Яаж баян, секси, алдартай болох вэ? /эмэгтэйчүүдэд/

Tweet

Яаж баян, секси, алдартай болох вэ? /эмэгтэйчүүдэд/

2012-08-31

Мэдээж чи алдарт Trump-ын гэр бүлийн тухай дуулсан л байх.

Харин Ivanka-г ямар их хөдөлмөрлөж байж энэ амжилтад хүрсэн тухай сайн мэдэхгүй болов уу. Дэлхийд данстай Вартоны Бизнесийн сургуулийг амжилттай дүүргэсэн тэрээр өнөөдөр Trump Organization-ы хөгжлийн асуудлыг хариуцсан дэд ерөнхийлөгчийн албыг хашиж байгаа. Хажуугаар нь тэр бас өөрийн нэрийн гоёл чимэглэлийн цуглуулга гаргадаг. Энэ үзэсгэлэнт бүсгүйн гайхалтай стиль, мэдрэмжийн тухай олон юм нурших ч хэрэггүй байх… Аливаа ажилд сэтгэлээсээ ханддаг Ivanka амьдралдаа ч, бизнест ч хүчтэй хэрнээ секси имиджээрээ бусдаас ялгарч чаддаг. Түүний өгөх зөвлөгөөг дагаад БИ гэсэн өөрийн тансаг оршихуйг бий болгоод үзээрэй.

1. Секси дүр төрхөө байнга ашигла

Ажлын байран дээр эмэгтэйлэг талаа харуулах шиг сайхан зүйл үгүй. Тачаангуй дүр төрх эмэгтэй хүнийг дур булаам, өөртөө итгэлтэй болгодог. Хамгийн гол нь энэ давуу талаа ухаантай ашиглах хэрэгтэй. Цээжээ хэтэрхий гаргасан хувцас өмсөх, бизнес түншүүдтэйгээ сээтэгнэх нь зохисгүй. Харин “Шинэ төслийг амжилттай хэрэгжүүлж чадна гэдэгт итгэлтэй байна” гэж яльгүй тачаангуй өнгө аястай намуун дуугаар яривал онох болно.

2. Өөрийгөө дутуу үнэлэхийг зөвшөөр

“Намайг аавын эрх охин эсвэл шар үстэй хүүхэн гэж хэлэх хүн олон” гэж Ivanka хэлсэн удаатай. Гэтэл энэ дайчин бүсгүй атаархагчдын хорон үгийг өөртөө ашигтайгаар эргүүлж чаддаг аж. Хүнийг дутуу үнэлэх бол тэр хүн шарандаа бусдаас илүү болохыг хичээдэг. Үүнд л гол учир байгаа юм.

3. Шаардах хэрэггүй. Удирд!

Хүмүүс удирдах албан тушаалд буй залуу хүнд тийм ч таатай ханддаггүй. “Би бялдууч биш. Нялуурах дургүй учир хэнтэй ч адилхан шударга харьцдаг” гэх Ivanka олны дунд удирдлагын нэрийг барьж ярилцвал илүү хүчтэй харагдана гэж зөвлөж байна. Мөн аливаа асуудлаар бусадтай санал нийлэхгүй байх үед “Та гайхалтай санал дэвшүүлж байна. Гэхдээ энэ надад арай өөрөөр харагдаад байх юм…” гэж дипломат маягаар ярилцаж чадвал чи өөрийн үнэлгээг дээшлүүлж чадна.

4. Орчныг мэдэр

Хамтрагч хүнээ, өөрөөр хэлбэл орчноо мэдрэх гэдэг маш чухал. Хэлэлцээрийн ширээний ард хүмүүс ширүүн эсвэл зөөлөн харилцаанд дуртай байдаг. Мөн өөрсдийгөө чиний сайн найз юм шүү гэж мэдрүүлэхийг хүсэх нь ч бий. Гэр бүл, амралтын тухай асууж, хөнгөхөн яриа өрнүүлснээр чи харилцагчаа тохиролцоонд бэлэн хүн үү, эсвэл шууд довтлох шаардлагатай хүн үү гэдгийг ойлгож чадна.

5. Зарим хүмүүсийг байранд нь тавь

Чиний амьдралд дургүйг чинь л хүргэж байх ганц хүсэл мөрөөдөлтэй хүмүүс тааралдаж юуны магад. Тийм этгээдийг боловсон байдлаар байранд нь тавьж чадвал чи тэдний хүндэтгэлийг хүлээж, тэд чамаас айдаг болно. Бүр цаанаасаа түрэмгий, бүдүүлэг хүмүүс байдаг шүү дээ. Тийм хүнтэй тэмцэх ч хэрэггүй. Зүгээр л инээж байгаад аажимдаа өөрөөсөө холдуул. Тэд нарыг тоож анхаарлаа хандуулаад байх шаардлагагүй.

6. Нууц зэвсэгтэй бай

Нас залуу учир Ivanka-г ялах амархан гэж өрсөлдөгчид эндүүрч байгаад юу ч үгүй буцаж байсан тохиолдол олон. “Түрүүлж битгий ярь. Учир нь өөрийнхөө зөвийг батлахын тул хүн илүү, хэрэггүй юм ярих гээд байдаг. Тиймээс эхлээд нөгөө хүндээ үг хэлэх, санал тавих боломжийг олгож бай.” Өөрөөр хэлбэл, цалингийнхаа тухай ярилцахдаа захирлыгаа “Уучлаарай, тийм төсөв байхгүй” гэж дуугарахаас нь өмнө нөгөө хэлтсийн Амараа чамаас илүү цалин авдагийг мэдэж байгаагаа хэлэх хэрэггүй. Илүү чухал, илүү хэрэгтэй үед “хумсаа” харуул.

7. Өөрийгөө тэнэг байдалд оруулахаас эмээх хэрэггүй

“Заримдаа манай салбарын улсууд миний даварсан санал хүсэлтийг дуулаад шоконд ордог. Гэхдээ намайг захирлуудын зөвлөлөөс OK гэж зөвшөөрсөн шийдвэр гаргуулаад ирэхэд бүр ч гайхдаг.” Заримдаа өөрөөсөө хэтэрсэн зүйл шаардсаныхаа төлөө бусдын инээдийг хүргэж, доог болж явахдаа бэлэн байх хэрэгтэй. Жишээ нь, удирдлагууд чинь тусгай оффис өрөө хүссэн чиний даварсан өргөдлийг хүлээж аваад бантсандаа нийтийн өрөөнд нэг ширээ гаргаж өгч мэдэх юм шүү дээ.

8. Өөрийн ажилдаа дуртай бай

Олон жилийн туршид Trump-ын гэр бүлийн бизнес цэцэглэн хөгжиж байгаа билээ. “Ажилдаа дуртай бай” гэсэн аавынх нь үг хамгийн шилдэг зөвлөгөө байсан гэж Ivanka хэлдэг. “Энэ бол бүхний үндэс суурь. Чи сод ухаантан байж болно. Гэхдээ чамтай цуг нэг өрөөнд байгаа хэн нэгэн чамаас илүү мэдлэгтэй биш ч илүү ихийг хүсэж байвал өрсөлдөөн өрнөнө. Бусдаас илүү их хүсэл тэмүүлэлтэй байх бол хүн ямагт өсөн хөгждөг.”

9. Ухаалаг гоёх урлаг

Чамд Trump–ынхны зиндааны гоёл чимэглэл авах хөрөнгө байхгүй бол өөрийн гоёлд нэг тансаг зүйл байлгахад анхаар. Бүр боломжгүй бол дууриамал эдлэл хэрэглэж яагаад болохгүй гэж!? Ivanka хүртэл Portofino-ийн дууриамал цүнхтэй гэдгээ нуудаггүй. Хэчнээн боломжтой байлаа гээд гоёлд их мөнгө үрэх нь утгагүй зүйл. Хэтэрхий үнэтэй хувцас хунар авчихаад түүнийгээ өмсөж зүүсэн хойноо ичээд, сэтгэл тавгүй байгаа хүн шууд мэдэгддэг шүү дээ.

10. Хэрхэн ялагч шиг харагдах вэ?

Анхаарал татахын тулд эмэгтэй хүний хувцасны шүүгээнд биед яг таарсан хослол заавал байх ёстой гэж Ivanka үздэг. Түүний гайхалтай стилийн бас нэг нууц бол өндөр өсгийтэй туфли юм. Ээж нь өөрийгөө өндөр туфли өмсөхөөрөө ялагдагдашгүй болдог гэж инээдэг тухай Ivanka ярих дуртай. Тэгээд ч туфли бизнест садаа болдоггүй. Ivanka өөрийнхөө Stuart Weitzman-ы туфлиэ бараг өдөр бүр өмсдөг. Учир нь түүнд нэг загварын туфли өнгө бүрээрээ байдаг юм. “Өнгөнөөс л хамааран тухайн өдөр чамаас ялгарах итгэлтэй эрхэм төрх янз бүр болдог” гэх Ivanka-ийн үгийг сайтар бодоод үзээрэй.

11. Өөртөө цаг гаргаж сур

Амжилтын оргилд хүрч чадсан хүн өөртөө жаахан ч гэсэн цаг зав гаргаж чаддаг. Ivanka-ийн хувьд тэр халуун ваннд ном бариад хэвтэх дуртай. Түүний сүүлийн үеийн хобби бол йога. Мөн Талархалын баярын үеэр хаа нэг газар ганцаараа аялах дуртай гэдэг. Шинэ газар үзэж, бусдын санаа оноог сонсолгүйгээр шийдвэр гаргах нь өөрийн зорилгоо цэгцтэй, тодорхой болгоход тус болдог гэж тэр үздэг. Учир нь аян замд ганцаар гарснаар хүн жаахан ч гэсэн цагийг өөртэйгээ өнгөрүүлж, өдөр тутмын амьдралаас холдож асуудлаа бодож чаддаг гэжээ.

Cosmopolitan сэтгүүл