зорилгоор үе үе хэвлэлээр цухалддаг Х.Баттулгын хувийнх нь, улстөрийнх нь асуудлаас тэнгэр газар мэт ангид зүйл. Үнэхээр том асуудал. МоАХ фракцын тэргүүний хувиар нам дотроо самуун дэгдээх эсэх нь Ардчилсан намын л дотоод хэрэг. Нууц гэрээ бол Монгол Улс, цаашилбал 2.7 сая иргэний хувь заяатай хамаарах сэдэв. Энэ бол Х.Баттулгын гаалиар оруулж ирээд усанд хаясан чулуу мэт замхруулсан 17 чингэлэг спиртийн хэргээс огт өөр зүйл. Гаалийн баталгаат агуулахын хяналтын талбайд байсан 17 чингэлэг спирт 15 жилийн өмнө ганцхан шөнийн дотор ор мөргүй алга болсон түүхтэй. Гэрээг нууцаар байгуулсан нь “Тоглож байсан юм аа...” хэмээн замхруулах боломжгүй, төр, ард түмний эсрэг гэмт хэрэг. Тэрхүү спиртийн хэргээс бултаж зугтсан шигээ улс орны эрх ашиг хөндсөн нууц гэрээг булзааруулах гэж ниргэсэн хойно нь мянга хашгираад ч нэмэргүй. Ард иргэд үнэнийг ойлгож байгаа...

Сайд асан Х.Баттулга бултах газаргүй болсон юм биш үү. Төмөр зам барих талаар түүнийг гаднын компаниудтай нууцаар гэрээ байгуулсныг Хууль зүй дотоод хэргийн /ХЗДХ/ сайд илчиллээ. Дараа нь сайдтай гар нийлэн ажиллаж байсан нөхөд нь буюу Зам, тээвэр, барилга хот, байгуулалтын яамны /ЗТБХБЯ/ дэд сайд, газрын дарга нар баталлаа. Тэд гэрээг яамныхаа архиваас хайгаад ч, нууцын ажилтнаасаа асуугаад ч олоогүй гэдгээ хэвлэлийнхэнд дэлгэв.

Засгийн газрын хэрэг эрхлэх газрын дарга /ЗГХЭГ/ Ч.Хүрэлбаатар мөн ийм гэрээ хийгдсэн нь үнэн болохыг гэрчлэв. Мань хүн өөрөө үгүйсгэж бултуулаад байгааг эс тооцвол уг гэрээг нууцаар зөвшөөрч баталгаажуулсан нь бараг батлагдчихаад байна. Тэрбээр төмөр замын асуудлыг Засгийн газрын хуралдаанд гурван ч удаа гэнэт оруулах гээд бүтэлгүйтсэн. Х.Баттулга наанаа оросуудтай гэрээ байгуулна гэж амладаг ч цаанаа өөр хөрөнгө оруулагчидтай сүлбэлдэж явсан нь тодорхой болжээ. Төмөр зам, дэд бүтэц, 100 мянган айлын орон сууц, Сайншандын аж үйлдвэрийн цогцолборын хөрөнгө оруулалт бол толгой эргэм их мөнгөөр хэмжигдэх асуудал. Энэ ч утгаараа улс орны хөгжлийн нэг хэмжүүр болох учиртай. Нөгөө талаар хамтарч Засгийн газар байгуулсны үр шимийг энэ салбарт шингээх ёстой байлаа. Гэтэл мань сайд асан албан тушаалаараа бамбай хийн томоохон хөрөнгө оруулалтыг ашиг хонжоо унагах хэрэгсэл болгохоор зүтгэнэ гэж хэн санах вэ дээ. Үйл явдлыг ойлгомжтой болгох үүднээс шуугианд нэр дурдагдсан мэдээллийг огноогоор нь харуулъя.

-2010.06.24. Монгол Улсын Их Хурлын 32 тоот тогтоолоор “Төрөөс төмөр замын тээврийн талаар баримтлах бодлого”-ыг батлав.

-2010.11.03. Төслийн эхний үе шат болох Даланзадгад-Тавантолгой-Цагаансу варга-Зүүнбаян-Сайншанд-Баруун-УртХ өөт-Чойбалсан хүртэлх 1100 орчим км төмөр замын суурь бүтцийг барих тусгай зөвшөөрлийг Засгийн газрын 283 тоот тогтоолоор “Монголын төмөр зам” ТӨХК-д олгов.

-2011.01.20. ТӨХ-ны шийдвэрээр “Монголын төмөр зам” ТӨХК-ийн гүйцэтгэх захирал А.Батболдыг үүрэгт ажлаас нь чөлөөлж, гүйцэтгэх захирлаар Б.Батзаяаг томилов.

-2011.02.18. Төмөр зам барих тусгай зөвшөөрлийг тус компанийн гүйцэтгэх захирал Б.Батзаяад гардуулав.

-2011.03.24. Сөүл хотноо “Монголын төмөр зам” ТӨХК-ийн гүйцэтгэх захирал Б.Батзаяа, БНСУ-ын 19 компаниас бүрдсэн консорциумыг төлөөлөл “Төрөөс төмөр замын тээврийн талаар баримтлах бодлого”- ын нэгдүгээр үе шатыг хэрэгжүүлэх ажлын хүрээнд харилцан ойлголцлын санамж бичигт гарын үсэг зуржээ. Уг мэдээлэл тус компанийн www.mtz.mn сайтад албан ёсоор тавигдсан байна.

-2012.03.20. УИХ-ын гишүүн Х.Баттулга МҮОНТ-ийн шууд ярилцлагад оролцож, ХЗДХ-ийн сайд Ц.Нямдоржийг төмөр замын төслийн ажилд садаа болж байна гэсэн утгатай мэдээлэл цацав.

-2012.03.21. ХЗДХ-ийн сайд Ц.Нямдорж Х.Баттулгын БНСУ-ын консорциумтай төмөр зам барих талаар нууц гэрээ байгуулсныг илчиллээ.

Цаг хугацааны хувьд авч үзвэл Х.Баттулгын халаасны хүн Б.Батзаяа энэ компанийг тэргүүлэх болсноос хойш ажил нь гэрлийн хурдаар “өрнөжээ”. Төмөр зам тавих тусгай зөвшөөрөл өвөртөлсөн тэрбээр хамгийн түрүүнд Өмнөд Солонгосыг зорьж, хөрөнгө оруулагчидтай санамж бичиг үзэглэж амжсан байх юм. Сайд эрх ашгаа гар доорхи хүнээрээ дамжуулан гүйцэлдүүлсэн болохоор тэрхүү нууц гэрээг гялс гэгч нь баталгаажуулж орхиж. Нууц гэрээнд гурван баримт хамаарч байгаагийн нэг нь гэрээ, хоёр нь санамж бичиг аж. Гэрээ нь 23 хуудастай бөгөөд хуудас бүртээ нууц гэсэн дардастай юм байна. Харин энэ гэрээний талаар “үнэр” авсан ХЗДХ-ийн сайд Ц.Нямдоржийг “Та нар ажлаа монгол төрийн хуулийн дагуу явуулах ёстой. Хууль зөрчсөн ажиллагаанууд хийгдэж байна. Хууль зөрчих юм бол эргээд эвгүй байдалд Засгийн газар, асуудал хариуцсан сайд, албаны хүмүүс орно шүү. Наадах чинь асар өндөр өртөгтэй төсөл. Тендер шалгаруулдаг журмаар яваарай...” гэж Засгийн газрын хуралдаан дээр сануулсаар байтал ар хударгаар нь ийм хэрэг дэгдээжээ. Ингээд нэгэнт олны өмнө ил болсон төмөр замын төслийн талаархи нууц хэргийг айх, ичих булхайгүйдээ л Ц.Нямдорж сайд илчилчихсэн болохоос биш яг мөн чанартаа Х.Баттулга, С.Баярцогт нарын намдаа эзэрхийлэх байр сууриа булаацалдсан эрх мэдлийн төлөөх дайн явагдаж байгаа юм.

Төмөр замын төсөлд шаардлагатай санхүүжилтийн асуудлаар Х.Баттулга Хөгжлийн банкинд хэдэн бичиг баримт бүрдүүлж өгчээ. Тэрхүү бичиг баримтад төмөр замын төслийг “Маккенси” компаниар хийлгэж зардалд нь 15 сая ам.доллар төлнө, үүний 2.5 саяыг нь өөрийн зөвлөх Ганбатын хувийн компанид хуулийн зөвлөгөө өгсний хөлсөнд өгнө хэмээн танилцуулсан байжээ. Хөгжлийн банк сайдын хүссэнчлэн ажлыг нь бүтээж өгсөнгүй. Түүний энэ эх захгүй хүсэлд тухайн үеийн Сангийн сайд С.Баярцогт тээг болон суучихсан юм. Төлөвлөгөө нь бүтээгүйд шаралхсан ЗТБХБын сайд асан Х.Баттулга Хөгжлийн банкныхныг муу үгээр баалж эхэлсэн нь хэвлэлийн хуудсанд тодхон үлджээ.

“Байгуулагдсанаасаа хойш нэг ч төгрөгийн хөрөнгө босгож амжаагүй, дэд бүтцийн аль ч төслийг санхүүжүүлэх талаар тодорхой мэдээлэлгүй байсныг нь би л гэнэтийн шалгалт хийн илрүүллээ...” хэмээн ярилцлага өгч байсан тэрбээр Хөгжлийн банкаар дамжих хөрөнгө оруулалтад эрх мэдэлгүй болсон бухимдлаа тайлж байгаа нь энэ юм. Бухимдал, хорон үгийг хаягласан эзэн нь Сангийн сайд байв. Ардчилсан нам доторхи нам гэгддэг “Алтан гадас” фракцын идэвхтэй гишүүдийн нэг С.Баярцогт, ҮЗХ-ны 228 гишүүний 86-г нь эгнээндээ багтаадаг МоАХ фракцын толгойлогч Х.Баттулга нарын хооронд эрх мэдлийн төлөөх тулаан ингэж эхэлжээ. Тэдний зорилго нь нам доторхи нөлөөгөө улам бататгах, улмаар сонгуульд фракцаасаа олон хүн нэр дэвшүүлэх явдал. Бүр цаашилбал “Женко”-гийн ирээдүйн Ерөнхий сайд болох далд хүслийн илэрхийлэл энэ тэмцлийг өдөөсөн хэрэг. Эрх мэдлийн төлөөх шунал нь түүнийг ямар ч үнээр хамаагүй нууц гэрээ байгуулж, хөрөнгө оруулалтын томоохон төслүүдээс хувь хүртэж, бүхнийг хяналтдаа байлгах зорилгод хөтөлжээ. Харамсалтай нь, түүний эрх мэдлийн төлөөх сонирхол нь савнаасаа хальж улс орноо дэнчин тавих хэмжээнд хүргээд байна.

Улс орон, ард түмнийхээ эрх ашгийг дээдэлдэг хэн ч болов ийм хөрөнгө оруулалтад Засгийн газраасаа зөвшөөрөл авалгүй толгой мэдэн, дур зоргоор аашлахгүйсэн. Гэтэл тэр өчигдөрхөн хэвлэлийнхнийг цуглуулсан мэдэгдэлдээ гэрээтэй зөвхөн танилцсан болохоос яг таг баталсан зүйлгүй хэмээв. Уг нь бидний мэдэх монгол хэлээр орчуулан ойлговол танилцсан, зөвшөөрсөн гэдэг үгс “тийм, тэгье” гэдэг үгийг илэрхийлэхгүй гэж үү. Ийн асуусан сэтгүүлчийн асуултад эрхэм гишүүн их л омогтойгоор “Би эдгээр үгийг өөрөөр ойлгодог...” хэмээн муйхарласнаас цааш эс халив. Ийн сайд асны эрх хүүхэд шиг аашлах ганцаарчилсан тоглолт өнөөдөр улс орон, ард түмний эрх ашгийг үнэ цэнэгүйдүүлэх хэмжээнд хүрээд байна. Нууцаар гэрээ байгуулна гэдэг бол захын нэг намын буюу Ардчилсан намын дарга Н.Алтанхуягийг унагах зорилгоор үе үе хэвлэлээр цухалддаг Х.Баттулгын хувийнх нь, улстөрийнх нь асуудлаас тэнгэр газар мэт ангид зүйл. Үнэхээр том асуудал. МоАХ фракцын тэргүүний хувиар нам дотроо самуун дэгдээх эсэх нь Ардчилсан намын л дотоод хэрэг.

Нууц гэрээ бол Монгол Улс, цаашилбал 2.7 сая иргэний хувь заяатай хамаарах сэдэв. Энэ бол Х.Баттулгын гаалиар оруулж ирээд усанд хаясан чулуу мэт замхруулсан 17 чингэлэг спиртийн хэргээс огт өөр зүйл. Гаалийн баталгаат агуулахын хяналтын талбайд байсан 17 чингэлэг спирт 15 жилийн өмнө ганцхан шөнийн дотор ор мөргүй алга болсон түүхтэй. Гэрээг нууцаар байгуулсан нь “Тоглож байсан юм аа...” хэмээн замхруулах боломжгүй, төр, ард түмний эсрэг гэмт хэрэг. Тэрхүү спиртийн хэргээс бултаж зугтсан шигээ улс орны эрх ашиг хөндсөн нууц гэрээг булзааруулах гэж ниргэсэн хойно нь мянга хашгираад ч нэмэргүй. Ард иргэд үнэнийг ойлгож байгаа.

Н.Цэц

www.UNEN.mn

НУУЦ ГЭРЭЭ бол усанд хаясан чулуу мэт замхарсан 17 чингэлэг спиртийн хэргээс өөр шүү
Tweet
Bolod.mn