Их санасан газар есөн шөнө хоосон хонов уу

2012-05-07

Монгол Улсын иргэн та хувьцаагаа авах уу эсвэл сая төгрөгөө бэлнээр нь авмаар байна уу гэх сонголтыг Засгийн газраас санал болгосныг өнгөрсөн долоо хоногт НХХЯ-наас мэдээлэв. Уг нь иргэд энэ оны төсөв батлагдах хүртэл “Эрдэнэс Тавантолгой”-н хувьцаагаа ч авна, “Эх орны хишиг”- ээ ч хүртэнэ гэсэн итгэл тээн, горьдсоор байсан юм.

Хувьцаагаа хадгалж, үр ашгийг нь хүртээд, дээрээс нь “Эх орны хишиг”-ээ аваад банкны зээлээ төлж, хүүхдийнхээ сургалтын төлбөрт нэмэрлэнэ гэх мэтчилэн төлөвлөж байсан иргэдийн хувьд өнгөрсөн долоо хоногт НХХЯ-наас хийсэн мэдэгдэл тэдний хүслийг “салхинд хийсгэв”. Ёстой л өнөөх их санасан газар есөн шөнө хоосон хононо гэгчээр “Эх орны хишиг”, “Эрдэнэс Тавантолгойн хувьцаа” хоёрыг тусдаа зүйл хэмээн итгэж, найдаж, хүлээж байсан иргэд ийнхүү хоёрхон долоо хоногийн дотор хувьцаагаа юу, бэлэн мөнгөө юу гэдгээ шийдэх шаардлага тулгарлаа.

Уг нь дөрвөн жилийн өмнө намууд гоё, гоё амлалтууд өгч, сонгогчид ч эрт орой хэзээ нэгэн цагт сая төгрөгөө ч авна, хувьцаагаа ч эзэмшинэ хэмээн горьдож, бэлэн мөнгө, хувьцаа хоёрт чих тавьж байсан том. Гэтэл энэ асуудлыг нэг мөр болгож иргэдэд хувьцаа юу, бэлэн мөнгө үү гэх сонголтыг санал болгосон ч гэж дээ, бараг тулгасан. Тодруулбал, Засгийн газ¬рын 2012 оны дөрөвдүгээр сарын 11-ний өдөр “Эрдэнэс Тавантолгой” ХХК-ийн хувьцааг иргэдэд эзэмшүүлэх, аж ахуйн нэгжид худалдахтай холбогдуулан авах зарим арга хэмжээний тухай 116 дугаар тогтоол баталсан билээ. Уг тогтоолоор Засгийн газрын 2011 оны 98 дугаар тогтоолын дагуу хувьцаа эзэмшиж байгаа иргэдэд нэмж 536 ширхэг хувьцаа эзэмшүүлэхээр болсон юм. Тиймээс эзэмшиж байгаа хувьцаагаа Засгийн газарт нэрлэсэн үнээр худалдах хүсэлтэй иргэний өргөдлийг хүлээн авч, иргэдийн нэрс, худалдах хувьцааны тоог нэгтгэн гаргах ажлыг энэ оны зургадугаар сарын 1-ний дотор улсын хэмжээнд зохион байгуулахыг НХХЯ- нд даалгалаа.

Уг тогтоолыг шуурхай хэрэгжүүлэх ажил өнгөрөгч долоо хоногт албан ёсоор эхэлсэн бөгөөд энэ хүрээнд иргэдийн хүсэлтийг тавдугаар сарын 20 хүртэлх хугацаанд авч, мэдээллийг нэгтгэх юм байна. Эзэмшиж байгаа хувьцаагаа Засгийн газарт нэрлэсэн үнээр нь худалдах хүсэлтэй иргэд өөрийн оршин суугаа сум, хорооны нийгмийн ажилтанд хүсэлтээ гаргах боломжтой. Өргөдлийн загварыг ХХҮГ-аар дамжуулан аймаг, дүүрэг, сум, хороодод хүргүүлжээ. Хэрэв тухайн иргэн сум, хороонд очиж, хүсэлтээ өгөх боломжгүй тохиолдолд хүсэлтийг гэр бүлийн гишүүдээс төлөөлөн гаргаж болох аж. Төлөөлөн гаргагч нь 16 хүртэлх насны хүүхдийн эцэг, эх, ах, эгч, эмээ, өвөө, асран хамгаалагч харгалзан дэмжигч, 16 ба түүнээс дээш насны иргэний эхнэр, нөхөр, хүү, охин “Нотариатын тухай хууль”-ийн дөрөвдүгээр зүйлд заасны дагуу итгэмжлэгдсэн хүн байх ёстой гэнэ.

Хэрэв иргэд өмнө нь Хүний хөгжил сангаас хишиг, хувиа бэлэн мөнгө хэлбэрээр авахаар хүсэлтээ гаргасан ахмад настан, хөгжлийн бэрхшээлтэй иргэн, 2010-2011, 2011-2012 оны хичээлийн жилд сургалтын төлбөр хэлбэрээр хишиг, хувь хүртсэн оюутан, өнгөрсөн онд эрүүл мэндийн даатгалын шимтгэл хэлбэрээр хишиг, хувь хүртсэн бол тухайн иргэнд ногдох хувьцаанаас хасч тооцохыг дээрх тогтоолд тусгасан байгаа. Иймд эзэмшиж байгаа хувьцаагаа Засгийн газарт нэрлэсэн үнээр нь худалдах хүсэлтэй иргэдийн хувьд тавдугаар сарын 20-ны дотор амжиж өргөдлөө яаралтай өгөх шаардлагатай гэдгийг холбогдох албаны хүмүүс анхааруулсан.

Түүнчлэн одоогийн байдлаар хөгжлийн бэрхшээлтэй болон ахмадууд болох 230 мянган иргэн ХХҮГ-т сая төгрөгөө бэлнээр авах хүсэлтээ ирүүлээд байгаа гэнэ. Харин тавдугаар сарын 20-ны дотор амжиж хүсэлтээ ирүүлээгүй ахмадууд хөгжлийн бэрхшээлтэй иргэдийн хувьд хувьцаагаа авах хүсэлтэй байна гэж ойлгоод “Эрдэнэс Тавантолгой”-н хувьцааг олгох аж.

Засгийн газрын энэ шийдвэрийн дараа иргэд хувьцаагаа авч үлдсэн нь ирээдүйд нь ашигтай юм болов уу, сая төгрөгөө авах уу гэх сонголттой тулгарч, толгойгоо гашилгаж байна. Нөгөөтэйгүүр төрөөгүй хүүхдэд төмөр өлгий гэгчээр нэрлэсэн үнэ нь тодорхой болоогүй хувьцааг аваад хэзээ үр шимийг нь хүртэх юм хэмээн иргэдийн дийлэнх нь хувьцаагаа бус, бэлэн мөнгөө авах хүсэлтэй байгаа. Ахмадууд хөгжлийн бэрхшээлтэй иргэд, оюутнууд лав хувьцаагаа авч чадахгүй нь. Эдгээрээс гадна өнөө маргаашаа яая гэсэн иргэдийн дийлэнх нь бэлэн мөнгөө авах сонирхолтой байгаа. Тэгэхээр тэд бэлэн мөнгөө авчихсан юм чинь хувьцаагүй хоцорно.

Уг нь уул уурхайгаас орж ирж буй орлого болон байгалийн баялгийг Монгол Улсын иргэдэд эрх тэгш хуваарилна гэж байсан боловч энэ нь бас л “хоосон амлалт” байсан бололтой. НХХЯ-наас Монгол Улсын нийт иргэдийн хэд нь хувьцаагаа, хэд нь бэлэн мөнгөө авах хүсэлтэй байгаа талаар нэгдсэн дүн гаргах гэж ийнхүү тавдугаар сарын 20 гэх хугацааг зааж байгаа юм гэсэн. Засгийн газрын зүгээс гэнэт шийдвэр гаргаж, давчуу хугацаанд сонголтоо хийхийг “тушаасан”. Нэгэнт тушаал гарсан учраас хэчнээн эсэргүүцээд ч нэмэргүй. Өнөөх ноёнтой тэрсэлдсэн хүн толгойгүй, нохойтой уралцсан хүн хормойгүй гэдэг шиг. Тиймээс бидэнд хувьцаа юу, бэлэн мөнгө үү гэх сонголтыг хийхэд ердөө хоёрхон долоо хоног үлдлээ. Уг нь бодож байж сонголтоо хиймээр байдаг, яая гэхэв тавдугаар сарын 20-ны дотор амжиж шийдвэрээ гаргах ёстой юм чинь.

Х.Өнөржаргал

mongoliiin medee