“Цалинг гурав дахин нэмэгдүүлж, 5 жилд нийтдээ 140 мянган орон сууц барьж ашиглалтад оруулна”

2012-04-06

-2008 оны сонгуульд АН, МАН-аас гаргасан мөрийн хөтөлбөрөөс-

Дөрвөн жил Засгийн эрхийг хамтран барьсан АН, МАН хоёр тухайн үед чухам юу амлаж байсныг таньд эргэн сануулж буй.

Ингээд эрх баригч болохын төлөө тэд нийгэмд хэрэгцээ шаардлагатай байгаа эмзэг асуудлуудыг хэрхэн хөндөж, та бидний сэтгэлийг худал хуурмаг үгсээр яаж хуурсныг дараах амлалтуудаар дахин сөхье.

МАН-ЫН МЯНГУУЖИНГУУД ЮУ ГЭЖ АМЛАВ?

“Иргэн бүр сэтгэл хангалуун амьдрах эдийн засаг, нийгмийн нөхцлийг бүрдүүлнэ. Үнэ ханшны өсөлт, өөрчлөлтийг тухай бүр тооцож, цалин тэтгэвэр, тэтгэмжийг үе шаттай өсгөж 2012 он гэхэд одоогийнхоос 3 дахин нэмэгдүүлнэ. Үнэ, тарифыг зохиомлоор өсгөхийг хязгаарлана. Иргэн бүр тогтвортой орлоготой байх эдийн засгийн орчин бүрдүүлж, 2012 онд дундаж өрхийн сарын орлогыг нэг сая төгрөгөөс дээш болгох боломжийг хангана”

Үнэ тарифын зохиомол хөөрөгдөл гээч нь тэнгэрт хадчихаад байгаа энэ үед МАН-ын энэхүү амлалт хэр үнэн болоод бодитой болох талаар яриад ч хэрэггүй биз. Цалин энэ хугацаанд хоёр дахин нэмэгдсэн. Харин өдгөө цалинг гурав дахин нэмэгдүүлэх боломж байхгүй гэж хэлж байгаа нь намууд мөрийн хөтөлбөрөө ямар нэгэн эдийн засгийн үндэслэлгүй гаргадаг болов уу гэх хардлагыг төрүүлдэг юм.

“Гэр бүл, хүүхдийг дэмжих бодлого хэрэгжүүлнэ. Шинээр гэр бүл бологсод, шинэ төрсөн хүүхдэд төрөөс олгож буй мөнгөн тэтгэмжүүдийг үргэлжлүүлж, шинээр 3 дахь хүүхдээ төрүүлсэн гэр бүлд 300 мянган төгрөгийг нэг удаа, Алдарт эх-II одонтой эхэд 500 мянга, Алдарт эх-I одонтой эхэд 1 сая төгрөгийн тэтгэмжийг жил бүр олгоно”

Хавтгайруулсан халамж хэрээс хэтэрсэн ч харин хэрэгтэй хүмүүстээ хүрч чадаагүй нь дээрх амлалт ажил болж чадаагүйгээс харагдана. Монголын хүн амыг улам олон болгоход бодлогоо чиглүүлэх байтал ажилгүйдэл, ядуурал, залхуурлыг дэмжсэн бодлого явуулсны дүнд өдгөө ядуурал 37 хувьд хүрээд байгаа юм.

“Мал аж ахуйн үйлдвэрлэл, бизнесийг дэмжиж, малчид хөлжих, мэдээлэл технологийн боловсролоо дээшлүүлэх боломжийг сайжруулна. Бага оврын 8 мянган тракторыг дагалдах тоног төхөөрөмжийн хамт малчдад хөнгөлөлттэй үнээр олгоно. Малчин бүрийг нийгмийн даатгалын нэрийн данстай, эрүүл мэндийн даатгалтай болгоно. Малчдыг малын хөлийн татвараас чөлөөлж, энэ мөнгөөрөө малынхаа тэжээлийн нөөцийг бүрдүүлэхэд зарцуулна. Хөдөөг хөгжүүлэх зорилгоор сум бүрийг 50 саяас доошгүй төгрөгийн эх үүсвэр бүхий “Сумын хөгжлийн сан”-тай болгоно. Сүү, цагаан идээгээр дотоодын хэрэгцээгээ бүрэн хангаж, мал аж ахуйн гаралтай түүхий эдийг дэлхийн түвшингийн технологиор боловсруулж дотоод, гадаадын зах зээлд нийлүүлнэ”

Хамаг малаа барьцаанд тавьчихсан малчидын амьдрал энэ дөрвөн жилд хэр сайжраа бол. МАН Монгол Улсын 329 сумдын 74 хувьд нь засаг барьдаг. Гэтэл одоог хүртэл сумдын хөгжилд ямар ч ахиц гарахгүй хэвээр.

“Их барилга, хот байгуулалт, орон сууцны төлөвлөлтийн оновчтой бодлого хэрэгжүүлнэ. Орон сууц барих санхүүгийн эх үүсвэрийг нэмэгдүүлж, орон сууцны урт хугацаатай зээлийн анхдагч болон хоёрдогч зах зээлийн тогтолцоог бий болгон орон сууцны урт хугацааны зээлийн жилийн хүүг 6 хувь хүртэл бууруулж, эргэн төлөгдөх хугацааг 25 жил болгоно”

Дөрвөн жилийн турш унтаа байдалд байсан энэ асуудлыг сонгуулийн өмнөхөн сэрээж, муйхраар зүтгүүлэн өнөөх зээлээ эхлүүлэхээр болсон. Гэвч арилжааны банкууд ч, иргэд ч, барилгын компаниуд ч бэлэн бус. Харин ч зургаан хувийн хүүтэй зээлийн сургаар орон сууцны үнэ хэт хөөрөгдөлд орж, жирийн иргэд л дахиад дунд нь хохирч үлдэх шив. Сонгуулийн амлалт сонсоход сайхан ч амьдралд дандаа гай тарьдагийн нэг жишээ энэ билээ.

АН-ЫН МЯНГУУЖИНГУУД ЮУ ГЭЖ АМЛАВ?

-Иргэдийг орон сууцаар хангах хөтөлбөрийг бодит ажил болгож, залуу гэр бүл болон орлого багатай иргэдэд зориулсан орон сууцны зээлийн бодлого хэрэгжүүлнэ.

Үндэсний статистикийн хорооноос нийт өрхийн 13,3 хувь нь өөрийн сууцгүй хэмээн мэдээлсэн. Хоёр намын амлалт хоёулаа иргэдэд нэн хэрэгцээ шаардлагатай байгаа зүйлүүдийг онцолсон байгаа нь “эмзэг газарт нь хатгаж тоглох”-той зүйрлэж болмоор санагдана.

-Ирэх 5 жилд нийтдээ 140 мянган орон сууц барьж ашиглалтад оруулна.

АН мөрийн хөтөлбөрөө зохиохдоо ямар нэгэн судалгаа, шинжилгээ ашигладаг эсэх нь тун эргэлзээтэй болохыг энэ амлалтаас харж болно. Засгийн газар 100 мянган айлын орон сууц хөтөлбөрөө одоог хүртэл ажил хэрэг болгож чадаагүй л байгаа шүү дээ.

-Амьжиргааны баталгаажих доод түвшин гэх ойлголтыг аажмаар халж, дундаж орлоготой өрхийн тоог нийт өрхийн 60-аас дээш хувь хүртэл нэмэгдүүлнэ.

Ядуурал 37 хувьд хүрч, дундаж орлоготой иргэд нь харин ч доошлох зам нь “шулуудаад” буй нь энэ амлалт хэр үр дүнгээ өгснийг гэрчлэх биз. Амьжиргааны түвшин дээшлэх нь бүү хэл улам доошилж буйг нөөцийн мах болон 21 мянгад дугаарлах иргэдийн тоо бэлхнээ гэрчлэх билээ.

-Эх орны түүхий эдэд түшиглэсэн бензин шатахуун үйлдвэрлэх хүчин чадлыг бий болгож, дотоод хэрэгцээгээ ойрын 5 жилд багтаан хангах зорилт хэрэгжүүлнэ.

Манай улс өнөөдрийг хүртэл нефть импортынхоо 98 хувийг ОХУ-аас, 1 хувийг БНХАУ-аас, 0,6 хувийг БНСУ-аас мөн Казахстанаас багахан хувийг импортолж байна. Нефтийн бүтээгдэхүүний худалдааны зах зээл дээр монопольчилж буй цөөхөн компаниуд валютын ханшийн зөрүү мэтхэн дээр үнээ өсгөн иргэдийн “халаасаар тоглосон” хэвээр л байна.

Хэдийгээр дөрөвхөн жил үлдсэн ч энэ мэт амлалтуудыг тухайн үед өгч байсныг хүн бүхэн санаж байгаа нь юу л бол. Одоо бид энэ хоёр намаас амласнаа биелүүлсэн байх шаардлагыг тавьж, хэрвээ биелүүлж чадаагүй бол энэ сонгуулиар хийх сонголтоороо хариуцлага тооцох цаг хэдийнээ иржээ. Сонгуулиас сонгуульд, тойргоос тойрог дамжин худал залж явдаг эрхэм гишүүдийн Мянгуужин байх хугацааг дуусгамаар санагдана.

О.Ариунбилэг

gogo.mn