илэрхийлэхийн аргагүй ганцаардал, гунигт амьдрал билээ. Түмэн зүйлийн өнгөтэй хорвоод ийм гунигт амьдралаар амьдарч буй олон мянган бүсгүй бий. Төдий нэг хэсэг нь үр хөндүүлсний уршгаар эх хүний жаргал эдэлж чадахгүй зовж, шаналан амьдарч байна. “Залуу нас минь гараас хөтлөх үрээр л дутаж, гудамж талбай, хаа ч алхахдаа сэтгэл нэг л хоосон оргиж, надаас бусад нь хахуулиуд юм шиг санагдаад өөрийн эрхгүй нулимс асгардаг” хэмээн ярих Гэрэлмаа (нэрийг нь өөрчлөв) бүсгүйтэй ярилцлаа.

Уучлаарай, үр хөндүүлсний улмаас дахин хүүхэд гаргах боломжгүй болсон гэсэн. Өнөөдөр охид, бүсгүйчүүд үр хөндүүлэх нь цөөнгүй болсон гэсэн. Тэдэнд сургамжтай байх болов уу гэх үүднээс өөрийг тань сонгож ярилцах гэсэн юм.

-Одоо би 37 настай. Өөрийн гэсэн байр, ажил, амьдралд шаардлагатай хөрөнгөтэй болсны дараа хүүхэдтэй болно гэж шийдээд анхны хүүхдээ төрүүлээгүй юм. Гэвч одоо надад хүүхдээс бусад нь байна. Би дөрвөн удаа үр хөндүүлсэн. Хоёрыг нь Монголд, гурвыг нь Германд. Сүүлийн найман жилийг ганцаардал, өөрийгөө зүхсэн зүхэл дунд өнгөрөөлөө. "Тэр өдөр яах гэж тийм шийдвэр гаргав аа” гэж бодохоор дотроос минь нэг юм хатгах шиг л болдог.

-Эд хөрөнгийн төлөө үүнийг хийсэн хэрэг үү?

-Ердөө л тийм. Би энэ хорвоогийн хамгийн нүгэлтэй эмэгтэй. Надад энэ бүхнээс илүү хүүхэд, гэр бүл чухал гэдгийг нэг их бодож явсангүй. Зөвхөн ажиллах, бас ажиллах гэсэн ганц зорилго байсан. Би үйлчлэгчээс удирдах ажилтан хүртэл дэвшиж, өөртөө хэрэггүй бүхнээ авах мөнгө цуглуулж чадсан. Гэвч эд хөрөнгө, мөнгө юу ч биш юм байна. Эмэгтэй хүний шазруун, хор шартай, тэнэг зангаасаа болж би энэ хэрэггүй зүйлсээр үр удмаа сольсноо хожимдсон хойноо ухаарсан. Энэ бүхнийг юу ч өөрчилж чадахгүй. Зөвхөн өөртөө л гомдох юм даа.

-Та гэрлэж байсан уу?

-Албан ёсны гэр бүл байхгүй ээ. Тэгээд ч тэр үү би гадуур гарах дургүй. Хаашаа л харна хүүхдээ тэвэрсэн хүмүүс. Би л орь ганцаараа. Энэ хорвоод надаас бусад нь хүүхэдтэй юм шиг санагддаг. Өдөр ирэх тусам сэтгэл минь хатуу, хүйтэн болоод байгааг мэдэрдэг. Одоо уйлъя гэсэн ч нулимс гарахаа больсон. Өмнө нь бол нус, нулимстайгаа хутгалдуул л сууж байдаг байлаа. Нулимс хүртэл намайг орхисон гэхээр би их азгүй хүн байгаа биз. Надтай гэрлэх хүсэлтэй залуу олон байсан ч тэдэнд удам залгах үр хэрэгтэй. Намайг хүүхэд тээж чадахгүйг хэзээ нэгэн цагт мэдэж л таарна. Тиймээс тэднийг өөрөөсөө холдуулсан. Одоо бүгд гэр бүлтэй, сайхан амьдарч байгаа.

-Та яагаад хүүхэд гаргахгүй гэж шийдсэн юм бэ. Таны хувь заяаг юу ингэтэл өөрчлөв?

-Миний нэг найз бүсгүй байсан юм. Тухайн үед тэднийх жаахан ядруу амьдралтай байсан. Тэр маань нэг залуутай сууж, хөөрхөн охинтой болсон. Гэтэл ар гэр нь ядуу зүдүү гэдгээр шалтгаалж найзыг маань орхиод явсан. Энэ байдлыг хараад тэр муу ёрын шийдийг гаргахад хүрсэн. Найзыгаа буруутгаж боддоггүй. Миний найзад ямар ч буруу байхгүй. Зөвхөн эр хүний дор орж, тийм зовлон амсахгүй гэх үзэл бас хэн нэгэнд хог шаар шиг хаягдах вий гэх айдсаасаа болсон хэрэг.

-Та хүүхэд үрчилж авч болно шүү дээ. Бас үр шилжүүлэн суулгаж хүүхэдгэй болох боломж нээлттэй байна?

-Би судалж үзсэн. Үр шилжүүлэх боломжгүй болсон байна гэж эмч хэлсэн. Олон удаа үр хөндүүлэхээр савны хана нимгэрч, хүүхэд тээх боломжгүй болдог юм байна. Хүүхэд үрчилж авах талаар олон удаа бодсон. Хорвоог ганцаараа туулалтай биш, гараасаа хөтлөх хүүхэд үрчилж авна гэж бодож байгаа. Гэхдээ хүний үрийг хайрлаж, халамжилж, зөв хүмүүжүүлж чадахгүй болов уу гэж айх юм. Хайрлаж чадахгүй бол яана. Би дэндүү жаахныг нь арчилж чадахгүй байх. Бас өнгөрсөн хугацаанд дандаа ганцаараа амьдарсан. Их зожиг.

-Та хүүхдэд хайртай биз дээ. Хүүхэдтэй болохыг хүсдэг болохоор чадах байх аа.

-Тийм ээ. Надад миний хийсэн амтгүй хоолыг хувааж идээд, өвөрт минь унтах үр... Одоо ч харамсдаг юм, Герман явалгүйгээр хүүхдээ гаргаад эндээ байсан бол би хамгийн аз жаргалтай ээж байх байсан гэж. Хоногийн хоолгүй ч гэлээ хүүхдүүд маань ойлгох л байсан. Харамсал гэдэг зүгээр л нэг бодол юм даа. Юуг ч өөрчилж чадахгүй дэмий л шаналж, тарчилсан бодол. Би гэртээ харихгүй хэдэн өдөр ч болж болно. Тэнд намайг хүлээх хэн ч байхгүй. Ингэж бодохоор бүх юм утгагүй байгаа биз. Гэвч юунд ч юм итгэсээр, горьдсоор амьдарч л байна Надад байнга очдог асрамжийн хэд хэдэн газар бий.

-Та хэдэн хүүхэд үрчилж авна гэж бодож байна вэ?

-Найм. Дөрвөн хүү, дөрвөн охин. Надад гадаад хүүхэд үрчилж авах санал олон ирж байсан. Гэхдээ би монгол хүүхдэд хайртай. Эргэж тойрдог хүүхдүүд ч бий. Тэднийгээ аваад Герман явна. Монголд амьдрахгүй.

-Та сайн ээж болох байх аа. Эхээс хэдүүлээ вэ. Үр хөндүүлж байгааг тань аав, ээж чинь мэдэж байсан уу?

-Би сайн ээж байх байсан бол яалаа гэж хүүхдээ авахуулж байх юм бэ. Би ганцхан дүүтэй. Дүү маань одоо АНУ-д амьдардаг. Аав, ээж хоёртоо юу гэж хэлэх вэ дээ. Тэр хоёр маань бурхан болоод удаж байна. Надаас дандаа л зээ нэхдэг байлаа. Тэр болгонд нь би дараа жил хүүхэд гаргаад, та хоёроор харуулна гэж хуурдаг байсан. (хэсэг чимээгүй суув)

-Таны харууслыг ойлгож байна. Үр хөндүүлж байгаа охид, бүсгүйчүүдэд хандаж юу хэлмээр байна вэ?

-Миний амьдралыг надтай ижил зовлон амсаж яваа хүмүүс л ойлгоно. Надад тухайн үед бас л бэлэн биш санагдсан. Ийм хор уршигтайг нь мэдэхгүй юм чинь яах вэ дээ. Болохгүй гэх бүхнийг хийж байж эцэст нь ойлгодог юм байна. Хүүхэдтэй болж байна гэж заримдаа зүүдэлдэг. Зүүдлэх бүртээ буян бодож хэн нэг хүүхдэд бэлэг өгдөг. Тэглээ гээд зүүд минь биелдэггүй ч хүний горьдлого тасардаггүй юм байна. Хүн болгонд өөр өөрийн гэсэн зовлон бий. Гэхдээ тэр зовлон чинь үр хүүхэдгүйн зовлонгийн дэргэд юу ч биш. Бүгдээс нь гуйя. Битгий хүүхдээ авахуул. Над шиг болбол яана. Надад намайг гэх хэн ч алга. Аав, ээж, үр хүүхэд, хань ижил. Хорвоо дээр үнэт зүйл гэж байдаг бол тэр нь чиний үр хүүхэд, амьдралаа зориулах хань ижил байх болно. Өөр юу ч биш. Үр хөндөлтийг зогсоох нь зөв. Бидний ээж, ээжийн ээжүүд үр хөндөлт хийлгэхгүй амьдраад болоод л байсан шүү дээ. Үр хөндөлт гэж байгаагүй бол би ямар ч байх байсан юм билээ. Юм хөгжих тусмаа мөхөл рүүгээ ойртдог гэж үнэн үг шүү. Ийнхүү бидний яриа өндөрлөхөд ярилцлагын турш нүднээсээ салгаагүй хар шилээ авч, гуниг, цөхрөл бас итгэл гэрэлтсэн харцаар хаашаа ч юм ширтээд “Би хүүхдээ дагуулж яваа бүсгүй хүн бүрт аз жаргал хүсэн шивнэдэг. Тэд бол амьд бурхан” гэсэн юм.

Ц.Бүжин

Эх сурвалж: "Улаанбаатар таймс"

Үрийн заяагаа гомдоосон намайг нулимс хүртэл орхисон
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
хоорхий до.бурхан чамайг харнаа.битгий шанал эгч ни хорвоогийн жаргал зовлонг амсаж явсаар 41 насандаа ээж болж хол газар хурэхгүй баярлаж блаа.гэхдээ чи бид 2 их оор юм бн.эгч ни ганц удаа ч ур хондуулж бгаагуй.уунийг минэ бурхан мэднэ.бур багааас ни хуухэд оргож авч бж л чи жинхэнэ эх хун болно

2012-09-12 | 22:21:25 | 202.131.248.129 |

Зочин
хүн бүхэн л алдаа гаргадаг өөрийг чинь бүрэн дүүрэн ойлгож байна гэж хэлж чадахгүй ч эх хүнийхээ хувьд ямар хэцүү байгааг чинь бага ч гэсэн ойлгож байна. бүр оройтхоосоо өмнө хурдан хүүхэд өргөж аваарай гэж хэлмээр байна. гэхдээ таны бодож байгаа чинь буруу бүр жаахныг нь өргөж авч чадахгүй өсгөж чадахгүй байх гэж битгий бод. Яагаад чадахгүй гэж та эх хүний жаргалыг мэдэрхийг хүсэж байна уу? /өөрөөсөө асуу.... ганц удаа биш дахин дахин асуу 7 хоног байнга өөрөөсөө асуу тэгвэл л та өөрөөсөө хариултаа олж харж чадна та эх хүн болж чадах уу?/ хэрвээ таны зүрх сэтгэл үнэн сэтгэлээсээ эх хүн болохыг хүсэж байна гэвэл та өргөж авах хүүхдийхээ эцэг эхийг төрж амаржихаас нь өмнө ол гаргаад өсгөж чадахгүй гэсэн хүмүүс олддог юмаа яагаад гэвэл хорвоо өөрөө бүхнийг зохицуулж өгдөг юм. тэнгэрээс хүсч л байгаа бол гуй юу хүсч юу бодно тэрийгээ авч чаднаа та. миний эгч төрөлхийн савны эмгэгтэй хүүхэд олдог ч 3 сар болоод ураг нь амьгүй болчихдог байсан 5 удаа жирэмсэн болоод дандаа өсөлтгүй болоод л цэвэрлүүлдэг бас тань шиг гуниг гутралаар дүүрэн хүн байсан өнгөрсөн 12 сард гэр бүлийн нэг танил эгч маань оюутан 2 хүүхэд байна хүүхэд гаргах гэж байгаагаа 2 талын аав ээждээ огт хэлээгүй гарангуут нь хүүхэд өргөж авах хүнд өргүүлнээ гэж байна гэхээр нь уулзаад хадаг энтр тавиад 3 7хоногийн дараа төрхөд нь эмнэлгээс гаргахад нь шууд авчихсан ээжид нь хэцүү л байсан би байранд гь хүргэж өгсөн болхоор аймар хэцүү байсан ч хэдэн хүнийг баярлуулж энэ хорвоо дээр сэтгэлд нь нар мандуулж гэртэй болгож баярлуулж байгаагаа чи мэдэж байгаа миний дүү битгий буруу зүйл хийлээ гэж бодоорой харин чи буян хийсэн бид чамд энэ насандаа талархаад барашгүй их өртэй хүмүүс охиныг минь өгсөн ачтан юм шүү гэхээс өөр юу ч хэлж чадаагүй ч манай гэр бүл сэтгэлдээ их хүндэлж дээдэлж явдаг. одоо тэр зээ охин маань 8 сартай удахгүй 9 сар хүрлээ мөлхөөд эд бужигнуулж байгаа ээжээсээ холдох дургүй гээч. тийм болхоор эх хүн болоё гэвэл нярайгаас нь өсөг хэн ч бүрэн бэлэн болчоод хүүхэд өсгөнө гэж байхгүй тэр үедээ хэцүү байсан ч дараа нь танд баяр хөөрөөр дүүрэн дурсамж болдог юм шүү хүүхэд гэдэг тийм л гэгээлэг юм шүү. АМЖИЛТ ХҮСЬЕ.

2012-09-12 | 14:23:38 | 202.179.16.206 |

Мэдээ
Гадаад мэдээ
Видео