Наадмын дараа Н.Алтанхуягийн хувь заяаг шийднэ

2012-07-09

-Тус намын зарим фракц гуравхан гишүүн нэмсэн даргаа гавьяагүй гэж үзэж байгаа гэнэ-

Ард түмэн энэ удаагийн парламентын сонгуулийн дүнгээр улс төрийн намуудыг, улстөрчдийг шалгахаар шийджээ. Тэд хэнд нь ч ялалт өгөлгүй адилхан тэнцүү хуваагаад хаячихлаа. Энэ парламентад олонх, ялагч гэж гарсангүй. Төрд шургах донтонгуудыг бүгдийнх нь төлөөллийг оруулж, хэрхэн яаж дөрвөн жил ажиллах, тэр дундаас аль хэсэг нь цойлон ард түмнийхээ төлөө зүтгэхийг харахыг хүссэн бололтой. Гэхдээ 60 чавганц уралдахад нэг нь түрүүлдэг зарчмаар Ардчилсан нам хэнтэй эвсэн Засгийн газар байгуулж төр барих талаар санал гаргах эрхтэйгээ үлдэв. Гэхдээ энэ эрх маш хямдхан буюу өмнөх парламентад байсан суудлаа гурваар нэмэгдүүлэхэд л олдсон юм.

Иймээс ялагчгүй парламентын цээжээ дэлдэн гүйгсэд Ардчилсан намынхан болоод байгаа хэрэг. Гуравхан суудлаар ахиулсан ялалтыг намынх нь гишүүд ялалт гэж үзэхгүй байгаагаас тус намд чимээгүй дайн эхлээд байна. Түүхэндээ Ардчилсан нам ганцхан удаа ялалт байгуулсан ч Засгийн газраа тогтворгүйтүүлж, дотоод дайндаа идэгдсэн нь энэ намд итгэх иргэдийн итгэлийг ийнхүү бүрэн унтраасан аж. Энэ удаад З.Энхболдын сонголт, Л.Болдын зүтгэлээр луйвардсан гэсэн нэр зүүн ажиллаад ч өмнөх гишүүдийнхээ тоог чадан ядан гурваар нэмэв.

Мөн нэг ажиглагдаж байгаа зүйл нь фракцуудын төлөөлөл тэнцүү орсон. Энэ нь намын дотоод дайн дээд цэгтээ хүрэх аятай нөхцөл болж буй юм. Иймээс Ардчилсан нам МАН, МАХН- МҮАН-ын эвсэл алинтай нь ч хамтран Засгийн газар бүрдүүлсэн сайд сугалах, засаг унагах дайн тасралтгүй явах болно гэж улс төрийн хүрээнийхэн үзэж байна. Энэ ч үнэний ортой биз. Ардчилсан нам MAH-тай эвслээ гэхэд МАХН-МҮАН зүгээр байлгахгүй. Мөн МАХН-МҮАН-тай эвслээ гэхэд МАН болон бие даагчид, ИЗНН тайван суулгахгүй.

Иймээс ирэх дөрвөн жил парламентын хуралдаанаар сайдын суудал, Засгийн газрын бүрэн бүтэн байдлын тухай асуудал хамгийн олон удаа орж, ил далд тохироо тохиролцоо тасрахгүй. Үүний хэрээр нийгэм доргиотой, ард түмний амьдрал долгилсоор байх нь гардаагүй бололтой. Харин яг одоогийн байдлаар буюу УИХ-ын сонгуулийн дүнг зарласнаас хойш Ардчилсан намд намын даргын төлөөх тулаан ил гартлаа ширүүсээд байгаа тухай улс төрийн хүрээнд ярих боллоо. Гуравхан суудал нэмчхээд гавьяа байгуулсан гэж цээжээ дэлдэн Ерөнхий сайд болохоор зүтгэх хэрэггүй гэж үзсэн З.Энхболд, Х.Баттулга нарын амбийц дотооддоо жинхэнэ цахиур хагалаад байгаа гэнэ. Ардчилсан нам парламентад суудал авсан намуудаас хамгийн олон суудал авлаа гэх баярын долгион энэ хэдэн нөхрийн сэтгэлийг хөдөлгөж дийлээгүй байна. Харин ч Н.Алтанхуягийгаа унагах гарцыг төвөггүйхэн олсон тэд энэ сонгуульд ялагч байхгүй. Түүхэн сонгуулиар үнэмлэхүй ялалт байгуулах ёстой байтал чадсангүй. Тэгээд ч энэ гурван суудал Э.Бат-Үүлийн нөлөөгөөр нэмэгдсэн гэх мэтээр Н.Алтанхуягийн гавьяаг бууруулах өч төчнөөн шалтаг олчхоод байгаа гэнэ.

Үүнийгээ ч наадмын дараа 16-нд хуралдах Үндэсний зөвлөлдөх хорооны хуралдаанаар асуудал болгон оруулж хэлэлцүүлэхээр болоод байгаа гэсэн. Харин энэ ажиллагаагаа хэрэгжүүлэхийн тулд Х.Баттулга намын дарга, Ерөнхий сайдад зүтгэж З.Энхболд чанартай чадвартай ар тал болохоор үгсэн тохироод бараг нэгдэЖ байгаа юм байх. Үүнийг мэдэрсэн Н.Алтанхуяг гараа хумхин суусангүй. Тэрбээр өнгөрсөн хугацаанд болсон Үндэсний зөвлөлдөх хорооны бүхий л хуралдааны өмнө хэрэглэж ирсэн жор буюу жижиг фракцуудыг худалдан авах, албан тушаалаар урвуулах маягаар талдаа татах ажиллагаагаа эхлүүлсэн ажээ. Түүний аргад “Зүүн Хойд Ази” буюу Л.Болд, МҮДН буюу Р.Амаржаргалын фракц дээр нь “Кроун” буюу Д.Нямхүү тэргүүтэй увсынхан орох магадлалтай. 2008 оны сонгуулийн дараа ч МАН-тай хамтарч засаг барих тухай асуудлыг Үндэсний зөвлөлдөх хороогоор хэлэлцэхэд Н.Алтанхуяг эдгээр фракцыг өөртөө нэгтгэж чадсан. Тэрбээр талдаа дуугаргаж, өөртөө гар өргүүлсэн ганц шалтгаан нь сайд, дэд сайд, газрын дарга зэрэг албан тушаалын хуваарилалт байсан. Амташсан хэрээ 13 дахихын үлгэрээр энэ аргаа энэ удаа ч давтахаар зэхэж буй гэнэ.

Харин “1-Ардчилал”, “Мөнх тэнгэр” гэх фракц одоогоор аль талд гар өргөх нь тодорхойгүй байгаа. Залуусын гэх тодотголтой дээрх хоёр фракц яг үнэндээ Н.Алтанхуягийн албан тушаалын төлөө амиа өгөхөөс буцахгүй занг хамгийн ихээр шүүмжилдэг юм.

Ч.Сайханбилэг гишүүн “Засгийн эрхээ барьж, ард түмнийхээ өмнө хүлээсэн үүргээ биелүүлье”хэмээн өдөр бүр шахам тоть мэт хашгираад байгаа нь цаанаа учиртай. Тэрбээр Н.Алтанхуягтаа хий оруулчхалгүй Ерөнхий сайдаар хурдхан томилуулаад авах гэсэн сандралын илрэл гэсэн шүү. Сонирхуулахад энэ удаагийн парламентад “Алтангадас” фракцын Г.Батхүү гэж хөрөнгөлөг төлөөлөл парламентад багтаж чадаагүй нь тэднийг тун ч хүндхэн байдалд оруулаад байгаа гэнэ. Энэ нь цаад утгаараа тус намын эрхийг бариад байгаа “Алтангадас” З.Энхболдын “Шонхор”-т ялагдсантай дүйх асуудал болж амьсгааг нь дээрдүүлээд байгаа нь энэ ажээ. Иймээс ч Г.Батхүүгээ ямар ч үнээр хамаагүй буцаан парламентад багтаах нь “Алтангадас”-ын нэр төр, оршин тогтнохтой салшгүй холбоотой, өндөр ач холбогдолтой асуудал болоод байгаа юм. Харин энэ санаагаа хэрэгжүүлэхээр МАН-аас ялалт байгуулсан Н.Төмөрхүү, С.Чинзориг нарын өмнөөс архи, чокопай зэрэг тараан бичлэг хийж гүтгэсэн нь олны өмнө ил болон хөгөө хөлдөө чирчхээд байна.

Өнөөх Н.Төмөрхүү, С.Чинзориг хоёр юм тараалгалаа гээд байсан сонгогчид нь нийслэлд ирэн “Биднийг тэгээд хэлчих гэсэн” хэмээн Ардчилсан намынхны булхайг нийтэд дэлгэн нүүр хийх газаргүй болгоод байгаа. Ингэхээр “Алтангадас”-ын Г.Батхүү энэ удаад парламентад орж ирэх нь өнгөрч, З.Энхболдын “Шонхор” анхныхаа ялалтын тугийг мандуулав бололтой. МАН, МАХН-МҮАН- ын эвсэлтэй тус бүрт нь уулзалт зохион байгуулан засгаа товлож байгаа Ардчилсан намынхан дотоод тэмцлийнхээ үр дүнг үзэж, ирэх дөрвөн жилд хэн тоглоомын түлхүүр атгахыг наадмын дараах Үндэсний зөвлөлдөх хорооныхоо хуралдаанаар шийдэх нь. Харин Х.Баттулга, З.Энхболд хоёр дахин гэнэдэх эсэх, жижиг фракцууд нь дэд сайд, газрын дарга нарын суудлаар Н.Алтанхуягт урвах эсэхийг харах л үлдлээ.

М.Мөнгөнчимэг tsag