Н.Энхбаярыг хорихтой холбогдуулан намууд мэдэгдэл гаргажээ

2012-04-27

МАХН-ын дарга Н.Энхбаярыг үргэлжлүүлэн хорих болсонтой холбогдууланМҮАН, Монголын Либериал намаас

мэдэгдэл гаргажээ. Мөн Монголын Либериалнам уг мэдэгдлээ УИХ-ын дарга Д.Дэмбэрэлд хүргүүлэхээр болсон байна. Угмэдэгдлүүдийг бүрэн эхээр нь нийтэллээ.

МОНГОЛ ҮНДЭСНИЙ
АРДЧИЛСАН НАМЫН МЭДЭГДЭЛ

Монгол Улсын III ерөнхийлөгч, МАХН-ын дарга Намбарын Энхбаярыг цагдан хорихоор явуулсан үйл ажиллагаа нь Үндсэн хууль, Ерөнхийлөгчийн тухай хууль, УИХ-ын тухай хууль, Цагдаагийн тухай хууль, Тусгай хамгаалалтын тухай хууль, Эрүүгийн хууль, Эрүүгийн байцаан шийтгэх хуулиудыг ноцтой зөрчин, тусгай хамгаалалттай субъектийн амь нас, эрүүл мэнд, орон гэр, унаанд халдаж, ерөнхийлөгч асныг хүчлэн биед нь халдсан туйлын хэрцгий, хүнлэг бус, Монгол уламжлалд харш балмад үйл явдал болсон юм.Сүүлийн хэдэн жил шалгаж байгаа гэгдэх авилгын хэрэгт холбогдуулан УИХ-ын сонгуулийн өмнө хүч хэрэглэн баривчилж, хүчээр хэрэг хүлээлгэхэд чиглэсэн үйл ажиллагаа нь улс төрийн захиалгат шинжтэй болж байгаа нь Монгол Улсад хүний эрх зөрчигдөж, явцуу эрх ашгийн төлөө хэнийг ч золиослож болох улмаар нийгэмд үл итгэлцэл, сөргөлдөөн үүсгэх, улс төрийн тогтворгүй байдал үүсгэж болох үр дагаварт хүргэж болшгүй байна.

Авилгын загалмайлсан эцэг бол өнөөдрийн хяналтгүйгээр төрийн эрх мэдэл барьж байгаа нам дамжсан олигархи бүлэглэл юм.Тэд эрх мэдлээ хадгалахын тулд хэнийг ч золиосолж чадах төдийгүй, гадны захиалагчдынхаа даалгавраар үндэснийхээ төлөө гэсэн хэнийг ч болов хорооход бэлэн байдгийг бид гашуун түүхээсээ мэдэх билээ. МАХН-ын даргыг баривчилан улмаар хууль бусаар яллагдагчаар татаж, цагдан хорих хугацааг сунгаж байгаа явдал нь ард түмний шүүхээс айсан МАНАН хэлбэрээр засаглах олигархиуд “Даргагүй нам яаж сонгуульд ордогийг үзнээ” гэдэг дархан мэхийг хэрэглэсэн улс төрийн хэлмэгдүүлэлт боллоо.Өөрсдийн бий болгосон авилгын аварга сүлжээ, улс орны газар нутгийн бүрэн бүтэн байдал, эдийн засагт асар хохиролтой хөрөнгө оруулалтын гэрээнүүдийнхээ булхайг нуун дарагдуулахын тулд ард түмний нэрийг барин, шударга ёсоор гул барин гутамшигтай улс төрийн хүчирхийлэл үйлдлээ. Монгол хүний жудаг, Монгол ёс жаягаас хэт хол хүнлэг бус үйл ажиллагаанаас харахад эдийн засгийн алуурчдын эрх ашгийг хамгаалагч улс төрийн алуурчдын гар Монголд гүнзгий шургалжээ.

Олон улсын тавцанд Монголын нэр хүндийг гутааж, энхийг сахиулахаар явдаг бус, энхийг сахиулагчид ирдэг орон болгох гэсэн гадны олигархиудын захиалга санаархлыг, дотоодын олигархиуд хэрэгжүүлж эхэлсэнийг Монголын олон нийт таниж мэдэх боллоо. Олигархиудын улс орноо худалдаж олсон мөнгөөрөө бусдын нэр төрийг гутаах үйлдлийг өөрсдийн мэдлийн хэвлэл мэдээллийн хэрэгсэл болон бусад хэвлэл мэдээллийг мөнгөөр зодон төлбөртэйгээр тасралтгүй нэвтрүүлж олон түмний тархийг угаах үйл ажиллагаанд автахгүй байхыг нийт иргэд, сонгогчиддоо анхааруулж байна.Энэ бүх үйл ажиллагааны ард бодитойгоор улс төрийн гуравдагч хүчин болон гарч ирж буй МАХН-МҮАН-ын улс төрийн холбоо, бусад үзэл санаа нэгтэй намуудын хамтын үйл ажиллагаанд саад хийх тэднийг задлах, улмаар ирэх сонгуульд эвсэн орох боломжийг хаах үүнийхээ хүчээр эрх мэдлээ хадгалан авч үлдэж, улсаа худалдсан жинхэнэ авилгачдыг аварч үлдэх, эх орныхоо эрх ашгаас урвасан гэрээнүүдээ хамгаалж үлдэх явцуу сонирхол нуугдаж байгаа гэдгийг хариуцлагатайгаар анхааруулан сэрэмжүүлж байна. Сонгуулийн хувьсгал ойртож байна. Зүрхээ чагна. Зүрхээ дага Монголчуудаа.
Мөнх Тэнгэр Монгол түмнийг ивээх болтугай.

Монголын Либериал нам

Мэдэгдэл хүргүүлэх тухай

Төр бол зөвхөн төр ёсноос хамаардаг. Дэлхийн ардчилсан улсуудын жишгээр, аливаа улсын ерөнхийлөгч байсан хүн бол улсын 1-р зэргийн хүн байж, улс орны тусгаар тогтнил, төрийн нууц, аюулгүй байдлын асуудлыг маш сайн мэддэг утгаараа насан туршид нь төрийн хамгаалалтанд байлгаж тусгай эрхийг эдлүүлдэг тогтсон ёстой. Энэ үүднээс хууль ёс, билэг сургаалиар явж ирсэн зан суртахуун, ахуй төрийн заншил монгол хүмүүсийн сэтгэл, мах цусанд шингээстэй байдаг. Үнэн төр ёс бол ёс бусаар хүний эрхэнд халдахыг хориглож, иргэний эрхийг хамгаалах явдал. Монгол Улсын явж ирсэн төрийн түүх ийм байж ирсэн. МУ-ын Ерөнхийлөгч асан Н. Энхбаярын хийсэн бүтээсэн зүйл нь алдснаасаа маш их гэдгийг монголын ард түмэн мэднэ, харин өнөөгийн төр үүнийг мартаж уландаа гишгэх учиргүй. Монгол Улсын төр- нийгмийн зүтгэлтэн ЕРӨНХИЙЛӨГЧ асан Н. ЭНХБАЯР нь МУ-ын хөгжил цэцэглэлтийн төлөө улс орноо гадаад, дотоод тавцанд төлөөлж, улс орны сайн сайхан амьдралын төлөө зүтгэж ирсэн, өнөөдөр ч зүтгэж яваа гавъяатай хүн билээ.

Төрийн засаглал нь зөвхөн засаглагчдын дур зоргоос хамаардаггүй, харин ард түмний хүсэл зориг, итгэл үнэмшилд үндэслэгддэг. 2012 оны 4-р сарын 13-нд болсон баривчлах гэсэн үйл ажиллагаа нь зүй бус, ёс бусын аргаар буюу Монгол улсын болоод Дэлхийн ардчилсан төрийн зарчмыг барьдаг улс орнуудад огт байхгүй аргаар харьцаж хүний эрх, өмч хөрөнгөнд эрээ цээрээгүй халдсан үүднээсээ, дан ганц ЕРӨНХИЙЛӨГЧ асан Н. ЭНХБАЯРЫН эсрэг биш монголын ард түмний итгэл үнэмшил, сэтгэлийг эвдсэн “ хүний эрхийн эсрэг ” шинжтэй гэмт халдлага мөн гэж үзэж байна. Энэ бол Монголын өнөөгийн ардчиллын эмэгнэл. Үүнийг үндэслэвэл:

1. Монгол улсын Үндсэн Хуулинд зааснаар, төр ёсоо эрхэмлэн дээдлэх
- Хүний эрх, эрх чөлөө,
-Шударга ёс
- Үндэсний эв нэгдэл, хүмүүнлэг иргэний ардчилсан нийгмийн зорилгыг зөрчлөө.

2. Олон улсын хүний эрхийн түгээмэл тунхаглалд зааснаар: хэнтэй ч хүний ёсноос гадуур, нэр төрийг нь доромжлон харьцан шийтгэхийг хориглох
болон бусад заалт болох 5, 6, 7, 9, 11, 12, 19-р зүйлүүдийг зөрчсөн байна.

3. Иргэний болон Улс төрийн эрхийн тухай Олон Улсын пактын 40-р зүйлд, хувь хүний нэр төр, халдашгүй байдлыг хамгаалах үүднээс зүй бусаар харьцах, доромжлохыг хориглоно. Зүй бусаар харьцсан явдлыг эрх мэдэл бүхий байгууллагаас мөрдөн шалгана. Түүнчлэн тус конвенцийн 2, 5 -р зүйлүүдийг зөрчсөн байна.

4. Эрүүгийн тухай хуулийн 2, 3, 4, 5, 6, 7, 72, 86, 109, 110, 153,137, 180, 249, 251-р зүйлүүд, Эрүүгийн байцаан шийтгэх тухай хуулийн 58.1, 59-р зүйл зэргийг тус тус зөрчсөн байна. Түүнчлэн тухайн болсон үйл явдлыг ямар ч хуулийн зүйл, заалтыг мэддэггүй 8 настайгаас 80 настай иргэд ч олон нийт ч хараад хүний эрхийг ноцтойгоор зөрчиж байна гэдгийг ойлгоно. Иймд хууль ёсны бус, ардчиллын зарчмаас гажсан, хүний эрхийн эсрэг үйл ажиллагаа явуулсан гэж үзэж байгаа тул Ерөнхийлөгч асан Н. ЭНХБАЯРЫГ нэн даруй суллахыг шаардаж байна" гэжээ.