Хар намтартай Францын тэргүүн хатагтай

2012-05-04

Карла Бруни Францын Ерөнхийлөгч Николя Саркозитай түүний гэр бүлээ цуцлуулсныг тэмдэглэсэн жижиг үдэшлэг

дээр танилцсан гэдэг. Саркози Ерөнхийлөгчийн алба авмагцаа эхнэрээсээ салж, бас ч багагүй зориг зүрх гаргасан байлаа. Улстөрчдөөс өмнө нь ийм өндөр тушаалд очсон хэрнээ тийм бодлогогүй алхам хийж байсан нэг ч Ерөнхийлөгч байсангүй.

Харин хайр сэтгэл, сэтгэл хөдлөлийн орон гэдэг Францын шинэ Ерөнхийлөгч ингэж чадсан төдийгүй энэ таагүй явдлаас хойш гурван сарын дараа дахин гэрлэсэн нь жинхэнэ дуулиан тарьсан юм. Хэргийн эзэн нь зөвхөн Саркози биш. Харин түүний сонгосон бүсгүй байлаа. Францын тэргүүн хатагтайн алдрыг хүртэх хувьтай энэ бүсгүй цагтаа дэлхий ертөнцийг гоолиг биеийнхээ нүцгэн зургаар байлдан дагуулж явсан загвар өмсөгч.
Мөн түүний өнгөрсөн амьдралаас тэргүүн хатагтайд таарахаар алхам, шинж чанар олно гэдэг хэцүү. Хэвлэлээр тэмдэглэн бичснээр тэр бол “Хар намтартай цагаан бүсгүй” ажээ.
Ерөнхийлөгч хүн салснаасаа хойш гурван сарын дараа гэрлэнэ гэдэг тун томоогүй гэмээр алхам. Хүмүүс түүнийг Карлагаас л болж салсан гэж ойлгоход хүрэх байлаа. Гэвч Саркози эр хүний хувьд ийм алхам хийхээсээ ичиж, нэрэлхэж, зориг зүрх дутсангүй. Хурдан гэрлэсний бас нэг шалтгаан нь тэр үед Их Британийн хатан хаанд бараалхах цаг тулчихаад байж. Гэтэл шинэ найз бүсгүйгээ албаны энэ айлчлалд юу гэж танилцуулахаа бодоод Саркози сандарч орхижээ. Энэ үед Францын тэргүүн хатагтай асан Бернадет Ширак тэдэнд нэгэн гарцыг зааж өгсөн нь “Хурдхан гэрлэ” гэдэг зөвлөгөө байлаа.
Ингээд л тэд хурдан бие биенээ ойлголцсон шигээ нэг мэдэхэд гэрлэх болчихлоо. Ийнхүү Франц улс шуугиант өнгөрсөн үетэй шинэ тэргүүн хатагтайтай ирээдүйгээ холбосон юм.

Алдартай загвар өмсөгч, нэртэй дуучин
Карла Бруни 1967 оны арванхоёрдугаар сарын 23-нд Италийн Турин хотноо мэндэлсэн. Гэвч алдартай загвар өмсөгч, нэртэй дуучны хувиар тэр насаа аль болох зарлахгүй байхыг хичээдэг аж. Ээж нь төгөлдөр хуурч, харин аав нь хөгжмийн зохиолч Альберто Бруни Тедески юм. Чинээлэг айлын хүүхдийг барьцаалж их хэмжээний мөнгө нэхэмжилдэг “Улаан бригад” хэмээх байгууллагын үйл ажиллагаанаас эмээсэн Тедески гэр бүлийнхээ хамтаар 1974 онд Францад шилжин суурьшжээ. Гэвч Альбертог нас барсны дараа ээж нь Карла Брунид жинхэнэ аавынх нь нэрийг хэлсэн гэдэг. Төрсөн эцэг бизнесмэн Маурицил Ремерт байсан бөгөөд ээж Мариза нь түүнтэй удаан хугацааны турш амрагийн холбоотой байсан ажээ.
Карлаг бүр багаас нь хөгжимд сургасан гэдэг. Эцэг эх нь түүнийг хөгжмийн өндөр мэдрэмж, мэдлэгтэй нэгэн болгохыг ихэд зорино. Карла гитарын дамжаанд суралцахын зэрэгцээ загвар өмсөгчийн дамжаанд бас явдаг байж. Тэр ахлах сургуулиа дүүргээд Сорбонны урлагийн их сургуульд элсэн орсон ч төдөлгүй сургуулиа хаяж, загвар өмсөгчөөр ажиллах болжээ.
Түүний энэ алхам зөв шийдвэр байсан гэж хэлж болно. Карла 1990-ээд онд Guess болон Versage компанийн нүүр царай болж, дэохийн хамгийн цуутай, бас хамгийн өндөр цалинтай загвар өмсөгч гэгдэх болов. Ингээд залуу насаа загварын ертөнцөд бүрэн зориуллаа. Харин загварын тайзаа бүрэн орхихоор шийдсэн. Гэвч тун удалгүй тэр тайзнаа дахин гарсан нь дуучны хувиар эргэн ирсэн явдал байлаа. 2003 онд гаргасан “Хэн нэгэн надад хэлсэн юм” хэмээх цомгийнхоо 11 дууны 8-ийг нь тэр өөрөө зохисон гэдэг.
Үүнээс хойш таван жилийн дараа дахин нэгэн цомог гаргасан нь “Юу ч болоогүй юм шиг” хэмээх нэртэй. Энэ цомгийнхоо 14 дууны 11-ийг мөн тэр өөрөө бүтээжээ. Бруниг урлаг судлаачид тун уянгалаг дуутай гэж онцолдог гэнэ.

Эрчүүдийн нэртэй “хар дэвтэр”
Гоо үзэсгэлэнтэй бүсгүйн хувиар түүнийг эргүүлдэг, өвөртөө оруулахыг хүсдэг эрчүүдийн эгнээ уртаас урт байсан нь тодорхой. Тэгээд ч Карла төдийлөн энгэрээ хумиад яваад байдаг бүсгүй биш. Жиг ургуулж байсан эрчүүдээс дурьдвал дуучин Мик Жаггер, Эрик Клэптон, барилгын магнат Доналд Трамп, жүжигчин Кевин Костнер, Винсен Перес, Чарльз Берлинг нарын нэр үзэгдэнэ. Мөн Францын Ерөнхий сайд асан Лоран Фабиус нэр ч дурьдагдана. Эдгээр эрчүүдийн дараа зохиолч Жан-Поль Энтевонтой хамт амьдарч байсан үе бий. Гэвч тэр Энтевоны хүү, өөрөөс нь 10 дүү Рафаэлтай янагийн холбоотой болсон төдийгүй түүний хүүхдийг төрүүлсэн юм. Ингээд Рафаэлтай гэрлэжээ. Гэвч 2007 оны тавдугаар сард тэр гэр бүлээ цуцлуулжээ.
Ингээд дараа нь танилцсан зартай хүн нь Николя Саркози байсан хэрэг. 2008 оны хоёрдугаар сарын 2-нд тэд гэрлэлтээ батлуулахад Саркози 53-тай, харин Бруни 40-тэй байлаа.
Гэвч эдүгээ Францын Ерөнхийлөгч эхнэрийнхээ санаа бодлыг сайд, дарга нарынхаасаа илүү тавьж, түлхүү үнэлдэг тухай хэвлэлээр байн байн шүүмж гарах болоод байгаа.
“Ерөнхийлөгчид хэтэрхий их нөлөө үзүүлж байна. Төр Карлагийн гарт байгаа юм шиг” гэж бичих нь энгийн үзэгдэл мэт болсон.
Саркози ч эхнэрээсээ багагүй зөвлөгөө авч, үгийг сонсох тун дуртайгаа нуудаггүй. “Би түүний ярьж буй болгоныг анхааралтай чагнаж, их ач холбогдол өгдөг. Түүний үзэл бодол миний үзэл, мэдлэгийн хүрээг тэлдэг” гэж нэгэн сэтгүүлчид өгүүлсэн нь гал дээр тос нэмэх шиг л болсон.
Карла түүнийг спортоор хичээллэхийг зөвлөсөн нь хожмоо уршиг тарьж, Саркози өглөөний гүйлтийн үеэр ухаан алдаж унаснаар хэдэн хоногийн турш ажлаа хийх боломжгүй болсон удаатай. Гэвч Саркози биеэ муудснаа эхнэртэйгээ хамт байх боломж болгон, наран шарлагийн газар амарч, яг л 18-тууд шиг элсэн дээр үнсэлцэн гүйлдэж буй зургаар барууны хэвлэлүүд нэг хэсэг “гангарсан” билээ.
Харин Елисейн ордонд амьдрах болсон тухайгаа “Елисейн ордны өрөөнүүд гайхалтай тохьтой. Минийн өрөөнд Ерөнхийлөгч байнга ирэх дуртай. Бидний харилцаа урьдын адил сайхан дулаан хэвээрээ байгаа. Би түүний Ерөнхийлөгчийн эрх мэдлийн хугацаа дуусах хүртэл тэргүүн хатагтай байх болно. Харин насан туршдаа түүний үнэнч гэргий байна. Амьдрал гэнэтийн бэлэг, содон нууцыг үргэлж ирээдүйд бэлдсэн байдаг. Гэлээ ч би зөвхөн түүнтэй насаараа амьдармаар байна” гэж Карла Бруни ярьдаг.
Загварын ертөнцөд зард гарч, урлагийн салбарт нэрт дуучин гэгдэж, харин хувийн амьдралдаа улсын Ерөнхийлөгчтэй сууж хувьсгал хийсэн энэ эмэгтэй орчин цагийн амьдралын жинхэнэ тод жишээ юм.
Карлагийн нүцгэн зургийг өндөр үнээр дуудлага худалдаагаар зарахдаа “Тэргүүн хатагтайн нүцгэн зураг” гэж сурталчилна. Олон түмний өмнө Карлагийн амьдрал нь яг л нүцгэн яваа мэт ил харагддаг.