Д.Одончимэг ч, түүний аав ээж ч охиноо алдсанаас хойш цагдаагаас өөр хүнд хандаагүй. Тэр ч бүү хэл Түнхэл тосгоны захирагч, нийгмийн ажилтанд энэ тухайгаа дуулгаагүй гэсэн. Түнхэлийнхэн энэ талаар хэвлэл мэдээллийн хэрэгслээс л сонссон гэх. “Лам хард үзүүлсэн үү. Охиныг чинь олдоно гэж байна уу” гэж Д.Одончимэгийн ээжээс асуухад “Үзүүлсээн. Хамаатных нь хүнд байна гэдэг юм” гэхээс өөрийг хэлээгүй. Тэд тавхан сартай нялх үрээ хулгайд алдсан гэхэд дэндүү тайван байгаа нь ажиглагдсан. Бүр охиных нь талаар сураг гаргахаар сурвалжлага бэлтгэж байгаа биднийг буруушаасан юм.

О.Номин-Эрдэнийн ээж Д.Одончимэг 22 настай. “Аварга” дээд сургуулийн Эмчилгээний ангийн дөрөвдүгээр курсийн оюутан. Айлын том охин. Түнхэлийнхэн түүнийг мод бэлтгэдэг компанид ажилладаг гэсэн. Харин өөрөө сургуульд сурч байгаа учраас хичээлийнхээ хажуугаар хааяа ажил хийдэг гэх. Д.Одончимэг хоёр дүүтэй. Д.Одончимэг хоёрдугаар курст байхдаа Н.Содном-Иштэй танилцсан аж. Н.Содном-Иш түүнээс хоёр насаар дүү. Аав ээж нь Түнхэлд амьдарч байгаад хотод суурьшсан юм байна. Тэрбээр тодорхой ажилгүй. Аав ээжтэйгээ барилгын ажил хааяа хийдэг. Д.Одончимэг Н.Содном-Ишийнд жил шахам амьдарч байсан гэнэ. Тэр үедээ жирэмсэн болжээ. Гэтэл найз залуутайгаа таарахаа больж хоёр тийш болсон байна. Д.Одончимэг дутуу төрж, 1.6 кг охинтой болсон нь О.Номин-Эрдэнэ. Ачтай болсноо мэдсэн Н.Содном-Ишийн ээж Хорлоо нэг удаа утсаар ярьжээ. Тэгэхдээ ачийнхаа биеийг асуугаад өнгөрсөн байна. Харин дараа нь Эх нялхсын эрдэм шинжилгээний төвд хэвтэж байхад нь нэг удаа уулзжээ. Түүнээс хойш холбоогүй байсан гэнэ.

Д.Одончимэг охиноо алдсан даруйдаа ээждээ хэлээгүй талаар бид өмнөх дугаартаа дурдсан. Харин охин хулгайлагдсанаас хэд хоногийн дараа Д.Одончимэгийн ажиллаж байсан цайны газарт Н.Содном-Иш ээж, эхнэртэйгээ очсон байна. Тухайн үед Д.Одончимэг зуныхаа амралтаар Урт цагааны ойролцоох цайны газарт ажиллаж байсан гэнэ. Хорлоо хүү, бэр хоёртойгоо орж ирэхдээ “Хүүхдээ алдсан гэлүү. Бид олоод авчихсан шүү дээ” гэх мэтээр Д.Одончимэгийг тавлах, доромжлох зэрэгцүүлэн баахан ээрч байгаад явцгаажээ. Тухайн үед охины ээж юу ч хэлж чадаагүй гэнэ. Харин энэ тухай хэргийг шалгаж байгаа байцаагчдаа мэдэгджээ. Тэр дагуу байцаагч нь охины аавын гэрт нь нэг удаа очсон гэх. Тэгэхдээ “Охин чинь алга байна” гэсэн утгатай зүйл хэлжээ. Үүнээс хойш хадмуудыг нь шалгасан эсэх нь тодорхойгүй байна.

Д.Одончимэгийн ээж зээгийнхээ аавын талаар ярихдаа нэлээд янзгүй байгаа нь ажиглагдсан. “Тэднийхэн олигтой хүмүүс биш байх. Хамаатнуудынх нь нэг хүүхэдгүй хүүхэн байдаг гэсэн. Цагдаа тэднийг яаж шалгахаа мэдэж байгаа байлгүй” гэж байсан.

САРЫН ДАРАА ОХИН АЛГА БОЛСНЫГ МЭДСЭН

Бид Н.Содном-Ишийн ээж н.Хорлоотой ярилцлаа.

-Та Д.Одончимэгийг хэр сайн мэдэх вэ?

-Мэднэ,ээ манай гэрт хэсэг амьдарч байсан. Хүний үгээр элдэв ааш аяггүй сайн охин. Жилийн өмнө амьдарч байгаад явсан.

-Та ачаа харсан уу, алга болсныг нь мэдсэн үү?

-Д.Одончимэгийн охиныг сайн хараагүй. Төрснийхөө дараа утасдаад “Надад хувцас байдаггүй. Хүрч ирээд эмнэлгээс гаргаадхаач” гэсэн. Нөхөртэйгөө би явж очоод эмнэлгээс гаргасан. Хүүхэд нь улаан нялзрай амьтан харагдаж байсан. Тэгээд эмнэлгээс гарсных нь орой Одончимэгийн ээж ирээд тэр хоёрыг аваад явсан. Тэрнээс хойш сураг тасарсан. Сарын дараа телевиз үзээд сууж байгаад алга болсныг нь мэдсэн.

-Яагаад танай гэрээс явсан юм бол?

-Би яаж мэдэх вэ дээ. Хүүхдүүд хоорондоо таарч тохирохгүй байсан юм байлгүй.

-Д.Одончимэгтэй холбоо барьдаг уу?

-Нэг утасных нь дугаар байсан. Одоо хаана явааг нь мэдэх юм алга. Одончимэгийн ээж нь загнаад хүүхдээ аваад явлаа л гэсэн. Ачаа харъя гэхээр үзүүлдэггүй аашлаад байдаг. Тийм болохоор холбогдоод байдаггүй. Одончимэг ч бидэн рүү ярьдаггүй. Хүүхэд дутуу гарсан гэдгийг мэдэж байсан. Яасан хүүхдээ олоо юм болов уу.

-Олоогүй байгаа гэсэн?

-Тийм үү, олдоосой билээ.

-Нэгэнт танай ач юм чинь алга болсонд нь харамсаж байсан биз дээ. Ээжтэй нь хамтраад хайх тухай бодож үзсэн үү?

-Нөхөр бид хоёр завгүй байдаг хүмүүс. Зун болохоор ажлаар хөдөө гадаа явчихдаг. Өвөлдөө суурин байдаг. Тийм болохоор нэг их зав гараад байдаггүй.

-Та хоёр ямар ажил хийдэг юм бэ?

-Барилгын засал чимэглэл хийдэг.

-Д.Одончимэгийг Урт цагаанд цайны газарт ажиллаж байхад очоод нөхөртэйгээ “хүүхдийг чинь бид олоод авчихсан” гэж хэлж байсан гэсэн үнэн үү?

-Юу, би юу гэж тэгж хэлэх вэ дээ. Юу яриад явнаа наад хүүхэд чинь.

-Таныг тэгж хэлсэн гэхээр бид ачаа та нарыг авчихсан байж магадгүй гээд асууж байгаа юм л даа?

-Юу гэж бид авах вэ. Хүү маань хоёр дахь амьдралаа зохиосон. Сонгинохайрхан дүүргийн цагдаагийн хэлтсээс хүүхэд алга болсон хэргийг шалгаж байгаа цагдаа манайд ирж нэгжлэг хийсэн. Тэгээд хүүхэд олоогүй яваад өгсөн. Юу гэж бид авах вэ дээ. Д.Одончимэг мөрдөн байцаагчид ярихдаа “Хадмууд хүүхдийг минь аваад явчихсан байх” гэж хэлсэн юм шиг байна лээ. Би чинь эх хүн шүү дээ. Юу гэж тийм зүйл хийгээд явах вэ гэв. Биднийг ийн ярилцаж байх зуур алга болсон охины аав Н.Содном-Иш ярианд оролцлоо.

ЭЭЖ НЬ ОХИНОО ГЭДСЭНД БАЙХАД НЬ НАДААС ЯВСАН. ТИЙМ БОЛОХООР ТЭР МИНИЙ ХҮҮХЭД БИШ

-Та нар хаанаас яваа хүмүүс вэ?

-Өөрөө алга болсон охины аав байх аа. Бид хүүхдийн тань сургийг гаргахаар явна. Юунаас болж охин чинь алга болчихов?

-Би яаж мэдэх вэ. Нутгийнхаа нэг залуутай уулзтал “Одончимэг төрчихсөн юм байна лээ. Хүүхэд нь чинийх гэсэн үнэн үү, саяхан охин нь алга болчихсон юм байна лээ” гэж ярих үед нь би хүүхэд нь алга болсон гэдгийг мэдсэн.

-Хүүхдээ харсан уу?

-Би огт хараагүй ээ. Тэгээд ч би эхнэр авч хүүхэдтэй болсон. Тийм болохоор энэ талаар ярьж Одончимэгтэй зууралдмааргүй байна. Төрснийхөө дараа ээж аав хоёрыг маань ирж эмнэлгээс гаргаадхаач гэж гуйсан байсан. Тэр үед би гэртээ байгаагүй.

-Тэр хүүхэд чиний мах цусны тасархай шүү дээ?

-Ээж нь намайг боловсролгүй. Харин чиний дэргэд миний охин боловсролтой. Шоронгийн тав гэх мэтээр доромжлоод бид хүүхдээ ганцаараа өсгөж чадна гээд л явсан. Өөрөө болж бүтнэ гээд аваад явсан. Хариуцлагаа өөрөө үүрэх хэрэгтэй шүү дээ. Надад яасан энэ тэр гээд гүйх сонирхол алга.

-Чамайг гадуур хонож, өнжөөд гэрийн бараа хардаггүй байсан болохоор эмэгтэй хүн гомддог л байсан биз дээ?

-Би тэгэхэд ажил хийдэг байсан. Мөсөн каток дээр ажилладаг, хонож өнждөг. Тэр тухайгаа хэлдэг л байсан. Өөрөө “Аварга” сургуульд сурдаг. Намайг боловсролгүй гэж байнга доромжилдог. Би Одончимэгт үнэхээр гомддог. Намайг их гомдоосон. Ээж нь ч бас загнадаг.

-Чи хэрэв гадуур хонодоггүй байсан бол эхнэр чинь явахгүй. Охин чинь алга болохгүй байж болох байсан шүү дээ?

-Би энэ талаар танд хэлсэн шүү дээ. Тэр охиныг би хараагүй. Энэ тухай дахин дахин яримааргүй байна. Ээж нь охиноо гэдсэнд байхад нь надаас явсан. Тийм болохоор тэр миний хүүхэд биш. Би энэ хэргийг шалгаж байгаа мөрдөн байцаагчид нь ч “Надад тэр хүүхэд хамаагүй” гэдгийг хэлсэн. Одоо би тайван амьдармаар байна.

-Эхнэр чинь яагаад салах болсон юм бол. Энэ тухай бодож үзсэн үү?

-Би яаж мэдэх вэ. Намайг загнаад өөрөө хүүхдээ өсгөнө гээд л явсан. Тэгэхээр надад огт хамаагүй гэж хэлээд байна шүү дээ.

-Та хоёр яаж танилцсан юм бэ?

-Би Түнхэлд хөрөө раман дээр ажилладаг байсан юм. Тэгж байхдаа танилцсан юм.

-Танайх Түнхэлд байсан юм уу?

-Ээжийн дүүгийнх тэнд амьдардаг байсан. Одоо хотод ороод ирсэн байгаа.

“ХУЛГАЙЧ ЭМЭГТЭЙН АМ ЗУРАГ АРАЙ ӨӨР БОЛСОН”

О.Номин-Эрдэнэ охин одоо ой хүрч байгаа. Түүний содон тэмдэг нь баруун чихэн дээрх жижигхэн мэнгэ. Энэ мэнгэнийх нь талаар эмээ нь мэдэхгүй байсныг бодоход бүдэг ч мэнгэ байж мэдэх. Хулгайлагдах үедээ нүүрэн дээрээ хордлогын сорвитой байсан нь одоо арилсан ч байж мэдэх. Дутуу төрсөн гэхэд нэлээд мяраалаг охин. Охиныг эрэн сурвалжлах хуудсан дээрх зураг бол таван сартай үеийнх нь. Ээж нь утсаараа охиныхоо зургийг авсан нь тэр.

Харин хулгайлсан гэх Наранчимэг гэх эмэгтэй өөрийгөө V сургуульд багшилдаг талаар охины ээжид хэлсэн. V сургуульд тийм нэртэй багш байгаагүй. Мөн ам зураг бодит байдлаас өөр болсныг Д.Одончимэг хэлж байсан. Түүний хэлж байгаагаар Наранчимэг гэгч нь 40 орчим настай, махлагдуу эмэгтэй аж. Д.Одончимэг “Ам зураг зурсан ах загвар өмсөгч эмэгтэйчүүдийн хөрөг зурдаг гэсэн. Тэгээд тэгсэн болов уу, тэр эгчийн зургийг их залуухан, туранхай зурсан” гэсэн. Тэр эмэгтэй Д.Одончимэг хоёрыг ярилцаж байхыг төмөр замын вокзалын үйлчлэгч харсан гэнэ. Үйлчлэгчийн яриагаар Д.Одончимэг тэр эмэгтэйтэй нэлээд ярилцаж байгаад хамт гарсан аж. Тухайн үед вокзалын хяналтын камер ажилладаггүй байжээ.

өмнөх ярилцлага эндээс үзнэ үү

Б.ЦЭЦЭГДЭЛГЭР Г.ДЭЛГЭРЦЭЦЭГ

Үргэлжлэл бий.