Жолооч утсаар ярьж байснаа “Ингэхэд чи миний хажууд хэн сууж явааг таа даа. Катя Пушкарева дүрээрээ байна” гэж хэлэв. Өөрийнх нь тухай ярихыг сонсоод хар шил зүүж, саравчтай малгай өмссөн Нелли Уварова цочсондоо үг ч дуугарч чадсангүй.

Хээгүй жолооч жүжигчин бүсгүйд эвгүй байгааг анзаарсангүй шууд л “Хөөрхөн төрөх албагүй” цувралын тухай хэрэгтэй хэрэггүй баахан зүйл ярьж, бас түүнээс Андрейд тоглосон Григорий Антипенкотой гэрлэх гэж байгаа эсэхийг нь асууж амжив. Гэхдээ тэрбээр жүжигчин бүсгүйг очих ёстой газар нь хүргэж өгсөн хэдий ч унааны хөлс авахаас татгалзжээ.

Түүний хувьд нэрд гарсан жүжигчинтэй тааралдсан нь нэр төрийн хэрэг байсан аж. Нелли жолооны ард суух дургүй ч энэ явдлын дараа машин худалдаж авсан гэдэг. Уг нь хуучин нөхөр нь түүнийг нийтийн тээврийн унаагаар явахыг хорьдог байсан юмсанж. Тэрбээр “Хөөрхөн төрөх албагүй” телецувралд тоглож байхдаа Сергей Пикаловтой гэрлэсэн боловч зарим үзэгч яагаад ч юм бэ түүнийг Григорий Антипенкод сэтгэл алдарсан гэж ярьжээ. Жүжигчин бүсгүйг бас “Атлантида” телецувралын найруулагчтай нь янаг амрагийн холбоотой болсон ч гэдэг. Юутай ч энэ жил тэрбээр 31 нас хүрч, анхны хүүхдээ төрүүлжээ.

Хяналтаас гаргаж болохгүй тэмцэл

Тэрбээр Кино урлагийн дээд сургуульд суралцан төгссөнийхөө дараа Оросын залуучуудын эрдмийн театрын жүжигчин болов. Театрт ирээд анх түрүүн жүжигчин Сергей Пикаловтой танилцсан юмсанж. Ухаалаг харцтай, нөхөрсөг хөгжилтэй яриа хөөрөөтэй энэ өндөр залуу түүнийг найруулагчид зэмлүүлэх бүрийд дэргэд нь ирж тайвшруулан кофегоор дайлдаг байв. Аажмаар тэд сайн найзууд болжээ.

“Хөөрхөн төрөх албагүй” телекиног хийх хүртэл тэдний харилцаа энгийн найз нөхдийн үерхэлээс хэтэрсэнгүй. Тэгтэл гэнэт Сергей ажилдаа үзэгдэхээ болив. Сураг сонсвол тэрбээр нэг телевизийн кино найруулахаар зэхэж байгаа аж. Үнэхээр хаврын урь эрт орсон тэр жил Сергей Пикалов “Царай муут Бетти” цувралын орос хувилбарыг хийх санал хүлээн авчээ.

Киноны продюсер, найруулагчид гол дүрийн жүжигчинг сонгох сорилго ид өрнөж байх үед Ирина Муравьева тэдэнд Нелли Увароваг санал болгосон гэдэг. Тэрбээр өмнө нь Залуучуудын театрт очиж жүжиг үздэг байсан тул дотоод сэтгэлийн илэрхийлэл, хувирал сайтай залуухан жүжигчин бүсгүй Неллиг мэддэг болжээ. Сергей Пикалов ч нэрт жүжигчний саналыг зөвшөөрч найруулагчид зэмлүүлэх болгондоо нэг буланд очоод дуугүй суучихдаг том нүдтэй мөнөөх бүсгүйг студид авчран сорилгод оруулсан аж. Нелли Уварова шалгаруулалтанд тэнцэж, Катя Пушкаревагийн дүрд тоглохоор болжээ. Киноны зураг авалтын үеэр Сергей чин сэтгэлээсээ Неллид дурлаж орхив. Тэрбээр цувралын нэг ангийн зургийг авч дууссан орой бүсгүйг зоогийн газар урьсан аж. Залуус зоогийн газрыг үүдээ барьтал нь сууж, дараа нь Нелли Уваровагийн гэрт очжээ. Бүсгүйн аав нь барилгын инженер, ээж нь эдийн засагч боловч ихэнх цагаа хүүхдүүдэд спортын гимнастик заах ажилд зориулж ирсэн гэдэг.
Орос, армян гаралтай энэ гэр бүл Литвагийн Мажейкяй хотод аж төрж байхдаа хоёр дахь охин Неллиг төрүүлжээ. Хожим тэд Москвад нүүн ирж суурьшсан аж. Нелли жүжигчин болсныхоо дараа аав ээжээсээ өрх тусгаарлан хоёр өрөө байр худалдан авчээ. Тэрбээр энэ шинэ байрандаа Сергейг урьсан аж. Тэд үүр цайтал ярьж хонов. Нелли Уварова “Тэгэхэд би амьдралдаа анх удаа амрахыг мэдэхгүй чалчиж билээ. Бид миний шинэ байрнаас эхлээд гадаад орноор хийх аялалын минь тухай гээд элдвийн зүйл ярьсан. Харин шинээр хийж байгаа киноныхоо талаар л огт яриагүй юмдаг” гэж дурсчээ.

Энэ үеэс залуус салж хагацахаа больсон гэдэг. Гэхдээ тэд анхандаа дотно харилцаагаа бусдаас нууж байв. Өглөө ажилдаа цуварч ирнэ. Оройдоо цуварч харьдаг байв. Тэд харилцаагаа удаан нууж чадсангүй. Нэг л өдөр найруулагч жүжигчин хоёр гэрлэхээр шийдсэнээ нийтэд мэдэгджээ. Залуусын хуриманд кинонд тоглосон бүх жүжигчин ирсэн гэдэг. Тэд бал сарын аялалаараа Итали явсан аж. Төд удалгүй кино хийх ажил ч дуусч уг цуврал телевизийн дэлгэцээр гарч Нелли Уварова ч алдаршив. Харин Сергей тэр хоёрын амьдралд цав гарч эхэлжээ. Найруулагч залуу эхнэртээ жүжигчний ажлаа хэсэг зуур орхиж, хүүхэд төрүүлж, гэр бүлдээ цаг гаргахыг шаардсан аж.

Нелли нөхрийнхөө хүсэлтийг хүлээж авсангүй. Тэрбээр ид хүчээ авч байгаа уран бүтээлээ замын дунд орхихыг хүссэнгүй. Эцсийн эцэст тэдний зөрчил улам хурцдаж, Сергей нэг сайхан өдөр театрынхаа залуухан оёдолчин Анастасия Пугашкина гэгч бүсгүйтэй амрагийн холбоотой болжээ. Энэ бүхнийг Нелли мэдээгүй юм шиг өнгөрөөж байсан ч мөнөөх оёдолчин бүсгүй хөл хүндтэй болсныг сонсоод арга буюу нөхрөөсөө салахаар шийдсэн аж.

Ийнхүү тэдний дөрвөн жилийн хамтын амьдрал хоёр тийш болжээ. “Энэ салалт амьдрал бол хяналтаас гаргаж болдоггүй тэмцэл юм гэдгийг надад ойлгуулж өгсөн. Би арай илүү анхааралтай байсан бол гэр бүлээ авч үлдэж чадах байлаа” гэж Нелли Уварова хэлсэн аж. Сергей хүүхдийнхээ ээжтэй гэрлэж, Нелли театрынхаа жүжигчин залуу Денис Баландинтай дотно харилцаатай болсон талаар сонин хэвлэлд бичиж байв. Мөн эхнэрээсээ гэрлэлтээ цуцлуулаад удаагүй байгаа Денис Баландин үнэт эдлэлийн дэлгүүрээс хоёр алтан бөгж авсан тухай ч мэдээлсэн аж. Үүний зэрэгцээ Нелли нэрт жүжигчин Александр Гришинтэй нэр холбогддог болжээ.

Зөвхөн миний хүүхэд

Нелли Уварова “Атлантида” телецувралд тоглосныхоо дараахан хөл хүндтэй болсон аж. Энэ мэдээ хэрэгт дуртай хүмүүсийг гайхшруулж байв. Бас үүнтэй зэрэгцэн түүнийг хуучин нөхөртэйгээ нэгэн цайны газар сууж байхад нь “Экспресс газета” сонины гэрэл зурагчин зургийг нь сэмхэн авах гэж байгаад санамсаргүй мэдэгдэж Сергейн уурыг хүргэсэн тухай мэдээлэл таржээ. Сергей Пикалов зүгээр нэг уурласангүй нөгөө зурагчинг нэвширтэл нь зодож улмаар цагдаагийн газар хүргэгдсэн байна.

Гэхдээ Уварова зурагчны хохиролыг барагдуулж, экс нөхрөө цагдаагийн газраас гаргажээ. Үүнийг сонссон Анастасия Пугашкина галзуурталаа уурлаж Неллигийн толгойтой үснээс золтой л зулгаачихаагүй гэдэг. Тэдний дэргэд байсан Денис Баландин хоёр бүсгүйн дундуур орсноор Нелли Уварова эсэн мэнд үлджээ. Энэ явдлын дараа Неллигийн охины эцэг нь Сергей Пикалов байж магадгүй гэсэн яриа тарав.

Телевизийн нэг сурвалжлагч ярилцлагынхаа үеэр Уваровагаас хайр дурлалын тухай, охиных нь эцгийн талаар асуухад “ Энэ бол зөвхөн миний хүүхэд. Би хүүхдээ эрүүл чийрэг боловсролтой сайн хүн болгож өсгөж чадна гэдэгтээ итгэлтэй байна. Хайр дурлал бол борооны дараа татсан солонго л гэсэн үг” хэмээн хариулжээ.

Театрынхан нь ч түүний хүүхдийн эцэг хэн болохыг сайн мэдэхгүй. Сүүлийн үед энэ оны сүүлчээр зул сарын баярын өмнө Нелли, Денистэй гэрлэж магадгүй гэсэн яриа тараад байгаа аж. Зарим хорон хэлтэй хүмүүс Нелли эхнэр хүүхэдтэй жүжигчин Александр Гришиний охиныг төрүүлсэн болохоор бүхнийг нууцалж байгаа гэх нь бий. Түүнтэй Сергей Пикалов үе үе ирж уулзсан хэвээрээ аж. Тэд уран бүтээлийнхээ хажуугаар одоогоор өнчин, эдгэршгүй өвчин туссан хүүхдүүдэд зориулсан интернэт дэлгүүрийн төсөл дээр хамтран ажиллаж байгаа юм. Харин Нелли Уварова Денис Баландин хоёрын “Нотолгоо” гэсэн жүжигт хамт тоглож байхдаа үнсэлцсэн зураг олон сонин хэвлэлд гарчээ.

П.Шагай /Mongolnews.mn/