Н.Энхбаяр мэлзэв

Tweet

Н.Энхбаяр мэлзэв

2012-08-02

Албан тушаалаа урвуулан ашиглаж, улсад онц их хэмжээний хохирол учруулсан, мөн долоон тэрбум төгрөгийн

авлига авсан гэх хэргээр буруутгагдаж буй МАХН- ын дарга Н.Энхбаярыг шүүх хурал өчигдөр Сүхбаатар дүүргийн шүүхэд үргэлжиллээ. Шүүх хурлын даргалагчаар С.Соёмбо-Эрдэнэ, шүүгчээр М.Алдар, С.Оюунчимэг, улсын яллагчаар Е.Сагсай, О.Мөнхбаатар, харин өмгөөлөгчөөр Г.Оюунцэцэг, Л.Өлзийхүү, Ц.Цэрэнжээ, К.Бауржан, С.Нарангэрэл нар оролцож байна. Ерөнхийдөө улсын яллагч, өмгөөлөгч нарын хоорондох мэтгэлцээн маягаар өрнөсөн хурлын үйл явцыг тоймлон хүргэе.

Өнгөрсөн мягмар гарагт эхэлсэн шүүх хуралдаанаар улсын яллагчид яллах тогтоолоо, харин өмгөөлөгчид шинжлэх баримтуудыг танилцуулж, шүүгдэгчид мэдүүлэг өгч, улсын яллагчдын асуултад хариулсан юм. Иймэрхүү маягаар арван цаг үргэлжилсэн хурлыг өмгөөлөгчийн хүсэлтээр завсарлуулсан. Н.Энхбаярын өмгөөлөгч С.Нарангэрэл Сүхбаатар дүүргийн шүүхэд Д.Сугар, М.Бадамжунай, Х.Наранхүү Ц.Мөнх-Оргил, Ш.Алимаа, Ш.Батбаяр, Г.Нинжин, Б.Баатар, Ц.Батбаяр, Н.Болормаа, Ш.Раднаасэд, Д.Чойжамц, Ц.Баатар- сайхан, Биндэръяа, Б. Эрдэнэбилэг, Н.Баасанжав нарын төрийн өндөр албан тушаалтнуудыг оролцуулах хүсэлтээ өгсөн.

Шүүх бүрэлдэхүүн энэхүү хүсэлтэд зөвшөөрөл өгөх- гүй гэдгээ мягмар гаргийн хурлын үеэр мэдэгдсэн. Гэхдээ өчигдрийн хурлаар Ц.Мөнх-Оргил, Б.Баатар, Г.Энхболд нарыг мэдүүлэг, өгөхийг зөвшөөрсөн байна. Энэ үеэр Ц.Мөнх-Оргил. «ТВ-9 телевизийг Н.Энхбаяр болон хамба Д.Чойжамц нарт бэлэглэлийн журмаар өгч байгаа гэж ойлгосон. Харин телевизийн тоног төхөөрөмж өгөх үед би гадаадад байсан. Тийм учраас энэ талаарх мэдээллийг өгөх боломжгүй» гэсэн байна.

Өмгөөлөгчийн зүгээс «ТВ-9» телевизтэй холбоотой хавтаст хэрэгт бичсэн нотолгоог судалсан. Хамгийн
гол нь тус телевизтэй холбоотой асуудлаар Японоос ирсэн албан бичиг хүчин төгөлдөр эсэх нь сонирхол татаж байгаа юм. Үнэндээ Японы талаас уг албан бичгийг хүчин төгөлдөр гэж албан ёсоор мэдэгдээгүй. Тиймээс шүүхээс Япон улсын Засгийн газрын зүгээс дээрх бичгийг шүүхээс хүчин төгөлдөр гэж үзвэл АТГ болон ТЕГ-ын ажилтнуудын оролцоотойгоор Б.Хурцыг Англид баривчлуулж байсантай адил гүйцэтгэх ажиллагаа явуулсан хэмээн өмгөөлөгчийн зүгээс буруутгах байр суурьтай байгаа гэнэ.

Дээрх гэрчүүдээс 12:30 цагийн үед мэдүүлэг авч эхэлсэн бөгөөд 14:25 цагт дуусч, хурлыг завсарлуулжээ.
Хурал завсарлаад орсны дараа Н.Энхбаярт холбогдох «МИАТ»-ийн гэх хэргийг авч хэлэлцсэн юм. Энэ үеэр улсын яллагч нар Н.Энхбаярыг Монгол Улсын Ерөнхийлөгч байх хугацаандаа МИАТ- ийн онгоцоор өөрийнхөө номыг үнэгүй тээвэрлүүлж, улсад 30 сая төгрөгийн хохирол учруулсан гэх шалтгаанаар буруутгаж буйгаа уламжилсан. Мөн энэхүү шалтгаанаа тодорхой баримтаар нотолж, энэ хэрэгтэй холбоотой гэрчүүдийн мэдүүлгийг ч сонссон. Үүнээс гадна АТГ-аас гаргасан мөрдөн байцаалтын хавтаст хэргийг танилцуулав.

«МИАТ» ХК-тай холбоотой хэргийн танилцуулгын дараа «Улаанбаатар таймс» сонины хувьчлалтай холбоотой асуудлаар мэтгэлцсэн. Мэтгэлцээн бараг хоёр цаг үргэлжиллээ. Энэ үеэр өмгөөлөгч С.Нарангэрэл «Улаанбаатар таймс» сонины байр болон газрыг 2.1 тэрбум төгрөгөөр үнэлсэн. Үүнийг хууль бус үйлдэл гэж үзэж байна. Энд газрын гэрчилгээ байгаагүй учраас хэт өндөр үнэлсэн нь буруу. Ямар хууль тогтоомжид үндэслэн ийм тоо гаргасныг мэдмээр байна» гэсэн аж.

Шинжээчдийн багийн ахлагч Д.Зоригт үүнд хариулт өгөхдөө «Энэ газрыг үнэлэхэд ямар нэгэн хууль тогтоомжид үндэслээгүй. Зах зээлийн ханш, барилгын үнэ зэргийг судалж, зохих үнэлгээ хийлгэсний дүнд үнийг тогтоосон юм. Тухайлбал «Улаанбаатар таймс» сонины байртай ойролцоо байршилтай «Сентрал Тауэр»-ын газрыг нэг сая ам.доллараар үнэлсэн байдаг.

Үүнийг ингэж өндөр үнэллээ гээд бидэнд ямар ч ашиг байхгүй. Учир нь бид эндээс ямар нэгэн хувь авдаггүй» гэсэн байна. Н.Энхбаяр нарт холбогдох шүүх хурал нэлээд ширүүн , мэтгэлцээний дунд өрнөж байлаа. Үүнээс өмнө гэрчүүдийн мэдүүлэг, шүүгдэгчдийн мэдүүлэг, шинжээчдийн мэдүүлэг явагдсан. Ямартай ч өчигдрийн хуралдаанаар дээрх асуудлуудыг хэлэлцэж, өнөөдөр улсын яллагчийн тогтоолыг танилцуулах ажээ. Харин үлдсэн хэргийг өнөөдрийн шүүх хуралдаанаар үргэлжлүүлэх тухай эх сурвалж мэдээлж байсан юм. Тухайлбал, «Эрдэнэт» үйлдвэрийн ган бөмбөлгийн асуудал, Баянзүрх дүүргийн долоодугаар хороо, Энх- тайвны гудамжны 104 тоотыг 630 мянган ам.доллараар худалдан авсан зэрэг нийт долоон тэрбум төгрөгийг хувьдаа завшсан гэх таван хэргийн хоёр нь дээрх хэргүүд аж.

Н.Энхбаярт холбогдох хэргийн хүмүүсийг Эрүүгийн хуулийн тусгай ангийн 150.3, 263.2-т заасан хүндэвтэр зүйл ангиар буруутгаад байгаа юм. Хэрвээ тэднийг шүүхээр гэм буруутай нь тогтоогдвол хуулийнхаа дагуу бүх эд хөрөнгийг хурааж, тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хөдөлмөрийн хөлсний доод хэмжээг 51-100 дахин нэмэгдүүлсэнтэй тэнцэх хэмжээний төгрөгөөр торгох, эсхүл 5-10 жил хүртэлх хугацаагаар хорих ялаар шийтгэнэ.

Дугаар шилжих мөчид уг шүүх хурал хэрхэн шийдэгдэх нь тодорхойгүй байсан юм. Н.Энхбаяр нарт холбогдох шүүх хурлын шийдвэрийн талаар маргаашийн дугаартаа мэдээлэх болно.