Хууль бус мод бэлтгэлтэй тэмцэх ажил эрчимжиж байна

2012-11-21

Байгаль орчныг хамгаалах намрын сарын аяны хүрээнд хууль бус мод бэлтгэлтэй тэмцэх

“Хяналт” нэгдсэн арга хэмжээг Байгаль орчин ногоон хөгжлийн яам, Цагдаагийн ерөнхий газар, Мэргэжлийн хяналтын ерөнхий газрууд хамтран 2012 оны 11 дүгээр сарын 10-ны өдрөөс эхлэн Сэлэнгэ, Төв, Архангай, Баянхонгор, Булган, Баян-Өлгий, Дархан-Уул, Дорнод, Орхон, Завхан, Өвөрхангай, Увс, Хэнтий, Хөвсгөл аймгуудын нутагт мод бэлтгэх, тээвэрлэх, худалдан борлуулах үйл ажиллагаа эрхлэн явуулж байгаа аж ахуйн нэгж, нөхөрлөл, шаардлагатай бусад цэгүүдэд хяналт шалгалт явуулж байна.
БОНХЯ-ны дэргэд байгуулагдсан Хууль бус мод бэлтгэлтэй тэмцэх шуурхай ажиллагааны тасаг Сэлэнгэ, Төв аймгийн зарим сумдад ажиллаж хууль бус мод бэлтгэлийн албан тушаалтантай холбоотой 5, аж ахуй нэгж байгууллагатай холбоотой 3, хувь хүнтэй холбоотой 10, эзэнгүй 2 нийт 20 зөрчил илрүүлж, УМБГ-ын Баягаль хамгаалах журмын эсрэг гэмт хэрэг мөрдөх хэлтэс шалгаж байна.

Сэлэнгэ аймгийн засаг дарга С.Бүрэнбат нь А-340 тоот захирамжаар ойд явуулах үйл ажиллагааг 11-р сарын 10-ыг хүртэл түр зогсоосон байтал Ойн тухай хуулийн 17.2.18 заалт /Ой хээрийн түймрийн аюултай үед ойд мод бэлтгэх, ойн дагалт баялагийг ашиглах, ойд аялал, зугаалгаар явах болон бусад үйл ажиллагааг зогсоох арга хэмжээг авах/-ыг үндэслэн ой нээж Сүхбаатар, Алтанбулаг, Шаамар, Түшиг сумдад 2012 оны 10-р сарын 25-ны өдрөөс мод бэлтгэх үйл ажиллагаа явуулсан байна.
Алтанбулаг сумын Засаг дарга Д.Сундуй нь ойн ангиараа Ойн тухай хуулийн 18.3.1-д заасан ойгоос мод бэлтгэх талбай тусгаарлах ажлыг хийлгэж, 18.3.2-д заасан бэлтгэсэн мод, модон материалд гарал үүслийн гэрчилгээ олгох ажлыг орлогч В.Түмэндэмбэрэлд хариуцуулсан нь ашиг сонирхлын зөрчил байгааг харуулж байна.
Засаг даргын орлогч В.Түмэндэмбэрэл, байгаль орчны хяналтын улсын байцаагч Ч.Баяржаргал, байгаль хамгаалагч С.Мөнхзул нар нь “Сэлэнгэ Хөх Чоно” ХХК-д бэлтгэсэн мод, модон материалд гарал үүслийн гэрчилгээ, гоожин хуваарь хэтрүүлэн, бөөнөөр олгосон байна.
Алтанбулаг суманд үйл ажиллагаа явуулдаг “Сэлэнгэ Хөх Чоно” ХХК нь ойгоос мод бэлтгэх технологийн заавар мөрдөөгүй удаа дараа зөрчсөнөөс гадна мод бэлтгэх хуваарь хэтрүүлсэн нь тогтоогдсон. Тус компани нь 2012 онд хэрэглээний мод 690 м3, түлээ 250 м3 бэлтгэх хуваарьтай байтал, аж ахуйн хашаанд нь нарсан палк 686 ширхэг, 32-ын банз 8 м3, зах банз 2 м/куб, хэрэглээний мод 1420 м3 байгаа нь мод бэлтгэх хуваариа хэтрүүлсэн нь харагдаж байна. Мөн бичиг баримтыг нь шалгахад их хэмжээний гарал үүслийн бичиг авч Улаанбаатар хот руу хэрэглээний мод тээвэрлэсэн нь тогтоогдсон. Сэлэнгэ амгийн Бугант тосгонд үйл ажиллагаа явуулдаг “ЭБНЗ” ХХК нь зөвшөөрөлгүй газраас, зөвшөөрөлгүйгээр ногоон мод бэлтгэж байсан ба эдгээр компаниуд нь “Ойн тухай хууль”-ийн 35.4 заалтийг бүхэлд зөрчсөн байна.
Ерөө сум нутагт хамаарах Цонхлонгийн даваанд 100 орчим ногоон нарс мод, Хүдэр сум нутагт хамаарах “16”-ын даваанд их хэмжээний ногоон нарс мод хууль бусаар бэлдсэн байсныг эзэн холбогдогчийг тогтоохоор тухайн орон нутгийн Цагдаагийн газарт шалгаж байна.
Мөн аж ахуйн хашаанаасаа бичиг баримтгүйгээр мод тээвэрлүүлсэн Түнхэл тосгоны “Хангайн бүргэд” ХХК, түлээний модны стандарт биелүүлээгүй тээвэрлэсэн 5 хүнд торгуулийн арга хэмжээ, 5 хүнд эрүүгийн хариуцлага хүлээлгэхээр шийдвэрлэж холбогдох Цагдаагийн байгууллага, Баягаль орчны улсын байцаагч нарт хүлээлгэн өгсөн.
Нийслэл хотын хэмжээнд “Хяналт” нэгдсэн арга хэмжээг зохион явуулж БЗД-ийн нутаг Улиастай, Гачууртын амны уулзварт хөдөлгөөнт постонд автомашинтай гаргаж ажиллуулснаар зүүн чиглэлийн авто замын сүлжээгээр шалган бүртгэх товчоодод бүртгүүлэхгүйгээр нэвтрэх боломжтой авто замуудад хяналт тавьж ажилласан албан хаагчид үүрэг гүйцэтгэх хугацаанд 105 тээврийн хэрэгсэл шалгаснаас зохих зөвшөөрөлгүйгээр ойгоос мод бэлтгэн тээвэрлэсэн 5 тээврийн хэрэгсэл, айлууд хууль бусаар их хэмжээгээр 385 ш мод бэлтгэн хашаа, малын хашаа, саравч, амбаар зэргийг барьсан зөрчлүүдийг баримтжууллаа.
Тахилт, Шижирийн даваа орчмын чиглэлд гарч ажилласан албан хаагчдаас үүрэг гүйцэтгэх хугацаанд нийт 210 тээврийн хэрэгсэл шалгаснаас 600 шуудай, 2.5 м3 мод тээвэрлэж явсныг илрүүлэн Нийслэлийн байгаль хамгаалах байцаагчаар торгуулийн арга хэмжээ авхуулахаар өгсөн.
Партизаны нүхэн гүүр, СХД-ийн 22 дугаар хорооны нутаг 361-ийн гармын орчмын постын чиглэлд гарч ажилласан албан хаагчдаас үүрэг гүйцэтгэх хугацаанд нийт 325 тээврийн хэрэгсэл шалгаснаас хууль бусаар 50 м3 мод, 1470 шуудай мод, 190 ш плак, 10 боодол брус мод, илрүүлэн эрүүгийн хэрэг үүсгүүлэхээр СХД-ийн Цагдаагийн хэлтэст, Чингэлтэй дүүргийн нутаг дэвсгэр Зуслангийн цагдаагийн хэсэг дээрхи байнгын постонд үүрэг гүйцэтгэх хугацаанд хууль бусаар 30 ширхэг мод, 2 м3 модыг илрүүлж, Нийслэлийн дүүрэгт гарсан байнгын постууд нийт 453 тээврийн хэрэгсэл шалгаж, зохих зөвшөөрөлгүй хууль бусаар тээвэрлэсэн 13 м3 мод, 990 шуудай түлээний мод, 18 м3 палк модыг илрүүлэн дүүргүүдийн Цагдаагийн хэлтэст шалгуулахаар шилжүүлсэн.
Баянхонгор аймагт нийт 53 тээврийн хэрэгсэл шалгаснаас 60 м3 мод, Булган аймагт нийт 69 тээврийн хэрэгсэл шалгаснаас 18 м3, Орхон аймагт нийт 68 тээврийн хэрэгсэл шалгаснаас түлээний мод хууль бусаар бэлтгэн тээвэрлэсэн, Сэлэнгэ аймагт нийт 75 тээврийн хэрэгсэл шалгаснаас 16 ш нойтон мод, 4 м3 мод, Төв аймагт нийт 141 тээврийн хэрэгсэл шалгаснаас 6 м3, 60 ш зээр зохих зөвшөөрөлгүйгээр агнасан, Хэнтий аймагт 36 тээврийн хэрэгсэл шалгаснаас 15м3 мод, Хөвсгөл аймагт 34 тээврийн хэрэгсэл шалгаснаас 16 м3 мод хууль бусаар бэлтгэсэнийг хурааж, тээвэрлэсэн 8 автомашиныг илрүүлэн шалгаж байна.
Хулгайн модтой тэмцэхэд байгаль орчны чиглэлээр үйл ажиллагаа явуулдаг Төрийн бус байгууллагууд, иргэдийн оролцоог нэмэгдүүлэх, иргэдээс мэдээллийг Засгийн газрын 11-11 төвийн 1111 утас болон Хууль бус мод бэлтгэлтэй тэмцэх шуурхай ажиллагааны тасгийн 51-266315, Улсын мөрдөн байцаах газрын Байгаль хамгаалах журмын эсрэг гэмт хэрэг мөрдөх хэлтэсийн 51-264957 утсаар тогтмол мэдээлэл авч хяналт, шалгалт явуулж байна.

БАЙГАЛЬ ОРЧИН, НОГООН ХӨГЖЛИЙН ЯАМНЫ
ХУУЛЬ БУС МОД БЭЛТГЭЛТЭЙ ТЭМЦЭХ
ШУУРХАЙ АЖИЛЛАГААНЫ ТАСАГ

УЛСЫН МӨРДӨН БАЙЦААХ ГАЗАР
БАЙГАЛЬ ХАМГААЛАХ ЖУРМЫН ЭСРЭГ
ГЭМТ ХЭРЭГ МӨРДӨХ ХЭЛТЭС