засварын ажил наадмын өмнөхөн дууссан бол үргэлжлээд хотын төвийн зам засварын ажил хийгдэж байна. Зам засвартай холбоотой нийтийн тээврийн чиглэлд ч мөн адил өөрчлөлтүүд гарсан. Сэлбийн хос гүүрийн засварын ажил эхэлсэнтэй холбогдуулан эхний ээлжинд урд гүүрийг засаж есдүгээр сарын 7-нд хүлээлгэж өгөх аж. Зам засварын ажлыг гүйцэтгэж байгаа ажилчид хоёр ээлжээр өдөр шөнөгүй ажиллаж буй хэдий ч борооны улмаас түр зогсолт хийж байгаа гэнэ. Өнөөдрийн байдлаар хотын төвд хийгдэж байгаа зам засварын ажил хэрхэн явагдаж буй талаар Нийслэлийн автозамын газрын хяналтын инженер М.Ганболд, Д.Оюунгэрэл нараас тодруулсан юм.

Д.Оюунгэрэл: Нийт 114 тэрбум төгрөг төсөвлөсөн

-Ажлын явц ямар байна?

-Одоогийн байдлаар нийслэлд дөрвөн хэсэг газарт зам хаалттай байснаас өнөөдрийн байдлаар нэг зам нь ашиглалтад орсон. Мөн 27-ны өдрөөс эхлээд Байгалийн түүхийн музейн уулзвараас хойшоо 260 метр замыг хааж засах төлөвлөгөөтэй байна. Энэ тухайгаа замын цагдаа болон нийтийн тээврийн газартай ярьж байна. Сэлбэ голын гүүрийг 11 метр болгож өргөтгөхөөр ажиллаж байна. Хос гүүрээ хоёуланг нь хаалгүй нэг талынхаа гүүрээр хоёр урсгалтай болгохоор төлөвлөсөн. Гүүрийг есдүгээр сарын 7-ны өдрийг хүртэл хаана. Одоогийн байдлаар гүүрний тулгуурын ажил явагдаж байна. Есдүгээр сарын 7-н гэхэд урд талынхаа гүүрийг бүрэн нээж хэвийн ажиллагаанд оруулаад хойд талын хэсгийг хааж засварын ажлаа үргэлжлүүлэн хийнэ. Хойд талын гүүрийн ажлыг 11-р сарын 20-н гэхэд хийж дуусах төлөвлөгөөтэй. Урд гүүрийн өргөнтэй адил байна. Төмөр бетон хос гүүр ашиглалтад орно. Бас нэгэн хаалттай зам нь Үндсэн хуулийн гудамж буюу Тээврийн товчооны зам байна. Баруун дөрвөн замаас уруудааад шинээр баригдаж байгаа нарны гүүр хүртэлх 300 метр зам гэсэн үг. Энэ замын хойшоо явах урсгалыг 14 хоногийн хугацаатай хаасан. Энэ хугацаанд цахилгаан холбоо, цэвэр усны шугам буюу инженерийн байгууламжийн шугамын ажлыг явуулна. Цаашлаад авто замын шинэчлэлтийн ажил өрнөнө. Энэ жил 60 гаруй төсөл ажлыг төлөвлөсөн. Одоогоор хийгдэх ажил 50 хувийн гүйцэтгэлтэй явж байна.

-Зам засварын ажил явуулахад хүндрэлтэй зүйлүүд гарч байна уу?

- Улирлын шинжтэй ажил учраас зуны дэлгэр цагт хийж дуусгах хэрэгтэй байна. Цаг агаараас гадна газар чөлөөлтийн асуудал нэлээд хүндрэл учруулдаг. Гэхдээ иргэд маань өнгөрсөн жилүүдийг бодоход иргэдийн үзэл бодол өөрчлөгдсөн байна. Нийгмийн тустай ажлыг ойлгодог болж. Энэ ажилд газрын алба сайн ажиллаж байгаа байхаа. Мөн инженерийн шугам сүлжээний ажил байна. Гэнэт кабелийн утас гарч ирэх тохиолдол цөөнгүй байдаг. Зам засварын ажил түлшний асуудлаас болж саатаж байсан бол энэ жилийн хувьд түлш элбэг байгаа нь ажилд мөн тус дэмтэй байна.

-Зам засвараас гадна хотын доторхи нэлээд замыг өргөтгөх ажлууд хийгдэж байна?

-Тиймээ, жишээ нь баруун аймаг руу гардаг гол зам болох 22-ын товчооны зам байна. Нийт урт нь 10.6 км. Энэ замыг 21 метр болгон гурав дахин өргөсгөж байна. Ганц машин зөрөх боломжтой байсан бол одоо гурван машин зөрдөг болгосон. Энэ ажлын явц 60 гаруй хувьтай байгаа.

-Цаашдаа хаах замын мэдээлэл байгаа юу. Зам засварын ажилтай холбогдуулан ард иргэдийн дунд нэлээд бухимдал байдаг?

-Замыг хаахдаа Нийслэлийн авто замаас хүсэлт гаргаад нийтийн тээвэр болон замын цагдаагийн газарт нар зөвшилцөж байгаад хаадаг. Цаашид хаагдах том замуудын тухайд Энхтайваны өргөн чөлөөний баруун хэсэг болон зүүн хэсэг. Баруун хэсэг нь 3,2 км буюу нэгдүгээр хорооллын урдах зам. Энэ замыг “Тотал инж” нэртэй компани хийхээр болсон. Тухай бүртээ энэ талаар мэдээлэх болно.Энхтайваны өргөн чөлөөнөөс зүүн талын зам нь Зүүн дөрвөн замаас Амгалан хүртэлх замын засвар орно. Нэгдүгээр хорооллын зам нь он дамжин хийгдэх зам юм.

-Зарим нэг замыг хугацаанаас нь өмнө хүлээлгэж өгсөн таатай мэдээ байна. Энэ нь сайшаалтай ч чанарын асуудал нэн тэргүүнд яригдах нь зөв болов уу?

-Нийслэлийн авто замын газраас захиалагчийн хувьд хяналт тавьж ажилладаг. Нийслэлийн авто замын газар замын материал шинжилгээний лабораторитой. Лабораториор шинжилгээ хийгээд хяналтын инженер хяналтаа тавьдаг. Техникийн комисс болон улсын комисс дээр Мэргэжлийн хяналтын газар ажилладаг.

-Чанартай замуудаас нэрлэвэл нарны замыг нэрлэж болно. Одоо хийгдэж байгаа замын чанар энэ замтай харьцуулахад чанарын тал дээр тааруу байдаг?

-Нарны замын хөрөнгө оруулалтыг Япон улс гаргасан ч манайхны хийсэн зам л даа. Хөрөнгө мөнгөтэй холбоотой. Их хөрөнгө хаяж хийсэн зам шүү дээ.

- Энэ жил хэчнээн нүхэн гарц хийх вэ?

-Долоон нүхэн гарц барихаар төлөвлөсөн.Тухайлбал Ард кино театрын зүүн тал, их дэлгүүрийн урд талд, аравдугаар хороололд гэх мэтчилэн.Энэхүү ажлын эхлэл болж он дамжин хийгдэх нь Сансрын тунелийн нүхэн гарцын ажил юм. Ноднин жил хийц бүтцийг нь үйлдвэр дээр нь хийчихсэн. Энэ жилийн хувьд зам хаагаад суурийн нүхийг ухаад суурилуулж тавина. Есдүгээр сарын 1-н гэхэд нүхэн гарцын дээгүүр автомашин зорчих боломжтой болно. Дотоод засал болон фасадын ажил аравдугаар сард бүрэн дуусах юм. Өмнө нь багшийн дээдийн урд талын нүхэн гарцыг хийж байсан “Хотын зам” компани хийж гүйцэтгэж байна.

-Багшийн дээдийн урд талын нүхэн гарц гэж ярьлаа. Энэ нүхэн гарц маань одоо ямар байдалтай байгааг уншигчид маань мэдэж байгаа байгаа байх. Тэгэхээр “Хотын зам” компани дахин нүхэн гарц хийж байгаа гэж байна. Дахин ийм чанаргүй хийчих байх гэдэг болгоомжлол төрж байна?

-Ашиглалтад өгөөд удаж байгаа нүхэн гарц л даа.Ашиглалтын хугацаа гэж байдаг.Ер нь бол замыг засаж янзалсан компани хоёр жилийн хугацаанд гарсан эвдрэл гэмтлийг өөрийн хөрөнгөөр засах гэрээтэй ажилладаг. Хүмүүсийн дунд нэг яриа байдаг. Ноднин хийсэн зам эвдэрлээ улсын мөнгө үрэгдээд байна гэдэг ташаа мэдээлэл хүмүүсийн дунд байдаг. Энэ бол улсын мөнгөөр дахин засдаггүй. Тухайн компани өөрийн хөрөнгөөр засаж янзалдаг.

-Энэ жил зам гүүрийн засвар арчлалт, шинэчлэлд хичнээн төгрөг зарцуулж байна вэ?

- Энэ жилийн зам засварт шаардлагатай хөрөнгө шийдэгдсэн. Нийт 114 тэрбум төгрөг төсөвлөсөн.

-Зам гүүрүүд ашиглалтад орсны дараа түгжрэл хэдэн хувиар буурах вэ?

-Ер нь бол түгжрэлийг сааруулах, хөдөлгөөний эрчмийг дээшлүүлэх үүднээс ажиллаж байна. Хөдөлгөөний эрчмийн тооллогын хариу гарсны дараа хэдэн хувиар буурсныг тооцож гаргана. Тэр үед манайхаас тодорхой мэдээлэл өгөх болно.

Э.Ганболд: Бороо л засварын ажилд хүндрэл учруулж байна

-Зам засварын ажил удааширч байна. Шалтгаан нь юу вэ?

-Баяр наадам боллоо. Мөн борооны улирал эхэлсэнтэй холбоотой. Бороо орсны дараа хоёроос гурав хоног хүлээх шаардлага гарч байгаа. Хэрвээ бороо орохгүй бол долоо хоногийн дотор дуусгах бололцоотой.

-Зам засварын ажил аль дүүргүүдэд хийгдэж байна вэ?

-Бид тендерийн ажлаа эрт зарлаад наадмын өмнө гол ажлаа нугалсан. Сонгинохайрхан дүүргийн төвийн гол автозамын засвар, “Саппоро”-гоос хойшоо эргэсэн зам Баянгол дүүрэгт гуравдугаар эмнэлгийн зүүн тал, Замчдын гудамж руу, 25 дугаар эмийн сангаас хойшоо явдаг замын ажил наадмын өмнө дууссан.

-Сүхбаатарын талбайн баруун талын замын засвар дууссаны маргааш бороонд эвдэрсэн гэсэн. Энэ нь ус зайлуулах систем, хоолой байхгүйтэй холбоотой юу?

-Ер нь ус зайлуулах систем манай Улаанбаатар хотод бага байгаа. Зам болгон ус зайлуулах системтэй байх ёстой. Одоогоор манайд бүрэн ажиллаж байгаа ус зайлуулах систем алга. Нийслэлийн төсөв хүрэлцээ муутай шүү дээ. Ус зайлуулах систем бол маш их хөрөнгө зарцуулдаг байгууламж. Доошоогоо хоёроос гурван метр ухаж труба суулгана, тэгээд буцаагаад хучилт хийдэг. Уг нь Японы төсөл хэрэгжиж ус зайлуулах талаар бэлтгэл ажил хийгдэж байгаа. Ус зайлуулах систем хойшид хийгдэх байх. Ард иргэд ч үүнийг шаардаж байна.

-Баянхошууны зам маш олон жил яригдаж байгаа. Хэзээ ашиглалтад орох вэ?

-Баянхошууны автозам үнэхээр муудсан л даа. Энэ зам дээр Хөгжлийн банкны санхүүжилтээр шууд гэрээгээр ажил гүйцэтгэх учиртай. Би тодорхой мэдэхгүй байна. Харин “Саппоро”-гоос Таван шар хүртэлх автозамын засварын ажил явагдаж байна. Хашлагуудаа авч сууриа бэлтгээд ажил үргэлжилж байна.

-Ill, IV хорооллын замыг нөхөж байсан, дууссан уу?

-Гэмтлийн эмнэлгийн арын замд урсгал засварын ажил хийгдэж байгаа. Энэ замд хөдөлгөөн бага зэрэг сааталтай, иргэд гомдолтой байх шиг байна. Зам засварын ажлыг зургадугаар сарын 19-нд эхлүүлсэн. Бороо л засварын ажилд хүндрэл учруулж байна. Цаг агаарын хүчин зүйлийг бид шийдвэрлэж чадахгүй шүү дээ. Мөн эхний тендерийн үед компани орж ирээгүй учраас засварын ажил цаг хугацааны хувьд оройтож эхэлсэн.