одоо ч ялгаагүй. Төрийн түшээ, сайд, дэд сайд, агентлагийн дарга болсон бол, хэрвээ тэр нөхөр хоосон амбицтай товарищ бол Нутгийн зөвлөлийн дарга болох гэж зүтгэнэ. Цаад учир нь бол аймгийнхаа ТУЗ-ийн дарга болж тамгагүй хутагт болно гэсэнтэй адил юм. Иймдээ ч улс төрчид, бизнесмэнүүд Нутгийн зөвлөлийн ноён болох гэж улангасдаг зуршил бий болчихжээ. Есхөн сарын дараа ээлжит парламентын сонгууль эхэлнэ. Компанийн захирал аав нь хүүгийнхээ төлөө, төрийн түшээ эрхэм эхнэр ба дүүгийнхээ төлөө мөнөөх Нутгийн зөвлөл буюу аймгийнхаа Төлөөлөн удирдах зөвлөлийн дарга, гишүүдийг шадарлан шахаж мөнгөөр хахуульдан гоё амлалтаа өгч бүх зүйлээ яс хийлгэж байж санаа амрах цаг ирлээ. Урьд ийм л байсан, одоо ч бас адил. Тэглээ гээд энэ хөшигний цаад нууц хуйвалдааны талаар хэн ч мэддэггүй. Ялангуяа эгэл жирийн иргэд. Тэдэнд мэдүүлэх вий гэж өөрсдөө ч айж, таг нуудаг билээ.

wikimon