2012-06-08“Өдөр өдрийн нар” киноны Агиймаа, “Аравт” киноны ганц эмэгтэй дүр оточ Өнө-Мөнхлэй, “Эсрэг дурлал”
жүжгийн гол дүрд чадварлаг тоглосон УДЭТ-ын залуу жүжигчин, Монголын сайхан бүсгүй XIIуралдааны “Ган-эрдэнэ”-ийн өргөмжит Д.Ганцэцэгтэй ярилцлаа.
-Уран бүтээлч хүнтэй уулзсаных хамгийн сүүлд ямар уран бүтээл дээр ажилласан бэ?
- Сүүлийн уран бүтээл гэвэл Монгол-Японы хооронд дипломат харилцаа тогтоосны 40 жилийн ойд зориулан тавигдсан жүжиг байгаа. “Гэнжийн туульс” гэж. Мянгаад жилийн өмнө буюу 1008 онд бичигдсэн дэлхийн хамгийн анхны роман гэгддэг. Японы зохиолч эмэгтэй Мурасаки Шикүбү гэдэг хүний зохиолоос сэдэвлэсэн “Эсрэг дурлал” жүжигт тоглолоо. Зохиолч Б.Галаарид гуай бичсэн.
-Энэ жүжигт ямар дүрд тоглосон бэ?
-Гол дүрийн нэг хааны бага хатан Фүжицүбогийн дүрд тоглосон.
-Жүжгийн онцлогийн талаар ярихгүй юу?
-Энэ жүжгийн хувьд маш олон онцлогтой. Нэгдүгээрт: Япон Монголын хооронд дипломат харилцаа тогтсон гэдэг утгаараа. Хоёрдугаарт: Дэлхийн хамгийн анхны роман гэгддэг онцлогоороо. Роман нь дэлхийн 30 гаруй оронд хэвлэгдэж байсан. Япондоо маш алдартай. Манайхаар бол “Монголын нууц товчоо” шиг алдартай үнэ цэнэтэй зохиол. Японд “Гэрэлт Гэнжийн дурлал” гэдэг. Гэнжийн тухай кино зохиол, хөгжмийн том том бүтээлүүд, хүүхэлдэйн кинонууд, “Гэнжи” гэсэн тодотголтой ресторан, зоогийн газар олноор нэрлэгдсэн байдаг. “Гэнжи” гэдэг нэр бол Японд брэнд болсон үг.
“Гэнжийн туульс” романаасаа сэдэвлэн жүжгийн зохиол бичигдэж байгаагүй юм билээ. Анх удаагаа Монголчууд тайзны жүжгийн зохиол болгож байгаагаараа Япон-Монголын соёлын харилцааны хувьд онцлогтой, тэмдэглэгдэхүйц үйл явдал болсон юм.
Мөн 80 жилийн түүхтэй энэ театрын хувьд анх удаагаа дорно дахины жүжиг тавигдсанаараа бас онцлогтой. Өмнө нь манай театрт голдуу европын жүжгүүдийг маш сайн тавиж байсан. Хятадын жүжиг тоглогдож байсан ч дорно дахины тэр дундаа японы жүжиг тавигдаж байгаагүй.
-Театрт ороод хэр удаж байна. Одоогоор хичнээн дүр бүтээв?
-Театрт орж ирээд таван жил гаруй болж байна. Туслах болоод гол дүрийн хориод уран бүтээлд тоглосон байгаа. Тэр дундаа голлох уран бүтээл гэвэл найруулагч Б.Мөнхдоржийн “Харц хатан” хэмээх дуулалт жүжгийн Сэржмядаг гэж харц хатны гол “дүбльёр”-оор ажиллаж байсан. “Дүбльёр” гэдэг нь нэгдүгээр дүр, хоёрдугаар дүр гэж байдаг. Дөрвөн ийм “дүбльёр” ажиллаж байсан түүний нэг “дүбльёр”-оор нь ажилласан. Тэр жүжгээс хойш, энэ япон жүжгийн дүр бол миний бас нэгэн тоглосон гол дүр юм.
-Анхны уран бүтээлийн хувьд?
-Хамгийн анхны уран бүтээл театрт анх ороод Б.Наранбаатар найруулагчын “Нууц амраг чинь болъё” жүжгийн Хулан гэж охины дүрд тоглосон. Энэ нь СУИС-ийн жүжигчний ангийг дөнгөж төгсөөд байсан надад их ойрхон дүр байсан. Тэгэхэд яг эргээд СУИС-ийг төгсөж байгаа нэг ангийн хүүхдүүдийн үйл явдлыг маш сонирхолтойгоор харуулсан. Оюутан залууст зориулсан сэдэвтэй жүжигт тоглож байлаа.
-Жүжигчин болоогүй байсан бол?
-Жүжигчин болоогүй байсан бол дуучин болох байсан. Багаасаа урлаг сэтгэхүйтэй, урлагт түлхүү оролцоод ирсэн болохоороо ч тэр юм уу. Ер нь хүн урлагаас өөр гоё зүйлийг мэдэрч чаддаггүй юм билээ. Тийм болохоор би яагаад ч урлагаас хазайж болохооргүй хүн.
Анх дуучин болох гэж байгаад жүжигчин болсон л доо. Тийм учраас эргээд би дуучныхаа мэргэжлээр сурч заавал дуучин болно. Энэ мэргэжлийг эзэмшинэ гэж зүтгэсэн л дээ. Тэгээд жүжигчний мэргэжлээр төгсчхөөд эргээд СУИС-д дуучны ангид уртын дуулаачаар бас төгссөн. Би дуучин, жүжигчин гэсэн хос мэргэжилтэй. Жүжиглэхийн хажуугаар дуучин мэргэжлээ, мэдээж хэрэг орхихгүй. Хамтад нь хослуулж ажиллана.
-Хүүхэд насныхаа тухай ярихгүй юу? Ер нь ямархуу хүүхэд байсан бэ?
-Гэр бүлийнхэн дотроосоо арай илүү үсэрч, цовхчсон хэрэгт дуртай хүүхэд байсан. Юм юманд оролцдог. Аав, ээж маань аймаар зөрүүд хүүхэд байсан гэж хэлдэг. Наашаа гэхээр цаашаа, цаашаа гэхээр наашаа гэдэг хүний уурыг барсан тийм зөрүүд хүүхэд байсан гэдэг юм. Одоо бол зүгээр л дээ. /инээв./
-Өөрийг чинь “Мисс”-ийн титэм зүүж байсан гэж сонссон. Энэ талаараа ярихгүй юу?
-2003 онд би есдүгээр ангиа төгсөөд баруун таван аймагт Увс, Ховд, Говь-Алтай, Завхан, Баян-Өлгий гэсэн Баруун бүсийн мисс шалгаруулах тэмцээнд ороод түрүүлж байсан. Оюутан болоод нэгдүгээр курст байхдаа Монголын сайхан бүсгүй XII уралдаанд орж “Ган эрдэнэ”-ийн өргөмжлөл авч байсан.
-Ер нь өөрөө урлаг, тэр дундаа жүжиглэх урлагийг юу гэж боддог вэ?
-Би жүжигчин мэргэжлийг сонгож энд ажиллаж байгаадаа бахархдаг юм. Жүжигчин хүн гэдэг нарийн мэдрэмжтэйгээс гадна дэлхийд ховорхон мэргэжил гэж би боддог. Жүжигчниймэргэжлийн давуу тал нь би өөрөө Ганцэцэг гэдэг хувь хүн. Гэтэл энэ дэлхий дээр байдаг хамгийн сонирхолтой, сонирхолгүй,баянхоосон,хатан ч юм уу, хаан ч юм уу гээд нийгмийн бүхий л давхаргад амьдарч байгаа хүмүүсийн амьдрал дотор орж түүнийгээ өөрийнхөө бие сэтгэл, дотоод ертөнцөөрөөмэдэрч гаргаж ирээд хүмүүст дамжуулж хүргэдэг нь сонирхолтой, бахархалтай. Нэгэн сэтгэл судлаачийн хажуугаар бас хүн судлал,сэтгэл судлал гэж би ойлгодог.
-Өөрийг чинь жүжигчин болоход хөтөлсөн хүн гэвэл хэнийг хэлэх вэ?
-Намайг анх жүжигчиниймэргэжилд хөтөлсөн хүн гэвэл Н.Золзаяа гэж эмэгтэй байгаа.Харин энэ мэргэжлийг эзэмшүүлж өгсөн ачтан бол ардын жүжигчин Лхамхүү багш минь юм.Би уг нь дуучин болногээд дуучин, жүжигчнээр хоёулангаар нь шалгалт өгсөн. Харин шалгалтын комисс тухайн үед намайг жүжигчин болгох уу, дуучин болгох уу гээд шийдсэн юм шиг байгаа юм. Тэгээд л би жүжигчин болсон. 2003 онд Лхамхүү багшийн удирдлаган дор төгссөн. Увс аймгийн гавъяат багш Найдангийн охин Золзаяа гэж 2003 онд төгсөөд намайг төгсөх жил дипломынхаа ажлыг нутагтаа ирж хийж байсан. Тухайн үед Золоо эгчийн тоглосон жүжгийг үзээд би жүжигчин болъё гэж шийдсэн. Яг тэрүед Увсад элсэлт авах комисс ажиллаж байсан. Тэгээд Золоо эгчтэй хэдэн өдөр,шөнөгүй бэлтгэл хийгээд шалгалтанд орж байсан.
-Таны бүтээх юмсан гэсэн дүр юу вэ? Тоглож амжсан уу?
-Миний хувьд боддог байсан нэг зүйл маань биелсэн юм шиг байгаа юм. Тэр маань биелэжби “Аравт”кинонд Өнө-Мөнхлэй гээд оточ эмэгтэйн дүрийг бүтээсэн. Мэдээж уран бүтээлчхүн бүр өөрсдийн тоглосондүр болгондоо сэтгэл хангалуун байдаггүй,чамлалтай л байдаг байх. Миний хувьддэлгэцийн түүхэн кинондтоглох юмсан гэж боддог байсан. Одоо харин тайзны түүхэн хатан ч юм уу, түүхэн эмэгтэйн дүрд тоглохсонирхол байгаа.
-Хүн бүрт мөрөөдөл байдаг. Таны мөрөөдөл ер нь хэдэн хувьтай биелсэн гэж боддог бэ?
-Мөрөөдөл маань зууны 20-30 хувьтай л явж байна. Хамгийн анх би ямартай ч урлагийн хүн болно гэж бодож байсан минь биелсэн. Тэр дундаа жүжигчин гэдэг мэргэжлийг сонгон суралцаад Монголын академик театр гэсэн урлагийн эцэг байгууллагад ажиллаж байгаа нь миний багын мөрөөдлийн нэгээхэн хэсэг нь биелсэн гэж бодож явдаг. Би урлагт хэдий олон жил болоогүй ч дэлгэцийн түүхэн кинонд тоглох хүсэл байсан. Тэр хүсэл минь бас биелсэн. Хүний мөрөөдөл хязгааргүй шүү дээ. Хүнд биелэх боломжтой, боломжгүй мөрөөдөл гэж зөндөө байдаг.
-Таны ойрын болон хэтийн төлөвлөгөө юу вэ?
-Ойрын төлөвлөгөө гэвэл мэдээж театрынхаа шинээр гарч байгаа уран бүтээлүүдэд аль болохоор гол дүрд тоглохоор ажиллах хүсэл эрмэлзэл байна. Мэдээж залуу хүнийхээ хувьд олон сайхан уран бүтээлд тоглох хүсэл их байна. Театрынхаа уран бүтээлүүдэд түлхүү оролцоно гэж бодож байна. Ер нь театрын гээдзөвхөн театртаа байх биш дэлгэцийн уран бүтээлүүд дээр бас ажиллая гэсэн бодол байгаа. Хэтийн төлөвлөгөөний хувьд яваандаа дуучин мэргэжлээ хөгжүүлж, дуулах, жүжиглэх хосолсон бүтээлүүдэд оролцох хүсэл зорилго байна.
-“Урлагийн тогоонд чанагдана” гэж ярьдаг даа . Өөрөө ер нь тэр тогоонд хэр чанагдаж байна даа?
-Урлагийн ертөнцөд хүн нэг алхаад орсон бол тэгээд үхэн үхтлээ л чанагддаг гэдэг шүү дээ. Тэгэхээр би ер нь түүхий л явж байгаа гэж бодож байна.
-Театрын алаг нүдэн “Ганцэцэг”-үүдийг хүмүүс хэр андуурдаг вэ?
-Андуурал их гардаг байсан шүү. Бид хоёрын овог нэр, байгаа төрх адилхан болохоор анх театр дотроо ялгахад хэцүү байсан. Би дөнгөж төгсөөд ирсэн болохоор жижиг Ганаа гэхээр нөгөө Ганаа эгч биеэр жижигхэн, намайг биеэр нь том Ганаа гэхээр түрүүлээд орж ирсэнээр нь Ганаа эгчийг том гэж ялгамаар байдаг хэцүү байсан л даа. Одоо бид хоёр СТА Д.Ганцэцэг, залуу жүжигчин Д.Ганцэцэг гэдгээрээ ялгарч байна даа. Бас намайг “UFC” Ганаа гэдэг./инээв/
-Одоо хоёулаа жаахан чөлөөт сэдвээр ярилцъя. Хөөрхөн бүсгүйн араас гүйдэг эрчүүд мэдээж олон л байгаа байлгүй?
-Байгаа байгаа.
-Найз залуутай юу?
-Найз залуу байхгүй.
-Хэзээ хослон жаргах гэж байна даа?
-Болоогүй ээ. Одоогоор залуу байна. Тийм болохоор амьдралд нэг их яарахгүй байгаа. Уран бүтээлдээ түлхүү анхаарч байгаа. Яваандаа амьдрал зохиох байлгүй дээ.
-Анхны хайрын тухай юу гэж боддог вэ?
-Ер нь хүний анхны гэсэн юм бүхэн сэтгэлд тод байдаг шүү дээ. Анхны хайр гэдэг тэр хүний сэтгэл дотроос хэзээ ч гарахгүй, амьдралынх нь туршид, үхэн үхтэл нь тэр хайр нь хамт явдаг байх гэж боддог. Магадгүй анхны хайраа олж авсан бол насан туршдаа тэр хайртайгаа хамт байхыг хичээгээрэй. Хэрвээ олсон мөртлөө алдсан бол тэр хайрынхаа дурсамжаар ч юм уу, магадгүй тэр хайр ахиж олдохгүй шүү дээ. Хайрынхаа аз жаргал, эгэл жирийн хамгийн нандин ийм хайраараа өөрийгөө цэнэглэж явбал хүнд илүүдэхгүй байхаа гэж бодож байна. Анхны хайрын дурсамжаараа хүн амьдралдаа яагаад өөдрөг сайхан амьдарч болохгүй гэж.
-Ярианаас чинь сонсоод байхад өөрөө анхны хайртайгаа учраад бүтээгүй юм шиг байна тийм үү?
-Тийм ээ. Би анхны хайртайгаа учирсан. Анхны хайр бүтдэггүй, бүтдэг гэж ярьдаг. Миний хувьд бол бүтээгүй л гэж боддог.
-Залуу хүний хувьд үеийнхэндээ хандаж юу гэж хэлэх вэ?
-Залуу хүний хувьд маш их хүсэл эрмэлзэл байгаа. Хүсэл тэмүүлэл хүнийг өөд нь татаж санасан бүхний оргилд хүргэдэг гэсэн сайхан сургааль байдаг. Залуучууд мэдээж хэрэг маш том мөрөөдөл зорилготой байж тэр мөрөөдөл зорилгынхоо нэгээхэн хэсэгт хүрч очдог байх гэж боддог. Тэгэхээр залуучууддаа хандаж хэлэхэд маш том зорилго өөрийнхөө өмнө тавиарай. Түүнийгээ биелүүлэхийн тулд жижиг. жижиг зорилтуудыг хойш нь тавилгүйгээр яг одооноос эхлэн зорьсон зорилгодоо хүрэхийг хичээж эхлээрэй. Зорилтууд чинь өөрийг чинь цаашдын оргилд хөтлөөд том зорилго болно. Тэгэхээр зорилго чинь биелэх боломжтой. Зорилго чинь томроод чиний мөрөөддөг байсан мөрөөдөл чинь биелэнэ гэж хэлмээр байна.
/Өнөөдрийн тойм/ сонин
.jpg "Томруулж харах")
.png "Томруулж харах")
