“Х-Түц” продакшны жүжигчин А.Туяа: Үнэхээр өөрт таалагдсан залуутайгаа дотносохын тулд ямар нэгэн байдлаар ханд хаяна

2012-09-21

Энэ удаагийн ярилцлагын буландаа бид “Х-Түц” продакшны залуу жүжигчин А.Туяаг урьлаа.

Ингээд түүний хувийн амьдралын талаар нээлттэй ярилцлагыг хүргэж байна.
Өдрийн мэнд. Туяагаар сонин юу байна?
-   За танай сайтын уншигчдад юун түрүүнд энэ өдрийн мэнд хүргэе. Манай хамтлаг одоо өдөр бүр СТӨ-нд 19 цагаас “Амьдрах сайхан” нэртэй хошин шоу тоглолтоо үзэгчдийн хүртээл болголоо. Одоо хөдөө орон нутгийн үзэгчдэдээ бас энэхүү тоглолтоо хүргэхэд бэлэн болоод байна.
-   Энэ зун хэрхэн амрав? Амралтаа хаана өнгөрүүлсэн бэ?
-   Энэ зун ёстой сайхан амарсаан. Хөдөө их явсан. Манай хамтлагийнхан бүгд нэгдсэн журмаар амарсан. Ёстой л амарсан шиг амарлаа.
-   Туяа энэ зун хувийн амьдралдаа бас нэлээд өөрчлөлт хийсэн бололтой. Өөрийг чинь найз залуугаасаа салсан гэх мэдээлэл сүүлийн үед хэвлэлүүдээр нэлээд гарсан байна лээ?
-   Тэгсээн. Хүмүүс энэ талаар их асуух юмаа. Хоёр хүн мэдээж таарч тохирохгүй бол өөр өөрсдийнхөөрөө явсан дээр л дээ. Тийм ч болохоор бид хоёр салсан.
-   Хэвлэлүүдээр өөрийн чинь талаар сөрөг мэдээлэл хэр их гардаг вэ. Гарсан тохиолдолд ямар байдлаар хүлээж авдаг вэ?
-   Тийм асуудал их байдаг. Хэн нэгэнтэй андуурдаг ч юм уу эсвэл зүгээр хов жив сонсоод тэрнийгээ нэмж хачирласан тийм зүйл гардаг. Гэхдээ би тэр болгонд нээх эмзэглээд байдаггүй ээ. Яагаад гэвэл угаасаа л би тийм биш. Тэгээд ч ойр дотныхон маань намайг ямар хүн бэ гэдгийг мэддэг болохоор худал мэдээлэлд нээх их ач холбогдол өгөөд байдаггүй.
-   Мэдээж ийм сайхан бүсгүйг олон л хүн болзоонд урьдаг байх?
-   Тийм асуудал гарах нь ховор шүү. Гэхдээ мэдээж уулзая, учръя гэсэн хүмүүс байдаг л даа. Тэр тохиолдолд тухайн хүнтэй хойшид үерхэж нөхөрлөх ч юмуу, хайрлаж дурлах тийм бодол байдаггүй болохоор цаг зав алдаж, зууралдах шаардлага байхгүй л гэж боддог. Тэгж бодож байгаагаа ч шулуухан хэлчихдэг болохоор нээх их асуудал үүсээд байдаггүй. Амар байдаг юм.
-   Бэлэг хэр их авдаг вэ? Танихгүй залуугаас бэлэг авч байсан уу?
-   Тийм тохиолдол хааяа гардаг. Цэцэг их ирдэг юм. Тэгэхээр хэн өгсөн юм бол гэж боддог л доо.
-   Өөрөө эрэгтэй хүнд хэр өндөр шалгуур тавьдаг вэ?
-   Мэдээж хүн болгон л ирээдүйн найз залуу, нөхөр болох хүнээ ийм байгаасай тийм байгаасаа гэж бодож, шалгуур тавьдаг байх. Миний хувьд бол ирээдүйд надтай учрах хүн өөрөөс минь хэдэн хувиар илүү байх ёстой. Өндөр боловсролтой, ухаалаг, тэвчээртэй, өмнөө тавьсан зорилготой байх хэрэгтэй.
-   Тэгвэл хүмүүсийн ярьдаг төгс эмэгтэй хүний 21 шинжээс өөрт чинь хэд нь байгаа бол?
-   Мэдэхгүй юм аа. Би өөрөө одоо надад тэд нь байгаа гэж хэлэх нь бас хэцүү л юм л даа. Энэ асуултад бол миний хамгийн ойр дотны хүмүүс л хариулт өгөх байхдаа. Тэрнээс би өөрөө хариулахад хэцүү юм байна
-   Өөрийнхөө гадаад төрхөнд хэр сэтгэл хангалуун байдаг вэ?
-   Би бол сэтгэл хангалуун байдаг. Надад байгаа бүх зүйл өөрт минь таалагддаг. Ер нь миний бодлоор хүн их юм хүсэх тусам тэр хэрээрээ зовох юм шиг санагддаг. Тийм болохоор нээх их зүйлд шунаад байлгүй, өөрийнхөө байгаа байдалд сэтгэл хангалуун байх нь илүү аз жаргалтай, амар тайван байх үндэс болдог байх.
-   Өөрийгөө гадаад төрх, байгаа байдлаараа хэн нэгэнтэй адилхан гэж боддог уу?
-   Ёстой өөрийгөө хэн нэгэнтэй адилхан гэж бодож байгаагүй юм байна. Яахав зүгээр үлгэр дуурайлал авдаг хүмүүс бол байдаг. Гэхдээ үлгэр жишээ авдаг гэдэг нь бүр яг адилхан болох гээд дуурайгаад байдаг биш л дээ. Мэдээж хэн нэгнийг хэтэрхий их даган дуурайгаад эхлэвэл шал утгагүй шүү дээ.
-   Сүүлийн үед хошин урлагийн тайзыг царайлаг, өндөр гоолиг бүсгүйчүүд чимэх болсон нь анзаарагддаг. Гадаад төрх тань урлагт хөл тавихад хэр зэрэг түлхэц өгсөн гэж боддог вэ?
- Тодорхой хэмжээгээр нөлөөлсөн байж магадгүй. “Х-Түц” продакшинд урьд нь Одноо эгч, Нарансолонго нараас гадна нэлээд олон эмэгтэй жүжигчин байсан. Эцсийн шалгуурт тунаж үлдсэн нь тэр хоёр. Миний хувьд, нүүр царайны төрх болон бие галбираараа тэднээс арай өөр. Одноо эгч, Нарансолонго хоёр маань монголжуу төрхтэй царайлаг хүүхнүүд гэдэгтэй хэн ч маргахгүй биз. Би нэлээд европжуу төрхтэй, өндөр нуруутай болохоор үзэгчдийн нүдэнд содон харагдсан байх.
-   Шинэ, залуу жүжигчин олноор гарч ирж байгаа энэ үед өрсөлдөөн нэлээд ширүүсэх байх. Бусад продакшны уран бүтээлчдийн тухайд юу гэж боддог бол?
- Өрсөлдөж байж л чанартай уран бүтээл, чадварлаг жүжигчид гарч ирнэ. Хошин урлагийн жүжигчид бусдыг бодвол “толгой сайтай”, сэтгэх чадвар нь илүү хөгжсөн юм шиг санагддаг. Хурдан шаламгай, хувиралт сайтай гээд л давуу тал олон. Жүжигчний ур чадварын хувьд, хамгийн мундаг нь шүү. “Инээд гэдэг бол эмгүй эмчилгээ” гэж нэг суутан хэлсэн байдаг юм билээ. Энэ ч утгаараа, хошин урлагийн тоглолт үзэгч ихтэй, үнэлэмж нь өндөр байдаг биз. МУГЖ Э.Лхамхүү багш маань шавь нараа УДЭТ-т оруулах хүсэлтэй байсан. Нуулгүй хэлэхэд, надад драмын театраас илүү хошин урлагийн продакшин дээр санагддаг. Драмын тайзнаа гоё дүр бүтээх хүсэл жүжигчин хүн бүрт л байдаг. Гэхдээ би цаашид хошин урлагийн тайзан дээрээ л “амьдрах” байх.
-   Ярианыхаа сэдвийг жаахан өөрчлье гэж бодлоо. Ганц бие эмэгтэй хүний хувьд сексийн асуудлаа хэрхэн шийдэж байна?
-   Одоогоор уулзаж, болздог хүн байхгүй болохоор тэр тал дээр ямар нэгэн хамтрагч байхгүй. Эмэгтэй хүн сексийн асуудалд эрэгтэй хүнээс илүү тэвчээртэй ханддаг байх.
-   Ойрын хугацаанд найз залуутай болох бодол байна уу?
-   Одоохондоо найз залуутай болох талаар бодохгүй байгаа. Ажлаа хийгээд л энгийн сайхан амьдрахыг хүсч байна. Тэгж байгаад сэтгэл санаа болон хийх ёстой бүх асуудлаа цэгцэлчихээд бэлэн болсон цагтаа болох байх.
-   Өөрийн чинь хувьд сексийг заавал хайртай хүнтэйгээ хийх ёстой гэдэгтээ санал нэгдэх үү?
-   Хүн болгон тэгж заавал хайртай хүнтэйгээ хийнэ гэж байхгүй байх л даа. Бие биендээ үнэхээр таалагдаад, татагдаад байвал яагаад болохгүй гэж. Энэ бол байж болохгүй зүйл бол биш гэж боддог.
-   Чи өөртөө таалагдаад байгаа залуугаатайгаа дотносохын тулд өөрөө эхлээд өдөх, танилцах санал тавих зориг гаргаж чадах уу?
-   Үнэхээр таалагдаад байвал өөрөө эхэлж алхам хийж чаднаа. Тэгэхгүй бол аймаар таалагдаж байгаа хэрнээ юу ч хийхгүй өнгөрчихвөл харамсалтай биз дээ. Тийм болохоор би л лав ямар нэгэн байдлаар ханд хаях байх /инээв/.
-   Тэгвэл эсрэгээсээ өөрт чинь огт таалагдахгүй байгаа залуу өдөж, хоргоогоод байвал яаж хандах вэ?
-   Тийм хүмүүс байсаан /инээв/. Тэр тохиолдолд бол цаад хүндээ маш тодорхой бөгөөд зөвөөр хэлнэ л дээ. Чи бид хоёрт ямар нэгэн ирээдүй, цаашаа хамт явах боломж байхгүй. Тийм болохоор хэн хэнийхээ цаг завыг үрээд яах вэ гээд хэлнэ. Харин тэрийг ойлгохгүй бол бүр тэнэг хүн л байж таарна л даа.
-   Өөрт чинь урлагынхан дотор ч юм уу, улс төрчид дотор эр хүн гэсэн утгаараа харж явдаг хүн байгаа юу?
-   Ёстой байхгүй. Яахав зүгээр мэргэжлийнх нь үүднээс, хийсэн бүтээснээр нь хүндэлж, биширдэг хүмүүс байдаг. Харин эр хүн гэсэн нүдээр хардаг хүн бол одоогоор алга.
Ярилцсанд баярлалаа.
Г.Мөрөн www.uls.mn