Иргэдийнхээ эрүүл мэндийн эрхийг хамгаалах, баталгаажуулахын төлөө ажиллана

2012-11-09

Та МАХН-ыг сэргээн байгуулахад гардан оролцож, зовлон жаргалыг үүрч явсан хүний

хувьд өнөөдрийн улс төрийг яаж харж байна вэ?

МАХН бол манан дундаас нэвтэрч гарсан гэрэл гэгээ мөн гэж бид анх намаа сэргээн байгуулсан үедээ ярьдаг байлаа. Харин одоо өнгөрсөн үеэ эргэж харахад МАХН, түүний удирдлага, гишүүд дэмжигчид монголын нийгэмд асар том хувьсгалыг улс төрийн хамтран тэмцэгчдийнхээ хамтаар хийж чадсан байна. Нөгөө МАХН-ыг сэргээн байгуулах Онц Их хурал дээр анх тодорхойлж гарч ирж байсан МАНАН хэмээх улс төрийн үзэгдэл тодорхой хэмжээгээр сарнисан байна. Авилга, хүнд суртлын үндэсний сүлжээ тасран унаж байна. МАХН гудамжинд жагсаж шударга ёсны хувьсгал хийх гэж тэмцдэг байсан бол өнөөдөр засгийн эрх барилцаж байна. Энэ нь бидэнд Монголоо аврах 5 хувьсгалын хөтөлбөрөө хэрэгжүүлэх, төрд шударга ёсыг тогтоох сайхан боломжийг олгож байна. Гэхдээ бидний энэ тэмцлийн үзр дүн бол зөвхөн эхлэл нь. Цаашид шударга ёсны хувьсгалыг туйлд нь хүргэх хэрэгтэй. Үүний тулд бмд урьдаасаа илүү эрч хүчтэй ажиллах хэрэгтэй

Мөдхөн орон нутгийн сонгууль болно. УИХ-ын сонгуулийн үеэр Та орон нутагт үүссэн улс төрийн нөхцөл байдал нилээд шүүмжлэлтэй хандаж байх шиг санагдсан

2011 онд Монголын бүх ард түмний их хурилдайгаас монгол төрд олигархи дэглэм тогтсныг ард түмэн шүүмжлэн ярьж байсан. Түүнээс удалдгүй орон нутгийнхаа олигархиудаас салах санначлага өрнөж байсан. Тэр санаачлагыг нь бид сайн дэмжиж чадаагүйгээс энэ санаачлагын эрч хүч нь суларсан. Мөн орон нутагт хамжлагат ёс тогтож хөдөөгийн ард түмэн хэдхэн хуйвалдааны хүмүүсийн дохио зангаагаар хөдөлдөг, үг хэлэхээсээ айдаг, тухайлбал биднийг дэмжвэл ажлаасаа халагдах болов уу? үр хүүхдийг нь ажил албагүй болнох болов уу? өвчин зовлон болвол үзэж өгөхгүй хэцүүдэх болов уу? гэсэн болгоомжлол айдас байгаагаа хэлж байсан. Энэ орон нутгийн сонгуулиар энэ байдлыг халах хүчин л сонгуульд ялаасай гэж бодож байна.

МАХН-ын хувьд орон нутгийн сонгуульд хэрхэн оролцож байна. Энэ сонгуулиас ямар үр дүн гарна гэж хүлээж байна вэ?

МАХН бол 2011 оны 6-р сарын 24-нд албан ёсоор үйл ажиллагаагаа сэргээсэн нам. Энэ хугацаанд орон нутагт намынхаа мянгат, зуутыг байгуулах ажил хийсэн ч орон нутагт харилцан адилгүй байна. Ард түмний дэмжлэг маш өндөр байга. Энхбаяр даргын нам гээд л ард түмэн биднээс шударга ёсыг хүлээж байгаа. Ямар ч байсан МАХН-аас нэр дэвшигчид орон нутгийнхаа шат, шатны хуралд гуравны нэгээс доошүйг санал авч чадна гэж найдаж байна. Хэрэв саналаа луйвардуулчихгүй бол шүү дээ

Санал луйвардана гэснээс сонгууль нэг л биш болоод байна. Дандаа булхай, луйвар, саналын дүнг худлаа гаргадаг гээд иргэд их сүжиггүй болжээ.

Эрх барьж байсан МАН ба АН хоёулаа адилхан. Нэг нь нэгнээсээ илүү луйвардана уу гэхээс дутах юм байдаггүй. Ер нь сонгуульд ялсан гэх хүмүүсийг луйварчид л гэх юм байна. Шударгаар сонгуульд ялаад ч ялалт нь баталгааждаггүй ийм л болчихоод байгаа. Орон нутгийн сонгуулийн ирц хүрэхгүй болох бий гэсэн болгоомжлол байна.

Шинэчлэлийн засгийн газарт сайд боллоо. Хариуцлага өндөр, хариуцсан салбар чинь уначихсан. Ажлын гараа хир байна вэ?

Гайгүй дээ. Салбар маань танигдахын аргагүй дорд оржээ. Өнгөн талаас нь харахад өнгө будаг нь засарсан ч юм шиг. Үнэн хэрэгтээ хамаг ажил нь зуун задгай, жаран хагархай. Өдөр бүр энд тэнд доголдол, хүний эрүүл мэндийн эрх ашиг хохирч байгаа нь зүйрлэвэл монголдоо Чеченитэй адилтгамаар ч юмуу даа. Надтай уулзсан иргэд ард түмэн зовж байна гээд асгартал уйлж байхыг хараад өөрийн эрхгүй зүрх шимширч байна. Иргэдийнхээ эрүүл мэндийн эрхийг хамгаалах, баталгаажуулахын төлөө шинэчлэлийнхээ бүх үйл ажиллагааг чиглүүлнэ дээ.

Иргэдийнхээ эрүүл мэндийн эрхийг хамгаална гэхээр эрүүл мэндийн байгууллага эмнэлгийн байшин барилга гэхээсээ илүүтэй иргэд рүүгээ чиглэнэ гэсэн үг үү?

Тийм ээ. Мэдээж байшин барилга, багаж тоног төхөөрөмж чухал ч үйлчлүүлж байгаа хүмүүсээ анхаарч хайхрахгүй бол тэр байшин барилга, багаж тоног төхөөрөмж зөвхөн хэдхэн хүний бизнесийн зориулалтын хэрэгсэл болж хувирна биз дээ. Ард нь ард түмэн хүлээсээр, чирэгдсээр, олигтой чанартай тусламж, үйлчилгээ ч авч чадахгүй, сэтгэл дундуур байвал хичнээн ч хөрөнгө оруулсан ямар ч үр дүнд хүрэхгүй байх болно. Тийм учраас монгол хүнийхээ эрүүл, амьд явах эрхийг нь баталгаажуулж өгөх нь төр засгийн үүүрэг учраас бүрэн эрхийнхээ хугацаанд иргэдийнхээ эрүүл мэндпийн эрх тал руу түлхүү шинэчлэл хийе гэж бодож байна

Таны сайдаар томилогдох үедээ хэлсэн нэг үг байдаг. Эмч нь байгаад үзүүлж чадахгүй, эмнэлэг нь байгаад хэвтэж чадахгүй, эм нь байгаад эдгэрч чадахгүй, шинжилгээ хийлгээд онош нь тогтохгүй гэж та хэлж байсан. Энэ үг ард түмэнд их ойр тусаж байсан. Харин эрүүл мэндийн салбарын зарим хүмүүс дургүй байх шиг байсан?

Энэ үгийг би өргөн олны эрх ашгийн үүднээс хэлсэн болохоор өөлсөн хүмүүсийн үгэнд эмзэглээгүй. Аливаа шинэчлэлд саад бэрхшээл учирдаг. Эхлээд эсэргүүцнэ. Эрүүл саруул бодолтой нь тодорхой хугацааны дараа шинэчлэлийг хамтран хийлцээд явна гэдэгт би эргэлзэхгүй байгаа. Энэ бүх гажиг согогийг л засахын төлөө ажиллана дээ. Шинэчлэлийн дүнд монгол хүн шаардлагатай үедээ эмчдээ үзүүлж, эмнэлэгт хэвтчихдэг, үзүүлж байгаа тусламж, үйлчилгээ нь чанартай, найдвартай, үр дүнтэй. иргэн хүн ч өөрөө авсан тусламж үйлчилгээндээ сэтгэл хангалуун байдаг тийм л тогтолцоог бүрдүүлэхийн төлөө байна.

Таныг харахад завгүй л хирээрээ л ажиллааад байх шиг байх юм. Зарим хэвлэл мэдээллийн хэрэгслээр таныг Н.Энхбаяр даргыг ялаас чөлөөлүүлэхийн тулд сайд болсон гэээд байгаад Та ямар ч тайлбар хийхгүй байгаа нь ямар учиртай юм бэ?

Жингийн цуваа явж л байг, жингэр нохой хуцаж л байг гэдэг биздээ. Би үүнийг тоодоггүй шүү. Энхбаяр даргатай тэмцлийн хүнд өдрүүдэд хамтран зүтгэж байсан хүний хувьд түүнд үүсгэсэн хэрэг, өгсөн ялыг хараад харамсдаг. Бусад ерөнхийлөгч байсан хүмүүс шиг төрд гарсан олигархиудтай нийлээд идэх газар нь идээд, хуйвалдах газар нь хуйвалдаад, хаацайлах газар нь хайцайлаад явж байсан бол өнөөдөр Энхбаяр дарга магадгүй Оюу толгойн ТУЗ-ын дарга ч юм уу, аль эсвэл маш чухал ямар нэгэн эрх мэдэлтэй байх байсан. Харамсалтай нь тэр ард түмний зовлонг олж харсан, эх орныхоо эрсдлийг ойлгож мэдсэн, тэр өөрийнхээ эрх ашгаас өмнө эх орон, ард түмнээ тавьж чадсан. Түүнийхээ гайгаар гэвэл арай ч муухай юм уу даа. Уг нь гавьяа л даа. Нэхэмжлэгчгүй, хохирогчгүй, зохион байгуулагчгүй, гэрчгүй хэрэгт хилсээр яллагдаад байгааг хэн ч зөвшөөрөхөд бэрх. Түүний эрүүл мэндийн байдал сайнгүй байсан. Одоо зарим талаар дээрдэж байгаа тухай эмч нарын комиссын дүгнэлтийг надад явуулсан байна лээ. Энхбаяр даргыг эрүүл мэндийн шалтгаанаар ялаас чөлөөлөх асуудлыг би шийддэггүй. Түүний эрүүл мэндийн дүгнэлтийг олон мэргэжлийн эмч нар хамтарч үзээд хийдэг. Энэ шийдвэрт хэн ч нөлөөлөх боломжгүй

Одоо орон нутгийн сонгууль болох гэж байна. Та сонгогчдод хандаж юу хэлэхсэн бол?

Орон нутгийн сонгууль бол маш ач холбогдолтой улс төрийн үйл явдал юм. Та бүхэн нутгийн өөрөө удирдах байгууллага болох иргэдийн хурлынхаа төлөөлөгчдийг сонгох гэж байна. МАХН-аас нэр дэвшигчдийг дэмжээрэй. Тэд харахад таны итгэлийг бүрэн дааж чадах хүмүүс шүү. Орон нутгийхаа удирдлагыг нэг цоо шинэчлээд үз. Тэгвэл та л хожно. Таны нутаг ус хожно. Шинэ удирдлага шинэ хөгжлийг авчирна гэж хэлмээр байна.