Тэдний удирдсан эх орон гэж ямар юм үлддэг гэдгийг бид Онцгой байдлын ерөнхий газар (ОБЕГ)-ын жишээнээс харж байна. Монгол Улсын иргэдийг гал усны гашуун зовлонгоос авран хамгаалах үүрэгтэй бүхэл бүтэн институци найман сартай хүүхдээ элгэндээ тэвэрсэн эмэгтэй голын мөсөн дээр “Амь авраарай” хэмээн орилоод урсаж явахад нь харсаар байгаад хил гаргаад алдчихлаа. Ямар ч авран хамгаалах ажиллагаа хийж чадсангүй. Хий дэмий голын эрэг даган гүйлдсээр байгаад явуулчихлаа. ОБЕГ нь эхлээд Улсын нөөцийн газар нэртэй байгуулагдаж байсан юм. Хамгийн анхны дарга нь Бямбаноров гэж хуучин ху нам буюу одоогийн МАН-ын гишүүн нэгэн. Одоо шоронд байна уу, гарчихсан байна уу. Энэ хүн энэ газрын даргаар ажиллахдаа байгууллагынхаа төсвийн талыг зээлээд авчихаж байсан юм. Тэр үед тэдний төсөв 600 сая төгрөг байлаа. Түүний 300 саяар хувьдаа автобуснууд худалдаж аваад “Ургамал ЗМ” гэж компани байгуулаад ажиллаж байсан нөхөр. Тэр цагаас хойш Улсын нөөцийн газарт очиж байгаа хүн бүхэн улсын нөөцийг иддэг газар гээд ойлгочихсон. Сүүлд энэ газар ОБЕГ гэдэг нэртэй болсон. Ингээд П.Даш, Алтангэрэл… гээд хүмүүс томилогдож эхэлсэн дээ. Энэ дарга нар нь бас шоронд байна уу, гарчихсан уу. Уг нь Дашийг Өршөөлийн хуульд хамруулсан юм. МАН-д хань хамсаатнууд нь байсан болохоор түүнийг “Чи өөрийгөө хэлмэгдсэн гэж цагаатгуул” хэмээн шордсон юм шиг байгаа юм. П.Даш “Би буруугүй байсан” гэж давж заалдаад ялаа бүрмөсөн авч баларсан даа. Ингэж л давардаг гарууд энэ байгууллагыг үеийн үед удирдаж ирсэн. Энэ байгууллагад юу л бол юу шахаж болдог газар болж хувирсан. МАН-ын дарга нар хог дээрээс вертолёт сэлбэж босгоод хэдэн тэрбумаар ОБЕГ-т шахсан юм. Тэрхүү вертолётоороо борооноор түймэр унтраалгах гэж 20 орчим сайхан залууг явуулсан. Өнөө онгоц нь хүмүүсээ даалгүй Сэлэнгийн ойд аврагчдаа дараад ойчсон. Тэр үед тус байгууллагад ганцхан сансрын холбооны утас байсан. Тэр нь хотод дарга нарынх нь машинд хэвтэж байсан байдаг юм. Хэрэвзээ тэр холбоо гал сөнөөгчдөд явсан бол бүх аврагчид аврагдах байлаа. Тэд онгоцон дороо дарагдаастай хоёр шөнө, гурван өдөр орилсоор цувж үхэцгээсэн. Ингэж нүдэн дээр харсаар байтал орилсоор, чарласаар, амь гуйсаар хүмүүс үхэхийг харах шиг аймшиг, гуниг, харуусал хүн төрөлхтөнд байхгүй. Аврагчдыг ийнхүү бэртээд, няцарч, харангадаж ертөнцөөс буцаж байхад ОБЕГ-ын дарга нар У.Хүрэлсүхийн төрсөн өдөр дээр танц гишгэж байсан юм шүү дээ. Ганц гайгүй нисдэг тэрэг байсныг нь тэр үед үнэг хөөгөөд унагачихсан байдаг юм. Ийм л байдалтай явж ирсэн тус газрын аврагчид өнөөдөр асаагуурын арын хүжийн гэрэл шиг юмаар гэрэл хийж, утсандаа нэгжгүй, цоорхой өмдтэй, онгорхой гуталтай хүн аврах гээд очиж байна. Аврагчдыг буруутгах аргагүй. Удирдлагууд нь ийм хөгийн явж ирснийх. Тэгвэл аврах байгууллага угтаа ямар байх ёстой юм. Аймаг бүр онгоцтой, моторт завьтай, газар уснаа явагчтай, өндөр тусгалын гэрэлтэй байх ёстой. Наад зах нь шүү. Тэр бүү хэл Сэлэнгэ мөрөн дээгүүр хөвөгч гүүр тавиад хүнээ авраад зогсож байх ёстой. Өнөөдөр яаж байна. Дарга толгойтой бүхэн нь үнэтэй машин унаж, төрийн хувцсаар гангарч, суух өрөө тасалгаагаа гоёхоос өөр юу хийв. Юу байна цаад хэдэн муу аврагчдад чинь. Улс шиг улс байсан бол ийм техник хэрэгсэлтэй, аюулгүйн баталгаагаа хангалгүй аврах ажиллагаа явуулах гээд зогсож байх уу.

Миний энэхүү бичсэн бүхнийг авах хэмжээний мөнгийг улс энэ байгууллагад өгсөн, зарцуулсан. Энэ байтугайг авах мөнгийг энэ байгууллага авсан. Эхэнд хэлснээр шат шатны дарга нэртэй хулгайч нар өнгөрсөн 20 жилд хулгайлснаар өнөөдөр цогцос уснаас дэгээдэж гаргахаас өөр чадваргүй ийм л байгууллага үлдсэн байна. Шат шатны авлигач, хулгайч дарга нарын ард ийм л эх орон үлддэг юм байна.

Монголын эрүүл мэндийн яам байна. Ганц ч өвчнийг эмчилж чаддаггүй, гадаад явж эмчлүүл гэдэг. Гэтэл энүүхэн Өвөр Монголд эмчилчихдэг. Хуурамч өвчний түүх бичиж хэдэн зуун саяар нь улсаас хулгайлж байсан эмнэлгийн дарга нарын гэмт хэргийг “Өдрийн сонин” өнгөрсөн жил илрүүлсэн. Тэр үед нь тэр үеийн удирдагч нар нам дарсан. Мөн өчигдрийн дарга нар халамжийн мөнгийг яаж бантагнуулав. Халамжид 240 тэрбумыг өгсөн. Сү.Батболдын хэлснээр нийт хүн амын найман хувь халамжийг мөнгийг тоодоггүй, авахыг хүсдэггүй. Монголын хүүхдүүдээс гадаадад нэг хувь нь байна, гадуур бичиг баримтгүй нэг хувь нь тэнэж байна. Нийлээд 10 хувь. Эдгээр 10 хувийнхан 240 тэрбумаас аваагүй. Шинэчлэлийн Засгийн газрын гаргасан судалгаагаар 10 хувь нь ийнхүү тодорхойгүй үлдлээ. Тэгсэн төсвийн тайландаа энэхүү 10 хувьд очих мөнгө хаачсаныг өмнөх Засгийн газар хэлсэнгүй. Тараасан 240 тэрбумын арван хувь гэдэг 24 тэрбум төгрөг. Энэ мөнгө эзэндээ очсонгүй. 24 тэрбум бага мөнгө үү. Энэ мөнгийг тэгээд дундаас нь хэн хулгайлчихав. Иргэн Дорж, Дулмаа хулгайлсан уу. Ийм л хулгай төрд явагдаж, хулгайчид төр удирдаж байсан гэхээр үнэхээр уур нь хүрээд байна шүү дээ, энэ ард түмний чинь. Эх орныг минь ийм болгосны төлөө тэр үеийн сайд дарга нарыг цаазалж байх хэрэгтэй байна. Ийм эрс зоримог байж л энэ улс орон чинь эмх цэгцэндээ ордог юм байна. Ийм эх орныг өнгөрсөн 22 жилд бий болгосон учраас ард түмэн МАН-ыг халж, АН-ыг сонгосон. Арай дээр байх болов уу гэж горьдсон доо тэр.

М.Энхсайханы Засгийн газрын төсөв 300 тэрбум байсан юм. Өнөөдрийн төсвийн алдагдал 300 тэрбум. Манай улсын эдийн засаг ямар аймаар тэлэв. Ямар их мөнгөтэй болсон байна. М.Энхсайханы үед төрд ажиллах хүн олдохгүй байлаа. Тэгсэн өнөөдөр төрийн энэ их мөнгөнд амташсан хүмүүс амар бууж өгөхгүй бололтой. Ийм их мөнгөтэй болсон хэрнээ өнөөдөр ард түмний 40 хувь ядуу хэвээр байна. Эдийн засаг нь ингэж их өссөн байхад иргэд нь ядуу байгааг уншигч та юу гэж ойлгож байна. Энэ их мөнгийг тэгээд хэн халааслаж байсан байх вэ. Энгийн иргэн хэн ч үүнд хариулж чадна. Тэд бол өнгөрсөн 20 жил төрд байгсад.

Ардчилсан намынхаан, та нар өөдтэй байгаарай. Эд нар шиг хулгайч болчихгүй юм байгаа биз дээ. Ийм л итгэл сэтгэл ард түмэнд чинь байгаа шүү.

Б.НЯМСҮРЭН

ЭХ СУРВАЛЖ: ӨДРИЙН СОНИН /DAILYNEWS.MN/

Хулгайч нарын авч явсан эх орон иймэрхүү л үлддэг
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ОБЕГ-ыг идсэн Дашийн хэрэг бол зүгээр л нэг жишээ. Хулгайч нар ямар ичгүүргүй, дураараа загнадгийг Даш харуулж байсан даа.Төрийн өмчийг албаны нэр барьж өчнөөнийг хулгайлж идчихээд дараа нь өршөөлийн хуульд оруулахаар заавал цагаатгуулана гэж заргалдаж яваад ял аваа биз дээ.Энэ алба чинь ялсан намын мөнгө угаадаг хэрэгсэл юм бишүү. Ганц энэ байгууллага ч биш төрийн бүх албадад байгаа дүр зураг бол авилга хүнд суртал ердийн явдал болсон байгаа шүү.

2012-11-18 | 08:21:37 | 202.179.10.150 |

Мэдээ
Гадаад мэдээ
Видео