ХҮҮХДИЙН ТОГЛООМД ХУВЬСГАЛ ГАРЛАА

2012-02-01

Энэ бол тоглоом биш машин. Гэхдээ хүүхдүүд төдийгүй томчууд ч үүгээр тоглож болно.

Хүүхдийн тоглоомын ертөнцөд хувьсгал хийгээд буй энэ техник дэлхий даяар ихээхэн эрэлттэй байгаа бөгөөд багачуудын мөрөөдлийн тоглоом болоод байгаа аж. Хүүхдийн техник сэтгэлгээ, сэтгэн бодох чадварыг хөгжүүлэх, гарын ур дүйтэй болгох, юмхнаар юм хийж сурахад нь туслах, амьдрал ахуйдаа хэрэг болохуйц дадал суулгах гээд энэ тоглоом хүмүүжлийн олон талын ач холбогдолтой. Томчууд үйлдвэрийн том оврын техник хэрэгсэл, токарийн машин дээр ширээ сандал, ор, шүүгээ хийдэг шиг хүүхдүүд энэ машинаар хүссэн зүйлээ хийх боломжтой учраас хэзээ ч уйдахгүй. Мэдээж хэрэг үйлдвэрийн машиныг бодвол овор хэмжээ багатайгаас гадна аюулгүй ажиллагааг дээд зэргээр хангасан.

Өөрөөр хэлбэл, хүүхдэд зориулж тоглоом хэлбэрээр гаргасан энэхүү техник нь хүүхдийн гар хүрмэгц автоматаар зогсох бөгөөд ажиллаж байх үедээ ч ямар нэг аюулгүй. Токарийн суурь машинаас гадна цахилгаан зүлгүүр, уран хөрөө, мод зорох, өрөмдөх зэрэг олон нарийн үйлдэл хийх боломжтой. Австрийн “Cool tool” компанийн үйлдвэрлэсэн энэ тоглоомын нэр нь “Unimate”. Европын орнууд, Америк, Хятад, Орос, Солонгост энэ тоглоом ид моодонд орж байгаа бөгөөд хүүхэд багачуудынхаа оюуны хөгжил, ирээдүйд ихээхэн анхаарал тавьдаг улс орнууд тун дуртай хүлээн авч, тэр ч бүү хэл Боловсролын яам нь хүртэл дунд сургуулийн хичээлийн программд зайлшгүй хэрэглэх техник хэрэгслийн тоонд оруулж байгаа аж. Энэхүү тоглоомыг “Монгол базальт” компани саяхан оруулж ирсэн бөгөөд “Юнимат Монголия” нэртэй төсөл хэрэгжүүлж эхэлжээ.

Монгол хүүхдүүдийн оюуны хөгжил, ирээдүйд хэрэгтэй, бүтээлч тоглоомын орон зай манай улсад ихээхэн үгүйлэгдэж буй. “Манай хүүхэд PC тоглоомд донтоод, хичээлээ ч хийхээ болилоо” гэж ярьж байхыг та зөндөө сонссон байх. Орчин үеийн хүүхдүүд мэдээллийн технологийн хөгжлийн нөлөөгөөр цахим тоглоомд дурлах болсон нь эрүүл мэндэд нь сөргөөр нөлөөлж, мэдрэлийн ядаргаанд ороход хүргэж буй. Тэгвэл “Unimate” тоглоом хүүхдийн бүтээлч сэтгэлгээг хөгжүүлээд зогсохгүй олон шинэ тоглоом хийж, түүн дээр ажиллах тусам сонирхол нь татагддагаараа онцлогтой. Австрийн “Cool tool” компани дөрвөн төрлийн ийм машин үйлдвэрлэсэн бөгөөд сургуулийн өмнөх насныхан буюу 4-8 насныханд зориулж “Playmate”, 10-15 насныханд “Unimate-Basic”, ахлах ангийн сурагчдад “Unimate-Classic” машинаа гаргажээ.

Мэргэжлийн түвшний машин нь “Unimate metal line” нэртэй. Эхнийхээс бусдад нь тоглоом биш, бүтээлч машин гэсэн нэр нь илүү онох гэнэ. Учир нь тэдгээр нь таваас 20-иод янзын үйлдэл хийх боломжтой бөгөөд алт мөнгөний дархан, бэлэг дурсгалын зүйл хийдэг хүмүүс ашиглахад ч бас тохиромжтой гэнэ. Авсаархан учраас заавал ажлын байр шаардахгүй, гэртээ тавиад хэрэглэхэд боломжийн, дуу чимээ багатай юм байна. Дунд сургуулийн хүүхдүүд тавдугаар ангиасаа хөдөлмөрийн хичээлээрээ мужааны цахилгаан хэрэгсэлтэй ажиллаж эхэлдэг. Тэгвэл “Playmate” машин дээр гурав дөрвөн настай хүүхэд ч ажиллаж болдгоороо онцлогтой. Тоглоом дагалдуулж тусгай мод, будаг, бусад шаардлагатай хэрэгслийг өгдөг бөгөөд танилцуулга номын дагуу шатар даам, мөн туулай, морь, үхэр, нохой гэхчилэн хүссэн амьтнаа хийж болох аж. Хийх зүйл үүгээр хязгаарлагдахгүй, “Барби”-ны сандал, ор, байшин, мөн бэлэг дурсгалын зүйл, эмээдээ зориулаад гуулиар цөгц зороод хийж өгсөн ч болно. Тэр ч байтугай модон үзэг, хундага, хаалганы бариул зэрэг амьдрал ахуйдаа хэрэг болох зүйлийг ч бүтээх боломжтой. Магадгүй таны хүүхэд хийсэн бүтээлээрээ үзэсгэлэн гаргахад болохгүй нь юу байх вэ. Энд бас нэг зүйлийг онцолж хэлмээр байна.

Аав ээжүүдэд хүүхдүүдтэйгээ хамтдаа наадаж болох тоглоом хэрэгсэл тун ховор байдаг. Их л сайндаа нуугдаж тоглоно, хамт суугаад ном уншиж өгдөг байж магадгүй. Тэгвэл энэ тоглоомоор аав, ээж, ах, эгч нартайгаа хамт ажиллах боломжтой. Ингэснээрээ эцэг, эхчүүд хүүхд үүдтэйгээ цагийг хамтдаа өнгөрүүлж, гэр бүлийн халуун дулаан уур амьсгал бүрдэх сайн талтай. Манай аав, ээжүүд “Ажил ихтэй, завгүй” гэсэн шалтгаанаар хүүхдүүдтэйгээ тун бага цаг өнгөрүүлдэг. Тэгвэл “Unimate” хүүхдүүдийг, бас аав, ээжүүдийг ч уруу татах шидтэй тун онцгой тоглоом ажээ. Мөн заавал хөвгүүд гэлтгүй охид ч үүгээр тоглож болно.

Дуртай тоглоомоо өөрийн гараар бүтээх эрх нь охидод ч бас нээлттэй. Машинаа өөрөө угсардаг, шинэ үйлдэл хийх бол, жишээ нь, модоо зорж дуусаад зүлгэх гэвэл зарим хэрэгслийг нэмж суурилуулдаг гэхчилэн алхам тутамдаа хүүхдээс бүтээлч сэтгэлгээ шаарддаг ажээ. Таны харж байгаа жижиг хундагыг энэ машинаар хийсэн. Тоглоомтой дагалдаж ирдэг нарийхан савхан модыг уран гоё хэлбэр гарган зорсон бөгөөд маш нарийн чимхлүүр ажил шаарддаг болохыг та анзаарч байгаа биз ээ. Мөн амьтны дүрс зурсан нимгэн хавтан моднууд тоглоомыг дагалдаж ирдэг бөгөөд хүүхд үүд зураасны дагуу хөрөөдөхөд тун хялбар байдаг аж. Энэ тоглоомын талаар дэлгэрэнгүй мэдье гэвэл www. unimateeducation.com болон www.thecooltool.com цахим хаягаас орж үзээрэй.

“Unimate” тоглоомыг Монголд албан ёсоор борлуулах эрх авсан “Монгол базальт” компанийнхан төслийн хүрээнд хүүхдүүдэд зориулсан дугуйлан хичээллүүлэх, хөдөлмөрийн багш нартай хамтран ажиллах, сургалт явуулах зэрэг олон ажил хийхээр төлөвлөөд байгаа гэсэн. Мэдээж тун удахгүй тоглоомоо худалдаанд гаргах юм байна.

Г.ОЮУН