М.Энхсайханы амбиц хагарал өөд

2012-08-17

МҮАН-ынхан дунд үл ойлголцол үүсчээ.

Энэ нь албан тушаалын хуваарилалтаас үүдэлтэй. Чамлахаар чанга атга гэгчээр бодит нөхцөл байдалдаа дүгнэлт хийж олдсон боломжоо аятайхан ашиглахын оронд өвөр хоорондоо хэмлэлдэх болов. Хатуу ч гэсэн үнэн бол тэд дангаараа 2012 оны сонгуульд оролцсон бол засаг хамтарч байгуулах хэмжээнд хүрэх байтугай парламентад суудалтай нам болж чадах уу гэдэг нь эргэлзээтэй.

2008 оны сонгуульд яалаа. МҮАН/ҮШН/-аас нэг ч хүн парламентын босгыг алхаагүй.
Энэ намыг толгойлж байгаа М.Энхсайхан энэ удаагийн сонгуульд Дархан-Уул аймагт очиж өрсөлдөөд сонгогчдын дэмжлэг авч чадаагүй. Тэгэхээр түүнийг ард түмэн нэр хүндтэй хүчирхэг лидер биш гэж үздэгийн илрэл. Тиймдээ ч хоёр сонгууль дамнан өвдөг шороодлоо.
Харин 2012 оны сонгуульд МҮАН-ынхан одтой байсан нь үнэндээ МАХН-тай эвсч, Н.Энхбаяртай эртнээс шадарлаж, сүүдэрт нь сүүдэгнэсний хүч.
Гэтэл одоо МҮАН-ын дарга М.Энхсайханы амбиц нь хэрээс хэтэрч, өөрийгөө тойрон хүрээлдэг хэдэн хүнээ л албан тушаалд хүргэж, бусдыг үл тоож байгаа нь гишүүдийнх нь дургүйцлийг төрүүлэх болжээ. Мөн Н.Энхбаярт Сүхбаатар дүүргийн шүүхээс дөрвөн жилийн ял оноосон үеэс зангаа хувиргах болсон гэнэ.

МАХН-МҮАН-ын Шударга ёс эвсэл экс ерөнхийлөгч, МАХН-ын дарга Н.Энхбаярын шүүх хурал болохоос өмнө АН-тай хамтран ажиллах гэрээ байгуулсан тогтоолдоо “Хэрэв хилсээр ял тулгавал гэрээгээ эргэж харна, шаардлагатай тохиолдолд цуцлахад ч хүрнэ” гэсэн утга бүхий заалтыг оруулсан юм. Гэвч шүүхээс Н.Энхбаярт ял оноонгуут хэрхэх тухай яриа Шударга ёс эвслийнхэн дунд өрнөжээ.

УИХ-ын гишүүн З.Баянсэлэнгэ, МАХН-ын удирдах зөвлөлийн зарим нэг залуухан гишүүд нь АН-тай хамтарч ажиллахгүй, шударга ёсны төлөө тэмцэнэ хэмээн мэдэгдсэн. Гэвч нэг, хоёрхон хүн асуудлыг шийдэхгүй. Хоёр намын байгуулсан Шударга ёс эвслийн Удирдах зөвлөлийн хурлаар нухацтай ярилцаж шийдэхээр болсон юм гэсэн.
Гэтэл МҮАН-ын дарга М.Энхсайхан нэгхэн хоногийн дараа болох Шударга ёс эвслийн Удирдах зөвлөлийн хурлыг хүлээж чадахгүй тэвдэж, хэрэв хамтрахаа больчихвол Сангийн сайдын суудалд суух боломжгүй хэмээн агдаж бүтэн сайн өдөр нь мэдэгдэл гаргаж, амиа бодсон алхам хийж байлаа.

Н.ЭНхбаярын ял авах нь бидэнд ямар хамаа байна, МАХН больвол болино биз, МҮАН АН-тай хамтарч засаг байгуулна гэх битүү утгатай мэдэгдлийг гаргасныг уншигчид санаж буй.

Ингэснээрээ тэр нэгэн дээвэр дор нэгдэж, Шударга ёсны төлөө тэмцэнэ хэмээсэн хамтрагчдаасаа нүүр бууруулж, амархан урвадаг, итгэлгүй, тууштай биш гэдгээ мэдрүүлсэн биз ээ.

Түүний энэ тууштай биш зан чанарыг мэддэг учраас АН-ын зарим гишүүд М.Энхсайханыг Сангийн сайд болгохыг хүлээж авахгүй, манай намын дарга байхдаа яаж фракцаар нь ялгаварлаж, өөрийг нь шүүмжилсэн нэгэнд өш санадаг байсан, эцэст нь бидэн рүү ус цацаад, элдэвлээд хаяад явсан даг хэмээн хатуухан үг чулуудсан гэдэг. Арга ч үгүй шүү дээ. Нэгэн цагт АН хэрэггүй хэмээн туурга тусгаарлаж, ҮШН-ыг байгуулж, нам руугаа, гишүүд рүүгээ “нулимсан” юм чинь.
АН Шударга ёс эвсэлтэй 75:25 гэсэн харьцаатайгаар албан тушаалаа хуваарилахаар гэрээлсэн байгаа. Харин МАХН-МҮАН хоёр УИХ-ын сонгуулиар 70:30 гэж тохиролцон нэр дэвшүүлсэн юм билээ. Одоо оногдсон эрх мэдлээ ч энэ харьцаагаар хувиарлахаар шийджээ. Гэтэл МҮАН-ын дарга М.Энхсайханд энэ нь чамлалттай санагдах болсон бололтой.

“Хэтэвч “ нь гэдэг УИХ-ын гишүүн М.Сономпилээ Эрчим хүчний сайд, өөрөө Сангийн сайд болно гэж зүтгэх болжээ. Уг нь 70:30 хувь гэсэн харьцаагаар бол гурван яамны нэг нь л МҮАН-д оногдох учиртай.

МҮАН-ын зарим гишүүд М.Сономпил тойрогт очиж өрсөлдөн сонгогдоогүй, М.Энхсайхантай ойр байдаг учир Шударга ёс эвслийн жагсаалтын дээгүүрт бичигдэж, УИХ-ын гишүүн болсон. Энэ нь түүнд хангалттай. Гэтэл цаана нь намаа бэхжүүлэхийн төлөө зүтгэж яваа Ерөнхий нарийн бичгийн даргаар ажиллаж байсан Б.Цогтгэрэл зэрэг боловсролтой, чадалтай залуус олон бий.
Үнэндээ УИХ-ын сонгуульд Шударга ёс эвслээр фон хийсэн ч гэлээ Г.Уянга, Ч.Батцогт хоёр л өөрсдийнхээ нэр хүнд, зөв бодлогоороо гарч ирсэн. М.Сономпилд биш энэ хоёр гишүүндээ баярлах ёстой. Гэтэл У.Уянга, Ч.Батцогт нарт байнгын хорооны дарга ч болох боломж олгоогүй .
Энэ мэтчилэн гишүүдийнх нь тунирхал, гомдол гүнзгийрч, цаашдынхаа ирээдүйг бодож МАХН-тай нэгдэж, хүчирхэг хүчин больё, М.Энхсайхан намыг авч явж чадахгүй хэмээн санал нэгдээд байгаа аж. Тиймээс ч өчигдөр МҮАН-ыг ҮШН нэртэй байхад дарга нь байсан, УИХ-ын Аюулгүй байдал, гадаад бодлогын байнгын хорооны дарга, МАХН-МҮАН-ын Улс төрийн холбооны дэд дарга Ц.Цолмон МАХН, МҮАН гэсэн хоёр намыг “МАХН-МҮАН” гэсэн нэртэй нэг нам болгохыг уриалж буйгаа мэдэгдлээ.

Тэрээр “МАХН, МҮАН хоёр нам УИХ-ын 2012 оны сонгуульд “Шударга ёс” эвсэл байгуулан хамтран оролцож парламентад 11 суудал авсан. Мөн хоёр нам 2021 он хүртэл есөн жил хамтран ажиллах урт хугацааны гэрээ байгуулсан.

Юуны өмнө хоёр намын дарга нар сонгуулийн өмнө “Хоёр нам сонгуульд ялбал нэг улс төрийн хүчин болж ажиллана” гэсэн ам тохироо хийж байсныг албан ёсны болгох цаг ирлээ. Үндэсний ухаарлыг эрхэмлэгчдийн улс төрийн нэгдэл болох МҮАН, социал длемократ чиглэлтэй МАХН хоёр олон талаар ижил төстэй” гэж онцолж байв.
МАХН-МҮАН-ын “Шударга ёс” эвсэл АН-тай 75:25 гэсэн харьцаатайгаар албан тушаал хуваарилах бол эвсэлд дотроо 25 хувиа 100 хувь гэж үзвэл МАХН-д 70, МҮАН-д 30 хувь нь оногдож байгаа. Энэхүү албан тушаал хуваарилах квотын систем нь эрүүл бус байдалд хүргэдэг бололтой. Түүнийгээ ч Ц.Цолмон гишүүн ний нуугүй зарласан юм.
МҮАН-ын дарга М.Энхсайхан оногдож байгаа 30 хувийг шударгаар биш өөрийгөө тойрон хүрээлэгчддээ л өгөх гээд байгаа нь хагаралдуулжээ. Тиймээс ч гишүүд нь МАХН-тай нэгдээд нэг нам болох нь дээр, албан тушаалаа ч 70:30 хувь гэхгүй хуваарилж, чадварлаг, зөв боловсон хүчнээ тохирох албанд нь томилох боломж бүрдэхийн зэрэгцээ хүчээ зузааруулж, өргөжих нь чухал гэж үзэх болжээ.
Д.Тэнгис times.mn

М.Энхсайханы амбиц хагарал өөд
Tweet
Bolod.mn

Сэтгэгдэл (4)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
оо зайлуул муу батцогц уг н сайн хун байсан юм гэнэлээ

2012-08-18 | 02:32:35 | 84.193.108.208 |

Зочин
ИРЛАНД УЛСАД ИХ ДЭЭД СУРГУУЛИЙН ХЭЛНИЙ БЭЛТГЭЛД ХЯМД ҮНЭЭР СУРАЛЦАХ БОЛОМЖ НЭЭГДЛЭЭ. KAVANAGH КОЛЛЕЖИЙН АЛБАН ЁСНЫ ТӨЛӨӨЛӨГЧИЙН ГАЗАР. УТАС : 89980009, 89980005

2012-08-17 | 14:51:46 | 202.9.47.129 |

Мэдээ
Гадаад мэдээ
Видео

Архив ангилал

М.Энхсайханы амбиц хагарал өөд

Сэтгэгдэл (4)