З.Ойдов аварга 7.5 сая, У.Мөнх-Эрдэнэ 3.5 сая төгрөгийн цалинтай боллоо

2012-08-17

Олимп, дэлхийн аваргуудаа, тамирчдаа Монгол Улс одоо л харж үзэх нь. Олимпоос алтан медаль авбал сар бүр дөрвөн сая төгрөгийн цалин тэтгэмж авна гээд бодоод үз дээ.

Түүн дээр ДАШТ-ээс медаль авсан тохиолдол бүр нь эзэндээ сар бүр чамлахааргүй мөнгө авчирна. Сайхан л хэрэг.

Монголчууд Мехикогийн олимпоос хойш өдгөө олимпийн хоёр алт, есөн мөнгө, 13 хүрэл медальтай болоод байна. Тэднээс олимпийн мөнгөн медальт, ДАШТ-ий хоёр удаагийн аварга, нэг хүрэл медалийг эх орондоо авчирсан Хөдөлмөрийн баатар З.Ойдов гуай хамгийн том амжилтыг үзүүлсэн хүн. Засгийн газрын шийдвэрээр З.Ойдов гуай сардаа 7.5 сая төгрөгийн цалин авахаар боллоо гэсэн үг. Түүний дараа Бээжин, Лондонгийн олимпоос алт, мөнгөн медаль авсан жүдоч Н.Түвшинбаяр 7.0 сая, Дархан аварга, Хөдөлмөрийн баатар, гавьяат тамирчин Х.Баянмөнх олимпийн нэг мөнгө, ДАШТ-ий нэг алт, хоёр мөнгөн медаль авсан тул 7.0 сая, Хөдөлмөрийн баатар, гавьяат тамирчин Х.Цагаанбаатар 6.5 сая /олимпийн хүрэл, ДАШТ-ий хоёр алт, нэг хүрэл/, Хөдөлмөрийн баатар, гавьяат тамирчин П.Сэрдамба 5.5 сая /олимпийн мөнгө, ДАШТ-ий нэг алт, нэг хүрэл медальт/, Хөдөлмөрийн баатар, гавьяат тамирчин Э.Бадар-Ууган 5.0 сая /олимпийн алт, ДАШТ-ий хүрэл медальт/ төгрөгийн цалинг тус бүр авах нь.

Харин Хөдөлмөрийн баатар, гавьяат тамирчин О.Гүндэгмаа 3.5 сая /олимп, ДАШТ-ий мөнгөн медалиуд/, Гавьяат тамирчин У.Мөнх-Эрдэнэ 3.5 сая /олимп, дэлхийн мөнгөн медальт/, Гавьяат тамирчин С.Батцэцэг 4.0 сая /олимпийн хүрэл, ДАШТ-ий алтан медальт/, Гавьяат тамирчин О.Төгсцогт 4.0 /олимпийн мөнгө, ДАШТ-ий нэг мөнгөн медальт/, ОУХМ С.Ням-Очир 2.0 сая /олимпийн хүрэл медальт/ төгрөг авна.

Тэгвэл 1968 оны Токиогийн олимпоос хойш медаль авч байсан манай ахмад тамирчид, тэдний ар гэрийнхэн ч төр засгаас олгож буй мөнгөн урамшууллыг хүртэх болж байна. Тухайлбал, Хөдөлмөрийн баатар, гавьяат тамирчин, дархан аварга Ж.Мөнхбат гуай сар бүр 3.5 сая төгрөгийн цалинтай болсон бол Ч.Дамдиншарав /чөлөөт бөх/, Д.Сэрээтэр /чөлөөт бөх/, Т.Артаг /чөлөөт бөх/, Д.Оюунболд /чөлөөт бөх/, Р.Даваадалай /жүдо/, Н.Энхбат /бокс/, Д.Нармандах /чөлөөт бөх/ зэрэг олимпийн хүрэл медальтнууд маань сар бүр улсаас хоёр сая төгрөгийн цалин хангамж эдлэхээр болж байна.

Монгол Улсын харьяат байхдаа олимпоос хүрэл медаль авсан буудлагын Д.Мөнхбаярт харин энэ тэтгэмж очих эсэх нь эргэлзээтэй. Гавьяат тамирчин маань Германы иргэн болсноосоо хойш олимпоос дахин хүрэл медаль авч, медалиа ихэрлүүлсэн. Бас буудлагын дэлхийн аварга эмэгтэй. Түүнийг Герман улсын иргэн гэдэг ч тэр монгол эмэгтэй, Монголын тамирчин.

Засгийн газрын тогтоолын төслөөр хорвоогийн мөнх бусыг үзүүлсэн тамирчиддаа нэг жилийн мөнгөн урамшуулалтай тэнцэх хэмжээний буцалтгүй тусламжийг үзүүлэхээр болсон байна. Өнөөдрийн байдлаар манай улсын 47 тамирчин олимп, Дэлхийн аварга шалгаруулах тэмцээнээс медаль хүртээд байгаа юм. Олимп бол Монголын нэрийг дэлхийн тавцанд дуурсгах цорын ганц сайхан боломж хэмээн З.Ойдов аварга хэлсэн нь бий. Тийм шүү. Азийн цээжин дэх жижигхэн буурай орон хэмээн Монголыг маань басамжилдаг харийнханд монголчууд гэж ийм эгэлгүй хүчтэй хүмүүс байдаг юм гэдгийг тамирчид маань харуулж чаддагт нь бид баярлах ёстой.

Ялах, ялагдахын хооронд асар их тэвчээр хатуужил, эр зориг байдгийг тэднээс өөр хэн ч ойлгохгүй. Өчигдөр Засгийн газраас гаргасан шийдвэрийг сонссон хүмүүс фейсбүүк, твиттерээр янз бүрээр саналаа илэрхийлж байна лээ. Зарим нь дэмжиж, сайшааж байхад зарим нь онигоо хүртэл зохиочихсон байв. Олимпийн медальтнууд бие хамгаалагч ажилд авна гэж зарласан байна гэдэг ч юм уу, зарим эрчүүд шарандаа хоолны дэглэм барьж, дасгал сургуулилтад явж, шар айрагны мухлаг хэсэхээ болих гэнэ.

Олимпт орж, медаль авахын тулд юм юм л хийх гэнэ. Манай төр засаг аль эртнээс ийм шийдвэр гаргах хэрэгтэй байсан юм. Гурван сая хүрэхгүй хүн амынхаа тоонд харьцуулбал олимпоос 24 медаль авна гэдэг том амжилт. Тэрбум хол давсан хүнтэй Хятад улсад гэхэд ганцхан спортын төрлөөр сая гаруй хүн олимп, дэлхийн чанартай тэмцээнүүдэд бэлтгэж байдаг болохоор тэр улсыг илүү харж, “аймаарыг” нь гайхаж, өөрсдийнхнийгөө дорд үзэхийн хэрэггүй юм.

Б.Оюунгэрэл /www.ipost.mn/