Албан тушаалтнуудын 2011 оны хөрөнгө, орлогын байдал Төрийн өндөр албан тушаалтнуудын 2011 оны хөрөнгө,

орлогын мэдүүлэг нийтэд ил боллоо.

УИХ-ын гишүүд, сайд нар эсвэл агентлагийн дарга нар ямар хөрөнгө, орлоготойг уншигч та манай сонины хуудаснуудаас төвөггүй олж унших учраас халаас нэгтэй төрийн түшээдийн талаар бид энэ удаа онцлохыг хичээлээ. Бас 2008 онд УИХ-д сонгогдон орж ирсэн гишүүдийн халаас, халтуур нь 2011 оны байдлаар хэр зузаарч, нэмэгдсэнийг уншигч танд хүргэж байна.

Мэдээж хөрөнгө, орлогоо үнэнчээр мэдүүлсэн төрийн өндөр албан тушаалтнууд байхад хөрөнгө, орлого нь өмнөх он жилүүдээс эрс нэмэгдсэн ч гэр бүлийнхээ гишүүдийн нэр дээр нуун дарагдуулж буй түшээд ч цөөнгүй.

Ямартай ч халаас нэгтэй, халтуураа эрс нэмэгдүүлсэн төрийн өндөр албан ту­шаалт­нуудтай танилцана уу.     

“АСУ” ХХК Ц.Элбэгдорж, Д.Зоригт, Ч.Сайханбилэг нарын халаасыг холбодог

Монгол Улсын Ерөн­хийлөгч Ц.Элбэгдорж “АСУ” ХХК-иас хувь эзэмш­дэг аж. Түүнтэй хамт АН-аас Өвөрхангай аймагт нэр дэвшин сонгогдсон Д.Зоригт, УИХ-ын гишүүн Ч.Сайханбилэг нар уг ком­паниас хувь эзэмшдэг байна. 

“Гермес центр” ХК олон даргыг холбож байна

“Гермес центр” ХК-иас УИХ-ын гишүүн Д.Зоригт, Улсын Ерөнхий прокурорын орлогч Ц.Бямбацогт, УБЕГ-ын дарга Л.Амарсанаа, Дархан-Уул аймгийн ИТХ-ын дарга Л.Гүнчин нар хувь эзэмшдэг байна. УИХ-ын гишүүн, агентлагийн дарга, орлогч, ИТХ-ын дарга нар хувьцаа эзэмшдэг болохоор “Гермес центр” ХК-ийн үйл ажиллагаа саадгүй урагшилдаг биз ээ.

“Женко”-гоос нэлээд дарга халаасаа зузаалдаг

УИХ-ын гишүүн Х.Баттулгын “Мах импекс” ХК, “Женко тур” ХК, “Женко тур бюро”ХК-иас нэлээд дарга халаасаа зузаалдаг байна. Тухайлбал “Женко тур бюро” ХК-иас Монгол Улсын Ерөнхийлөгч Ц.Элбэгдорж, УИХ-ын гишүүн Х.Баттулга, Шадар сайд М.Энхболд, УБЕГ-ын дарга Л.Амарсанаа, Дорнод аймгийн ИТХ-ын дарга Н.Хүрэлбаатар нар хувь эзэмшдэг бол  “Женко тур” ХК-д УИХ-ын гишүүн Ц.Батбаяр, Ч.Улаан, Санхүүгийн зохицуулах хорооны гишүүн Б.Ганбат нар хувьтай юм байна. Харин “Мах импекс” ХК-иас Санхүүгийн зохицуулах хорооны дарга Д.Баярсайхан хувь эзэмшдэг гэнэ. 

“Зоос банк”-ны дампууралд Ц.БатбаЯр, Ч.Улаан, М.Энхболд нар  ӨртсӨн ҮҮ

“Зоос банк” ХК дампуурч, түүний буурин дээр Төрийн банкийг байгуулсан билээ. Тэгвэл Шадар сайд М.Энх­болд, УИХ-ын гишүүн Ц.Бат­баяр, Ч.Улаан нар “Зоос банк”-наас хувь эзэмшдэг бай­жээ. “Зоос банк”-ны дам­пуу­ралд М.Энхболд, Ч.Улаан, Ц.Бат­баяр нар ч өртсөн болов уу. 

МАН, АН холилдсон “Багануур” ХК

“Багануур” ХК-иас АН-ын гаралтай, УИХ-ын гишүүн Д.Зоригт, МАН-ын угшилтай гишүүн Ч.Улаан, МАН-аас Дархан-Уул аймагт нэр дэвшиж явсан ТЕГ-ын дарга Б.Баттөмөр нар хувь эзэмшдэг байна. Эд нэг халаастай ажээ.  

МӨнгӨний уурхай “Говь” ХК

“Говь” ХК олон даргыг холбодог мөнгөний уурхай бололтой. Тухайлбал Шадар сайд М.Энхболд, БСШУ-ны сайд Ё.Отгонбаяр, УИХ-ын гишүүн Ц.Батбаяр, Улсын дээд шүүхийн шүүгч Д.Тунгалаг, Ерөнхий про­курорын орлогч Ц.Бям­ба­цогт, Санхүүгийн зохицуулах хо­рооны гишүүн Б.Ганбат, УБЕГ-ын дарга Л.Амарсанаа, Хэнтий аймгийн Засаг дарга Ч.Эрдэнэбаатар нарын МАН, АН холилдсон сайд, гишүүн, хурган дарга нар “Говь” ХК-иас хувь эзэмшдэг байна.

Ж.ЭнхбаЯр, Б.Цэнгэл нарын “Газар сүлжмэл” ХК

“Газар” гэдэг үг орсон Ж.Энхбаяр гишүүний нэлээд хэдэн компани бий. Эднээс “Газар сүлжмэл” ХК-д Ж.Энхбаяраас гадна ЗТБХБ-ын дэд сайд Б.Цэнгэл хувь эзэмшилтэй юм байна.

Дарга нарт ээлтэй “АПУ” ХК

УИХ-ын гишүүн Г.Батхүүг “АПУ” ХК-ийг үүсгэн байгуулагч гэдгээр нь хүмүүс андахгүй. Архи үйлдвэрлэдэг компани учраас Г.Батхүү гишүүн “АПУ” гэдэг компаниас нэрээ хол байлгахыг ихэд хичээдэг төдийгүй өөртэй нь холбож ярьсан хүмүүст дургүйцлээ шууд илэрхийлдэг нэгэн. Тэгвэл түүний “АПУ” ХК-иас УИХ-ын гишүүн Ц.Батбаяр, Сан­хүүгийн зохицуулах хорооны гишүүн Б.Ганбат, Га­даадын иргэн харьяатын газрын дарга Д.Мөрөн, Дар­хан-Уул аймгийн ИТХ-ын дарга Л.Гүнчин нар хувь эзэмш­дэг байна.  

Ерөнхий сайд С.Батболд, Г.Батхүү гишүүн хоёрын халаас нэг

Ерөнхий сайд С.Батболд “Скайтел” ХК-иас хувь эзэмшдэг болжээ. Харин “Скайтел” ХК-ийг УИХ-ын гишүүн Г.Батхүүгийн “Шунх­лай” ХК худалдан авсан гэх юм билээ. Тэгэхээр эдний халаас ч гэсэн нэг болж таарав. Халаас нэгтэй МАН, АН-ын удирдлагууд төрийн болон хувийн ажилд хамт явдаг байх нь.

Б.Баттөмөр дарга Ц.Шинэбаярынхаа “АдуунЧулуун” ХК-иас татвараа авдаг гэж найдъя

ТЕГ-ын дарга Б.Баттөмөр УИХ-ын гишүүн Ц.Шинэ­баярын “Адуун­чулуун” ХК-иас хувь эзэмшдэг байна. Тиймээс ТЕГ-ын дарга ха­лаас нэгтэй компаниасаа тат­вараа шударгаар авдаг гэж найдъя.  

Нам нэгтэй, “Бридж” амьтай найзууд

АН-аас гаралтай УИХ-ын гишүүн Д.Ганхуяг, Ц.Сэд­ванчиг нарыг “Бридж” ХК нөхөрлүүлдэг байна. Нам нэгтэй, “Бридж” амьтай най­зуудыг УИХ-ын танхим ч бас холбодог.

“Улаанбаатар зочид буудал” ХК олон даргатай

Нийслэл хотын маань нэр хүндийг олон жил тахалж ирсэн “Улаанбаатар зочид буудал” ХК-ийг хүмүүс андахгүй. Тэгвэл энэ буудал олон даргын халаасыг нэгтгэдэг аж. Тодруулбал Шадар сайд М.Энхболд, Гадаадын иргэн харьяатын газрын дарга Д.Мөрөн, ОБЕГ-ын дарга Ц.Амгаланбаяр нар “Улаанбаатар зочид буудал” ХК-иас хувь эзэмшдэг байна. 

“Зоос гоёл” ХК М.Энхболд, Б.Ундармаа нарынх

Шадар сайд М.Энхболд, БСШУ-ны дэд сайд Б.Ундармаа нарыг “Зоос гоёл” ХК холбодог байна. Хүнс­ний нэгдүгээр дэл­гүүрийн замын зүүн талд байрлах энэ компани өмнө нь үнэт эдлэлийн цорын ганц шахуу үйлдвэр байлаа. 

“Монгол шилтгээн”-ий төр дагасан эзэд тодорлоо

“Брау хаус”-ын эзэн Отгонбаатарын “Монгол шилтгээн” ХК Улсын дээд шүүхийн шүүгч Ч.Тунгалаг, УБЕГ-ын дарга Л.Амарсанаа нарын халаасыг нэгтгэдэг байна. “Гачуурт” тосгонд байрлах энэхүү шилтгээнээр зуны турш гадна, дотны зочид үйлчлүүлдэг. Зуны улиралд шоу, цэнгээний гол төв болж хувирдаг энэхүү шилтгээний нууц эзэд нь төрийн чухал албан тушаалтнууд аж.  

Дампуурсан “Анод” банкны төр дэх эзэд ил гарав

Олон зуун хадгаламж эзэмшигчийн мөнгийг хуу хамаад дампуурсан банк бол “Анод”. Тэгвэл дампуурах гэж байсан банкны хувьцааг борлуулах шийдвэр гаргаж, 1300 гаруй хүнийг 20 орчим тэрбум төгрөгөөр хохироосон хүн нь Санхүүгийн зохицуулах хорооны дарга Д.Баярсайхан юм. Өөрөөр хэлбэл  Д.Баярсайхан албан тушаалаа ашиглан дампуурах нь тодорхой болсон “Анод” банкны хувьцааг иргэдэд зарсан бололтой. Эсвэл бусдын адил хулхидуулаад дампуурах гэж байсан банкнаас хувьцаа худалдан авсан байхыг үгүйсгэхгүй. Д.Баярсайханаас гадна Улсын Ерөнхий прокурорын орлогч Ц.Бямбацогт, УБЕГ-ын дарга Л.Амарсанаа нар “Анод” банкнаас  хувь эзэмшдэг байна.  

“Таван толгой” ХК “жижигхэн” дарга нартай

Санхүүгийн зохицуулах хорооны гишүүн Б.Ганбат, Баян-Өлгий аймгийн Засаг дарга С.Хавал “Ажнай” корпорацийн эзэн Д.Бат-Эрдэнэтэй холбоотой бололтой. Учир нь тэд “Таван толгой” ХК-иас хувь эзэмшдэг байна.    

“Монгол алт” ХК-тай Л.Амарсанаа холбоотой

НХХ-ийн дэд сайд Н.Номтойбаяр хичнээн үгүй гэсэн ч түүний угсаа залгамжлан авах компани бол “Монголын алт” ХК буюу МАК юм. Тэгвэл УБЕГ-ын дарга Л.Амарсанаа “МАК” ХК-иас хувь эзэмшдэг учраас эдний халаас нэг аж.

“УИД” ХК-ийн эзэд

“Улсын Их Дэлгүүр” ХК-ийн эзэд бол УИХ-ын гишүүн Д.Загджав, УБЕГ-ын дарга Л.Амарсанаа, МХЕГ-ын дарга Р.Содхүү нар юм. Тэд “УИД” ХК-иас хувь эзэмшдэг гэнэ лээ.   

Халтуураа нэмж, халаасаа зузаалсан түшээд

Халаас нэгтэй төрийн өндөр албан тушаалтнуудын цуваа ийнхүү дуусашгүй их аж. Тэгвэл эдний араас халтуураа нэмж, халаасаа зузаалсан дарга нараас ганц нэгийг нь хүргэж байна.

УИХ-ын гишүүдийн 2008 оны Хөрөнгө, орлогын мэ­дүүлгийг 2011 оныхтой харь­цуулаад харж байхад зарим нэг түшээдийн халаас илт зузаарсан нь ажиг­лагд­лаа.

Тухайлбал УИХ-ын гишүүн Д.Ганхуяг 2008 онд “Бридж” ХХК-ийн 24,45 хувийг эзэмшдэг гэж ХОМ-тээ дурдсан бол 2011 онд “Бридж констракшн” ХХК, “БЭТ” ХХК, “МШТ” ХХК, “Сансар бридж” ХХК, “Жигүүр” ХХК, “Эвридэй Интернейшнл” ХХК, “Наран Эвридэй” ХХК, “АХИ” ХХК, “Эм Жи Ти” ХХК, “Эн Ай Ти” ХХК, “Жаг Депо” ХХК гэсэн компаниудыг нэмж мэдүүлсэн байна. Чухам өнгөрсөн гурван жилийн хугацаанд шинээр байгуулагдсан компани уу гэдгийг хэлж мэдэхгүй юм. 

УИХ-ын гишүүн Б.Чойжилсүрэнгийн хувьд “Хурд хүнс”, “Хурд авто”, “Хурд групп” ХХК-ийг 2008 онд дөнгөж сонгогдчихоод байхдаа мэдүүлсэн бол уг гурван компанийн тоо илт өсчээ. Тодруулбал эдгээр дээр “Рапид харш”, “Хаус инвест”, “Талын шонхор”, “Сауд гоби коэл тэранс”, “Сауд гоби блейк гоулд”, “Аппартмент кйч эйч”, “Урбан Лэнд”, “Говь гоё сайхан”, “Говь ресурс хилл”, “Өмнийн гоё говь” ХХК-иуд нэмэгдсэн байна.

Мөн УИХ-ын гишүүн Ц.Батбаяр 2008 онд “Ганьт” ХХК-ийн 20 хувийг л эзэмшдэг гэж мэдүүлсэн бол 2011 оны байдлаар “Женко тур” ХК, “УБ-ЗБ” ХК, “Зоос банк” ХК, “Говь” ХК, “АПУ” ХК-иудад хувь эзэмшдэг болсноо илэрхийлжээ.

УИХ-ын гишүүн Ц.Мөнх-Оргилыг “М Си Эс” компанийн эзэдтэй андын холбоотой төдийгүй нэг хотхонд аж төрдгийг мэдэх байх. Тэрбээр 2008 онд  зөвхөн “Өлзийт төв” гэх компанитайгаа мэдүүлсэн бол 2011 онд “М Си Эс Лимитед” ХХК, “Тандерболт” ХХК-иудыг нэмж мэдүүлсэн байна. Тэгэхээр Ц.Мөнх-Оргил гишүүн “М Си Эс”-ийн “босс”-уудтай өнгөрсөн хугацаанд холбоогоо зузаалсан бололтой.

www.tsag.mn

Таньд манай сайт таалагдаж байвал LIKE хийнэ үү. Баярлалаа