Н.Алтанхуяг сайд аа, та хэлье гэж хэлэв үү

2011-10-28

“Өнөөдөр” сонин өчигдрийнхөө дугаарт “Хувийн компанийн захирлууд ажиллагсдынхаа цалинг нэмэх шахаанд орох

биз ээ” гарчигтай ярилцлага нийтэлжээ. Ийн ярьж буй хүн нь Тэргүүн шадар сайд, АН-ын дарга Н.Алтанхуяг юм. Дээрх ярилцлагыг уншсаны дараа л “Алтанхуяг гуай амаа мэдэж бураарай” гэж хэлмээр санагдаад явчихлаа. Н.Алтанхуяг бол дугаар хорооны жирийн иргэн биш, хаа сайгүй алиа салбадайн дүр эсгэж явдаг хөгийн улстөрч ч биш, Монгол улсын гүйцэтгэх засаглалын хоёрдугаар эрэмбийн албан тушаалтан, хамтарсан Засгийн газрыг бүрдүүлж буй хоёр том намын нэгнийх нь дарга хүн шүү дээ. Гэтэл тийм том албан тушаалтны амнаас ийм болчимгүй үг унаж байх гэж. Өмнөөс нь ичиж нүүр улаймаар л байх чинь. Монголын эдийн засгийн 70-80 хувийг хувийн хэвшлийнхэн нуруундаа үүрч байдгийг хамгийн сайн мэдэх учиртай Тэргүүн шадар сайд хүн ингэж хэлж, тэрхүү баялаг бүтээгчдийг дорд үзэж, доромжилж болно гэж үү.

Н.Алтанхуяг төсөв мөнгө, эдийн засгийн тооцоо энэ тэр мэддэггүйдээ хамрын дор хагархай гэгчээр ингэж хэлээгүй болов уу. Харин тэрээр энэ насандаа хувийн компани удирдаж, ажиллагсдынхаа аж амьдралыг өөд татах, ар гэрээ тэжээх талаар санаа тавьж, улсад бага ч болов татвар төлж үзээгүй нөхөр шүү дээ. Тийм хүний амнаас л “Хувийн хэвшлийнхний хувьд компанийн захирлууд төрийн байгууллагынхны цалин хөлсний нэмэгдлээс дохио авч, ажиллагсдынхаа цалинг нэмэхээс өөр аргагүй шахаанд орох болов уу. Зүгээр нэг цалин нэмэх бодол бизнесийнхэнд мэдээж төрөхгүй л дээ” гэх зуйгуул үг гарч таарна. “Ажиллагсдынхаа цалинг нэмэх бодол бизнесийнхэнд төрөхгүй л дээ” гэж тэр яаж хэлж чадаж байна вэ. Харин ч хувийн хэвшлийнхний олонхи нь ажиллагсдадаа төрийнхнөөс ахиу цалин олгодог юм шүү.

Төрийн байгууллагынхны цалин нэмэхийг бид эсэргүүцээгүй ээ. Авдаг хэд нь нэмэгдэж байвал хэнд ч гэсэн тустай. Ерөнхий сайд С.Батболдын 2012 оны төсвийн төслийн талаар УИХ-ын нэгдсэн чуулган дээр хэлснээс үзвэл, ирэх онд төсвийнхний цалинг 53 хувиар нэмэх аж. Сангийн сайд С.Баярцогт “Цалингийн сан 800 тэрбум төгрөг, түүн дээр цалин нэмэх зориулалтаар 437 тэрбум төгрөгийг төсвийн төсөлд нэмж тусгаж байгаа” гэв. Өөрөөр хэлбэл, зөвхөн төрийн байгууллагынхны цалинд 1.2 их наяд төгрөг зарцуулах нь. Монгол улсын ирэх оны төсвийн зарлага 7.1 их наяд төгрөг. Тэгэхээр нийт зардлын 1/6 буюу 16 орчим хувийг цалин эзэлнэ гэсэн үг.

Хувийн компанийн захирал гэхээр цалингаа нэмэхийг улайран эсэргүүцдэг, хорголоо тоолсон харамч хүмүүс байдаг гэж ойлговол хэтэрхий ташаа ойлголт болно. Харин ч өндөр цалин өгөөд дээр нь унаа, хоол, тэр ч байтугай байрны мөнгө олгодог компани өдий төдий бийг хэн ч үгүйсгэхгүй биз ээ. Хөдөлмөрийн бүтээмжээ дээшлүүлэх, ажиллагсдынхаа цалин хөлсийг нэмж, ажиллах нөхцөл бололцоог нь хангаж, ая тухтай орчныг бүрдүүлснээр хөдөлмөрийн бүтээмж, үр ашиг, бүтээгдэхүүн ажил үйлчилгээнийхээ чанарыг дээшлүүлж, тэр хэрээр ашиг орлогоо нэмэгдүүлэн компанийнхаа нэр хүндийг хэрэглэгчдийн дунд илүүтэй өсгөнө гэдгээ тэр захирлууд хувийн хэвшилд нэг ч өдөр ажиллаж үзээгүй Н.Алтанхуяг сайдаас даанч илүү мэдэлгүй дээ.

Н.Алтанхуяг улс орны эдийн засгийн хамгийн хүнд ачааг нуруундаа үүрч байгаа хувийн хэвшил, тэнд ажиллаж ар гэр, аж амьдралаа хэнээс ч дутуугүй авч яваа олон мянган жирийн иргэнийг ад шоо үзэхийнхээ оронд улс орны өмнө тулгамдсан олон чухал асуудалд анхаарлаа хандуулаасай. Тэрээр эдийн засгийн өсөлт 14 хувьд хүрснийг бахархан тэмдэглэсэн байна лээ. Тэр өсөлтийг тэргүүн шадар сайд хангасан юм биш, ихэнхийг нь түүний ад үзээд байгаа хувийн хэвшлийнхэн бүтээсэн хэрэг шүү дээ. Харин өнөөх ярилцлагадаа дурьдсанчлан тэр том өсөлтөөс чинь Дорж, Дулмаагийн гэрт юу наалдав гэдэг л Н.Алтанхуягт сонин баймаар юм. Гэтэл Тэргүүн шадар сайдын хувиар тэр наалдцын талаар санаа тавихын оронд мөрөөрөө байгаа хувийн хэвшлийнхэн рүү шүлсээ үсчүүлээд яах нь вэ. Монголын нэртэй эдийн засагчдын гаргасан тооцоогоор Монгол дахь ядуурлын хэмжээ 1995 онд 36.3 хувь байжээ.

Монгол улсын мянганы хөгжлийн зорилтод 2015 он гэхэд энэ үзүүлэлтийг 18 хувь болгож бууруулна гэсэн билээ. Гэтэл одоогийн байдлаар тэгж буурах нь бүү хэл 39.2 хувь болж өсчихөөд байна шүү дээ, Тэргүүн шадар сайд минь. Уг танай Засгийн газар энэ мэт сэтгэл зовоосон гол гогцоо асуудалдаа л анхаармаар санагдана. Ажилгүйдлыг бууруулах, ядуурлыг багасгахад төрийн байгууллага биш, хувийн хэвшлийнхэн л голлох үүрэг гүйцэтгэж байгаатай маргах хүн олон гарахгүй л болов уу. Төрийн байгууллагад 160 орчим мянган хүн ажилладаг гэдэг. Үүн дээр төрийн өмчит болон төрийн өмч оролцсон аж ахуйн нэгжүүдэд ажиллагсдыг нэмбэл 300 мянгад дөхөх байх. Тэгэхээр цаана нь үлдсэн ажилтай хүмүүс цөм хувийн хэвшилд хүчин зүтгэж байгаа хэрэг. Монгол улсын дотоодын нийт бүтээгдэхүүний 43.4 хувийг хувийн үйлдвэрлэлийн салбар эзэлнэ гэж Ерөнхий сайд хэлж байна. Энэ бол улс орны хөгжилд хувийн хэвшлийнхэн ямар их хувь нэмэр оруулдгийг нотлох үзүүлэлт мөн.

Тэргүүн шадар сайд хувийн хэвшлийнхний цалингийн талаар тийм л их санаа зовж, нэмэхийг хүсээд байгаа бол Засгийн газрынхаа танхимаар хувийн хэвшлийнхэнд цалингаа нэмэх боломж олгох асуудлыг ярилцаж шийдээд өг л дөө. Ингэхийн тулд наад зах нь хувийн хэвшилд оноодог өндөр татвараа бага ч болов хөнгөлөөд аль. Тэгвэл харин буянтай үйл болно. Муу нэртэй луу данстай ч гэсэн “Буян”-гийн Б.Жаргалсайхан шиг бизнесмэн таны оронд байсан бол арай ч ийм юм ярьж, олны дургүйг хүргэхгүй дээ. Ер нь Н.Алтанхуяг нам дотроо ч нэр хүнд муутай товарищ шүү дээ. Тийм ч учраас түүнийг намын даргаас хусах ёстой гэсэн үзэл бодолтой гишүүд энэ намд цөөнгүй бий. Ж.Батзандан “Үзэл бодолгүй, зарчимгүй намын даргатай байх хэрэггүй” гэж шуудхан хэлж буй бол “Манай Н.Алтанхуяг чинь ҮЗХ-ны хурлаар албан ёсоор баталгаажаагүй хууль бус дарга” гэх гишүүн ч олон байдаг юм. Түүнийг намын даргаас огцруулах гэж журмын нөхөд нь удаа дараа оролдсоныг бодвол тааруухан удирдагч биз дээ. УИХ-ын гишүүн, жинтэй, үнэн үг хэлдэг З.Энхболд “Либерализм, консерватизм гэдгээ ялгаж мэддэггүй дарга /Н.Алтанхуягийг хэлж байна.Д.Г/-тай АН хол явахгүй” гэж хэлж байв.

Яг одоо намын даргаа солимоор байна

Яг одоо хамтарсан Засгийн газраас гармаар байна

Яг одоо ямар ч хамаагүй аргаар Н.Алтанхуягийг буулгамаар байна гэсэн үгтэй дуу хүртэл гарсныг Тэргүүн шадар сайд маань сонсоо болов уу. Намайг огцруулж, миний оронд дарга болох гэсэн З.Энхболд зохиосон гэж арай новшрохгүй байгаа даа. Тэргүүн шадар минь та хувийн хэвшлийнхний тухай доромж үгээ хэлье гэж хэлэв үү, хэл чинь халтираад хэлэв үү. Аль нь ч байсан ам алдвал барьж болдоггүй гэдэг дээ. Та тэднээр ингэж тохуурхах эрх дархтай хүн үү.

Undesnii medee