Уг нь ч хөөрхий ярилцлага өгөх тун дуртай хэдий ч бодлогогүйгээсээ юү эсвэл амьдралаас хэт тасарчихсан учраас тэр vv, юм л бол асуултад нь унаад нэр хүндээ навс унагаж байна аа. Саяхан манай сэтгүүлч яагаад эдийн засгийн өсөлт бидэнд мэдрэгдэхгүй байна вэ, ядуурал буурахгүй байна шүү дээ гэж асуухад ”Эдийн засгийн өсөлт өөрөө тодорхой үе шат дамждаг, тодорхой хугацааны дараа иргэдэд мэдрэгдэнэ. Ядуурал гэхээсээ бидний санааг зовоосон асуудал нь хог болоод байна” хэмээн хэлж цочирдуулах нь тэр.

Хараа муутай болохоор буруу уншсан байж магадгүй хэмээн үсэглэн уншвал нээрээ л чин сэтгэлээсээ хариулжээ. Арай ч дээ. Сангийн дэд сайд гуай өөрийн үндсэн ажил болох эдийн засаг, ядууралд санаа зовнихгүй хогны асуудалд толгойгоо өвтгөж суух гэж. Салбар бүрийг буух эзэнтэй, буцах мөртэй болгохын тулд л дарга, дэд сайд гэгчийг томилдог баймаар. Тэр дундаа Сангийн дэд сайд гэдэг сайдынхаа түшиг тулгуур, зөвлөгч, хянагч, шүүмжлэгч нь байх ёстой мэт санагдана. Гэтэл дэд сайд Ч.Ганхуягийн хувьд тийм биш бололтой. Өөрийнх нь салбарт гарч буй 17 хувийн өсөлтийг иргэд нь мэдрээгүй, амьдрал нь дээшлээгүй, ядуурал 30 хувьд хүрээд байхад тэрээр хогонд л санаа зовоод шөнө ч унтаж чадахгүй, хоол унднаас гараад царай алдаж байгаа бололтой. Гэхдээ түүний паян үүгээр дуусахгүй. Тухайлбал, 2010 оны арванхоёрдугаар сард Шууд телевизийн нэвтрүүлэгт оролцохдоо талхны үнэ 300 төгрөг байгаа хэмээн ярьж, иргэдийн эгдүүцлийг хүргэж орхисон удаатай.

Энэ тухай МАН, АН-ын улстөрчид өдөржин ярилцсан гэх бөгөөд “Ядаж нэвтрүүлэгт оролцох гэж байж ярилцах сэдвээ судалдаггүй хариуцлагагүй нь дэндсэн нөхөр юм даа” хэмээн толгой сэгсэрч байсан. Үнэхээр л хэвлэл мэдээлэлд ярилцлага өгөөд сурчихсан, ахмад улстөрчдөөсөө туршлага судлахгүй, цээжний бангаар хариулсан нь түүнийг “Талх” хоч авахад хүргэсэн хэрэг. Тэр ч бүү хэл МҮХАҮТ-ын захирал, эдийн засагч С.Дэмбэрэл өөрийн twitter –тээ ”Хөтлөгч залуу их чухал сайн асуултууд тавьж байна. Харин Ч.Ганхуяг сайдын хариулт маш муу” хэмээн дүн тавьж байсан гэдэг. Түүний оролцсон эл нэвтрүүлгийг үзсэн хөгшид ”Талхны үнэ мэдэхгүй хүн эдийн засгийг төвхнүүлнэ гэдэг юу л бол. Бид чинь хэнд улс орныхоо эдийн засгийг атгуулчихсан юм бэ. Талхны үнэ мэдэхгүй хүнд эдийн засгаа сайжруул гэх нь нохойнд яс хадгалуулахтай л адил болж дээ” хэмээн бухимдаж байв. Угтаа Сангийн дэд сайд гэдэг улс орны орлого зарлага цаашлаад ард түмний хоолтой ундтай, хувцастай, сайхан амьдрах эсэхийг шийддэг нэг ёсондоо их жасын нярав л гэсэн үг. Тиймээс ч энэ салбартаа толгой цохиж буй их мэдлэгтэй хүнийг л энэ суудалд томилдог. Зүгээр нэг гадаад, дотоодод гахай шувууны мах идсэн хүнийг тавьчихдаггүй баймаар.

Ер нь, амьдралаас хэт тасарчихсан Ч.Ганхуяг гэж хэн бэ. Түүний ажил байдлын тодорхойлолтоос нь харвал нийслэлийн 23 дугаар сургуулийг төгсч, Будапешт хотын Эдийн засаг, төрийн захиргааны их сургуулийг төгссөн манай улсын шилдэг боловсон хүчний нэг гэжээ. Түүгээр ч барахгүй Хөрөнгийн биржийн брокер, Монголбанкны хянан шалгагч, Монголын томоохон байгууллагад ажиллаж байсан гээд ажлын туршлага нь хөвөрнө. Тэр их мэдлэг мэдээллийг цуглуулсан тэрээр Монгол Улсын сангийн түлхүүрийг атгаж байж талхны үнэ мэдэхгүй, бидний санаа зовоосон асуудал ядуурал бус хог гээд жишим ч үгүй хэлж байгаа нь ёстой л онигоо болж, хөгөө чирсэн хэрэг биш гэж үү.

Үнэндээ Ч.Ганхуяг дэд сайдыг мэдэх хүмүүс өндөр мэдлэгтэй залуу хэмээн эрхий хуруугаа гозойлгодог юм билээ. Төгссөн сургууль соёлыг нь харвал үнэхээр ч толгой цохих манай шилдэг залуу боловсон хүчний нэг аж. Гэвч амьдралаас тасарлаа, тасарлаа гэхэд санаа зовних улс орны эдийн засгийн өчнөөн асуудал байхад нийслэлийн жирийн иргэн Дорж шиг хог яриад сууж байна гэдэг ичиг ичиг. Эсвэл төр, хувийн ажил хоёр өөр байдаг юм уу. Тэрээр 1998-1999 онд НҮБ -ын Хөгжлийн хөтөлбөрийн МикроСтарт төслийн санхүүгийн менежерээр ажиллаж байхдаа Хөгжлийн Алтан Сан (ХАС) ХХК-ийнхаа тулгын чулууг тавьж, зургаан төрийн бус байгууллагатай нэгдэн Монгол Улсын анхны банк бус санхүүгийн байгууллагыг байгуулсан түүхтэй. Тэгэхдээ багагүй мөнгө гадны төслөөс зувчуулан “ХАС“ банкны суурийг тавьсан гэдэг юм билээ. Тэрээр 2002-2009 онд ХАС банкинд ажиллаж байх хугацаандаа үйл ажиллагааг нь сайжруулж, Монголын шилдэг банкуудын тоонд оруулсан.

Түүгээр ч барахгүй 2009-2010 онд Тэнгэр Санхүүгийн Нэгдэл ХХК -ийн гүйцэтгэх захирлаар ажиллахдаа Монгол Улсын өнцөг бүрт хүрсэн санхүүгийн цогц үйлчилгээ ард иргэдэд үзүүлдэг ХасБанк ХХК, түүний харуул хамгаалалт хариуцсан ХасСекьюрити ХХК, санхүүгийн түрээс олгох чиглэлээр ХасЛизинг ХХК, программ хангамж боловсруулан нийлүүлдэг Хорус Номадик Сольюшнз ХХК, Бүгд Найрамдах Киргиз Улсын бичил санхүүгийн компани болох МолБулак Кредит ХХК-д хувь нийлүүлсэн, цаашид бүс нутагт хөрөнгө оруулах, техникийн туслалцаа үзүүлэх стратегийн чиглэл бүхий холдинг буюу толгой компани болгож. “ХАС” банкны 99.9 хувийг Тэнгэр Санхүүгийн Нэгдэл эзэмшдэг нь үүнийг гэрчлэх биз. Ингэж жижигхэн ББСБ-уудыг нэгтгэж, шилдэг банк болгоод зогсохгүй, олон охин компани төрүүлсэн тэрээр төрийн байгууллагад ажиллахаар тархи нь ажиллаж, сэтгэхээ байчихдаг байх даа. Уг нь ч хүн залуудаа сайн тархиа ажиллуулбал хөгширсөн хойно зөнөдөггүй, ядуурдаггүй гэдэг л юм. Зүгээр л дээрээс өгсөн үүрэг даалгаврыг биелүүлэн билгэдлийн чанартай бол Сангийн дэд сайд гэж суудлын нөхөөс хийгээд ч яахав. Амьдралаас тасарчихсан сайдаар улс орны эдийн засгийг атгуулаад ч яахав. Ард түмнийгээ хэрхэн амьдарч байгааг мэдэхгүй сайдад улс орныхоо алтан жолоог атгуулаад ч яахав…. Өнгөрсөн дөрвөн жилийн хугацаанд та улс орны нийгэм, эдийн засагт ямар гавьяа байгуулсан бэ. Асууя танаас, Бас хариуцлага ч нэхэе…