Энгүүнээр хэлбэл
Идэж ууж наргиж цэнгэн
Элгээ өөхөлтөл чихэхээс
Эрүүл биегүй болтол
Эсгэлэн ундаатай нөхөрлөхөөс
Ээмэг бөгжөө чих,гарандаа биш
Энэтхэгчүүд шиг хамартаа зүүхээс
Ичих ч үгүй нууц газраа өлгөхөөс
Эрээн могой шиг шивсэн
Этгээд сонин арьсаа бүрж
Энд тэндэхийн фирмийн
Эдлэл хэрэглэхээс аваад
Ижил хүйстэнтэйгээ нийлж

Эр ч биш эм ч биш дүр эсгээд
Эротик,порно гэж биенээ өргөн
Стрептиз гэж дотоожоо чулуудаад
Энхриймаа гэж манингаа өхөөрдөж
Эхээс төрсөнөөрөө донжигновол модель гээд
Эрхтэн дархтанд таалагдвал миссээр дуудан
Ээж болох охид нь
Эр мундсан мэт харийнханд
Энгэрээ найр тавьж
Эрлийз хурлийз төрүүлээд
Эрэг дор хашаа хатгаж
Эрчит үерт гэрээ урсгахаас
Эртний хиргисүүр сүйтгэж
Эд өлгий хумслахаас
Хөрс шороогоо эвдэж
Хэн дуртай нь алт хайхаас
Хөвч ойгоо тайрч
Хөсрий болгохоос
Буутай болгон намнаж
Буга согоогоо хядахаас
Бусармаг хэрэг хийж
Бусдын газар зугатахаас

Охидоо наймаалж
Орон оронд гаргахаас
Оршуулгын газар
Орд өргөөгөө босгохоос
Эрүүгээ чилтэл чалчиж
Эх орноо муулахаас
Эрчүүдээ уландаа гишгиж
Эмс нь гадаадад янханчлахаас
Сайд даргаа ялгахгүй
Салаавч гаргаж үзүүлэхээс
Сахилга хүмүүжил гэдгийг
Сармагчны ухамсар гэж ойлгодогоос
Санасанаа хийж болохгүй бол
Цааз хуулийг буруушаадагаас
Цалингаа голж,гудамжинд хэвтэж
Саарал ордноо зүхдэгээс
Хөлөөрөө толгой хийж
Хөөрцөглөж хашгичидагаас
Толгойгоороо хөл хийж
Тоосго мөргөж унадагаас
Мөнгөтэй хөрөнгөтэй нь
Төрөө худалдаж авдагаас

Мөнгөгүй гуйранч нь
Төрдөө өсөрдөгөөс
Үүсэж бий болсон юм бол
Үгүй хийе энэ эрх чөлөөг
Үүнтэй үүнгүй бид
Үхэтлээ амьдраа л биз дээ
Бурханаа шүтэх шашингүй
Бум бумаараа хэлмэгдсэн
Буурал түүхээ унших эрхгүй
Бурангуй харанхуй явсан
Нүцгэн гуяа дэлгэх бүү хэл
Нүүрээ нуугаад явдаг үе байсан
Нүүрсний хаягдал түүж байгаад баригдвал
Нийгмийн өмч сүйтгэсэн ял сонсдог байсан
Хамаг бүхэн хориотой хатуу тэр үед
Хашигдаж амьдраад болоод л байсан
Дэндүү сайхан шүү социализм гэж
Дэлхийг мартаад магтдаг л байсан

Орос ахаас илүүг
Олж харахгүй явсан
Оройн цагийн мэдээгээр
Орчлонтой “жаахан” танилцдаг сан
Ая дуугий нь сонсох дуртай
АББА-гаа мөнгийг шүтэж дуулдаг гэдэгт гайхна
Алс холын Скандиновын оронд
Ардчилсан төр байдагийг мэдэхгүй мангартана
Битлзийн пянзыг цагдаагаас нууж
Биендээ дамжуулахадаа Ганс Клос болдог сон
Гаднах хавтсыг нь Катюшагийн дуутай
Ганган зургаар хавтасладаг сан
Гадаадад сурдаг оюутнуудаас
Ганц нэг сэтгүүл олдог сон
Гоолиг бүсгүйн дотоожгүй зургыг
Гол гаргаж ваннын өрөөнд үздэг сэн
Анжелина Девисын баригдсан мэдээг сонсоод
Америкт эрх чөлөө байдаггүй гэж боддог сон
Аль аль нь эрх чөлөөгүйгээ мэдэхгүй
Америкийн империализм сөнөтүгэй гэж жагсдаг сан
Хүйтэн дайны суртал ухуулагт автаад
Хөлсөө гоожуулан биеийн тамирт гүйдэг сэн
Хөл хурдан бол амьд үлдэх мэт
Хүүхэд бүрийн түрүүнд гарч гүйдэг сэн
Иргэний хамгаалалтын хичээлд их дуртай
Ирээдүйгээ бодож инстектээрээ тав авна
Энэ бүхэн хэзээ дуусахыг мэдэхгүй
Эрх чөлөө гэдэг үгийг англиар мэдэхгүй
Хувьсгал бидэнд эрх чөлөө өгсөн гэж
Хувь тусдаа итгэж л явсан
Хорвоо ертөнц уужим гэдгийг
Хунгийн дэгдээхэй шиг мэддэггүй байсан...

Ардчилсан хувьсгал гарч ирлээ
Амьдрал сайхан болно гэж үлгэр ярилаа
Амтай болгон нь улс төр ярьж
Ам гэдэг эрхтэн хамгийн чадалтайд тооцогдлоо
Үг яриа,үр дүнгүй жагсаал
Үндэстний минь ганц баялаг боллоо
Үгийн баялагтай,зальхай нэг нь өөд дэгдэж
Улс орныг уранзохиолын багш шиг удирдах боллоо
Памперстэй бацаан хүртэл гараа дохин
Проллетаричуудаа босоцгоо гэж хашгирах болов
Олон ургальч үзэл гэдэг маань яваандаа
Олон хүний амны дур боллоо
Хэн дуртай нь амандаа орсоноо чалчиж
Хэрэг дээрээ “эрх чөлөө”-гөөр бөөлжлөө
Хэнхдэгээ дэлдэн гудамжинд агсрах согтуу
Хэв шинжит Монгол хүний шилдэг дүр боллоо
Улс орныхоо удирдлагын кнопон дээр суух дуртай
Улаан коммунистууд нь өөрсдийнхөө хэнийг ч мэдэхгүй

Ардчилсан социализм гэж мэддэг үгээ ориловч
Ардчилсан нам нь солиор гээд амы нь барина
Либераль гэдэг нь неолиберазм болчихсон
Лекц унших нь фунг-шу шоу болчихсон
Нийтлэл бичих нь фашист хараалтай
Нэгдэж магтах нь утопист ерөөлтэй
Нэрээ мэдэхгүй философчдоор
Нийгмээ хаяглах гэж оролдсон
Ямар нийгэм байгуулаад байгаагаа
Яг хэлчих цэцэн олдохгүй
Яалт ч үгүй хүнлэг нийгэм гэж
Ядруу боловсролгүйгээрээ зүтгээд
Баабар агаагийнхаа амыг хараад
Бантахадаа худлаа онол зохиогоод
Баруун гартаа хас тэмдэгтэй залуусыг хараад
Панмонголизм гэж амаараа цуурна
Таван зуун жил тархий нь угаасан
Түвдүүдээ шүтээд хятадуудад хараалгана
Таваг шөлөөр харийн шашинд худалдагдаад
Тангадаа мэдэхгүй байж ийсус болоод сүжирнэ
Мөнх тэнгэрийн зан үйл байсаар байтал
Мөнгө өгч магадгүй гээд гадаадын номлогч шүтнэ
Бөө удган нь ч дүвчигнэж харайгаад
Бөөрийг чинь сугална гэж бүдүүлэгдэнэ.
Тархи толгойд чөтгөр юу гэж шивнэв
Таарсан болгоноороо теором гаргана
Таньдаг ч байсан танихгүй ч байсан
Та нар муусайнууд юу мэдэх вэ гэж чичилнэ

Магадлалын онол гэгчийг гаргаж ирээд
Махны оронд өвс идүүлнэ гээд явж байж мэднэ
Маргааш гэхэд дэлхийг өөрчлөөд
Матрын ордтой нийлүүлнэ гэж солиорно
Богд Чингисээ муулж болно
Боохой шиг магтаж болно
Бор дарсаа нэрлээд дуусвал
Боорцогондоо бас Чингис нэр өг
Хамрын дор хагархайтай бүхэн
Хорин дөрвөн цагт юу гэж ч болно
Алъя талъя устгая сөнөөе
Амандаа орсоныг чалчиж болно
Хэн нь юугаа хашгичих нь эрх чөлөө юм бол
Хэлтэй бүхэн нь амныхаа зоригоор чалчицгаа
Эцгээ харааж,эхийгээ зүхэж,бурхнаа шидэж
Эрин зуунаа газарт ортол чадлаараа орилцгоо
Хүнлэг энэрэнгүй энэ нийгэм та нарт
Хүссэнээ залгих эрх чөлөө өглөө
Хүнс хоолонд чинь нян байх ёстой юм бол
Хятадуудын хоолны шавхрууг долоо
Монгол эр хүний ханхар цээжнээс уйдаад
Могой шиг дотортой хятад тэврээд
Эцэг нь жунгаа эх нь халх
Эрх хүүхдээ толгой дээрээ гарга
Эр нь эртэйгээ явалдах гээд байвал
Эрхтэнгээ гаргаад шалдан гүйцгээ
Эм нь эмтэйгээ заваараад байвал
Эхээ ч гэсэн уруу татахгүй юү
Эртний түүхийн ховор олдвороо
Эх дэлхийгээр нэг цацахгүй юү
Эд мөнгөний төлөө юугаа ч өгөх чамд
Эх орон гэж хэрэгтэй юм гэжүү

Жалга сайранд гэрээ барьж
Жаргах амиа үерт өгөх тэнэгүүдэд
Ганц олдох энэ амьдралаа
Гамнаж яваач ээ гэж хэлээд хэрэггүй...
Өнөөдөр та нарт алт л байвал
Өнө хойчоо бодоод яах вэ
Үхсэн хойно чинь хүүрийг чинь хадгалах шороо
Өнгөт металаас дор үзэгдээд байвал юу хэлэх вэ
Эх орныхоо ногоон титмийг устгаж
Эвлүүлэх шалныхаа банзыг хийцгээ
Эвхмэл гэр чинь бүтэн байвал
Энд мод байгаад ч хэнд хэрэгтэй юм бэ
Хурдан буутай,хурдан машинтай бүхэн
Хууль зөрчиж болдог юм бол
Хулгар шараас эхлээд хөвчийн баавгайгаа
Хуруу хөдлөхийн тоогоор хороож дуусгахгүй юү
Банк дампууруулаад,улсаа луйвардаад
Багтах шингэхгүй болохоороо гарч зугатагсад
Барааны лангуу шиг эх орноо
Барууны цагаачлалаар солихгүй юү дээ
Танхил охид нь харийн бэр болох
Тавилан ерөөлтэй юм бол явцгаа
Гадаад эрсийн ганган хаусанд
Гархиа зүүгээд ёолоод хэвтэж бай.

Эрх мэдэлтэй нь Богд ууланд
Эрх мэдэлгүй нь хогийн цэг дээр
Эрэгчин эмэгчинээ үзэлцэн амьдрах юм бол
Эрлэгийн элчтэй хамт амьдар даа
Түрийвчнийхээ зузаанаар сонгодог
Төр байдаг бол уучлаарай
Түмэн олноо бодох бус
Төрийн суудлаа булаалцалдаарай
Доодчуул барлагын цуглааныг
Дээдчүүл сайдууд сонсохгүй юм бол
Долоон сарын нэгэн шиг
Дор нь буудаад тараагаарай
Эдлэх ёсгүй эрх чөлөө байдаг юм бол
Эрхэт төрийн эзэн байгаад яадаг юм бэ
Эрдэнэсийн хувиа хүртэж чадахгүй бол
Эх орныхоо иргэн байгаад яадаг юм бэ
Хөрс шороо нь эрдэнэсээр баян эх нутагтаа
Хөөрхий бангледешийн гуйлгачин шиг амьдраад үз дээ
Хүний хүнд баялагаа авилгалдаж өгчихөөд
Хөсөр царайлаад өлмөн яваад үз дээ

Ядуурлыг бууруулах гадаадаас өгдөг сангийн мөнгийг
Ямбатнууд нь сайн үүлдрийн нохойндоо өгдөг юмуу
Ядаж тэр мөнгийг эмзэг бүлгийнхэндээ тараачихсан бол
Яргын газар шиг улай үзэх нь цөөрөх байсан уу даа
Өлссөн хүн хүн алахыг юман чинээнд бодохгүй
Өрөвдсөн хүн хүн мэхлэхийг огт тоохгүй
Өөх өгсөн хүнтэйгээ өглөө нь шүүхээр заргалдах ч багадна
Өс хонзон санаж,үхэл рүү илгээхээр зүтгэнэ
Төрийн төлөө оготно боож үхнэ гэгчэээр
Түмнийхээ төлөө амиа зольсон улс төрч байна уу
Төсөв нэрээр улсын мөнгөөр гараа угаагсдын дотор
Түнтгэр гэдэсгүй чөргөр хүн байна уу
Ардчилал гэдэг эрх чөлөө юм бол
Амтай бүхэн нь чарлаг аа
Анархизм фашизмыг ч бас
Ав адилхан цоллог оо
Ардын намаа байгуулна уу
Авилгачдын намаа байгуулна уу
Аз нь шовойж байвал
Ардаараа тоглох юу юм бэ
Арван сая доллар өгнө гэж
Амалсан ч яадаг юм бэ
Азийн бар болгоно гэж
Архирсан ч яадаг юм бэ

Үгээгүй ядуудаа баригдаад
Үсэг нүдлэж чадахаа байсан
Үнэн худал хоёрыг ялгаж
Үсэрч дүүлж чадахаа байсан

Амьжиргааны өртөгтөө унаад
Амиа яая гэж хоохойлсон
Автобусны мөнгөө аргалах гэж
Амьтны царай харсан
Ард түмэн чинь өдгөө
Ардчилалын буянаар “жаргаж” байна
Алаан тулаантай кино шиг
Амь насаараа тоглож байна
Амьд явах баталгаагүй
Аж төрөх ирээдүйгүй
Алтан дэлхийн сүүл мушгиж
Амьдын там эдэлнэ
Сормуус дэрвэх нүд нь
Сохорч байна
Цоллож дуудах нэр нь
Цоохортож байна
Оюун ухааны ядууралд автагдаж
Орчлонгоор нэг тэнэж байна
Одоохон хамж цуглуулахгүй бол
Орон гэр минь хоосрох нь байна
Булчин шөрмөстэй залуус нь
Бусдын боол болоод дууслаа
Будаа шанцайханаар өл залгаад
Бор ходоодоо тэжээгчээ аядлаа
Уян налирхай охид нь
Уйлж унжаад явчихлаа
Ухаандаа эрх чөлөөгөө эдлээд
Улс гүрнээр нэг тарлаа

Эрх чөлөө гэдэг чинь сүйрэл юм уу
Эх орноо доройтуулсан гашуун сургамж юм уу
Эгшин ч мартамгүй эх нутагтаа
Эргэж ирэхгүй төрөл арилжихыг хэлдэг юм уу
Зорин одсон тэр газар нь
Зовлон жаргал хоёрын аль нь их байгаа бол

Зоргоороо дургидаг Монгол эрх чөлөө
Зоосноос дор үнэтэй байгаа юу
Эрх чөлөөгөө эдэлж байгаа хүнд
Эх орон гэж юу юм бэ нулима
Энд байхгүй эрх чөлөөг
Эр нь булчингаараа,эм нь хүйсээрээ олдог биз.
Эх орны хил эрх чөлөөтэй
Элдэв визыг овтнууд гаргаастай
Далд орж л байвал хаа ч яах вэ
Далай гатлаад хаана ч очно
Хил дамнаж тамхи зөөгөөд
Хэдэн цаас олно
Бохир гараар олсон мөнгөө
Бүрэнхий шөнө казинод үрнэ
Тугалган цаасаар доторлосон цүнхээр
“Туусанаа” контейнерээр монгол илгээнэ
Тунсаг охид нь мөнгөтэй өвгөн уургалж
Тун чадахгүй нь турк чихдэнэ
Газар сайгүй ертөнцөөр тэнэж
Гахайгаа дуудуулан хэл ам тарина
Гариг эрхэст зорчдог болчихвол
Гандан буурахгүй нэрээ цууриатуулнаа
Хил гаальгүй хэлхэлдэхийгээ
Эрх чөлөө гэж эндүүрнэ үү
Хэл усгүй татаатунгаадахаа
Эрх чөлөө гэж андуурна уу...
Онгойж сонгойсон уурхайн нүх шуудуунд
Осолдож унахыг эрх чөлөө гэдэг юм уу
Онгон байгалиа хулганы хөеө шиг тараачихаад
Орилж хашгирахыг эрх чөлөө гээд байна уу
Хэн дуртай нь биенээ гүтгээд
Хэвлэлээр нэг хэрүүл болохыг хэлээд байна уу

Амны алергитэй нэгнийгээ
Алдартан болгохыг хэлээд байна уу
Идэж ууж баригдчихаад
Ирүүлд дуудахыг хэлнэ үү
Эхнэр хүүхдээ сольдог
Эрэгчин сармагчинг хэлнэ үү
Олны өмнөөс ярьдаг
Овтон мэхтнийг хэлнэ үү
Онигоонд орж паакталдаг
Ордны том толгойтнуудыг хэлнэ үү
Эх нутгаа хамгаалж байна гээд
Эд хөрөнгө сүйтгэдэг
Элий балай яриатай
Эх оронцогчдыг хэлнэ үү
Төр улсаа хөгжүүлнэ гэж
Түмний саналыг луйвардсан
Төрийн түшээ нэртэй
Тэлээ нь тасарсан гэдэстнүүдийг хэлнэ үү
Эцэг шигээ өвгөн эргүүлж
Эхнэр нь болохоо хэлнэ үү
Эх шигээ эмээтэй нөхцөж
Илж таалуулахыг хэлнэ үү
Хоёр гурван гэргийтэй
Хорь гучин амрагтай
Султан хаан шиг сагсалзан
Сульдаа жороолохыг хэлнэ үү
Ухаанаа тавьтал мансуурсан
Урлаг соёлын одонцоруудыг
Улаан хөлтөн өмнөөрөө гаргадаггүй
Урин гоолиг хатагтай нарыг
Хээл хахуулиар зээл авсан

Хээр азаргатай баячуудыг
Хийсэн хэрэгтэй гэмших совестгүй
Хэргийн эзэн намын дарга нарыг
Хилс хэрэгт гэмгүй нэгнийг явуулчихаад
Хэнэг ч үгүй хууль ярьж суудаг
Хэмжээлшгүй эрхтэй хуульчдыг
Хүнийг ялгаж,зиндаагаар нь харьцдаг
Хүндэлж эрхий нь дээдэлдэггүй
Хүчний байгууллагын мөрдөстөнгүүдийг
Үхэж байгаа өвчтөний дэргэд
Үнэртэн ярьж суугаа эмч нарыг
Үдэж байгаа талийгаачийн замд
Өмч булаацалдсан хэрүүлчингүүдийг
Яс булаалцалдсан ноход шиг хүрхэрсэн
Ямба нь дэндсэн түшмэдийг
Ял гавъяа нь ялгагдахгүй
Ядуучуудын армийн борчуудыг
Эрх чөлөөгөө эдэлсэн
Иргэн гэх гээд байна уу
Эрх чөлөөгөө хасуулсан
Ялтан гэх гээд байна уу
Шуудайд хийсэн үхрийн эвэр шиг
Шуналын шүлс үсчүүлсэн
Шударга бус энэ нийгмээ
Шулж мөлжигчдийг хэлээд байна уу
Одод мөнгөн тэнгэрийг хормойдсон
Орон гэрээ цөлмөхийг хэлээд байна уу
Оршуулгын газрын хэрээ шиг бахирсан
Одоо цагийн люмпеньчүүдээ хэлээд байна уу
Хаа байна тэр эрх чөлөө
Халуун цусаараа олсон эрх чөлөө
Хамаг Монголоос өвлүүлсэн
Хаан Чингисийн эрх чөлөө...
Хаа байна хэлээд өгөөч
Харах юм сан үзэх юм сан
Бөртэ чонын соёрхсон
Бүрэн эрхээ эдлэх сэн...

Тэнгэр заяат Монголын
Тэнэгийг битгий гайхаарай
Эрх чөлөөгөө тэд
“Идчихсэн” байж чадна.
Эрх чөлөөгөө дутахаар
Эрс чанга дуугаар
Эвсэж нэхдэггүй хирнээ
Эрх чөлөөгөө ихдэхээр
Энэ бие толгойгүй мэт
Эрхэлж галзуурахаа мэднэ
Эрх чөлөө уг нь
Их л үнэтэй юм сан
Энэ бүхний төлбөрт
Эх орны минь тал явсан
Цагаан хэрмээс гаднах
Малчдын нутгийг өгсөн
Цаст малгай духдуулсан
Саяны уулсыг өгсөн
Зүүнгарын говийг
Зайсан нууртай өгсөн
Горьный Алтай,Байгаль нуурыг
Голоо тасалж өгсөн
Хаялга сайтай Өргөн мөрний
Хадлангийн бэлчээрээ өгсөн
Хан Хэнтийгээ тэг дундуур нь тасалж
Харийн хэлээр Явлоновый болгож өгсөн
Хувьсгалын алтан хараацайнуудаа
“Хуйвалдагчид” болгож өгсөн
Хувилгаан,мяндагтан лам нараа
“Хувалз” болгож өгсөн

Зөв буруугаа мэдэхгүй зүтгэж явсан хувьсгалчидаа
Зүүнтэн,баруунтан болгож бууны суманд өгсөн
Зүүн хэдэн аймагтаа Японы “тагнуул” орогнуулж
Зүв зүгээр ардуудаа “дайсан” болгож өгсөн
Засаг төрийг удирдсан ерөнхий сайдуудаа
Заяа нь хаясан КБГ-ынхэнд барьж өгсөн
Өрлөг хоёр жанжнаа Берияд
Өрийг нь зуруулахаар илгээсэн
Таван хошуу малаа
Танк болгож ачуулсан
Талын доорхи эрдэнээ
Тал татаж бэлэглэсэн
Хилийн доторхи уулыг
Хүний нутагт бүртгүүлтэл
Хүнд хэцүү хэлэлцээрийг
Хүзүү толгойгоороо сольсон
Гэрэлт социализмын туршлагын туулай болж
Гэдсээ хүүлүүлж явж эрх чөлөөтэй учирсан
Гэнэ алдвал араас,урдаас хутга шаах
Гэмтэй хөршүүдээр хаяагаа мануулсан...
Хаана байна гэж хашгираад яах вэ
Халхын хавтгай дээр эрх чөлөө нисч явна
Хэн нь хэнийгээ хэн гэж ч дуудаж болдог
Хэрээ,муур,үхэр гэж ч нэрлэж болдог
Хэвлэл сониноор “нугаслаж” болдог
Хэдгэнэ шиг нэгнийгээ хатгаж болдог
Хэн дуртай нь хүссэнээ хийж болно
Хил гаальгүй чөлөөтэй орж гарна
Хүний эрхтэн дамлаж яваа юмуу
Хүнцэлтэй хор зөөж явна уу
Хэн ч мэдэхгүй,хэн ч хараагүй
Хэрэв харсан бол дуугүй байсан нь дээр

Ажлаа муу хийлээ гэж
Айлгаж захиргааддаг цаг өнгөрсөн
Ард түмнийхээ хөрөнгийг
Акул шиг залгисан ч тоохоо байсан
Цөмийн хаягдлыг ч нутагтаа агуулна гээд
Цөс нь хөөрсөн луйварчин гүйж явна
Тэрбум гэдэг мөнгөний дүнгээс өөр
Тэр тэнэгт “юм” харах ухаан алга
Мөнгө олохыг эрх чөлөө гэж
Мөхөс дутуу ойлгоод харайж явна
Мөнгөний төлөө юу ч хийхээс буцахгүй
Мөр нь хар дээрэмчид ч их байна
Эрх дархаа хамгаалахын төлөө
Эх орноо худалдах тэнэгүүд төрд байна
Идсэн нь буруу хоолойгоороо орохгүй
Ирээдүйг минь залгих бирдүүд байна
Хуулиараа өөрсдийгөө дархлаад
Хуурай гарах зальтнууд байна
Хувь заяагаар маань казино тоглоод
Худалдаж байгаа аалзнууд байна
НҮБ-д хүртэл биенээ матаад
Нүүр хийх газаргүй болгоно
Төрөөс төрсөн тэрбумтнуудын
Төлбөргүй тоглоом нь хэрүүл байна
Байгаа баялгаа харийн мангасуудад
Баталгаагүй лицензээр өгч байна
Баруун солгойгүй цацаад дуусахаараа
Баялгын хараал гэж өөрсдийгөө хаацайлна

Далан жил хоосон эрх чөлөөгөөр
Дарангуйлж явсанаа мартчихаад
Дахиад хорь илүү жил
Дарамталталсаар сууна
Захиран тушаах үйл үгийг
Зарлиг хуулиндаа шахаад
За гэж мөргүүлэхээр
Залилангийн хэргээ өргөжүүлнэ
Хоорондоо гэдсэндээ хөлөө хийлцэж
Хоёр хэсэг салсан ч гэлээ
Хорт явуулгынх нь хөлд үрэгдэж
Хоёр сая долоон зуун мянгуулаа хэлмэгдэнэ
Арга зальтай үнэгэн нам
Ардчилсан намыг гавраа болгож
Ар талаа аюулаас сэргийлээд
Ам хамрыг нь гэрээгээр таглаж
Адилхан хувааж идчихээд
Ард түмнээ гол гарган
Амлалтаар молиго үмхүүлчихээд
Алтны дэнсэн дээр завилан
Арилжааны цонхоор шомбодоно
Хөрөнгийн бирж гэдгийг
Хөлжигчдийн бирд болголоо
Хөөрхий иргэдээ доош нь нясалж
Хүнд суртлын гутлаараа дэвслээ
Эр нөхөртөө өглөө цай аягалж сураагүй
Эрх бэрүүд исгэлэн жүүсээр зочноо дайлна
Эвий дээ айлын эхнэр юм байх даа гэчихвэл
Эргэж харахгүй хаалга савна

Бүсгүй биеийг минь Чойном магтсан гээд
Бүдэг гэрэлтэй газар хувцсаа тайлна
Бүдүүн нарийнгүй бөгсөө тонголзуулж
Бүжиглэж байгаа ухаантай элэг татаана
Сайхан төрсөн миний буруу юу гээд
Сарпаангүй нүцгэн гүйх энүүхэнд
Садист залууд хууртагдаж бялба нүдүүлээд
Сайдын мөнгөөр такси дуудуулах хажууханд
Энд тэндгүй уусан идсэн цамаан төрхтнүүд
Идэш нь ихэдсэн цагаан махтнууд
Эд хөрөнгөөрөө баярхаж буудалцсан танхайчууд
Ирүүлд дуудаж бие хамгаалагчаа зодуулсан “эрх”-үүд
Эрх чөлөө гэдгээр тоглож байна даа
Эрх нь хэтрээд даварч байна даа
Эрх чөлөө гэдгээр “найр” хийж
Эрлэгийн хааныг “баярлуулж” байна даа
Угтаа бол эрх чөлөө гэдэг
Улаан цусаараа бичсэн үг байдаг юм
Улиран одсон түүхийн шар хуудаснаа
Удам залгасан тэмцэл байдаг юм
Модон илжгэнд хадуулсан Амбагайн үхэл
Монгол хүний эрх чөлөөг дуудсан юм
Есүхэй баатрыг “хорлосон” Татаруудаас
Ерөөлт хүү Тэмүүжин нь хариу нэхсэн юм
Алба барьдаг арчаагүй аргаас
Алба бариулдаг ёсонд шилжсэн юм
Алтан улсыг дайлаар морьдож
Ахуй төрөө амар жимэр болгосон юм
Адуу чинь туранхай гэж голдог хятадуудад
Алган боовоор хариу барьсан юм
Арилжааны эрх чөлөөг
Амь насаараа дэнчин тавьж олсон юм
Хоремзын шах элчүүдийг нь цаазалж
Хонгоны махаа уруулах хэрэг үүсгэсэн
Хожим хойно толгойгоо алдах
Хортой явуулгаараа өөрийгөө хөнөөсөн
Амуу будаа хүртэл эрх чөлөөтэй
Адуугаараа арилждаг худалдааны горимтой
Арилжаачин худалдаачин хүртэл
Амьд явах эрхтэй
Алт мөнгийг нь булаасан дээрэмчдэд
Амийг амиар солих дүрэмтэй.

Эрх чөлөөг алдаж болдог
Эндүү ташаа бодож түүнийг үгүй хийдэг
Эрх чөлөөг олж болдог
Эрэлхэг зоригоороо тэмцэж олдог
Хүчил төрөгч шиг эрх чөлөөгөөр дутаж
Орхон голын загас шиг үхэж болдог
Хүн малгүй мөнгөн усанд хордсон
Хонгор сум шиг өвчилж ч бас болдог
Эрх чөлөө үнэтэй олддог
Өдөр шөнөгүй тулалдаж олдог
Эрх чөлөө үнэгүй ч болдог
Өөх шиг хүний бөөлжис хүргэдэг
Хүссэн нь хүслээрээ даллаж
Хүсээгүй нь хөлөөрөө дэвсэлж
Хөлд ороогүй хүүхдийн
Хөх инээдийг хүргэж
Эмээгийн таягаар балбаж
Элээсэн оймсоор нь гуядаж
Эрх бүсгүйн тайлж хаясан
Эрээн дотоожоор ороолгож
Өвөөгийн “сайхан цаг”-ийн

Үнэт сургамжаар алгадаж
Өрнө дорно холилдсон
Өмхий үгээр харааж
Хариуцлага тооцдоггүй засгийн
Харалган бодлогоор хашиж
Хаан эзнийхээ нэрээр
Хар ус болгон аманд цутгаж
Засаг төрийг эзэгнэгчдийн
Зарлиг тушаалаар боомилж
Захиргаагүй болсон төрийн
Зальт үгээр гинжилж
Ард түмнээ басамжилсан
Алтны наймаачин дарга нарын
Авилгалын мөнгөөр худалдаж
Амьдралын өртөгөөр багалзуурдаж
Мөнгөн усаар хордуулсан
Мөрөн голд живүүлж
Малын бэлчээрийг нь хурааж
Манжингийн талбай болгож
Тоглоомын газраас гарсан
Том толгойтой балчрууд
Тонуулчин дээрэмчний дүрд
Тохирох байраа эрэлхийлж
Эрүүгийн ертөнцтэй танилцах
Эхний хуудсаа нээж
Эрх чөлөөгөөр зэвсэг хийж
Эрхээрээ хатаж наадана
Энэ үе минь уул нь
Эрх чөлөөг тунхагласан юм сан

Эр биеэ есөн эрүүгээр тамлуулсан
Эрийн сайн хөвгүүдэд ч олдоогүй юм сан
Царцаа Намжил,Хангай Базарт ч
Цагийн нүүр буруу харсан юм
Тоорой банди,Тогос Чүлтэмд ч
Торгоныхоо өнгийг дутуу харуулсан юм
Эрийн сайн эр явлаа гээд
Эрх чөлөөг хээрийн салхи л өгсөн юм
Ижил олонтойгоо хамт явъя гэхэд
Ихэс дээдэс хар гэрт хорьсон юм
Банз шаахай бэрээгээр
Балбаж эрх чөлөөг амтлуулсан юм
Баглаж хорьсон мөглөнд
Бахаа хангаж эдлүүлсэн юм
Онгон талд зээр унасан
Огторгуйн салхи шиг эрх чөлөөг
Олон аавын хөвгүүдэд
Орон шоронгоор дөнгөлсөн юм
Авилгач ноёдыг эсэргүүцсэн
Ард Аюушийн хонгыг урж
Борц шиг тасарсан махтай нь
Богдын хүрээ рүү илгээсэн юм
Нохойтой өстэй хүн хонгогүй
Ноёнтой өстэй хүн толгойгүй гэж
Нойрмоглосон ард түмнээ
Нойрноос нь дуудсаныг нь гэсгээсэн
Тал хээр нутаг
Тамын диваажин шиг унтаж
Таван зуун мянга болтлоо хорогдож
Ташуурын дор амьдарсан

Манжийн буулганд дөрвөн хөллөж
Малаасаа дутахгүй амьдрахадаа
Мандах нарны туяаг
Манан дунд төсөөлсөн
Хуруудаа хөхөөд
Хургандаа явах эрх чөлөө байсан
Хуйваа унаж
Хурдан борлог болох нь эрх чөлөө байсан
Монголын нэг өдөр болж
Мориноосоо унатлаа согтох нь эрх чөлөө байсан
Мөргөлчид гороолдог сүмд
Мөлхөж залбирах нь эрх чөлөө байсан
Ухна хуц дууриаж
Улаан хацартай охинтой
Уушиг шиг улаан болтол
Учирч явах нь эрх чөлөө байсан
Хээрийн салхиар гэрээ хийж
Хэц дэрлэж явах нь эрх чөлөө байсан
Хэнтэй ч ярихгүй агуйд сууж
Хэнхэглэн даяанчлах нь эрх чөлөө байсан юм
Ноёноо жанчихад боль гэж болдоггүй
Номхон эрх чөлөө байсан юм
Номоо уншсангүй гэж багшыгаа бэрээдэхэд
Нохой шиг гасалж болдоггүй эрх чөлөө байсан юм
“Цагаан дээлт” Дамдин гэдэг шиг
Цагаач зарцын эрх чөлөө байсан юм
Цахиур Төмөр шиг “номхон” амьдарч болдоггүй

Цааз хуулиар гавалсан эрх чөлөө байсан юм
Эрдэнийг « араар нь тавьсан » Долгорын
Эхнэр хүний доромжлогдсон эрх чөлөө байсан юм
Эр хүйстэй болгоны өвөрт нухлуулсан
Итгэлтийн хонгор Дулмаагийн эрх чөлөө байсан юм
Хурга ишгээ чононд алдвал
Хулсан ташуурын амт үздэг
Хувь тавилангийн төөрөг сохорсон
“Хоньчин Найдан”-гын эрх чөлөө байсан юм
Ихэс дээдэстэйгээ заргалдвал
Эрлэгт залардаг эрх чөлөө байсан юм
Эзэн Богд нь харж үздэггүй
Эрх чөлөөгүй эрх чөлөө байсан юм
Эрх чөлөө тусгаар тогтнол хоёр
Ихэр хүүхэд шиг адил байсангүй
Олноо өргөгдсөний анхдугаар онд ч
Олон түмэнд эрх чөлөө өгсөнгүй
Дээдэс ихэс нь ван гүн болоод
Дээлийн торгоор шагнууллаа
Доодос харц нь татвар гувчуурт
Долоох аарцгүй хоцорсон
Хөгшин буурал ноёнд
Хүүхнүүд нь богтлогдсон
Цал буурал ноёнтой
Цагийг өнгөрөөх болсон
Далай вангийн Юндэн нь
Дайнд хүчээр явсан
Дөрвөн замын цэрэгтэй
Долоннуурыг дагуулсан
Ар өвөр Монголыг
Арайхийн нэгдүүлэх гэтэл
Арга зальтнууд Хиагтад хуралдаж
Автономит эрхийг Халхад өгсөн.
Улс орон нь эрх чөлөөгүй бол
Унаган ард нь эрх чөлөөгүй байдаг
Уурлаад Бавуужавтанг салан явахад
Урвасан хулгай гэж дайтсаныг юу гэх вэ
Бухимдсан ноёдыг
Бужигнаж байх зуур

Бээжингээс ирсэн Сюй Шү-Жан
Бүлтэгнэх эрх чөлөөг нь хассан
Ав адилхан тэд манжийн дарлалд
Алгаа хавсран бөхөлзөж явсанаа мартаад
Англи Америкийн карабин үүрчихээд
Арван мянгуулаа пээдийсэнийг яана
Ташуураа бариад байлдах чадалтай Монгол
Тарж бутраад гамингийн идэш боллоо
Тусгаар тогтнолоо гоминданд алдаад
Туургатан улс дахин сөхөрлөө
Манлай ван босоогоороо шоронд эцэслэж
Магсаржав вантан шаахайны амт амслаа
Сумъяа вангийн цахар дайчид
Сураг нь бас Батгүнд гарлаа
Үймээний жил ширүүхэн байлаа
Үнсэнд хаясан шалз шиг
Үндэсний эрх чөлөөний гал
Өөхөн дэн шиг сүүмэлзэн алдав
Эсгий хийх газар хүүхэд нохой хэрэггүй гэдэг шиг
Эцэж сульдсан морьтой Барон Унгерн ирлээ
Эзэн хааныг нь дахин сэнтийд нь залаад
Эр цэргээ автономитын цэргээр сэлбэлээ
Эрх чөлөөний төлөө
Энд тэндгүй дайны гал аслаа
Эрхүүд байсан улаан армийнхан
Эх орончдод туслахаар амаллаа
Ажилчин тариачны эрх чөлөөний төлөө
Атаман Семёновтой тулалдаж байсан тэд
Ардын хувьсгалын анхны ялалтыг
Алтанбулагт хийж оноо авлаа
Хаант засгийнхаа төлөө
Хасаг цэргүүд Сибирьт тулалдаж
Харгис хаант төрөө эргүүлэн босгох тэмцэлдээ
Халх Монгол орныг хөлдөө чирэв
Хэн хэнийх нь зөв
Хэрүүлээ зодоон болго гэдэг шиг
Аль аль нь адилхан
Аугаа тэмцлийг явуулсан юм
Ив ижилхэн тэд
Их хэргийн төлөө тулалдсан юм
Эдлэх эрх чөлөөнийхөө төлөө
Эр барс шиг алалдсан юм

Екатеринбургд гэр бүлээрээ хүйс тэмтрүүлсэн
Николай хоёрын төлөө наминчлахаасаа би ичихгүй
Ертөнцийг улаан тугаар бүрхэх гэж улайрсан
Ленин гэдэг орос өвгөний дайчин тэмцлийг үнэлнэ
Уур савссан Ангар мөрөнд шархтай нь живүүлсэн
Усан цэргийн адмирал Колчакийн төлөө залбирна
Уурын зууханд амьдаар нь тарчилган шатаасан
Ухрашгүй зоригт Бониверт тэргүүнээ бөхийлгөнө
Үзэл санааныхаа төлөө амиа зориулсан болгонд
Үзэг бэхээ хайрлахгүй үгээ зориулна би.
Монголын төлөө цусаа урсгасан
Могой байсан ч хүндэтгэнэ би
Генерал Резухин байг хамаагүй
Гялалзсан партизан Шетенкин ч ялгаагүй
Гэзэгт Монголын төлөө
Гавъяа байгуулсан баатрууд.
Сүхбаатар,Чойбалсан ч ялгаагүй
Сүрлэг хөшөө сүндэрлүүлэх баатар эрс
Хорин нэгэн онд Коминтернтэй хавсаж
Коммунизмын галыг монголд асаасан ч
Эв хамтын ёсыг бодохоосоо илүү
Эх орноо бодсон хүмүүс
Эрх чөлөөг авчирлаа гэж
Ихэд эндүүрсэн малчин гаралтнууд.
Хувьсгалыг импортолсон эх орончид
Хувьсгалынхаа галд “хуйхлагдсан” юм
Хойчийн шинэ ертөнц дээр
Хүндтэй гавъяа байгуулаад хэлмэгдсээн
Муу нэртэй луу данстай
Москвагийн шоронгуудад цааз сонссон

Магаданд цөлөгдсөн зарим нь
Муурын хоол болсоон
Монгол гэдэг нэрийг сонсохоороо
Морио эмээллэдэг оросууд
Матигарт гаанст Сталиныхаа
“Мах”-ны төлөвлөгөөг Монголд хэрэгжүүлсэн.
Хуучин сүмийн манзны банди нар
Хувраг санваартан байсаныхаа төлөө
Хувь заяа нь буруу эргэж
Хувьсгалын дайсан болсон
Хувьсгалт орныхоо төлөө
Хувалзуудтай тулалдсан бошгынхон
Хуруу гараа тасартал Корчагин шиг зүтгээд ч
Хуйвалдагч гэдэг нэр хаяг зүүсэн
Улаан яргачдаас зугатаж ирсэн буриадыг
Ургах зүгийн японы тагнуул болгосон
Ус нутгийн ардуудыг нэг гэрт хориод шатаахадаа
Улалзалзах галаас гарч ирсэнийг нь буудсан гэдэг
Уруу харан буудуулсан эхийгээ зууран
Уйлж байгаа балчир хүүхдийг жадалсан гэдэг
Үймээний жилийн гамингаас илүү
Үзлийн муухай зан гаргасан гэдэг.
Мангас Сталин архиндаа хордож үхэж
Манан татсан орос монголыг цэлмээхэд
Амьд үлдсэн хүн бүрийн сэтгэлд
Амьдрах итгэл хувингаар цутгалаа.

Сэтгэлээ нээж үзэл бодлоо тайлтал
Сэхээтний төөрөгдөл гээд ад үзлээ
Шинэчлэлт өөрчлөлт гэж ярьсан болгоныг
Шилэн фордод ачаад газрын мухарт цөллөө
Дархан суманд төрсөн яруу найрагч,
Даруулгагүй амтай өвгөн эрдэмтэн,
Эзэн Чингисийнхээ хөшөөг босгосон улстөрч,
Эвийн дөрвөн мөрт холбосон шүлэгч
Захиргаадалтын үеийн төмөр нүүрийг үзэж
Зандалчидын гарт нэг нь амиа алдлаа
Залж жолоодсон нам засгийн
Завхралыг хэлээд шийтгэл амслаа.
Дуртай дуугаа сонсох эрхгүй
Дурлалт хосууд үнсэлдэх амаргүй
Дуугаа хураасан хэлгүй тэр нийгэмд
Дусал эрх чөлөө байсангүй
Бурхан шашнаа шүтэх эрхгүй бол
Бурангуй нийгэмд амьдрах ч хүсэл алга
Буутай цагдаагийн хяналтан дор
Бух шиг зүтгэхийг хэн хүсэх билээ
Бодсон санасанаа хэлэх ёсгүй
Боолын амьдралыг хэн сонгох вэ
Бор өдрүүдийг гуниглаж өнгөрөөх
Боож үхмээр намтрыг хэн хүсэх билээ
Үзэл суртал гэдэг харгислалаар
Өсөхөөс нь эхэлж тархий нь угаагаад
Гэрэлт социализмын төлөө урагшаа гээд
Гутлын ул салтал командалдаг байлаа

Яаж бид нар РСФСР болчихоогүй юм бэ
Янкуудтай байлдуулахаар вьетнам руу хөөнө дөө
Яалт ч үгүй гарал үүсэл нэгтэй хазаруудтай үзэлцүүлэхээр
Ясны террорист афган руу томилох байсан даа
Явахгүй гэвэл урвагчийн малгай өмсгөөд
Ялтан гэдэг эрээн хувцсаар гоёод хашна
Ялагдашгүй коммунизмын төлөө бөөсөө тоолоод
Ялаатай жонхуугаа сорох байсан
Бурхны авралаар Горбачёв гэдэг нөхөр
Будилж байгаад өөрчлөн байгуулалтыг зарлав
Сочид уусан архи нь гараагүй согтуудаа
Солиотой юм шиг ил тод байдал гэчихэв.
Үүгээр нь дутагдаж үүгээр нь хагссан
Үй олон пролетаричууд үгсэн нийлж
Үзэл бодлоо хэлж,хараал ерөөлөө урсгаж
Үзээгүй юмаа үзэж үхэр тэргээр цам харайв.
Гэгээн социализм нэг л өглөө Берлиний ханан дээр
Гэмээ гэмшээд тоосгоо нураан бууж өглөө
Гэмгүй гэмтнүүд дүүрэн Польш,Чехэд
Гэлэнгүүд хурсан мэт үймэн шуугилаа
Атомын бөмбөг дэлбэрсэн ч өртөхөөргүй хол
Алсын Монголд ч өвлийн цасыг хайлуулан
Ардчилсан холбоо гэдэг нь гарч ирээд
Амь насаараа дэнчин тавьж өлсгөлөн зарлаллаа...
Үүнээс хойш түүнээс цаашихыг
Үлгэрийн туульс шиг “хайлаад” яах вэ
Өлсөж цангаж,өр ширэнд орооцолдож
Өмчийн хэрүүл хийж явсан та нар мэднэ
Хөөрхий муу “ардчилал” маань хөгшрөөд
Хүний хүн болоод удаж байна
Хөшөө нь жижигхэн Зориг агснаар
Хэмжээгээ хэлээд дуусаж байна

Эрх чөлөө гэж түрүүлж дуугарсан
Эрхэм хүний гавъяа их ч
Эрх чөлөөний “харшил”-тай болсон
Энэ үе маань төөрөлдөж орхилоо
Эх орноо худалдаж
Эд хөрөнгө цуглуулахыг
Эрх чөлөө гэж
Эрхтэн дархтанууд маань ойлгочихож
Эхнэрээ нүдийг нь бүлтийтэл гоёж
Эрээн бараан брендээр хувцаслахыг
Эрх хүүхдүүдээ гадаадад сургаж
Эрүүгий нь чилтэл пицца авч өгөхийг
Эрх чөлөө гэж ойлгожээ
Эрх чөлөөгөө эдэлж байна гэж төөрөлджээ
Эрх мэдэл мөнгө төгрөгтэй байхад
Ээтэн гуталтнууд намайг дийлэхгүй гэж барджээ
Олон арван намууд нь хоолойныхоо чадлаар
Орилж хашгирахыгаа эрх чөлөө гэж эндүүрчээ
Осолдохгүй хүний хоолой боохгүй явбал
Орчлон дээр яаж ч тийчилсэн эрх чөлөө гэж боджээ
Эрх мэдэлтний утсан хүүхэлдэй болсон хэвлэлүүд
Эхтэйгээ унтахаас бусдыг бичдэг болжээ
Эвгүйдээ энэ сурвалжлагч нар цусгүй ална шүү гэтэл
Эцэст нь хэн нэгний зараалаар хүн гүтгэнэ
Уншаад сэтгэгдэл бичсэн нэг нь солиорч өгнөө
Уур хүрч барилцалдаж авмаар хүнийг хатганаа
Уншсан зүйлээ ойлгоогүй байж хадуурч давхиад
Усан цээлийн жараахай шиг хүйтэн цүнхээлд шумбанаа

Донгио гээд нэг нь хэлчихвэл
Доош нь чихээд бүгдээрээ дайрна
Монгол хэлээр хэлж болох муу үг бүгдийг
Модон орчуулга шиг бахирч бичнэ
Хэлэхгүй ярихгүй бичихгүй зурахгүй юм гэж
Хэвлэлийн хуудсаар дүүрэн байх болж
Хэдэрлэхгүй шүүмжлэхгүй хараахгүй юм гэж
Хэнтэй ч уулзсан байхгүй болжээ
Түм түмээрээ ажил хайгаад гарна
Түрүүчээсээ иргэн болоод гадаадад уусана
Твиттер чат дээр хааяа нэг тааралдахаараа
Төр засгаа хараагаад фай фүй болно
Мянга мянгаараа охид хүүхнүүд нь
Малайз Сингапурт борлогдох гэж гүйнэ
Мухлагын бараа шиг гүйлгээгүй болохоороо
Мюнхен явах билет захиалцгаана
Итали франц бельги голланд австри
Эр хүний хушгатай бол хэнтэй ч наалдана
Энэтхэг пакистан гэж хялавхийхгүй хирнээ
Этиоф,маракко,тунис гээд гуяа алгадана
Туркаа голж португали руу харайна
Турж өлсөхөөрөө турктаа буцаад ирнэ

Өнөө муу түрэг нь монгол хүүхнүүдэд
Өвөг эцэг нь юм шиг халамжтайг хэлэх үү
Идэхийг цутгаж,өмсөхийг овоолж
Илүү зардал гаргахгүй спонсордоно
Эр биенийхээ чилээг гаргаж дуусаад
Рестораны үнээр нөгөөдөө зарна...
Эрх чөлөө гэдэг хүүхнүүдэд маань
Эрүүндээ сахалтай Ким өвөө болж харагдана
Илжгээ хөтлөөд тутарга тээрэмдэх
Эндээс ойрхон Хатан голын тариачин болно
Нэгдсэн үндэстний байгууллагын бүх улсыг
Нэрлэж чадна даа монгол хүүхнүүд
Хаа холын Камерунд оччихсон
Халамцуудаа хүн дүрээд явж байдаг юм
Эрх чөлөө гэдэг
Рекламны пауз авахгүй бол
Эрх чөлөөт Монгол минь
Эмгэнэлийн орон болох нь
Даяаршиж нийгэмшсэн иргэдийнх нь
Даллагын уут Ганданд хоосон хэвтэнэ
Далай ламын ирэх сургаар хэдэн лам нь
Дандаа өлсгөлөн байсан юм шиг алгаа тосно.
Эвээр шийдэх асуудлыг дэвэргэж
Эвхдэг тонгорогондоо тулгана
Эвдрэлцэж хэмэлцэх гудамжны ноход шиг
Илжиг гахайдаа хүрч нүүрээ урна

Уураа хүрэхээр нэгнийхээ гуяа руу
Урт иштэй балиус шаачихдаг
Уцаар нь хүрэхээр эцэг эхээ
Уйлуулж унжуулаад гудамжинд хөөдөг
Дагавар хүүхдээ битгий хэл төрсөн үрээ
Дацан хийдийн хүрд дээр хаячихдаг
Архины шараа тайлах мөнгөгүйдээ хүүхдээ хөөгөөд
Автобусны буудал дээр гуйлга гуйлгуулдаг
Авчирсан юмыг нь буруу хоолойгүй цуслаад
Агсам тавьж үрээ гомдооно...
Хүнээс юм асууна гэж хэзээ ч үгүй
Хүзүүгээ өргөн мэддэг мэт даналзана
Хэрэгцээ нь гарвал бусдын эд хөрөнгийг
Хүүгүй зээлүүлээд авч байгаа мэт тоншино
Баригдвал хулгайч болно гэж мэднэ
Баригдахгүй бол азны юм гэж сэтгэнэ
Бусдын юмаар баадагнахадаа
Бууз хуушуур шиг баярлана
Нийтийн газар зүгээр явахгүй
Нэрээ сийлэхээс аваад гар нь хорлонтой
Сандал дээр суухадаа хэвтчихээд
Саад болж нэгнээ уурлуулна
Өтчихсөн юм шиг юм зурж явахадаа
Өнөөх эрх чөлөөгөө эдэлж байна гэж ойлгоно
Үнэ цэнэтэй эрх чөлөөг
Үүдний дэвсгэр болгож гутаана
Хэл амаар доромжилж эрх чөлөөг магтана
Хилс хэргээр гөрдөж эрх чөлөөг тамална
Хэм хэмжээнээсээ хэтэрсэн авир гаргаж дээрэлхэнэ
Хэмжээгүй эрхт хаан шиг хөл дороо хэмхчинэ
Эрх чөлөөг шүлс гэж нулимана
Эрх чөлөөг тэвэг гэж өшиглөнө
Эндэж алдсан хэрэгтэн болгож шийтгэнэ
Эргүү тэнэг болгож галзууруулна

Хууль дүрмийг гууль гэж хэлүүлнэ
Хулгай хийхийг баяжих гэж хөхүүлнэ
Хойноос ирээд хот минийх болгоно
Хотонд ирээд хонь минийх болгоно
Өмдөө чирсэн хурган банди байж
Өвчүүгээ өргөж бухын явдлаар таахалзана
Өмхий үгээр өөрт тусалсан хүнийг утаж
Өгөөмөр сэтгэлийг уландаа гишгинэ
Тусыг усаар хариулахыг
Тун ч сайн мэдүүлнэ
Тугалга шиг харимтгай байж
Туйван шиг том яриулна
Гутлаа даахгүй хэвтэж
Гуниггүй худлаа залуулна
Гудамжинд бол эрх чөлөөг
Гуйлгын зэвсэг болгоно
Гэртээ бол
Гэргийгээ зандарна
Албан тасалгаандаа бол
Албатуудаа загнана
Эрх чөлөөний нэр хүнд
Эвдэрхий балгас болжээ
Эрх чөлөө гэж ханан дээр мянга бичсэн ч
Эрхийг нь хамгаалах байгууллагагүй болжээ
Дээд шүүхэд хэлвэл
Дээд хэмжээ л өгнө
Ерөнхийлөгчид хандвал өршөөл үзүүлэхгүй
Ердөө нэг цаасан дээр бичсэн үсэг болжээ

Хоосон ам шалдан гуянуудын
Хоолоо олох амны цаас болж
Хорвоод хэрэггүй энэ эрх чөлөөг
Хог руу хаясан ч тоохгүй болж
Эрх чөлөөгөөр туг хийж
Эвсэл холбоод талбай дээр сор зална
Эрх чөлөөгөөр тунхаглал гаргаж
Энх тайвны дайн хийнэ
Эрх чөлөөгөөр шүлэг хийж
Эргэлтэндээ хоригдлууд эрхлүүлнэ
Эрх чөлөөгөөр дуу хийж
Эцэггүй хүүхдүүд эфээмээр цацна
Эрх чөлөөгөөр таяг хийж
Эмээ өвөө нар тэтгэврээ голно
Эрх чөлөөгөөр мөнгө тарааж
Эрдэнэсийн сангаа хоосруулна
Эрх чөлөөгөөр самбар хийж
Эрдэм сургахадаа халтуурдана
Эрх чөлөөгөөр онош тавьж
Эмч нар үхэлтэй сүжрэлдэнэ
Эрх чөлөөгөөр хариуцлага тооцож
Эрх мэдэлтнээ урамшуулна
Эрх чөлөөгөөр тогоо бариулж
Элэг ходоодоо өвчлүүлнэ
Эрх чөлөөгөөр сүү ээдүүлж
Эртүүзэнд харвуулна
Эрх чөлөөгөөр гашич татаж
Эрх хүүхдүүдээ балайруулна
Эрх чөлөөгөөр хутга бариулж
Эрүүгийн хуулиа дормжилно
Эрх чөлөөгөөр тугалга цутгуулж
Эх орноо бай болгож буудана
Эрх чөлөөгөөр сүй тавьж
Эмс охидоо завхруулна
Эрх чөлөөгөөр хайр зохиож
Эх захгүй садарлана

Эрх чөлөөгөөр үсээ ургуулж
Эр эм нь мэдэгдэхгүй үсчинэ
Эрх чөлөөгөөр шоу хийж
Репчин банди нар хараана
Эрх чөлөөгөөр хүүхэд төрүүлж
Эхнэрээ арганд хорино
Эрх чөлөөгөөр даваа амалж
Эртэй бөхчүүдээ түрүүлүүлнэ
Эрх чөлөөгөөр жүжиг зохиож
Эв хавгүй жүжиглэнэ
Эрх чөлөөгөөр хууль зохиож
Эрүүл галзуугүй орилно
Эрх чөлөөгөөр виз олгож
Энд тэндгүй доншуулчилна
Эрх чөлөөг хошин урлагаар төлөөлж
Эцэж цуцсан ардаа элэглэнэ
Эрх чөлөөгөөр сур харваж
Эмнэлгийн төсвийг нэмнэ
Эрх чөлөөгөөр луйвар хийж
Эх орноо дээрэмдэнэ
Эрх чөлөөгөөр гул барьж
Эрхэлсэн албаа хамгаална
Эрх чөлөөгөөр төр бариулж
Эмгэнэл илэрхийлнэ
Эрх чөлөөг элэг барьж
Эрин үеээ гутаана...
Эрх нь дэндсэн эрх чөлөөг
Элгээр нь мөлхтөл
Эдэлье хэрэглэе
Эд бах хийе

Эрх чөлөөгөөр марихун хийе
Эмний оронд хэрэглэж заншъя
Эрх чөлөөгөөр бантан хутгаж
Эрх чөлөөгөөр шартсанаа эмчилье
Доз дозоор нь спирт хийж
Дотоодын үйлдвэрлэлээ дэмжье
Далан хэлтэнд тарааж
Дарс болгож худалдъя
Ард түмнээ молигодож
Алтан хувьцаа гэж муръя
Аугаа түүхээ мартаж
Аллах тэнгэрт мөргөе
Ардчилал гэдэг гоё үгийг
Арчиж хаяя хог дээр
А-гаас Э хүртэл үсгээр
Амны салиагаа арилгая...
Үймээн ихтэй гудамжинд
Үзэх юм зөндөө байна
Үхэр шиг мөөрч,ишиг шиг чарлаад
Үнэгүй трагеди олон байна
Замын цагдааг газарт нялчихаад
“Залуур”-гүй машин шон мөргөжээ
Захирлын хүү захирал гэнэ дээ
“Залсаар” яваад кадр тасарч
Ухаан орж сэхээ аваад
Уучлаарай гэж талийгаачаас гуйлаа
Удирдах даргатай нь “ярьж” тохироод
Утсан амийг мөнгөөр солилоо
Харж зогссон хоёр гэрчийг
Хахуульдаж мөнгөөр зодлоо

Машины урдуур өөрөө гүйж ороод
Мажийчихлаа гэж хэлүүлж дөнгөлөө
Тоодгор нараасаа нэгийг дуудаад
Тожоо жолооч болгож орондоо суулгалаа
Арын суудалд мөлхөж суугаад
Ажигч үгүй юу болоо вэ гэж будиллаа
Автынхан ирэхэд хөлсний гэрчтэйгээ
Аминаасаа уйдсан юм байх даа гэж бувтналаа
Эрхээ хасуулахаас айсан шинжгүй
Эрх чөлөөг худалдаж авлаа
Эрх чөлөө ердөө
Эвхээстэй мөнгө болж
Ийм л шударга биш бол
Эрх чөлөө чамаар яах юм бэ
Баян хүний түрийвчинд байдаг
Барлаг нэгний аминд байдаг
Бардам хүний аманд байдаг
Балгадаг нэгний жүнзэнд байдаг
Баталгаагүй эрх чөлөө
Байгаад ч хэрэг байна уу
Баталсан тэр эрхмүүдийн
Баруун гарыг цавчилтай
Хүсэхэд ирдэггүй эрх чөлөө
Хүзүүгээр ороогоод хэрэг алга
Хясахад олддоггүй эрх чөлөө
Хөлд тээглээд гай боллоо
Хэрэгтэй газраа алт шиг үнэтэй
Хэрэггүй газраа чулуу шиг үнэгүй
Хэн дуртайгийн амаар
Хэдгэнэ шиг дүнгэнэсэн эрх чөлөө минь

Чамайг муу хэлээд
Чарлаж байна хэрүүлчингүүд
Чандмань эрдэнийн эрх чөлөөг
Чардаканд тэнэмэлүүд шатааж байна
Ховын тулманд чихээд
Хогийн сав руу хаяж байна
Хол явахгүй муу санаатны
Холхидог шаахай шиг болгож байна
Буруу дуулахгүй бол үгүй гэдэггүйчүүдийн
Бэлгийн замаар халдварлаж дууслаа
Бодохгүй хийдэг тэнэгүүдийн
Бохир гараар үрэвсэж дууслаа
Том хөхтэй хүүхний
Товчин дээр
Топ модель бүсгүйн
Тонтгор өгзгөн дээр
Буудал хөлсөлсөн дааяагийн
Будагтай шаахайн дээр
Буруу гарын хөөрөгний
Бундгар шүрэн толгой дээр
Авилгал залгисан даргын
Аман дээр гарсан яран дээр
Авгай машинаа сольсон
Алба тушаалын амжилт дээр
Ам хуурайгүй чалчсан
Ахмад буурлын үглэл ари дээр
Агсам морь шиг хадуурсан
Архичидын цуглааны ишлэл үгэн дээр
Толгойгоо алдсан төрийн
Тос даасан тамган дээр
Тонон мөлжсөн гишүүдийн
Торгон мяндсан зангиан дээр
Үсээ сэгсийлгэн бахирсан
Үзэшгүй муухай гудамжны барам
Үнэр танар нь дийлдэшгүй
Өнөөх гудамжны хүн-хогуудын
Найман зуугийн үнэтэй
Найрканы шилэн лонхон дээр

Америкын далбааны зурагтай
Алаг турсикны оёдол дээр
Алдар цуутай жүжигчин хүүхний
Авахуулсан нүцгэн зурган дээр
Аавын хөрөнгөөр гараа угааж
Ардчилалын буянаар гулгисан
Чихгүй толгой нарын
Шүдээ шарлуулсан “өвс”-өн дээр
Жалгаар нэг уралдуулсан
Жаргалын найман хүлэг дээр
Жасаагаа уншуулсан баяны
Жаран харын найран дээр
Арьс ширний үйлдвэрийн бохирт
Амиа тавьсан Туулын усанд
Ар өвөргүй хаусанд эзлүүлсэн
Алдарт Богд уулын аман дээр
Эрх чөлөөгөөр пуужин буудаж
Эрх чөлөөний цэнгүүн хийцгээе
Эрх чөлөөгөөр агсам тавьж
Энэ өдрийг үдье
Хэн дуртай нь эрх чөлөө гэж орилно
Хэнхдэгээ дэлдээд илжиг шиг чарлана
Хэн дуртай нь эрх чөлөө гэж бүжиглэнэ
Хөлөө олохгүй согтуурхаж гуйвна
Ажилтай байгаагаа эрх чөлөөгүй гэнэ
Ажилгүй байгаагаа эрх чөлөөтэй гэнэ
Аавдаа авгай авахыг заана
Алсдаа ахдаа эхнэрээ түрээслүүлнэ
Дээврээсээ эхэлж байшингаа баръя
Дээш нь харуулаад онгоцоор зөөе
Дэнжигнэж чичрээд шал ядаргаатай юм
Дэлхийгээ сөнөөгөөд өөр гаригт очъё
Дэгжин харагдаж байвал ямар хамаатай юм бэ
Дээлэн дээрээ пиджак давхарлая
Хацар дээрээ бурханаа шивье
Халууцвал шалдан гүйцгээе

Дарга сайд гэж бүү айцгаа
Дорвинкоо сумлаад пан хийлгэ
Дасгалжуулагч багш юу яриад байгаа
Дасгалтай дасгалгүй би олимпийн аварга болно
Цол хэргэмнээс минь сүрдээд
Цочицгоо та нар муусайн сүгнүүд
Алдар нэртэй хүнд
Алгадуулвал гарз чинь арилна
Баяны хүүтэй шөргөөлдөөд хэрэггүй шүү
Батцоожинд зарлигдаад явуулчихна шүү
Бал даргыг та нар муулах хэрэгтэй
Барилга харахаараа “нүдлэн хамгаалаад” лайтай юм
Хуучны сэхээтнүүдийг харахаар нүд хорсох юм
Хувьсгалт намаа магтаад уур хүргээд байх юм
Хоцорсон үеийн феодалын үлдэгдлүүдэд
Хоолны сав нь бүтэн дээрээ тонил гэе
Өнгөрсөн цагийн яажийсан байшингуудыг тэгшлээд
Өндөр гантиган орд сүндэрлүүлье
Түүхийн дурсгал байна уу надад падгүй
Түм түчигнэсэн худалдааны төв босгоё
Олох шулахад минь саад болоод байгаа
Олон олонлигыг гудамжинд хөөж гарга
Орон гэргүй ядуусыг зайлуулаад
Оросоос чукча нарыг авчирч ажил хийлгэе
Эх орон гэж юу байдаг юм бэ
Элс шороотой тоос л байна
Эрдэс баялгыг нь гадагш нь зөөгөөд
Элгээрээ хэвтэхэд нь Бахама явъя...
Эрх чөлөөт иргэд
Ингэж ярьдаг юм байна
Эрх чөлөө нь халихаараа
Эрлэгшдэг юм байна
Эдлэх тусам
Эргэж бөөлждөг
Эрх чөлөө
Хэнд хэрэгтэй юм бэ?
Олдох тусам
Оодордог
Оройгүй сүм шиг эрх чөлөөг
Оосорлоё

Ярих хэлэх нь дийлдэхгүй
Яршиг төвөг учруулсан
Ямар янзын эд вэ
Ялтын гэрээгээр цуцалъя
Цуцлах нь ч юу юм бэ
Цугтаа хамт ярилцъя
Өрлөг жанжныхаа байгуулсан
Өчнөөн гавъяаг яах вэ
Дундад улсыг “ давсан”
Дуусашгүй гавъяаг мартаж болохгүй
Таван зуун мянган монголын
Тавиланг шийдсэн маршал шүү
Маршалын байгуулсан гавъяагаар
Манайх тусгаар улс болсон юм
Мао нь яах вэ Чан Кай Ши-тэйгээ дайтаад
Маниусаа тоох ухаангүй байсан юм...
Тавин жилийн өмнө НҮБ-д элсэж
Таван хошуутай соёмбоо намируулсан юм
Тусгаар тогтнолын төлөө цусаа урсгаж
Тусгаар улс болохын төлөө
Оршуулгын газраа загалмайтай
Оросын холбоотон болсон юм
Эрх чөлөөний төлөө баатруудын амиар бүтээсэн
Эрх чөлөө гэдэг эрхэм үгийг устгаж болохгүй ээ
Эдлэх ёстойгоо эдэлж,илүү зүйлд шунахгүй
Эх орныхоо иргэн шиг эрх тэгш амьдрах ёстой
Санан санан мөрөөдсөн
Салхи шиг дураараа эрх чөлөө
Самуун цагийн нүглийг даалгүй
Садарлаж төөрөв үү

Бодон бодон мөрөөдсөн
Боржигоны тал шиг онгон эрх чөлөө
Болохгүй бүтэхгүй нь дэндээд
Боолчлолын гинжээ санав уу
Боолын нийгмийг ганхуулсан
Боолчуудын удирдагч Спартакын
Ирт жаданд сийчүүлсэн
Ирүүлт тулааныг дурсав уу
Эрх чөлөө ямар үнэтэйг
Эртний судраас хайгаарай
Энэ бүхний төлөө
Эрин зуун минь цусаар амьсгалсан юм шүү
Хорин зууны турш үүний төлөө
Хорвоо ертөнц баатар хөвгүүдээ алдсан
Хоёр том дайны дараа л
Холхивч гинжнээсээ салсан билээ
Дарангуйллыг халж эрхээ эдлэх гэж
Даян дэлхий хар шаргүй боссон
Даяаршиж нийгэмшсэн одоогийн цаг дор
Дархан цолоо олж эрх чөлөөг тунхагласан
Даварсаар даварсаар давгын оронд очоод
Далай их эрх чөлөөгөөр наадаж байна бид
Даалуучин,хөзөрчин,покерчин бүгдийн
Далласан гарт эрх чөлөөгөөр тоглож байна
Шүүгчийн шийтгэл дор
Эрх чөлөө торгуулж байна
Шүлэгчийн мөрөн дотор
Эрх чөлөө нисэж байна
Хаа сайгүй л эрх чөлөө
Хамхуул шиг хийсч байна
Хогийн цэг,бурхны суварга
Хотын утаанд ч угаартаж явна
Олон янзын “изм”-энд
Оготны нүх шиг төөрнө

Орчлонгийн түмэн жаягт
Орчилдож чадахгүй будилна
Үндэсний үзэлтэн болох гээд
Үсээ ургуулж аяглана
Үзэсгэлэнт авхай болох гээд
Үнэртэн түрхэж маяглана
Үйлдвэржсэн орон болох гэж
Өмхий бохироор хордоно
Үсгэн дунд тоо цохих шиг
Үнэ хүндээ алдана
Цаас шиг хямдхан болсон
Царай алдсан эрх чөлөөг
Цааш нь түлхээд яах вэ
Цамаархаж голоод яах вэ
Эрх ямбыг нь зохицуулж
Эрх тушаалыг нь цөөлье
Эдлэх ёстой юм бол тэр эрхийг нь
Эв найртай хуваацгаая
Худлаа ярьдаг эрх чөлөөг хасъя
Хулгай хийдэг эрх чөлөөг чөлөөлье
Хоосон амалдаг эрх чөлөөг багасгая
Ховч хэрүүлч амнуудаа цэгцэлье
Аж үйлдвэрийн төвөө хурдан барьж
Ар Шандад үйдвэрийн бүсээ эхэлье
Ажилгүйчүүдээ ажилтай болгоод
Амнаас нь илүү гарыг нь ашиглая
Төмөр замын шинэтгэлээ түргэлж
Төвийн бүсүүдээ цахилгаан станцаар хангая
Таван толгойгоо тараачихгүй ашиглаад
Тансаг амьдралыг эх орондоо цэцэглүүлье

Шатахуун түлшэндээ бусдын царай харахгүй
Шалавхан үйлдвэрээ барьж дуусгая
Шар толгойтой,шар шүдтэй хоёр хөршийнхөө
Шантаажинд орохгүй биеэ дааж амьдаръя
Хүний гар харна гэдэг эрх чөлөө биш
Хүний хэлсэнээр амьдарна гэдэг эрх чөлөө биш
Хүний дарамтанд байх эрх чөлөө биш
Хүний харцаар явах эрх чөлөө биш
Өөрийн эрхшээлээр төвхнөнө гэдэг
Өлзий дэмбэрэлтэй эрх чөлөө шүү
Өөр хэн ч биш та бид хүчин зүтгэж
Өөрийн орныг “барын зулзага” болгох ёстой
Эцэг өвгөдийн минь бидэнд өвлүүлсэн
Энэ газар шороон дор их юм бий
Эх орныг минь эх орон шиг байлгах
Эрдэнэс баялгын нуугдмал сан их бий
Харж байгаарай та нар нэг л өдөр
Халууцсан баатар эр суниагаад босоод ирнэ
Харвингаараа хар алт,борвингоороо бор зэс
Хангай говьгүй цувуулаад ирнэ
Эх орноо цөлмөгчдөд хатуу шийтгэл оноож
Эрдэс баялгаа тоногчдод банга хүртээнэ
Эрхтэн дархтанд дарлуулсан ард түмнээ босгож
Эдлэх ёстой эрх чөлөөгий нь өгнө
Тэр цагт та нар надад баярлаарай
Тэнэгийн үгэнд итгэсэндээ баясаарай
Тэргэл сар нэгтэй дэлхийд
Тэнгэрлиг заяатай нь бид гэж залбираарай...

Өссөн төрсөн нутагтаа ажилтай байж
Өрнөх хөгжилд нь гар оролцвол эрх чөлөө шүү
Өстэй юм шиг агсран дүвчигнэж явсанаас
Өөрийн биеэр ажил хийх чинь эрх чөлөө шүү
Хэдхэн жилийн дараа Монгол ийм байхгүй ээ
Хэн бүхний бахархал төрүүлсэн орон болно
Хальтирч хэлсэн анхны ерөнхийлөгчийн үг
Хамтын амьдралд маань биелэлээ олно
Онигоо болсон Очирбат ерөнхийлөгчийн үгээр
Орчлон дэлхий биднийг таних болтугай
Овоо доо хааяа жаахан “туучихдаг” болохоос
Олон жилийн дараачийг онож хэлсэн өлзийтэй үг
Бар гэдэг эрээн судалтай амьтан болж
Баялгын ерөөлөөр биднийг дайлагтун
Бахархах эрдэнэсийн санд минь
Бас эрх чөлөө гэдэг үг байгааг бүү мартаарай