сонирхсон юм. Ямартай ч замын дундаас зангаа хувиргасан АН-ын сайдуудыг бодвол хэдхэн сарын хугацаанд ажил хийж байгаа. Бас бодит амьдралтайгаа хөл нийлэхгүй байгаа ч бий. Эцсийн дүндээ эдгээр сайдууд шинээр томилогдсоноос хойш юу хийв гэдгийг хүн тус бүрээр нь сонирхож үзлээ. Гэхдээ эндээс ганцхан гаргалгаа гарч буй нь УИХ-ын гишүүн бус салбар хариуцсан сайдад эрх мэдлийн тодорхой зангараг дутдаг юм байна. Хэдийгээр Засгийн газрын гишүүн УИХ-ын гишүүн байхад ажил ихдэнэ гэж ярьдаг нь боловч гүйцэтгэх засаглалын гишүүн хяналтын засаглалд байх хэрэгтэй. Ядаж л салбарынхаа хуулийг УИХ-аар батлуулж чадна шүү дээ. Тэр утгаараа цаашлаад УИХ-аас сайдуудыг томилж байх нь зүйтэй юм шиг ээ. Ингээд шинэхэн сайд нарын томилогдсоноосоо хойш хийсэн ажлын талаар сонирхлоо.

Ж.Энхбаяр Батлан хамгаалахын сайд

Аавынх нь нэрээр армийнхан сайхан хүлээж авсан Батлан хамгаалахын сайд Ж.Энхбаяр ард түмнийхээ өмнөөс буу агсана гэж ам алдснаас үүдэж АН-ынхны хорхойтой араанд зуулгасан. Аргагүй л олонхи болсон намынхаа батлахаар дэнчин тавьж байж суудалдаа үлдсэн Ж.Энхбаяр сайдын хувьд энэ хугацаанд хэвлэлийн баатраар цоллуулж амжлаа. Салбар хариуцсан яамандаа багагүй халаа сэлгээг хийснээр цэргийн дарга нарын зүрхэнд шар ус хуруулаад амжсан. Батлан хамгаалах салбарт аавынхаа нэр нөлөөгөөр олон генералуудтай хэл амаа ололцчихно гэж итгэж явсан тэрбээр ажлаа юунаас эхлүүлэхээ мэдэхгүй одоогийн байдлаар танилцах дадлага хийсэн шиг өдөр хоногийг өнгөрөөж яваа гэхэд хилсдэхгүй. Өмнөх сайдыгаа бодвол энгийн хүмүүсийг шууд цэргийн цолоор мялаахгүй гэдгээ илэрхийлсэн нь батлан хамгаалах салбарын нэр хүндийг бага ч атугай өргөсөн. Ямартай ч тэрбээр “100 мянган орон сууц” хөтөлбөрт 1600 цэргийн албан хаагчдыг хамруулах болсноо баярын өдөр нь танилцуулж, аж ахуйн сэтгэлгээ сайтай гэдгээ харуулаад амжив. Мөн “сайд таныг сонсч байна” нэртэй нээлттэй утас ажиллуулан ажил хэрэгч, шударга бодитой шүүмжлэлийг хүлээн авч өөрийгөө хэр зэрэг нээлттэй гэдгээ харуулах гэж хэрэндээ мэрийж байгаа нь тун олзуурхууштай явдал юм.

Д.Хаянхярваа Сангийн сайд

Ерөнхийлөгчид Хонгорын асуудлаар дуудагдаж байсан сайдын хувьд төсвийн тодотгол батлуулснаараа сонгуулийн өмнөхөн намдаа гавьяа байгуулж, улс орноо инфляцийн хөлд даруулсан. Ямартай ч төсвийн тодотголоор төрийн албан хаагчдын цалинг хоёрдугаар сарын нэгнээс 80 мянган төгрөгөөр, дараагийн ээлжинд тавдугаар сарын нэгнээс 23 хувиар нэмэхээр болсон. Харин тэтгэвэр тэтгэмжийн хувьд 35 мянган төгрөгөөр нэмж, тэтгэврийн доод хэмжээг 140300 төгрөгөөр, хувь тэнцүүлэн тогтоосон тэтгэврийн доод хэмжээг 105200 төгрөг болгоход хувь нэмрээ оруулсан сайд. Хөгжлийн банкийг хөдөлгөж, Хүний хөгжил сангийн хөрөнгийг шийдэх гээд санаачилж эхлүүлээд байгаа ажил түүнд бий. Үүнээс гадна Сангийн сайдын хувиар татварын мэдээллийг ил тод болгохын тулд Үндэсний татварын албаны удирдах ажилтны зөвлөгөөнд оролцсон үгэндээ онцолсон нь бас л боломжийн байр суурь байлаа. Харин хамгийн сүүлд Ерөнхий сайд С.Батболдтой Япон улсад хийсэн айлчлалд явахдаа бага хүүтэй зээлээр хөрөнгө оруулах нөхцлийн санамж бичигт гарын үсэг зурсан зэргээр бага сага ажил амжуулсан ч бодит амьдрал дээр зай ч байна лай ч байна.

Ц.Дашдорж ЗТБХБ-ын сайд

Эрүүл мэндийн хувьд тааруу гэж адлуулж байсан энэ эрхэм харин ч ажлаа авснаас хойш гялалзаж байна. Хариуцсан яамандаа дэд сайд хийж явсны зангаргийг бусдадаа харуулах шиг болж байна гэхэд нэг их хэтрүүлэг болохгүй. Юутай ч ажлаа мэддэггүй ч айлын эрх хүүхэд шиг мөнгө нэхээд суучихдаг байсан өмнөх сайдынхаа дутууг гүйцээж яваа нөхөр. Сайд болсноосоо хойш ажлаа тун сурамгай хийж гүйцэтгэж, гацаанд орчихоод байсан 100 мянган айлын орон сууц хөтөлбөрийг хөдөлгөж чадсанаас үзэхэд яггүй эр бололтой. Үнэхээр ч Засгийн газраас бага дунд орлоготой иргэдээ орон сууцжуулах зорилгоор гаргасан хөтөлбөрийг эхлүүлж, барилгын салбарын хөгжилд томоохон хувь нэмэр оруулах нь дамжиггүй. Гараа сайн бол бариа сайн гэдэг. Тэр ч утгаараа энэ хүрээнд нэлээдгүй ажлыг амжуулсан. “Барилга 2012” үзэсгэлэн яармаг зохион байгуулж, 100 мянган айл орон сууц хөтөлбөрийн дэд бүтцийг хонгилын системд шилжүүлэх зэрэг олон ажилд гар бие оролцож, иргэдээ бага хувийн хүүтэй орон сууцанд оруулах гэж хэрэндээ гар сэтгэлээ зориулж явна. Нөгөө талаар дээрх хөтөлбөр хэрэгжсэнээр барилгын салбар сэв хийтэл босно. Энэ хэмжээгээр ажилгүйдэл багасна гээд хоёр, гурав дахь нүүдлийн цаадахыг харж суугаа. Нөгөө талаар өмнөх сайд нь ажил авсан л бол амжуулаад больдог болоосой гэсэн бодол ЗТБХБ-ын сайд Ц.Дашдоржийн хийж байгаа ажлаас үүдэн төрснийг энэ дашрамд нуух юун.

Д.Цогтбаатар БОАЖ-ын сайд

Гадаад харилцааны яамны төрийн нарийн бичгийн даргын суудлаа сайдын суудлаар сольсон түүнийг одоогоор хариуцсан салбартайгаа танилцах дадлагаа тун амжилттай хийж байгаа сайд гэж нэрлэж болно. Угтаа бол байгаль орчин нь сүйдчихээд байхад хотын хог шороо, цэвэр бохир усны байгууламжтай танилцаад байгааг үзэхэд аргагүй л хотын унаган хүүхэд гэхээс өөр тайлбар олдсонгүй. Гэхдээ түүнийг ажил байдалтайгаа танилцсанаас хойш хог ч багассангүй, цэвэрлэх байгууламжийн ч ажил урагшилсангүй, баахан хэвлэл мэдээллийнхнийг дагуулж шоу үсэргэхээс хэтэрсэнгүй.

Нөгөө талаар бүхэл бүтэн салбар хариуцсан сайд хүний зангаргаар жижиг хог шорооны асуудлыг нийслэлийн Засаг даргад үүрэг болгоход болохгүй гэх газаргүй юмсан. Магадгүй ирэх хаврын чуулганаар Байгаль орчны багц хууль гарахад ажлаа хийнэ гэж бодож байгаа ч ухсан нүх, сүйдсэн байгаль нь хуулиа хүлээхгүй сүйдэж дуусч байгааг эрх биш гадарлаж суумаарсан. Өмнө нь гадаад харилцааны яаманд ажилладаг байсан болоод ч тэр үү энэ салбартаа бусдаас илүүтэй хандаж “Аялал жуулчлал XXI зуун” чуулганыг зохион байгуулсан. Хэдийгээр аялал жуулчлалын асуудал улсын төсөвт багагүй хөрөнгө оруулалт олох боловч ухсан нүх, сэндийчсэн шороог үзэх гэж гадныхан монголд чуулахгүй нь ойлгомжтой бус уу, Сайд аа.

Н.Хүрэлбаатар Эрүүл мэндийн сайд

Эрүүл мэндийн салбар миний л үед мөхөж байна даа гэж егөөдөн хэлж байсан экс сайд С.Ламбаагийн халааг авсан Төрийн нарийн бичгийн дарга асан Н.Хүрэлбаатар өнөөдрийг хүртэл ямар ажил хийсэн нь тодорхойгүй сууна. Дөрвөн жил салбар яамандаа төрийн нарийн бичгийн даргаар ажилласан түүний хувьд эрүүл мэндийн салбарыг орчин үеийн зах зээлийн бүтцэд шилжүүлэх ажил юу юунаас илүү чухал баймаарсан. Гэвч УИХ-аар ногоон гэрлээр батлагдсан түүний одоогийн байр байдлыг ажиглаад байхад ЭМ-ийн салбарыг гал алдуулахгүйхэн шиг авч яваасай гэж залбирах л үлдэж дээ. Үнэхээр ч зах зээлийн системд нэвтэрч чадаагүй Эрүүл мэндийн салбарт ахиц гаргахыг хүлээж суусан нь талаар болох янзтай. Ерөнхийдөө түүний ажлын маршрут танилцах дадлага хийж ганц нэг аймгийн эмнэлгүүдээр явж, хүндэтгэлийн зоог барьснаас хэтрэхгүй. Мөн “Эрүүл хүүхэд” аян, хөхөнцөр вирусын эсрэг вакцины сурталчилгаа гээд товчхондоо тууз хайчилж, энд тэндэхийн эмнэлэг хэсч, эмзэг бүлгийн иргэдийг эрүүл мэндийн даатгалд хамруулна гэж сургалт семинар хийснээр хязгаарлагдчихлаа. Хатуухан хэлэхэд үхсэн амьд нь мэдэгдэхгүй сайдаар толгойлуулсан яамны үйл ажиллагаа өдөр өнгөрөөсөн, бусдаасаа долоон дор байгааг гүйцэтгэх засаглалын тэргүүн анхааралдаа авахад илүүдэхгүй бололтой.

"Өглөөний сонин"

Манай сайт танд таалагдаж байвал LIKE хийгээрэй. Танд баярлалаа.