Ёо ёо ашгүй зүүд байж… Гэхдээ л үүнээс адгийн үхлээр үхэх байх даа. Ёо ёо үхэх нь ээ пизда. Өглөө хэнийг муриад юм уучихав аа, айдас хүрээд байх юм. 16.30 болж байна, хамгийн варианттай цаг даа. Гарч юм олж уухгүй бол чадрах нь ээ. Нүүрээ угаая, сахлаа аваад арай гайгүй хувцас өмсье. Өө пизду, нүүрэн дээр ямар аймаар юм туураа вэ. Хүн танихын аргагүй муухай болжээ. Хямд муу архины хордлого шүү дээ. Баруун талын богино хавирганы цаана өвдөөд гэдсэн дотор нэг л юм болоод байна даа. За яахав хэзээ ч үхсэн яахав. Яанаа капий улаан зоос алга, залиндаа л найдахаас. Дээр Баадкаагаас луйвардаж авсан орос дүнснээс ганц ороож татаад гаръя даа. Түй, тамхи ороож чадахгүй салгалж байгааг.

Гадаа сайхан байна даа. Зуны налгар орой урд талын цэцэрлэг л хамгийн варианттай даа. Хол ч гэсэн байрныхаа энэ талаар тойрсон нь дээр байх аа, ийм царайтай хүн. Яанаа араас хэн нэгэн ирээд дагз руу турбагаар шаачих байх гэж бодогдоод байна даа. Пизда энэ муу тагтаа нисэхэд ингэж цочих гэж. Цэцэрлэг сайхан байна аа. Ингээд сайхан дулаарчихаар байгаль баар намайг үргэлж тэтгэх болно. Монголчууд бааранд орох мөнгөгүй ядуу байгаа нь миний хувьд аз шүү. Энэ цэцэрлэгийн урд тойрсон сандал бүхий гурван саравч байгаа. Тэгэхээр тэнд гурван архидалт болж байгаа гэдэг нь эргэлзээгүй. Болохгүй бол түүний урд талын цэцэрлэг рүү явна даа.

За тээр хэлээгүй юу. Энд 50-аад насны хоёр эр “Ерөөл” архи тавьжээ. Энэ хоёр пиздааг гуйвал амны гарз болно. Өдий насны эрэгтэй хүн хамгийн хашир, над шиг луйварчны хувьд хамгийн лалар байдгийг би яаж андах вэ. Голын саравчинд дөчөөд насны дөрвөн авгай тухалжээ. Өө за за 1500-гийн бандгар тавьчихаж. Тэгэхээр би эд нарт хэрэггүй гэсэн үг. Нэлээд доошоо орсон архичин авгайчууд ажээ. Бараг бүгдээрээ орцны жижүүр байх. 10-аас дээш настай бүх эмэгтэй хүн танихгүй эр хүнээс айж болгоомжилдог. Еэ хүүрээ ингэж айх гэж. Хомоол шиг том чулуу намайг мөргөх нь гэж бодсон чинь муу болжмор байж.

Өө за за найзуудаа оллоо. Хамгийн зүүн талын саравчинд тав зургаан банди сууж байна. Хажуудаа банзан гитар тавьсан нь тэр чигээрээ бурхан намайг аврахаар шийдсэний гэрч. Хамгийн гэнэн, хамгийн тэнэг, хамгийн итгэмтгий, хамгийн цайлган арван долоотууд. Энэ насны эрчүүдийг би мунхруулж чадаагүй алдсан түүх үнэндээ байхгүй л дээ. Тийм л учраас ах нь та нарт хайртай байдаг юм шүү дээ. Гэхдээ ямар ч тохиолдолд эдэнтэй ам муруйж, зодолдож болохгүй. Тэгвэл эрлэгийнд очлоо гэсэн үг. За тээр аз болж тэдэнтэй хамт ганц ч охин алга. Ширээн дээрээ “Боргио” өржээ. Тэр хар үүргэвчинд бас хэдэн шил байгаа бололтой. Арваад метрийн зайтай байгаа тэр цементэн хашлага дээр буруу харж суугаад бууны нохой болж яриаг нь сонсоод байж дээ. Ээ хөөрхий, ийм л учраас би амьдралд хайртай байдаг юм даа. Пизда эд нараас ганц тамхи гуйчих юмсан, гэхдээ болоогүй шүү тэвчих л хэрэгтэй. Наймдугаар Богдын алдартай үгийг сайн бод. “Хөдлөх цаг болоогүй байна”.

Бацаанууд хэн нэгэн охиныг муулж байгаа бололтой. Яриан дундуураа над руу ээлж ээлжээрээ хараад байгааг би нурууныхаа шар үсний үзүүрээр мэдэрч байна. Жавзандамба хутагтынхаа яруу үгийг бодож үзье. “Хөдлөх цаг нь болжээ”.
-       За сайн уу дүү нар минь, ах нь гитарыг чинь сонирхож болох уу?
-       Сайн сайн, бололгүй дээ ахаа, гэхдээ хөг нь жаахан тиймэрхүү байгаа. Та янзалж чадна биз дээ? (Ингэж хэлэхийг чинь би мэдэж байсан юм)
Гар салгалаад байна даа. Гэхдээ ямар ч байсан аятайхан хөглөчихлөө. Хичнээн салга ч гэсэн Калифорнийн зочид буудлыг муухай тоглох номгүй л дээ. Бацаануудын ам нь ангайж, нүд нь гөлрөөд гацчихлаа. Муухай хоолойтой ч эвлэгхэн дууллаа.
-       Пөөх ямар тасарчихсан ах вэ. Ах май пиво уух уу? (Хуучин цэрэг үүнийг мэдэлгүй дээ)
-       Бололгүй дээ, залуу хүмүүстэй танилцах сайхан байдаг юм. Анхны хайр бодогдоод л. Энэ цагаан байшин хуучин оросын байр байсан юм. Тэнд Лена гэж хол ойрд алдартай үнэхээр нэг эрх гүнж шиг энхрий амьтан байлаа. Тэдний орцны үүдэнд концерт тавьсаар байгаад өвөрт нь орж билээ. Еэ энэ Боргио чинь үнэндээ уулын сэрүүн булаг юм аа. Хожим нь Ленаг архинд орсны дараа манай хорооллын эр сүвтэй бүхэн дээгүүр нь харайсан даа. За тэр ч яахав, дүү нарын алдар хэн бэ. Агааг нь Алтангургалдай гэдэг.
-       Өнөөдөр чинь ямар гээчийн гоё өдөр вэ? Намайг Алтансүх гэдэг. Та бид хоёр бараг амьдаа юм байна. Алт алтдаа хайртай байдаг юм.
-       Ямар сонин нэртэй, гоё зантай ах вэ? Намайг Рэгзэн гэдэг.
-       Намайг зүгээр л Болдоо (Энэ л миний арганд орох байх даа)
-       Ахыг гитар тоглохоор нь Өөжгийг байна гэж бодлоо ш дээ. Намайг Баяраа гэдэг (Энэ бацаан хамгийн хашир нь юм байна, түрүүлээд явуулчих юм сан)
-       Даваасүрэн
-       Намайг Гантөмөр. Найзууд Гааняа гэж дууддаг юм аа (Эд нарын нэрийг яаж цээжлэнэ дээ)
-       Ах нь дүү нартайгаа танилцсан юм чинь нэг шалгалт авчихъя. 23 гэдэг тоог хэлсэн хүн надад мөрийгөө алдана шүү. Арав дээр нэгийг нэм.
-       Арван нэг. (Тэнэгүүд уралдаад хэлж байна)
-       Түүн дээрээ арвыг нэм
-       Хорин нэг. (Бас л ам уралдаж байна)
-       Түүн дээрээ ганцыг нэмчих.
-       Хорин хоёр
-       За тээр та нар 22 гэдэг тоог хэлээд бүгд мөрийгөө алдчихлаа ш дээ.
-       Үгүй та хорин гурав гэдэг тоог битгий хэлээрэй гэсэн. (Болдоог би хамгийн гэнэн хүн гэж зөв таньжээ)
-       За тээр, чи ингээд л 23 гээд хэлчихлээ дээ. Бүгдээрээ нирхийтэл инээлээ.

Гурван лонх боргиог ам руугаа асгасны дараа айдас хүйдэс мартагдаад, тархины бяр чадал нэмэгдээд ирлээ. Бацаануудыг унаж тустал нь инээлгэж, уйлтал нь гитар тоглон сөөнгө хоолойгоор майллаа. Намайг дулаацуулах тэдний хайр ч гэрэлтээд ирлээ. Гэхдээ энэ Баяраа нэг л биш. Ашгүй Болдоо мөрийнд алдсан ганц шил архиа авчрахдаа Баярааг дагуулаад явсан чинь ганцаараа ирэв. Бурхан нээрээ миний талд байна. Хийморьтой явахад чөтгөр ч саад болдоггүй юм. Баяраа аавтайгаа дэлгүүрт халз тааралдаад нуугдаж амжсангүй, дагаад гэр лүүгээ харьжээ. Галтай усыг ярвайлгүй ууж, гэнэн банди нарыг гитар шиг хөглөөд байлаа. Удалгүй бүрий тасрах нь ээ, сэрүү ч орсон байна. Болдоогийн гэрийнхэн зусланд гарсан гэнэ. Хотынх нь гэрт ярьж суух санал тавив. Зарим нь харина гэнэ. Би үүнийг л хүлээж байсан юм.

Болдоод хоёр гараа хөрөөдүүлж байна гэж зүүдлээд сэрье л гэж сэрлээ. Хүйтэн хөлс асгарчээ. Гэрлээ асаав, хөөх гэртээ ирчихсэн байна ш дээ. Пизду ам хатаад үхэх нь ээ, хүйтэн пиво уух юмсан. Яг л архичдын сэрдэг үүрийн дөрвөн цаг болжээ. Хамаг бие бяцарсан юм шиг өвдөж байна. Хэмх балбуулсан юм шиг булчин шөрмөс хөндүүр болжээ, гэхдээ л хүнд зодуулаагүй бололтой юм. Өмдний халаасанд Болдоогийн түрийвч байна. Тавин мянган төгрөг. Бас баахан задгай зуут. Өө тээр, хүрэмний гадуур хоёр халаас, дотуур нэг халаасанд нэг нэг мөнгөн аяга байна. Өө лалар аа, өөр үнэтэй цайтай юм авчихаагүй байгаа. Өрөөгөө тойруулж харъя. Жижиг гарын л юм хийх хэрэгтэй. Тийм ч учраас аваргууд намайг “Жижиг гар” гэдэг. За ашгүй, дэндүү үнэтэй юм хусчихвал цагдаа сэргийлэх, эрэл сурал болж мэднэ. Гэхдээ намайг олохгүй л дээ. Ямар Алтангургалдай байгаа биш. Пизду гарч юм уухгүй бол яг үхэх нь ээ. Гэхдээ Болдоогийн гэр, цэцэрлэг хоёр луу зүглэж болохгүй. Бичил хорооллын шөнийн дэлгүүр лүү явъя. Хоёр мөнгөн аягыг гэртээ орхино, нэгийг нь зах цуглахаар зарж орхино. Хэн нэгэн намайг орцонд отож байгаад хутга шаачих юм шиг санагдаад байна, яанаа пизда.

Гадаа сайхан байна даа, өдөр нар шараад ирэхээр амьтан болно. Үүр цүүрээр хаагуур ч явсан хамаагүй, өглөөний долоон цагаас хойш л энүүгээр явах дэмий байдаг юм. Пизда бушуухан пиво шаахгүй бол явах нь ээ. Такси барина аа, энэ машин зогсох нь дээ. Ёо ёо гэдсэн дотор юу болоод байна аа. Иш чааваас үүрийн шөнөөр эмэгтэй хүн ганцаараа халтуур хийх гэж. Надаас дор юмнуудтай таарвал яах юм болж байна аа. “Эгч ээ бичил оръё, хойд замаараа явчих”. Энэ авгайтай би одоо юугаа ярих билээ. Шөнийн дэлгүүрээс пиво аваад хаашаа очих уу. Одоо мөнгөтэй юм чинь хүн царайчлах шаардлагагүй. Уг нь нэг хүүхний юм бодвол зүгээр юм сан. Юу яасангүй зөндөө удчихлаа. Цээж халуу оргиод байна бушуухан хүйтэн юм залгилъя аа. За за гулууз Батаатай л гэрт нь тааралдъя, одоо сэрчихээд дотор нь муу байх ёстой. “Эгч ээ, тэр гэрэл анивчаад байгаа шар дэлгүүр. Би хэдэн пиво авчихаад л гараад ирье, хүлээж байгаарай”.

Өө за энэний байж байгааг дээ. Яалт ч үгүй шартчихсан нөхөр байна даа, нүүр өгөхгүй юм шүү. “Худалдагч аа, нэг шил ерөөл, зургаан боргио өгчих” Зайлуул даа гэж, ийм нялх амьтнаар худалдагч хийлгэх гэж. Хамгаалагчтайгаа адил нойрмог амьтан юм. За тэсэхээ болилоо шүү. Шууд л задлаад залгилъя… Сэрүүхэн булаг юм даа. Энэ муугийн горьдож байгааг, нүд нь уналаа. Ямар ч хулгайч байгаад, яаж ч гай болох юм билээ, бушуухан машиндаа сууя даа. Танихгүй хүнийг дааж архи уух осолтой шүү, даалгавал хэнтэй ч уусан болно. За байз огих гээд байна уу. Ахиад балгана аа. “Гандан орно оо эгч ээ”. За байз энэ авгайд өгөх илүүдээ гарсан мөнгө хаана байхав, ер нь нөгөө аргаараа мурчихъя байз.

Гулууз Батаа ч гэртээ байгаа л даа, өөр хаана хонохов. Энэ пиво мөн сайхан байна шүү. “Чи залуу хүн байж ингэж ууж яаж болно оо, биеэ боддог байгаа даа. Уг нь гайгүй залуу шиг байх юм. Аль гудамжаар орох юм бэ?”, “Тэр машин эргэж байгаагаар эргээд чигээрээ гудмаар ороорой. Харин ээ эгч ээ дандаа ингэдэггүй юм. Ммм… эхнэртэйгээ муудалцаад гомдсондоо л жаахан уучихлаа”. (Гайгүй залуу гэнэ шүү, гайгүй залуу ямар байдгийг үзүүлээд өгнө өө чамд). “Тэр хаалга, за эгч ээ одоо ганцхан минут, эндээс мөнгө аваад өгчихье” Өө новш оо хаалга нь түгжээтэй байна. Давна аа, тортой юмаа хагалж болохгүй шүү. Эднийх нохойгүй юм, түүнийг ч олон удаа ашиглаж мөнгөө хэмнэсэн дээ хөөрхий. Хашааны хойд талыг нэвт давна аа, тортойгоо л хагалж болохгүй юм шүү. Бие ч арай дээрдэж байна, нэг балгана аа. Ингээд ажаа минь гайгүй залуугаа хүлээж дээ. Тэсвэр алдаад хаалга цохих үед чинь би гулууз Батаатай гэрт нь тааралдчихсан хатуу юм задлаад таны эрүүл мэндийн төлөө нэг татна даа.

Гэрэл нь асаалттай байна даа, хаалгыг нь тогшвол таксины жолооч сонсоно, бас л хашаа давахаас. Эхлээд цонхоор нь шагайна аа. Нэг сайн балгачихъя. Өө за за хоёулаа байх шив дээ. Ахмад хүн байна, ганган Баагий байна, би ийм лалруудад угаасаа дургүй. Яахав үг солиод л үзье. Хоёр пиво тавьчихиж, энэ хоёр мөнгөгүй юм байна, гэхдээ танихгүй хүнтэй ууснаас дээр л дээ.
-       За сайн байцгаана уу, хар үүрээр юу хийж байгаа улс вэ хөөе.
-       Хүүе Жижиг гар, хаанаас гараад ирэв ээ? Өө за ашгүй тортой юм барьчихаж юу юм бэ? За наашаа суу, танилц. (чамайг л дайлах гэж байна, дараа нь чи өрөө төлөөрэй) Энэ Цэрэн ах. Цэрэн ах аа танилц, энэ ммм Жижиг гар аа нэрийг чинь хэн гэдэг билээ? За за чамд нэр байгаад ч хэрэггүй. Жижиг гар Жижиг гараараа л байсан нь дээр. (Чи миний нэрийг яг мэдэж харагдана даа. Би бараг өөрөө мартчихаад байхад)
-       Надад угаасаа нэр байхгүй, за та хоёр чинь хар үүрээр юу хийж байгаа юм бэ?
-       Сая Цэрэн ахын чинь бие муу гээд ирсэн юм. (Харваас тийм л байна) Онгоцны дарга хүн шүү. Миний дүү сайн танилцаарай, хэрэгтэй хүн шүү. (Гайгүй л хүн харагдаж байна. Харан байж болъё, над шиг архичинд шар тайлахад туслахгүй бол чухал хүний хэрэг ер байхгүй) Юм байгаа юм бол задла л даа. Зүгээр хараад суугаад байх уу?
-       Май та задлаад тойруул. Би бие өвдөөд чадахгүй байна.

Цэрэн ах аргагүй л дотор нь муудсан байна даа. Архины сургаар хоёр тийшээ холхиод уналаа. Ай даа, яг л ингэж уудаг даа. Учир мэдэх хүн байна. Гулууз Батаа худлаа хэлээгүй бололтой, Цэрэн ах гайгүй л хүн шиг байна, их сонирхолтой юм ярих юм. Надад арай их хийчихэв үү, үгүй байна яг л нэг балга юм. Ай даа, архи ч ингэж л ордог шүү дээ, дэлтэй арсланг бүхлээр нь залгиж байгаа юм шиг. Өглөө ч болж байна даа, ээж зуслан дээрээ хүүгээ бодож суугаа даа. Дотор ч бүр засарчихаж, энэ муу зарааг хордуулж аллаа даа. За гарч хүндрэх хэрэг гарах нь ээ, одоо ч аймаар өмхий юм гарна даа, яадаг юм байгаа юм. Эдний жорлон мэдээж цаасгүй байгаа. За за цаастай цаасгүй, арчсан арчаагүй хамаагүй. Өмдөө шууд л өмсөхөөс.

Шинэ өглөө ч эхэлж байна даа. Хаалганы цаагуур ажил сургуульдаа яваа хүмүүс л холхилдож байх шиг байна. Цагтаа энэ муусайнуудтай адилхан хичээл номондоо яардаг байлаа. Хөөрхий муу таксины жолооч ажаа хаана манаргаж яваа бол. Энэ жорлон ч нурж унахаа тун дөхөж дээ. Хэн хаалга нүдээд байна аа. Мах Ганбаагийн дуу юу. Хоёр хүн орох шиг л боллоо. Өст хүн өлийн даваан дээр гэдэг л боллоо. Ядаж байхад хоёулаа ирдэг нь ч юув дээ. Яанаа алуулах цаг ирээгүй байгаа даа. За ямар ч байсан эвээр яриад, хэдэн төгрөг өгөөд үзье. Ёоё хөл бүр чилчихэж, зориглоод орно доо хө. Мах Ганбаа бид хоёр хаашдаа тааралдах байсан юм. Эв найрыг сайн сахиж суугаад Цэрэн ахыг аваад сэм бултъя.

-За сайн байцгаана уу, ямар сонин хүмүүс вэ?
-За муу бандийн заалт минь, чи надаас насаараа зугтаж чадна гэж бодсон уу? Өнөөдөр наад муу хоёр дэлдэнгээр чинь хуцваа хийж иднэ дээ.
- Ганбаа ах аа, би өнөөдөр таныг хайж явсан юм. Хэдэн төгрөгтэй болсон дээрээ таныг дайлъя гэж бодсон юм. Цэрэн ахаа би дөнгөж сая тэгж ярьж байсан биз дээ.
- Ганбаа, ахын дуу муу Жижиг гарыг зодож дээрлэхээд хэрэггүй шүү. Саяхан чамтай уулзаж хэдэн шил юм авч өгөх юмсан гэж ярьж байсан юм.
-За муу гөлгөн Сугар минь. Одоо хоёулаа явж арван шил архи авъя. Чадахгүй бол би аманд чинь баана шүү, хараарай.
-Ганбаа ахын дүү сууж байя. Цэрэн ах чинь найдвартай хүн чи мэднэ. Би Жижиг гартай хамт дэлгүүр яваад аваад ирье. Ах нь хэрүүл зодоонд дургүй хүн. Миний дүү ахынхаа дэргэд л муухай зан гаргаж болохгүй. Дараа та нар өөрсдөө учраа олно биз. За за Жижиг гараа хоёулаа гаръя.
-Жижиг гараа, муу бандийн шоо минь. Арван шилийг авчрахгүй бол хоёр нүдийг чинь ухаж, хоёр төмсгийг чинь суглаад гөлгөө тэжээнэ шүү. Төрүүлсэн эхээ хайрлаагүй хулгайч, чамайг өрөвдөнө гэж даанч нэг байхгүй шүү. Далан давхарт аваачиж толгойг чинь ил гаргаж булаад нүүр лүү чинь сарина даа.
-За Ганбаа ах аа, Цэрэн ах бид хоёр хамт яваад аваад ирье, аравхан минут.
- Уг нь би чамаар боовоо хөхүүлж, точгоо залгиулна гэж бодсон юм. За за, тамхи аваарай.

Гадаа хөл хөдөлгөөн сийрчээ. Одоо зах цуглаж байх ёстой. Ганц юм аваад таксинд уунгаа зах орж мөнгөн аягаа үнэд хүргэх юм сан.
-Жижиг гараа хоёулаа өөр тийшээ явалгүй горьгүй байх аа. Ийм хулгайч нартай юм ч ярьж болохгүй, хамт уух амь насанд осолтой байдаг юм.
-Харин тиймээ би ч бас тэгж бодож байна. Цэрэн ах аа, хоёулаа ингэнэ ээ. Тэр дэлгүүрээс ганц юм аваад такси барьж зах гаръя. Надад нэг зарах юм байгаа юм. Тэрийг зарчихаад манайд очиж амар тайван ууж идье дээ. Та тэгвэл манай ээжийг хоёрдугаар эмнэлэгт хэвтүүлж нэг сайн эмчлүүлж өгөөрэй. Би чинь гэсэн ээжийнхээ урд орчих гээд байгаа хүн.
-За тэгнэ ээ тэр асуудалгүй, би энд зогсож байя. Нэг тавийн аяга авахаа битгий мартаарай.

Мөн ч сайхан орж байна шүү. Яс юман дээр архи, пивоноос хол дээр л дээ. Цэрэн ах түшигтэй сайхан хүн юм аа. Өнөөдөр чинь яагаад эмэгтэй жолооч нартай таараад байна аа. Өглөөний авгайг гэж бодоод айх шахлаа ш дээ. За хоёр гурав хоног АПУ компанид хөрөнгө оруулчихаад зусланд ээж дээрээ очиж биеэ тэнхрүүлэхгүй бол их засварт орох дөхчихлөө шүү дээ. Зах харин ч арзайтлаа бужигнаагүй байна. Хэдэн төгрөгөө геологдуулчихвал балай юм болно шүү. Зах ирэх хүртэл амжуулаад уучихлаа. Шилийг нь энд орхичъё. Бас муудах шинжтэй болж байна шүү. Хүүе энэ Цэрэн ах чинь юм зарахдаа авъяастай хүн юм. Би гучаар зарна гэж багцаалж байсан чинь тавин мянга хүргэчихлээ. Аргагүй аяга нь ч сайн эд байж.

Мах Ганбаад паарны секцээр толгойгоо бяц шаалгаж байна гэж зүүдлээд аймаар чанга хашгирч сэрлээ. За байз би чинь хаана байгаа билээ. Бүх бие хөндүүрлээд үхэх нь дээ яанаа. Ёстой л амандаа баалгасан юм шиг өмхий байна даа. Өнөөдрөөс тоормослоод, хэд хоног шархтай чоно шиг гийнаж хэвтэхгүй бол гарцаагүй үхэх юм байна. Еэ пизда манай гэр чинь юу болчихоо вэ? Өө за за, онгоцны дарга Цэрэн гэж хуцаад байсан чинь геологич байсан байна ш дээ, өмхий хар лалар чинь. Хоёр мөнгөн аяга, ээжийн хайртай зурагт. Түй кармаанд ядаж ганц пивоны мөнгө үлдээхгүй, оймсондоо нуусан мөнгийг хүртэл авсан байна шүү. Над шиг шинжгүй шаасан байна даа. Тал ч гэсэн архи байгаа нь их юм. Сайндаа ч биш барих юм нь ихдээд авсангүй. За пизда яаж балгана аа, ходоодоо эргэтэл бөөлжчихвөл тамир тасрана даа. Цэрэн муу хошногыг цагдаад өгөлтэй биш дээ. За за больё гайны нэмэр. Үхэлтэйгээ ч үнсэлдэх нь дээ пизда. Авах нэг өдөр байхад алдах нэг өдөр байлгүй л яахав. Яаж таксины мөнгө олж зуслан явна аа. Ай даа, балгах нь ч балгачихлаа. Одоо хөдөлж болохгүй шүү дээ. Аяа гарах нь дээ, гарах нь. Еэ чааваасаа мэдээд байсан юм. Ийм аймаар юмаар бөөлжих гэж дээ. Нэл цус, өндөгний шар шиг муухай юм. Бөөлжис ч ийм л байдаг л даа. Гэхдээ энэ цусыг ээ. Еэ энэ нүүр яачихаа вэ, улаан Жамсрангийн шүрэн багнаас ялгарах юм алга шив дээ.

Пизда дахиад бөөлжлөө. Тамирдаад хөл дээрээ зогсох тэнхэлгүй болчихлоо. Чаддагсан бол ваннтай усанд хэвтэх юмсан. Цэрэн гэдэг булингартай хүнд хамаг юмаа алдсан маань бага хэрэг байж. Яанаа энэ тааз нураад дараад алчих юм шиг санагдаад байх юм. Цагаан солио тусаж байна уу. Еэ хүүрээ энэ бие юу болоод байна аа. Ээж рүүгээ яаж ийгээд утасдахгүй бол, түй мөлхөж ч чадахгүй байна. Чадын хонхорт унаж байгаа юм байх даа. Ээжийг зуслангаас ирэхэд цогцос минь өмхийрсөн байх вий дээ. Ядаж цонхоор орилох чадалтайсан болоосой. Одоо амьд гарвал жинхэнээсээ уухаа болино, бурхан минь амлаж байна. Яанаа, юу болоод байна аа? Ямар нэг хүн дуудах арга алга юм байх даа.

Ий, нүд харахаа больчихлоо ш дээ. Хоёр чих ямар аймаар шуугиж байна аа, юу болоод байгаа юм бэ? Ээжийнхээ өмнүүр ч орлоо доо. Еэ хэн нэгэн түргэн дууддаг болоосой. Хөл гар мэдээ алга, үхэж байгаа юм болов уу, харваж байгаа юм болов уу. _ _ _ _ _ _______________.

Хөх хот 2011 он

Зохиогч : До. Болдхуяг