Эрхэм уншигч танд энэ удаад Дэлхийн поп хөгжмийн хатан хаан, дуучин, жүжигчин

 Мадоннагийн "Newsweek" сэтгүүлд өгсөн ярилцлагыг бүрэн эхээр нь хүргэж байна.

...Намайг түүний хаягийг зааж өгөхөд "-Мадоннагийн хажууд ийм ойрхон очно гэж үү" хэмээн таксиний жолооч дуу алдлаа. “-Тиймээ, хоёулаа тэднийд очно” гэж намайг хэлснээс хойш бид замын турш таг дуугүй зөвхөн замаа харан явлаа. Би ч толгойдоо асуултаа цэгцэлсээр л... Удалгүй Сильвестр Сталлонегийн "Casa Rocky" хаусын хажуугаар өнгөрч поп хатагтайн гэрийн үүдэнд ирлээ. Бүгд энэ дүүрэгт хэн хэн амьдардгийг сайн мэднэ. Ингээд би буухаар жипний хаалганы түгжээн дээр хуруугаа хүргэх мөчид жолооч "-Мадоннад мэнд хүргээрэй!" хэмээн баяртай нь аргагүй хэлэв. Хар өмдтэй, богино цамцтай нэгэн эр хашааны хаалгыг онгойлгож өгөх зуураа "-Мадонна одоохондоо алга. Гэхдээ удахгүй ирэх байх" гэсээр намайг дотогш дагуулан орлоо...

Зочдын өрөөний буйдан дээр тухлан суулаа. -Үнэхээр энэ бүхэн ийм амархан бүтлээ гэж үү? Өнөө цагт алдартнууд хэн нэгнийн тэр дундаа сэтгүүлчдийг гэртээ оруулахаа больсон шүү дээ. Гэрийнхээ ойролцоох ресторан ч юмуу, зочид буудал, оффис зэрэгт л биднийг хүлээн авдаг гэх зэргээр бодож суув.

...Аажмаар байшин доторхийг ажиглалаа. Интерьерийг нь нэрт дизайнер "бага" Кристофер хийсэн болохоор цаанаа л нэг тохилог, үнэтэй эдлэлийг маш энгийн байрлалд тавьсан нь илүү дутуу гэмээр зүйлгүй харагдаж байв. Өргөн буйдан дээр том том өдөн дэр, энд тэндгүй асах лаа, дэнлүү, задгай зуух зэрэг нь хэнийг ч гэсэн амар амгалан болгож чадах байх. Бүх тавилга нь сонгодог загварын үнэтэй модоор хийсэн мебель. Дээд давхрын шатнаас цагаан өнгөтэй бультерьерийн гөлөг "Пепито" бууж ирлээ. Түүнийг саяхан Мадоннагийн төрсөн өдрөөр нь бэлэглэсэн аж. "Пепито" ч дэндүү эрх юм. Ер нь бол Мадонна гурван байшинтай. Энэ хамгийн жижиг нь. Лос-Анжелесийнх нь жинхэнэ шилтгээн. Нью-Йоркт бас нэг хаус байдаг. Тэр нь бүр 21 өрөөтэй. Удалгүй хатагтай гаднаас орж ирлээ…

-Уучлаарай та удаан хүлээв үү? Би жаахан дэлгүүр хэсмээр санагдаад. Тэгээд замдаа Шэрон Стоунтай таараад баахан чалжиж байгаад удчихлаа. Тэр үнэхээр залуугийнх шигээ сайхан хэвээрээ байна шүү. Бид уулзалгүй бараг зургаан жил орчим болчихож. Та сая Слайтай /Сильвестр Сталлонег хэлэв/ тааралдсан уу? Тэр бас гэртээ зочинтой байна хэмээн инээмсэглэж яриа өдлөө.

...Ингээд бид түүний чанасан кофег амтархан уунгаа буйдан дээр өөд өөдөөсөө харан суулаа. "-Яасан би өөр болчихсон байна уу. Түрүүнээс хойш харц салгахгүй байх чинь. Эсвэл намайг ямрыг сонирхоод эхэлчихсэн юм уу" гээд Мадонна тас тас хөхрөн намайг жаахан эвгүй байдалд оруулаад авав.

-Та ер нь өөрийгөө эротик, сексээс өөр зүйлээр төсөөлж байв уу?

-Намайг хэн ч муу муухайгаар бичиж бас хэлж болно. Ямар нэгэн зүйлийн золиос болгох гээд байдаг ч юм уу даа. Би бусдаас ялгарахыг хүсдэг. Тэгэж чадаж ч байгаа. Хэрвээ би эрэгтэй байсан бол бүх зүйл хэнд ч хамаагүй байна. Хэн ч намайг хэн нэгэнтэй унтсан талаар сонирхохгүй л байх.

...Гэтэл бидний яриан дундуур нөгөө гөлөг орж ирэн анхаарал татахыг хичээж байлаа. "-Үүнийг би танд бэлэглэчихмээр л байна. Тэр бараг бүх гутлын минь хоншоорыг цоолоод хаячихсан" хэмээн хэлээд Marlboro Lights-аас нэгийг асаан авлаа. Миний өмнөөс харан суух түүнийг тэр том нэртэй хүн гэж хэлэхийн аргагүй энгийн байдалтай байсан нь бидний яриа цаашаа халуун болно гэдэг итгэл улам их төрж байлаа. Урт хар даашинз, задгай тавьсан үс, өндөр өсгийтэй туфл, будаггүй шахуу царай гээд бүгд энгийн...

-Та миний уран бүтээлийг сонирхоод байгаа бил үү?

-Тиймээ, гэхдээ "Bedtime Story" цомог болон "Секс" гээд ном чинь анхаарал татаад байна?

-Миний дуунуудаас тааралдсан болгонтойгоо секс хийгээд байдаг хүүхэн гэж ойлгодог байх. Тэгвэл тэр "Human Nature" чинь байгаль хамгаалахыг уриалсан дуу шүү дээ. Харин "Секс" ном бол тэр чигээрээ төсөөлөл, хий хоосныг гаргаж ирсэн бүтээл байхгүй юу. Тэнд надтай холбоотой, миний сексийн амьдралыг харуулчихсан зүйл огт байхгүй. Миний амьдралдаа хийсэн хамгийн зоригтой алхмуудын нэг. Хэн ч гэсэн үүнийг хэзээ нэгэн цагт хийх байсан. Тэр "Шөнийн өнгө" кинон дээр ч гэсэн Брюс Уиллис сексийн зарим нэгэн санаанд оромгүй зүйлийг харуулсан байна лээ.

Тэр үдэш Мадонна найз бүсгүйн хамт ямар ч бие хамгаалалтгүй Брюс Уиллис, Жэйн Марч нарын тоглосон "Color of Night" хэмээх киног үзээд байжээ.

-Жэйн үнэхээр янаг бүсгүй юм билээ. Тэр киноноос зөвхөн түүнийг л харсаар байгаад гарч ирсэн шүү.

-Таны амьдралыг хараад байхаар тэр чигээрээ зохиомол, фантастик зүйл гэж хэлмээр...?

-Яагаад фантастик гэж. Заримдаа би толгойдоо орж ирсэн бодлоо тэр дор нь хэрэгжүүлчихдэг. Амьдрал дээр ч, орон дотроо ч тэр. Хүссэн цагтаа би гэрээсээ ямар ч хамгаалалт энээ тэрээ гэхгүй гараад явж чадна. Бас эрчүүдийг татахын тулд хаана ч гэсэн "нөгөө ажлыг" хийхэд бэлэн. Гэхдээ би арай ч ингэж янхан шиг аашилж байгаагүй юм шүү! Хэрвээ Нью-Йорк дахь миний гэрийн орцны гадна олон арван хүн хүлээж байвал би нуугдаж энэ тэр болж анхаарал татаад байдаггүй. Цэцэрлэгээр зугаалж байхад тэд дагамаар байвал тэгэж л байг. Ер нь би дэлхий ертөнцөөс өөрийгөө тусгаарлахыг огт хүсдэггүй. Хотын гудамжаар найзуудтайгаа зугаалах сайхан.

-Энэ чинь аюултай биш үү? Хэдхэн жилийн өмнө бил үү дээ, тань руу нэгэн секс-маньяк дайрсан биз дээ. Хамгаалагч нар чинь эсвэл хангалтгүй ажилладаг юм уу?

-Надад хамгаалагч сахиусан тэнгэр байдаг. Эсвэл ямар нэгэн хүч ч юм уу нэг тийм зүйл байдаг юм шиг санагддаг. Тэр өдөр ч гэсэн маньяк эр надад халдахад тэр хүч намайг хамгаалсан байх. Шууд л миний цамцыг тас татан тайлах гэхэд нь яагаад ч юм надаас өмнө нь хэзээч гарч байгаагүй хүч гарсан. Эдди Мерфиг нэгэн шөнийн клубт ороход нь хорь орчим хүн хамгаалж байсан. хэрвээ ийм олон хүн гудамжаар явбал жинхэнэ карнаваль шиг юм болно биз дээ.

Энэ эмэгтэй нэг л гутарсан бас ганцаардсан шинжтэй. Үнэхээр ч тэр Гай Ричитэй танилцсанаасаа хойш урьдынх шигээ гал халуун, эрч хүчтэй байхаа больсон ч гэх яриа гараад байгаа билээ.

-Таны дурлалын роман төгсгөл болоход хэвлэлийнхэн бүгд л анхаарлаа түүн рүү хандуулж, элдэв төрлийн таамаг гарган элдвээр л бичих юм?

-Шон Пенээс салаад удаа ч үгүй байхад тэр Робин Райтт гэх хүүхэнтэй явалдаж бүр хүүхэдтэй болсон. Тэр хоёрын талаар болон Робины тухай энд тэндээс уншиж байхад үнэхээр төгс сайхан эмэгтэй юм шиг надад санагдаж байсан. Би Шоныг хайр халамжаар дутаасан юм шиг байна лээ. Харин орон дотроо бол тэр бүсгүй намайг гүйцэх нь юу л бол. Шон ч гэсэн миний өврийг нэг хэсэгтээ л их л үгүйлсэн дээ. Үргэлж л утасдаад нэг үдшийг ч гэсэн хамт өнгөрөөе гээд гуйдаг байсан. Уоррен Битти ч гэсэн миний биеийн халууныг хөрөөгүй байхад бас л нэг хүүхэнтэй гэрлэж хүүхэдтэй болсон ш дээ. Мөн л тэр нь сайн ханийн дүрд тоглож эхэлсэн. Үнэхээр тийм зүйл болоод байсан, яая гэхэв дээ. Гэтэл би өөрөө хүйтэн өвөртэй мэтээр бусдад төсөөлөгдмөөргүй байна.

-Магадгүй, тэгээд л чи өөрийгө тачаангуй шүү гэдгээ батлах гээд "-секс, секс, секс…" гээд байдаг юм болов уу?

/Тэрээр удаан гэгч нь инээгээд/ -Та надаар даажигнаад байна уу. Өөр дээрээ туршаад үзэх үү, эсвэл? Үүнийг нотлох олон баримт та нарын гарт байдаг биз дээ. Тэгээд яагаад ингэж асуугаад байгаа юм бэ? Хүн гэртээ урьж боломж гаргаж өгөөд байхад та ийм зүйл асууж байдаг…

-Үнэхээр санаандгүй асуучихлаа. Уучлаарай гэж би худлаа гуйхгүй ээ. Тэгвэл яриагаа арай зөөлрүүлье л дээ. Жинхэнэ романтик хайр дурлалын талаар юу гэж боддог вэ? Тийм хайртай учирсан л байлгүй дээ?

/Мадонна инээгээд/ -Мэдээж учирсан байлгүй яахав. Та өөрөө ч гэсэн хүссэн зүйлээ олж авч чадсан уу?

Бид хэсэгхэн хугацаанд дуугүй суулаа...

-Үнэхээр ч би хэзээ ч өөрийнхөө тал болчих хүнтэй учирч байгаагүй юм байна. Төгс эр хүн ч гэж энэ хорвоо дээр байхгүй л дээ. Гэхдээ зүгээрээ, надад хангалттай олон сайн найз байгаа шүү.

Ингээд би Мадоннад "Факт" гэдэг нэртэй тоглоом хамт "тоглохыг" хүслээ. Энэ нь хэвлэлээр түүний талаар ялангуяа сексийн амьдрал, хамтрагчдынх нь талаар цацагдсан элдэв мэдээлллийн талаарх үнэн зөв хариултыг тодруулахыг хэлсэн юм Үнэхээр ч тэр зарим нэгэн зүйлд "тийм" эсвэл "үгүй" гэсэн хариулт өгөхийг ч хүсэж байв.

-Та өөрийн хөрш Сталлонетай унтаж байсан уу?

-Үгүй.

-Загвар өмсөгч, лесби Женни Шимацу та хоёр янаг амрагийн холбоотой юу?

-Байсан.

-Та үнэхээр Хью Грантыг хүсдэг байсан уу?

-Үгүй.

-Мансууруулах төвд хэвтэн эмчлүүлж байсан уу?

-Үгүй.

-Та эр хүнтэй унтаагүй гурван жил болсон гэл үү?

-Огт худлаа.

-Одоо та сагсан бөмбөгийн нэгэн багийг худалдан авч байгаа юм уу?

-Үгүй.

-Жаклин Онасисийг нас барсны дараа та "бага" Жон Кеннедитэй уулзаж байсан юм уу?

-Жинхэнэ худал зүйл.

-Та Мик Жаггерийн авьяас билгийг шүтдэг тэгээд ч түүнтэй нэг сарын турш амрагийн холбоо тогтоож байсан уу?

-Үгүй.

-Та хэд хэдэн удаа үр хөндүүлсэн гэсэн?

-Тиймээ.

-Та хөхөндөө бага зэргийн силикон шахуулсан уу?

-Үгүй.

-Эмэгтэйчүүдийг таалах дуртай юу?

-Нэг биш удаа тэгсэн.

-Сексийн байрлал заалгадаг энэтхэг багштай байсан уу?

-Та ч сайн судалжээ. /инээв./ Надад олон сайн найз бүсгүйчүүд байдаг. Тэдэн дотор лесби ч байгаа. Хүмүүс намайг тэдэнтэй унтдаг гэж ойлгодог. Гэтэл би ижил хүйстэн биш шүү дээ. Тэдний ямар байх нь надад огт хамаагүй зүйл. Би тэднийг үгүйсгэж чаддаггүй. Гэхдээ би хэзээ ч лесбитэй нэг оронд орж байгаагүй гэж хэлэхгүй л дээ. Эцсийн эцэст би эр хүнд л дуртай бас хайртай.

-Чи өөрийнхөө хувийн амьдралын тэр дундаа сексийнхээ талаарх үнэн бодит байдлыг олны өмнө дэлгэн тавьж чадах уу?

-Амьдралынхаа талаар Принц худлаа ярьдаг бол Майкл Жексон үнэнээс байнга нуугдаж байдаг. Тэдний нуугаад байгаа зүйл миний ярьж чадах зүйлээс хавьгүй илүү сонирхолтой бас их баялаг түүхтэй. Миний талаар та нар тэртээ тэргүй сайн мэддэг болсон биз дээ. Олны дунд би хувцсаа тайлахад тэр нь нэг их анхаарал татахгүй л байх. Тэгвэл тэд бол бүх зүйлээ төлөвлөж хийдэг, элдэв скандал фактаа байнга нуудаг бүр сексийн хамтрагч нь ч хэн болох нь тодорхойгүй байдаг ш дээ. Яахаараа тэр хоёр өөрсдийн бага насны охид сонирхдог бас ижил хүйстэнтэйгээ унтах дуртайгаа та нарт ярьж болохгүй гэж. Хэрвээ чи ингэж чадах юм бол ч ойрын хэдэн жилдээ идэх хоолоо хэдхэн цагийн дотор олно доо.

Миний тархинд ч тэр талаарх бодол харван орж ирлээ.

-Та тэгвэл надад тусалж чадах уу?

-Ямар утгаараа гэдгээс л хамаарна. Зөвхөн үнэнийг гаргах гэж байгаа бол би одоо ч гэсэн Майклтай яриад өгч болно. Харин тэр жаахан айх л байх. Учир нь түүнээс яриа авсан болгон түүнийг хар талаас нь гаргаад байдаг юм. Тэр хүүхэд хүчиндсэн асуудал түүнийг маш их сэтгэл санаагаар унагасан. Үнэндээ бол та бид өөрсдөө л Майклыг алсан" шүү дээ. Тэгчихээд одоо болохоор тэр ингэлээ тэглээ гээд бичээд байна. Ичдэггүй юм байх даа.

Түүний Bedtime Stories цомогт нь "Inside of Me" хэмээх нэгэн гайхалтай дуу байдаг. Нэг талаасаа түүний сексийн хүсэл тачаалаа тэр дотроосоо мэдрэх ийг хүссэн нөгөө талаасаа өөрийг нь хүн бүхэн дотор нь орсон мэт сайн ойлгодог байгаасай хэмээн тэр энэ дуугаа зохиосон гэдэг. Тэгвэл түүнийг өдгөө дэлхийн “поп хатан хаан”, энэ цаг үеийн "секс бэлэг" тэмдгийн нэг хэмээн хүлээн зөвшөөрдөг шигээ яагаад журамт эхнэр, энгийн нэгэн америк бүсгүй гэдгээр нь хүлээн авч болохгүй байна.

...Тэр охиныхоо сургууль дээр очиж багштай нь уулзана гэснээр энэ удаагийн ярилцлага маань өндөрлөсөн юм. Харин түүний санал болгосноор дараагийн удаад Майклынд очих боломж байгааг судлахаар би тэднийхээс гарлаа…

"-Хаа хүрэх вэ. Та сая Мадоннагийнхаас гарч ирэв үү…? Үнэхээр гайхалтай" гэсээр таксист бид хоёр хотын төв орохоор ухасхийлээ.

"Newsweek". Сэтгүүлч Ларри Бритон

2007.10.11.

Лос-Анжелес. АНУ