маань андахгүй биз ээ. МҮОНТ-ийн “Өглөө” хөтөлбөрийн хөтлөгч гэдгээрээ олонд танигдсан Ө.Гэрлээ өдгөө “Эх орон” телевизийн гүйцэтгэх захирлын албыг хашиж буй юм. Ингээд түүний сонирхолтой ярилцлагыг хүргэе.

-Анх яаж яваад “Өглөө” хөтөлбөртэй холбогдсон талаар чинь яриагаа эхэлье?

-Энэ миний хувь заяа. Магадгүй телевизийн хөтлөгч болох юмсан гэсэн мөрөөдөл маань биелж “Өглөө” хөтөлбөрт орсон болов уу. Энэ нэвтрүүлэгтэй амьдралаа холбосноор миний хүсэл мөрөөдөл, зорилго тэмүүлэлд маш их өөрчлөлт орсон. “Өглөө” хөтөлбөр маань өргөжөөд зөвхөн өглөөний хөтөлбөрийг хүргээд зогсохгүй, нийгэмд тустай үйл ажиллагаанд оролцох маягаар хүрээгээ улам тэлсэн дээ. Үүнд нь миний оруулсан хувь нэмэр бага ч атугай байдагт нь одоо хүртэл баярлаж явдаг юм.

-Тэгвэл шинэ өглөө таны хувьд?

-Хамгийн их эрч хүч, энерги хуримтлуулсан, сэтгэх чадвар сайтай, сэргэлэн цовоо байх цаг гэж боддог. Шинэ өдөр болгоны эхлэлд урам зоригоор дүүрэн, эрч хүчтэй ажиллах чухал хөшүүрэг бол өглөө учраас уншигчдадаа хандаж “Эрт босч байгаарай. Тэгвэл ихийг хийж бүтээж, амжилт гаргаж чадна шүү” гэж хэлмээр байна.

-Телевизэд хөл тавьж байсан Гэрлээгийн дүр төрх, байр суурь өнөөдөр нэлээд өөрчлөгджээ?

-Тийм шүү. Цаг хугацаа гэдэг хүнийг хэтэрхий олон зүйлд сургадаг юм байна. Гэхдээ их зүйл үзсэн хүмүүст бол миний амьдралын туршлага бага л даа. Миний хувьд, өнгөрсөн цаг хугацаа маш их завгүй ажиллаж хөдөлмөрлөсөн он жилүүд байлаа. Хоёр ч их сургууль төгслөө. Би 23 дугаар дунд сургуулийн сурагч байхаасаа эхлээд л “Өглөө” хөтөлбөрт ажилласан. Их сургуульд орсон ч гэлээ, телевизийн ажлаа орхиогүй. Оюутны амьдрал, телевизийн нэвтрүүлэг, шалгалт шүүлэг, дипломын ажил гээд л ар араасаа ундарсан их асуудлыг цэгцлэх гэж хэрэндээ л хичээдэг байсан. Телевизийн сэтгүүлчийн ажил гэдэг цаг наргүй байхын зэрэгцээ маш их ачаалалтай байдаг шүү дээ. Тиймээс анх телевизэд хөл тавьж байсан үеэс одоо огт өөр Гэрлээ болсон гэдэг нь ойлгомжтой. Өнгөрсөн цаг хугацаа маань үр бүтээл, дурсамж дүүрэн байдаг юм.

-Сэтгүүлчээс өөр мэргэжил сонирхож байв уу. Энэ мэргэжлийн юунд нь тэгтлээ татагдсан гэж?

-Би амьдралаа сэтгүүлчээс өөрөөр төсөөлж огтхон ч үзээгүй. Тогооч, жүжигчин ч юмуу болъё гэж бодоогүй. Гэр бүлийнхэн маань энэ мэргэжилтэй их ойролцоо ажилтай хүмүүс. Манай эмээ сэтгүүлч хүн. МУИС-ийг төгсөөд МҮОНТ-ийг үүсгэн байгуулагдахад нь ажилласан хамгийн анхны уран бүтээлчдийн нэг. Харин өвөө маань жүжигчин. Ээж радиод найруулагчаар ажилладаг. Тэгэхээр амьдрал маань цаанаасаа л телевизтэй холбоотой байсан байгаа биз. Миний бага нас телевиз, радиогийн байрны коридорт л өнгөрсөн юм шүү дээ. Тийм болохоор энэ том байгууллагад ажиллахыг эртнээс хүсдэг байсан нь мэдээж. Гэр бүлийнхэн маань ч миний энэ сонголтыг хүлээн зөвшөөрч, их дэмждэг байсан.

-Таны хэлний боловсрол?

-Дунд сургуулийнхаа солонгос хэлний ангийг төгссөн. Хажуугаар нь англи хэл сурсан. Хэдийгээр төгс ярьж чадахгүй ч гэлээ, цаашид улам сайжрахын төлөө хичээнэ ээ. Ажлынхаа хажуугаар хэлний мэдлэгээ сайжруулж, өөр чиглэлээр ч гэсэн өөрийгөө хөгжүүлэхийн төлөө зорьсон зүйл байлгүй яахав. Магадгүй, боломж гарвал гадаадад ч гэсэн сурч мэднэ.

-Айлын том охин гэлүү?

-Тийм ээ, нэг эрэгтэй дүүтэй.

-Амралт, чөлөөт цагаа яаж өнгөрүүлдэг вэ?

-Гэр бүлийнхэнтэйгээ хамт байж, салхинд гарах дуртай. Гэхдээ надад чөлөөт цаг гэж бараг байдаггүй. Зав гарвал унтаж амрахыг хичээнэ ээ. Би ер нь хөдөө ч юм уу, гадаад руу амрах зорилгоор явдаггүй. Ихэвчлэн ажлын шугамаар л явж байлаа.

-Таныг эфирийн дүр төрх, хэллэг сайтай болохоор кинондоо тоглуулах хүсэлтэй найруулагч цөөнгүй байдаг байх. Ийм санал ирдэг үү?

-Өө, зөндөө ирж байсан. Бүр нэг удаа Л.Эрдэнэбулган найруулагчийн “Чингис хаан” кинонд хүртэл тоглох санал ирэхээр нь очиж дүрийн шалгаруулалтад оролцсон.

-Ямар дүр вэ?

-Бөртэ хатны дүрд. Гэхдээ мэдээж энэ кинонд тоглохыг хүсч байгаа олон сайхан охид байсан. Тэдэнтэй цуг шалгаруулалтад оролцох үнэхээр сонирхолтой санагдсан шүү.

-Багадаа цэцэрлэгийн хашаа давж зүггүйтдэг охин байсан гэлцдэг юм билээ?

-Аа, тийм. Зарим хэвлэлүүд дээр миний тухай янз бүрээр л бичдэг. Бүр намайг “Өглөө” хөтөлбөрийн Гэрлээ хулгайч” гэсэн гарчигтай мэдээлэл хүртэл гарч байлаа. Гайхаад уншсан чинь багын маань зүггүйтлийг бичсэн байна лээ.

-Тэгээд үнэн юм уу?

-Яахав, тэр бол үнэн. Багадаа үнэхээр их сахилгагүй охин байсан юм чинь. Тэр үед нөхөрлөж байсан найз охид маань одоо ч уулзалддаг. Тэдний нэг нь бүр “TV5” телевизийн хөтлөгч Б.Болормаа шүү дээ.

-Та хоёрыг төрөл садны холбоотой хүмүүс гэж ярилцдаг. Тийм гэж үү?

-Үгүй ээ. Болороо бид хоёрыг адилхан харагддаг болохоор хүмүүс “Энэ хоёр эгч дүүс юм гэнэ лээ” гэж ярьдаг юм шиг санагдсан. Царай зүс маань их төстэй л дөө. Тэгээд ч Болороо миний эгч гэж ярих дуртай болохоор би дүү шиг нь байхыг хичээдэг. Амьдрал дээр эгч дүүс шиг дотно нөхөрлөхөд буруу зүйл байхгүй биз дээ. Миний бага нас их сайхан өнгөрсөн. Тэр айлын хашаанаас жимс хулгайлсан маань ч гэсэн үнэний ортой л доо./инээв/

-Ажлынхаа хажуугаар томоохон арга хэмжээ хөтөлж байгаа харагддаг. Тодорхой тогтсон ханш, урамшуулал гэж байдаг биз?

-Байлгүй яахав. Арга хэмжээг нь хөтлөх гэрээ хийсэн газрууд байдаг юм. Мэдээж, тэдгээрээс тодорхой хэмжээний мөнгө авах асуудал байгаа.

-Хөтлөгч хүнд тавигдах шаардлага ямар байх ёстой вэ?

-Эфирийн дүр төрх сайтай, соёлтой байхаас гадна үзэгчдэд юу хүргэж байгаагаа мэддэг байх ёстой. Зүгээр нэг текст унших биш, өөрөө бас энэ талаар мэдлэгтэй байх нь чухал. Хөтлөгч байх үед надад ч бас мэдэхгүй зүйл цөөнгүй тулгардаг байсныг нуугаад яахав. Тиймээс үзэгчдийн хүсэл сонирхлыг мэдрэх мэдрэмжтэй, тулгарсан асуудлыг эвтэйхэн зохицуулах чадвартай байвал сайн даа.

-Сүүлийн үеийн телевизийн хөтлөгчдийн гадаад төрх, үг хэллэгийг их шүүмжилдэг болж?

-Тэр бол тухайн телевизийн бодлого байх л даа. Гэхдээ аливаа шинэ юм болгонд алдаа байлгүй яахав. Магадгүй намайг анх эфирээр гарахад хүмүүс “Хэлээ хазсан охин байна” гэж бодож байсан ч юм билүү. Аливаа юм багаасаа эхэлдэг. Тэр хүн өнөөдөр хэлээ хазсан жаахан охин байж болно. Гэхдээ хэдэн жилийн дараа огт өөр хүн болно. Тэр үед түүнийг жинхэнэ утгаар нь үнэлэх цаг ирэх байх. Ийм цагийг л хүлээх хэрэгтэй. Манайхан шинэ юманд хэтэрхий шүүмжлэлтэй ханддаг зантай улс. Тийм байж болохгүй шүү дээ. Бид нэг нэгнээ аль болох дэмжиж, тусалж, зөвлөх ёстой. Муу талыг нь эрж хайхаас илүүтэй, шинэ соргог зүйлийг нь олж харах ёстой болов уу.

-Гоо сайхан, стиль имижээ байнга анхаарах нь тодорхой. Таны хувьд гоо сайхнаа хаана даатгадаг бол?

-Би “Эжресс” гоо сайхны салоны байнгын үйлчлүүлэгч. Харин үс засалт, нүүр будалтаа өөрөө хийгээд сурчихсан болохоор томоохон арга хэмжээ хөтлөхөөс бусад үед хэн нэгнээр янзлуулдаггүй. Өөр хүн нүүрийг минь будчихаар нэг л биш юм шиг санагдаад болдоггүй юм. Тэгэхээр ямар ч үед өөрөө л бүх зүйлээ зохицуулна даа.

-Гэрлээгийн гоёл юу вэ?

-Надад тийм их үнэтэй гоёл ч юм уу, учиргүй гоё алмаазан шигтгээ, цагаан алт энэ тэр байхгүй. Миний хамгийн үнэтэй гоёл бол залуу нас минь гэж бодож байна.

-Үе үехэн жингээ өөрчлөөд байдаг. Спортоор хичээллэдэг үү?

-Усан бассейн, бодибилдинг, аэробекээр хичээллэдэг. Харин энэ бүхнээ жаахан завсарлачихаар таргалчих гээд байдаг тал бий. Бас заримдаа спортоор хичээллэх боломж олдохгүй, цаг наргүй ажилласаар байгаад турчихсан тохиолдол ч байдаг. Биеийн жин маань янз бүр л байдаг байх.

-Амьтан тэжээж байв уу?

-Би нохой, тоть тэжээж үзсэн. Харамсалтай нь, хоёулаа үхчихсэн. /инээв/ Тийм болохоор би одоо дахиж амьтан тэжээе гэж бодохоо больсон.

-Тэгвэл хобби чинь юу вэ?

-Надад нэг их сүртэй хобби гэхээр юм байхгүй л дээ. Харин ажил маань миний хобби, хүсэл сонирхол гэж боддог. Тэгэхээр ажилтайгаа холбоотой янз бүрийн мэдээ материал цуглуулдаг гэх үү дээ. Хобби минь гэвэл энэ л болов уу.

-Нэлээд эршүүд зантай юм шиг санагдах үе бий. Энэ тухай юу гэж боддог вэ?

-Мэдэхгүй ээ, би тийм ч их эршүүд биш. Гэхдээ бас ямбалаг эмэгтэй ч биш./инээв/

-Бухимдахаараа яадаг вэ?

-Бухимдаж байсан үе надад байдаг л байх. Би учир утгагүй бухимддаггүй. Хааяа гэнэт их цочмог уурладаг ч, дорхноо уур гарчихна. Бухимдахаараа зарим хүмүүс шиг архи ууж, тамхи татаж чадахгүй юм чинь одоо яая гэхэв дээ.Тэгсхийгээд л өнгөрнө.

-Стрессээ яаж тайлдаг юм бэ, тэгвэл?

-Цаг зав гарвал бүжиглэх дуртай. Гэхдээ би шоу цэнгүүнээс холуур явдаг. Миний ажил амжихгүй, бас олдсон цагаа өөрийнхөө амралтад зориулахыг хүсдэг учраас тэр. Шоу хүнийг маш их ядраадаг шүү дээ. Миний бодлоор, охид залууст чөлөөт цагаа зөв өнгөрүүлэх газар их цөөхөн юм шиг санагддаг. Тиймээс залуучууд маань их шоудаж байна. Энэ шоу маань зүгээр сайхан бүжиглэж, бие биетэйгээ танилцах бус харин ихэнхдээ архи дарс уух гэх мэт мансуурлын байдалтай болчихдог. Үүний ард ямар ч кайф байхгүй шүү дээ. Олдсон таван төгрөгөө зөвхөн шар айрагт зориулаад л өнгөрнө гэсэн үг. Архи уугаад маргааш нь босч чадахгүй шаналж хэвтэнэ гэдэг чинь тийм сайхан гэж үү. Энэ бол кайф биш. Харин жинхэнэ кайф өгөхөөр юм чинь тэр цаг, мөнгийг зориулах ёстой зүйлд нь зарцуулах байхгүй юу. Миний хувьд, бааранд суух цаг хүртэл хайран санагддаг юм. Тэгээд ч иймэрхүү зүйлд үрэх мөнгө надад байхгүй. Тиймээс спорт ч юм уу, шинээр үүсгэн байгуулагдаж байгаа тохилог газарт очиж найзуудтайгаа юм ярьж суух, боулинг тоглох, кино үзэх гэх мэт үнэхээр кайф авах зүйлд л цагаа зарцуулна даа. Сүүлийн үед чөлөөт цагаа теннист зориулах бодолтой байгаа.

-Тодорхой хэмжээгээр олны танил байхад хэцүү юм шиг санагдах үе таарах уу?

-Үгүй ээ, үгүй. Намайг хүмүүс таниад байхаар би нэг их зовсон ч юм алга. Танихгүй байсан ч ялгаагүй. Хүмүүс танивал таньж л байг. Гэхдээ тэд боддог байх. “Энэ олны танил хүн юм чинь их мундаг байх” гэж. Гэтэл зөвхөн миний хийж байгаа ажлыг л хүмүүс мэдэж байгаа болохоос биш, Гэрлээ гэдэг хүнийг мэдэхгүй шүү дээ. Би ямар поп од биш. Тийм болохоор надад тэгж учиргүй гангарч яваад байх сонирхол ч алга. Харин би хийх ёстой ажлаа хийгээд явж байгаа сэтгүүлч хүн гэж өөрийгөө бодох дуртай.

-Сайхан бүсгүйн тэмцээнд оролцох санал ирж байсан гэдэг. Энэ тухайд ямархуу бодолтой явдаг вэ?

-“Монголын сайхан бүсгүй” тэмцээнийг хөтөлж байхад их сайхан санагддаг байсан. Энэ тэмцээнд оролцох санал ирсэн ч би “Энэ бол миний хийх ёстой ажил биш” гэж бодоод татгалзсан л даа.

-Shopping хийх дуртай юу?

-Бусад хүмүүс шиг айхтар их shopping хийгээд байдаггүй л дээ. Үнэндээ бол залхуутай санагддаг. Хааяа шаардлага гарвал явна. Харин би бусад үед мөнгө үрж, цаг заваа зарцуулж, юм үзэх гэж дэлгүүр хэсэх дургүй. Хувцас гоёлоо авдаг цөөн хэдэн газрууд байгаа учраас энэ тал дээр санаа зовдоггүй юм. Бас ээж маань гоёл чимэглэл, бусад зүйлийг бэлтгэж өгдөг учраас надад дэлгүүр хэсч, цагаа үрэх хэрэг байхгүй гэж боддог.

-Таны дургүй зан?

-Их олон бий. Худлаа хэлдэг, ажил хэрэгч биш, юмыг дутуу дулимаг хаях, хий дэмий мөнгө үрэх занд дургүй. Хүн маш их ажилласныхаа хэрээр л амжилтад хүрэх байх гэж боддог.

-Эрэгтэй хүний юуг нь түрүүлж хардаг вэ?

-Мэдэхгүй ээ, нээрээ юуг нь түрүүлж хардаг юм бол... Мэддэггүй шүү дээ, би./инээв/ Гэхдээ надад бүх талаараа өө сэвгүй эрэгтэй хүн л таалагддаг. Нөхөр маань ч энэ бүх шинжийг өөртөө агуулсан сайхан залуу.

-Хүү тань том болж байна. Дүү нэхэж сандаргахгүй байна уу?

-Өө, нэхэлгүй яахав. Айл гэрийн эзэгтэй, хүүхдийн ээж болсон юм чинь энэ тухай бодно оо. Гадаадад хүмүүс баяжих тусмаа олон хүүхэдтэй болдог юм билээ. Миний хувьд, ажил амьдралаа тогтсон цагт үр хүүхдийнхээ тоог нэмнэ гэж боддог юм. Ер нь, хүүгээ дүүтэй болгох төлөвлөгөө гэр бүлийн маань ойрын асуудал болоод байгаа шүү./инээв/

Р.МӨНГӨН

Ө.ГЭРЛЭЭ: Сайхан бүсгүйн тэмцээнд оролцох санал ирсэн ч хүлээж аваагүй
Tweet
Bolod.mn