“Бүхнийг өөрчилсөн хүн” кино дэлгэцнээ гарахын өмнөхөн Брэд Питт шинэ дүрийнхээ тухай хэвлэлээр далд сурталчилгаа хийхээр ярилцлага өгсөн юм. Гэхдээ тэр ярилцлагадаа Женнифер Энистонтой хамт амьдарсан он жилүүдээ “Уйтгартай, өрөвдөлтэй” гэж тодорхойлсон нь шуугиан тарьсан билээ.

“Женнифер бид хоёр хамтдаа байхад би их уйддаг байж. Буйдан дээр архайж хэвтчихээд, бүтэн өдрийн турш тамхи баагиулна. Тэгээд ч хэвлэлийн элдэв шар мэдээнээс залхаж, бүх зүйлээс уйдчихсан юм шиг санагдаад байв. Удалгүй би сонирхолгүй амьдарч байгаагаа ойлгосон. Миний бодлоор үүнд гэрлэлт багагүй үүрэг гүйцэтгэсэн” гэж Брэд Питт тэрхүү ярилцлагадаа өгүүлсэн юм.

Энэ ярилцлагыг уншсан хүн бүр “Хаяад явчихсан хэрнээ бас муулж чадна аа. Муу эр байна даа” гэсэн сэтгэхүйтэй болсон биз. Хэвлэлийнхэн ч энэ ярилцлагыг олон талаас ухаж төнхөн, дэлхий даяар Брэд Питтийн хэн болох тухай яриа өрнөж эхэлсэн.
Эвгүй байдалд орсон Брэд Питт дахин томоохон ярилцлага өгч өмнөх ярианыхаа утгыг тайлбарлаж, уучлал гуйхад хүрсэн билээ.

“Миний үгийг хэвлэлийнхэн гуйвуулжээ. Женнифертэй хамт байхад уйтгартай байсан гэж би хэлээгүй. Тухайн он жилүүд уйтгартай байсан л гэж хэлсэн. Женнифер бол сайхан сэтгэлтэй, сайн бүсгүй. Одоо хүртэл миний сайн найз хэвээрээ л байгаа. Тэгээд ч Женнифер Энистон энэ ярилцлагын талаар надтай нэг ч үг солиогүй гэдгийг албан ёсоор хэлмээр байна” гэж Брэд Питт удаахь ярилцлагадаа дурьдсан юм. Ийнхүү бараг ярилцлага өгдөггүй Брэд Питт нэг ярианыхаа төлөө хэвлэлээр хоёр ч удаа баатар болоод амжсан. Түүний Hello сэтгүүлд нэгэн ярилцлага өгснийг нь хөрвүүлэн хүргэж байна.

- Брэд, таныг өмнө нь огт ярилцлага өгдөггүй байсан хэрнээ гэнэт амаа авсан морь шиг хэзээ зогсохоо мэдэхгүй дараалан ярилцлага өгөх боллоо хэмээн шүүмжлэх болжээ...

- Амаа үдээд суулаа ч, ярилцлага өглөө ч үнэндээ ялгаагүй л дээ. Миний тухай байнга л бичиж байдаг юм чинь. Та өөрөө бод доо. Анжелина бид хоёрыг салсан тухай, хуримаа хийсэн талаар, дахиад хүүхэд үрчилж авах гэж байгаа тухай, бүр зодоон хийсэн гэж хүртэл хичнээн удаа хэвлэлээр мэдээ гарсныг та анзаарсан уу? Ийм олон мэдээ гарсаар байтал би үнэндээ амаа нээхгүй суугаад байх нь надад гомдолтой ч юм шиг. Би ярилцлага өгч, үгээ хэлж байж л, Женниферийг доромжлоогүй гэдгээ олонд ойлгуулж, Анжелинагаа хайрлаж явдгаа баталж байна. Анжелина бид хоёр хэвлэлээр ингэж их муулуулж, ад үзэгдэх зүйл огт хийгээгүй. Хүүхдүүдээ өсгөж, ажил хөдөлмөрөө эрхлээд, өөрийнхөө замаар л явж байна. Гэтэл гэнэт зөв явж буй амьдралыг нь буруу гэсэн хүний өмнө тайлбар хийх болчихоод байдаг. Женниферийн хувьд ч би түүнийг хүндэлдэг, одоо хүртэл сайн найзаа гэж бодож явдаг гэдгээ хэлэх хэрэгтэй болсон.

- Та “Амьдралын мод”, “Бүхнийг өөрчилсөн хүн” зэрэг олны анхаарлыг төдийлөн татамгүй сэдвээр бүтээж буй кинонд тоглох болжээ. Та эрсдэлээс нь айхгүй байна уу?

- Энэ бол эрсдэл биш ээ. Энэ бол ухаалаг алхам. Зөв сонголт гэж хэлмээр юмуу даа. Үүндээ би итгэлтэй байгаа шүү. Сургуульд байхдаа спортын бүхий л төрлөөр оролдож, муугүй амжилт үзүүлж байлаа. Гэхдээ би нэг л зүйлээр дагнаж, ганц л юмны төлөө зүтгэхийг хүсээгүй юм. Ер нь би тийм хүн л дээ. Нэг хийсэн зүйлээ дахин давтан хийх тун дургүй. Гэртээ жолооны үнэмлэхээ мартчихаад гарснаа үүдэн дээрээ санасан ч гэсэн эргэж авдаггүй хүн. Өөрийгөө хүчилж чаддаггүй гэх үү дээ. Би хаашаа явах, хэзээ ажиллах, юу хийхээ яг мэдэрсэн тэр үедээ л бүхнийг эхэлдэг. Энэ мэдрэмж л намайг их сургуулиа төгсөхөөс хоёрхон долоо хоногийн өмнө Калифорни руу хоосон халаастай, эвдэрхий машинтай явуулсан байх. Тэгж явсныхаа хүчинд би өдий зэрэгт хүрсэн.

- Таны тоглосон шинэ кино бэйсболын тухай юм билээ. Та өөрөө энэ спортод дуртай юу?

- Үгүй ээ, тоглох дургүй. Зурагтаар ч үздэггүй. Сургуульд байхдаа нэг тоглож байгаад яг нүүрэндээ бөмбөгөөр нь хүчтэй цохиулчихсан юм. Тэгдээ 18 оёо хийлгэж, жижиг сорви үлдсэн. Цус болчихсон гаднаас орж ирэхэд ээж минь намайг уйлаад угтсаныг тодхон санаж байна. Би теннис, Европын хөлбөмбөгийг түлхүү сонирхдог байсан.

Сагсанбөмбөгт бас дуртай. Эцэг маань бэйсболын тоглолтын тасалбар хэтэрхий үнэтэй тухай, энгийн ажилчин хүн авахын аргагүйн зовлонг байнга үглэдэг байж билээ. Тэгэхээр бэйсбол үзнэ гэдэг бол гэр бүлийнхээ мөнгийг үрж байна гэж би ойлгох болсон. Гэхдээ шинэ кино маань бэйсболын тухай гэхээсээ илүү 150 жилийн турш оршсоор байгаа тогтолцооны эсрэг хандсан бүтээл юм. Дүрийн баатар маань ердөө 40 сая ам.долларын хөрөнгөтэй бэйсболын багийн дасгалжуулагч. 200, 400 сая ам.долларын хөрөнгөтэй багуудтай өрсөлдөж, тэднээс өрсөж шилдэг тоглогчийг авна гэдэг боломжгүй зүйл. Ийм бага хөрөнгөтэй баг дээд лигт орно гэдэг үлгэрийн далай л гэсэн үг.

Гэлээ ч тэр тэнцвэргүй тулаанд бууж өгөхгүй гэж шийдэн, тэмцэлдэж эхэлдэг. Тамирчдаа цуглуулаад, тэмцэх шинэ арга замыг хайж эхэлдэг. Дундаж тоглогчдоо хэрхэн зөв ашиглаж, амжилтад хүрч болохыг тооцдог юм. Энэ бол хүн өөрийгөө хэрхэн үнэлж, хүмүүсийг хэрхэн үнэлдгийг л харуулах зорилготой бүтээгдсэн кино. Нэг ёсондоо хүний амьдралын хамгийн үнэ цэнэтэй зүйлсийн тухай юм. Амьдралд жинхэнэ ялагч нь хэн байдаг тухай өгүүлсэн мэт надад санагдсан. Тэгэхээр бэйсбол бол энэ утгыг хүргэх зам нь л болсон хэрэг.

- Тэгээд амьдралд жинхэнэ ялагч хэн байдаг юм бэ?

- Би ялалт байгуулсан, амжилтад хүрсэн гэж оргилуун дарс буудуулж, орилж хашгирсан нь ялагч байдаггүй юм. Олимпийн наадмыг үзэж байгаад би нэгэн явдлыг насан туршдаа мартахааргүйгээр тогтоож авсан. Нэг эмэгтэй тамирчин гүйж байгаад бүдрээд уначихсан хэрнээ дахиж босоод бариа руу хар хурдаараа гүйж билээ. Хэдийгээр түрүүлээгүй ч гэсэн тэр тамирчин бариандаа орж чадсан. Гэтэл хэвлэл мэдээллийн хэрэгслүүд түүний эр зоригийг бахдахын оронд бүдэрч ойчсон, бүтэлгүйтлийнх нь талаар шүүмжилж бичсэн. Одоо би тэр тамирчны нэрийг санадаггүй юм. Чамгүй нэртэй л тамирчин байсан санагдана. Тэр үед хүмүүс ямар шударга биш юм бэ гэсэн бодол надад төрж байсан. Миний бодлоор хүн бусдыг ялах биш, өөрийгөө ялах л том ялалт. Хүн бүрт өөрийн гэсэн Эверестийн оргил бий. Түүнийг нь бусад хүн олж хардаггүй. Энэ тухай сонин, сэтгүүлээр хэн ч бичдэггүй, мэддэг ч үгүй. Ийм санаа, түүх л намайг илүүтэй татаж, хөгжөөдөг юм даа.

- Та кино найруулагчаар ажиллая гэж боддог уу?

- Надад тэгэх хүсэл алга. Тэгээд ч гэр бүлийнхэн уурлаад сүйд болох биз. Угаасаа их ажилтай дээрээ дахиад ажил авчихвал гайхна биз дээ. Би юун түрүүнд хүний эцэг хүн. Тэгэхээр үр хүүхэд, гэр бүл минь эхэнд, харин ажил хоёрт байх ёстой.
- Тэгвэл бизнес хийх хүсэл бий юу?

- Энэ тал дээр би ажиллаж чадна. Гэхдээ миний дэргэд хэн нэгэн үнэхээр сайн ажиллаад байвал өөрөө хийхээ больчих байх. Би сургуульд байхдаа математикт их дуртай байлаа. Миний бодлоор математик бүх юмны үндэс болдог. Хүний төрөлх зөн совингийн үндэст хүртэл математик үйлчилдэг гэж хэлж болно. Хэтэрхий ойлгомжгүй зүйл яриад байвал уучлаарай, намайг. Би математикт дуртай хэрнээ байгаль орчинд бас их хайртай. Жүжигчний мэргэжлээс гадна надад юу их таалагддаг гээч? Барилга архитектур. Би өөрөө барилгын зураг гаргаж чадна. Гэрийн тавилга, дотоод зохион байгуулалтыг өөрөө зурж хийх их дуртай. Өөрөө бодож олж, бүтээсэн олон загвар надад бий.

- Улиг болсон асуулт байх л даа. Гэхдээ танай гэр бүл дахиж хүүхэд үрчилж авах уу?

- Магадгүй, дахиад үрчилж болох л юм. Долоо их сайхан тоо шүү. Хүүхэд үрчилж авна гэдэг гайхамшиг гэж итгэхэд хүргэсэн хүн бол Анжелина. Хүүхдүүд өлсөж, зовж, шаналж буйг харах их хэцүү. Хэрвээ Захарыг тухайн үед л үрчилж аваагүй бол одоо амьд явахгүй байсан гэдгийг би мэддэг. Гэтэл том охин минь байхгүй байж болох байсан гэж бодохоор төсөөлж ч чаддаггүй юм. Эцэг хүний сэтгэл гэдэг агуу зүйл. Эцэг болсноор миний үзэл их өөрчлөгдсөн. Шөнөдөө жаахан чимээ гарахад л хүүхдүүд рүүгээ гүйж очиж заавал хардаг. Хүүхдүүдийн минь нэгд миний тус хэрэгтэй ч байгаа юм билүү. Би тэдэнтэйгээ чөлөөтэй харилцаж чаддаг. Гэр орноо буулгасан бол цэвэрлүүлчихнэ. Миний бодлоор хүүхдийн ирээдүйд хүмүүжлээс илүү түүнд байгалиас заяасан зан авир гол нөлөө үзүүлдэг байх. Миний хүүхдүүд бүгдээрээ хоорондоо өөр зан авиртай. Би хүүхдүүдтэйгээ бүгдтэй нь цуг байхын зэрэгцээ нэг бүрчлэн ярилцаж байхыг бас хичээдэг.

- Тэгээд л хүүхдүүдээ дагуулаад яваад байдаг хэрэг үү?

- Тэгэлгүй яахав. Тэд одоогоор хаагуур явж, юу үзэж буйгаа сайн ойлгохгүй байж магадгүй. Гэхдээ үзсэн харсан бүхэн ой тойнд нь үлдэж хоцрох нь дамжиггүй. Хамгийн гол нь тэднийг суралцахад бидний нүүдэл суудал саад хийх ёсгүй. Гэрээр боловсрол олгохыг муу гэж боддоггүй. Хамгийн гол нь олгож буй боловсролын тогтолцоо нь сайн байх хэрэгтэй.

- Ярилцлагын эцэст таныг хүссэн замаараа зөв яваа хүн гэж хэлж болох нь ээ...

- Тэр үнэн. Би байх ёстой газраа байна. Өөрийнхөө уулын оргилд гарчихсан. Өөрийнхөө сонголт бүртээ би сэтгэл хангалуун явдаг. Хайрлах бүсгүйгээ олж, халамжлах хүүхдүүдтэйгээ хамт амьдарч байна. Миний амьдралдаа хийсэн хамгийн зөв алхам бол Анжелинатай гэрлэж, түүнтэйгээ хамт олон хүүхдийн эцэг эх болсон явдал. Гэр бүл гэдэг тун амаргүй ажил. Гэр бүлээ их хайрлах тусам түүнийг алдах цагт илүү их шаналдаг. Би үүнийг ойлгодог болохоор гэр бүлийнхнээ үргэлж хайрлаж явахыг хичээдэг.

Орчуулсан Р.Гэгээ