“Их хөгжим нүргэлсэн өрөөнд суусаар байгаад бүр ядарч байна шүү. Дээрээс нь хоёр хоног унтаагүй. Ядарсан царайтай байна уу” гэснээр бидний ярилцлага эхэллээ.

-Ажил их байна уу?

-Тийм. Одоогоор “Universe Best Songs” уралдааны анхны ялагч, дуучин Ч.Цэлмүүний анхны цомгийн дууны хөгжмийг найруулаад сууж байна. Дээрх уралдаанд түүнийг оролцож байхад нь би шүүсэн. Тэр цагаас хойш Ч.Цэлмүүнийг сайн уран бүтээлч болно гэдэгт итгэсэн. Дууг нь найруулаад сууж байхдаа би үнэхээр зөв сонголт хийжээ гэж бодож сууна. Мөн “А-Sound”, “Lemons” зэрэг хамтлагийн дууг найруулж байгаа. Би амьд хөгжмийн хамтлагт илүү дуртай болохоор тэдэнтэй хамтарч ажиллахад сайхан байдаг.

-Та саяхан Сингапур яваад ирсэн. Нутаг тань өөрчлөгдөж үү?

-Өөрчлөгдсөн зүйл байна аа. Сайхан ч амраад ирлээ. Өссөн гэр минь тэнд байгаа болохоор үнэхээр сайн амарч чаддаг л даа. Ер нь би гэртээ очихоос бусад үед ерөөсөө амарч чаддаггүй юм. Ажил их болохоор аргагүй байх л даа.

-Ядаж ажлынхаа цонхоор харж, уран бүтээлийн санаагаа сэргээдэг биз дээ?

-Цонхоор харах ч зав гардаггүй юм дөө. Бичлэг дуусангуут ажилчидтайгаа ярих гэж яарна.

-Та чухам яагаад манай улсад ажиллахаар сонгосон юм бэ

-Сингапурт бүх урлаг сайхан. Гэхдээ сэтгэлээсээ хийдэг хүн ховор. Бүх зүйл нь бэлэн болохоор аргагүй байх л даа. Аль ч студид сайн дуучин, хөгжимчин байдаг. Гагцхүү тухайн дуучин нь бүтээлийнхээ хүрээг өргөжүүлье гэсэн сэтгэл гаргадаггүй. Харин танай нутагт гоё дуулдаг залуус сэтгэлээрээ ажилладаг нь таалагддаг. Бас хадам ээж энд байна (инээв).

-Гэргий тань энэтхэг хувцас өмсдөг. Яагаад тийм сонголт хийдэг юм бол?

-Би энэтхэг хүн шүү дээ. Гэхдээ аав, ээжийнхээ нутагт очиж үзээгүй. Миний бага насны дурсамж Сингапурт үлдсэн. Манайхан өөрийн үндэстэнтэйгээ гэр бүл болдог. Харин би монгол хүнтэй ханилж байна. Иймд эхнэр маань манай үндэсний хувцсыг өмсдөг.

-Та тэгвэл манай үндэсний хувцсыг өмсдөг үү?

-Үгүй. “Жалам хар” пивоны рекламд тоглохдоо л өмссөн юм байна. Эвгүй юм билээ шүү.

-Гэр бүлийнхэн тань таныг монгол хүнтэй ханилна гэхээр дургүйцээгүй юу?

-Эмээ маань их дургүйцсэн. Тэр үед эхнэрийгээ эмээтэйгээ уулзуулаагүй байлаа. Харин дараа нь уулзсанаас хойш тэс өөр болсон. Зарим үед надаас илүү хайрладаг. Одоо бид хоёр ханилаад гурван жил болж байна.

-Хэзээ хүүхэдтэй болох гэж байна даа?

-Юу ч гэсэн эхнэр маань төгсөөд ирэг. Тэгэхээр л болно доо. Хоёр жилийн хугацаа байна.

-Хаана сурч байгаа юм бэ?

-Уг нь Монгол банкинд ажилладаг байсан юм. Одоо Нью-Йоркт эдийн засагч мэргэжлээр докторантурт сурч байгаа. Эхнэр маань толгой сайтай. Харин минийх муу. Ийм бүсгүй сонгосондоо баяртай байдаг.

-Манай улсын хөгжмийн найруулагчдын ур чадвар таны бодлоор ямар хэмжээнд явна вэ?

-Дажгүй. Танайхан хэн нэгнийг нүүрэн дээр нь магтсан хэрнээ далдуур муулдаг. Миний хувьд хаана ч нэг хэвээрээ байж чаддаг. Иймээс би тэднийг тэр нь тийм, энэ нь ийм гэж хэлэхийг хүсэхгүй байна.

-Монгол дуу танд таалагддаг уу?

-Гоё. Шүлэг, ая нь үнэн тасархай.

-Тэгвэл юу дутагдалтай байна вэ?

-Амьд хөгжим. Амьд хөгжмийг сайн эзэмшсэн хүн цөөхөн байна. Тэд даанч дараагийн үедээ сургадаггүй. Бусад орны сайн уран бүтээлч ингэдэггүй. 10 гаруйхан настай хүү ямар сайн тоглодог гээч. Шууд ангайна.

-Монгол хэл хэр сурч байна вэ?

-Багш байхгүй болохоор сайн сурч чадахгүй байна. Тэгээд ч надтай харилцаж байгаа С.Наран, С.Сэрчмаа, Ж.Алтанцэцэг бүгд англиар сайн ярьдаг болохоор надад монгол хэл сурах шаардлага алга. Б.Ангирмаа л англиар ярьдаггүй байх.

-Уран бүтээлчдээс гадна хэр танилтай болж байна вэ?

-Цөөхөн. Чөлөөт цаг гарахгүй болохоор тийм байх л даа. Зав гарвал гэрээ цэвэрлэнэ, хоолоо хийнэ, хувцсаа угаана. Ганцаараа амьдарч байгаа болохоор ихэнх цагийг ажлынхаа өрөөнд өнгөрүүлдэг.

-Монголын тал нутгаар аялж байв уу?

-Хотын ойролцоо зусланд л гарч байсан. Тэгээд ч би ийш тийш явах дургүй. Надад утас, интернэт байхад л болно.

-Манай өвөлд дасч байна уу?

-Одоо дассан. Сингапурт очихдоо 40 градусын халуунд сууж чадахгүй хэрнээ энд ирэхээр зүгээр байдаг. Бас монгол үхрийн мах амттай. Сая Сингапур явсан чинь нутгийн үхрийн мах амтгүй санагдсан.

-Манай хоолонд тэгвэл дасчээ?

-Дасалгүй яах вэ. Монгол эхнэртэй хүн чинь дасахаас ч аргагүй. Миний идэх дуртай хоолны жагсаалтад цуйван ордог. Мөн халуун ногоотой, байцаатай хуушуур гоё.

-Та “Universe best songs” уралдааныг шүүдэг. Аль нэг оролцогчийнх нь ар гэрээс түүнийг жаахан дэмжээрэй гэх захиалга ирдэг юм биш биз?

-Үе үе гардаг. Гэхдээ би үүнийг эрс эсэргүүцдэг. Тогломоор санагдахдаа “Хэд гэсэн дугаартай оролцогч бэ” гэхээр тэд хэлнэ. Тэгэхээр нь “Өө тэр чинь дуулж чаддаггүй юм билээ” гэчихдэг.

-Энэ уралдааны үеэр таны хэлдэг үгнүүд нэг хэсэг моодонд орсон?

-Аливаа уралдааныг шууд сайн, муу гэж дүгнэх хэцүү. Харин гэхдээ, учир нь, гоё гэх мэт үг хэрэглэвэл уралдааныг чимж байгаа юм шиг санагддаг.

-Таныг манай иргэн болооч гэвэл зөвшөөрөх үү?

-Би монгол найз олонтой болж байна. Тиймээс татгалзах зүйл алга.

-Манай хамтлаг, дуучин дэлхийд хүлээн зөвшөөрөгдөхийн тулд яах ёстой вэ?

-Танай хэл олон улсынх биш учраас энэ талаар хэлэхэд эрт байна. Гэхдээ шинэлэг санаагаар уран бүтээлээ туурвидаг уран бүтээлч байгаа тул энэ эрч хүчээ алдахгүй байхыг хүсэе.

-Таныг гадуур явж байхад хүмүүс хэрхэн хүлээж авдаг вэ?

-Янз бүрээр. Тэгээд ч би хэн нэгэнд таалагдах гэж явдаггүй. Хамгийн гол нь сайн уран бүтээлчтэй, чанартай зүйл хийж ажиллах нь миний зорилго.

-Манай хамтлаг дуучдын дуунаас хэр сайн мэдэх вэ?

-Гайгүй мэднэ шүү. “Камертон” хамтлагийн дууг бүр сайн мэднэ. Энэ хамтлагийн дууг сонссоноор би танай улсад ирсэн юм шүү дээ.

-Чухам яаж тэдний дууг сонсов?

-Тэд манай улсад очиж цомгийнхоо дууг бичүүлсэн юм. Тэр үед би сонсч таарч Монголд сайн уран бүтээлч байдаг юм байна гэдгийг ойлгосон.

-Монгол бичиг сурах гэж байгаа тань хэвээрээ юү?

-Танай улсын иргэдийг монгол бичгээрээ бичдэггүйд нь их гайхдаг. Ийм сайхан бичигтэй юм чинь хэрэглэх хэрэгтэй. Надад энэ бичиг сайхан мэдрэмж төрүүлдэг. Хэдхэн үг ч болтугай бичиж суръя гэж бодож байгаа. Түүх, соёл нь ч гайхалтай юм билээ.

-Та их зарчимч юм шиг ээ?

-Тийм шүү. Манай студийнхэн сайн мэднэ. Ажлын шаардлагыг хатуу тавьдаг. Мөн өөрөөсөө шалтгаалах зүйлийг чин сэтгэлээсээ хийдэг. Хийсэн ажлаа дуусгаж байж л санаа минь амардаг. Надад “халтуурдана” гэсэн ойлголт байхгүй. Ажилдаа чин сэтгэлээсээ хандсан хүнд дуртай. Түүнчлэн ажлынхаа цагаар хүнтэй уулздаггүй сул талтай. Өнөөдөр өөрийг тань зориод ирсэн болохоор уулзаж байна. Тэгээд ч цайны цаг дөхсөн учраас.

-Цайныхаа цагаар дуртай цуйвангаа идэх гэж байна уу?

-Бараг тэгэх байх аа. Манай ажлынхан цайны цаг болохоор “Рагу цуйван захиалах уу” гэдэг.

-Таныг Сингапурт хэр олон хүн таних вэ?

-Мэргэжлийнхээ хүмүүсийн дунд тодорхой хэмжээгээр танигдсан. Танай улсад би шоу болгонд явж байдаг болохоор илүү таньдаг юм шиг байна билээ.

-Манай уран бүтээлчтэй хамтарч ажиллах ямар санагддаг вэ?

-Сайхан шүү. Гэхдээ цаг баримталдаггүйд нь уур хүрдэг. Одоо очлоо гээд хэдэн цагийн дараа ирж байгаа юм чинь. Аливаа амжилтын нууц цаг баримтлахаас эхэлдэг шүү дээ.

-Та цаашдаа энэ ажлаа хийгээд амьдрах уу?

-Одоогоор төлөвлөсөн зүйл алга. Ямар ч байсан эхнэр сургуулиа төгсөөд ирэг. Түүнээс бүх зүйл шалтгаална даа. Магадгүй өөр улсад амьдрах ч юм билүү.

-Сингапурт амьдарч байсан Рагу монголын Рагу хоёрын хооронд ялгаа байгаа юу?

-Энд тэндхийн шоунд оролцсон залуу байлаа. Олон ч найз охинтой. Харин энд ирээд сайхан гэр бүлтэй болж, амьдралаа авч яваадаа баяртай байна. Танай нутгийнхан “Сайн эмэгтэй сонгосон чи азтай хүн” гэж хэлдэг.

У.Баярсайхан