2012-12-07Шар айраг” хамтлагийн ахлагч Г.Ганхүүтэй ярилцлаа.
-“Michael Learns to Rock” хамтлаг манай эх оронд буулаа. Тоглолтын бэлтгэл ажил дууссан уу?
-“Michael Learns to Rock” хамтлаг “Чингис хаан” олон улсын нисэх онгоцны буудалд сая /өчигдөр 14.00/ буулаа.
Манай ажлын хэсгийнхэн тэднийг тосч “Sky tower”-т буулгасан. Бид “Evento” ХХК-ийг байгуулаад анхны төсөл болгож домогт “Битлз” хамтлагийн хуулбар “Bootleg Beatles” хамтлагийг урьж, улаанбаатарчууддаа үнэгүй тоглолт үзүүлсэн.
Дэлхий даяаршлагдан байгаа энэ үед монгол залуусыг дэлхийн хөгжмийн урсгалаас хоцрохгүй, хөл нийлүүлэн алхуулахын тулд одуудыг эх орондоо урьж тоглуулахыг хичээж байна. Хэдийгээр ардчилал хөгжиж, хүмүүс дуртай орондоо зорчиж, дуртай зүйлээ үзэх боломжтой болсон ч эдийн засгийн байдлаас болоод оддын тоглолтыг очиж тэр бүр үзэж чадахгүй байна. Тиймээс манай компани дэлхийн оддыг эх орондоо урих зорилготой байгуулагдсан юм.
Манай хоёр дахь төсөл “Michael Learns to Rock” хамтлаг. 1990-ээд оноос “Sleeping child”, “Take me to your heart” зэрэг олон сайхан дуу нь дэлхий даяар хит болж, монголчуудын сайн мэдэх болсон энэ хамтлаг Азид хийж буй аялан тоглолтын төгсгөлөө Эзэн Чингисийн өлгий нутагт хийх болсондоо баяртай байгаагаа албан ёсоор мэдэгдсэн.
Ер нь монголчуудыг рок поп хөгжим хөгжсөн, тэдний дууг сонсдог гэдгийг мэдээд нэртэй хамтлаг дуучид гайхдаг. “Michael Learns to Rock” хамтлаг бас гайхаж хүлээж авсан. Гэхдээ олон хүний хүч хөдөлмөр, туслалцаа дэмжлэгээр тоглолт маань сайхан болно гэдэгт итгэж байна.
-Тасалбар нь зарагдаж дууссан уу?
-40, 60, 80 мянган төгрөгийн үнэтэйгээр тасалбараа зарсан. Хоёр өдрийн тоглолтын тасалбар зарагдаад бараг дуусч байгаа. Бид борлуулалтын маркетингаа өөрчилж, барууны стандартыг нэвтрүүлэхийг хичээсэн. Тиймээс анх удаа онлайнаар тасалбар худалдсан нь амжилттай боллоо. Монголчууд онлайн системийг сайн хэрэглэдэг болжээ. Онлайнаар зарсан тасалбараас хамгийн үнэтэй нь эхэлж дууссан.
Монголчууд урлаг ойлгодог, уран бүтээлийг үнэлдэг болсон нь эндээс харагдаж байна. Ер нь рок поп гэдэг хямдхан урлаг биш. Хошин шогийнхон шиг өдөр бүхэн тоглодоггүй. Харин бүтэн жил хөдөлмөрлөж ганц удаа л тоглолт хийдэг. Тэр утгаараа үнэлэмж өндөр байх ёстой. Гавьяат жүжигчин, дуучин Т.Ариунаа Монголд анх удаа 200 ам.доллараар тоглосон. Саяхан “Никитон” хамтлагийн Баачка маань 100 мянган төгрөгөөр тоглоход ч үзэгч дүүрэн байсан. Нэг талаас үнэтэй мэт харагдавч, нөгөө талаас бүтэн жилийн хөдөлмөрийн дүн юм. Тэгэхээр зах зээлийнхээ журмаар явах ёстой. Эрэлт байвал нийлүүлэлт нь байж таарна.
-”Evento” ХХК дэлхийн оддын айлчлан тоглолтыг хоёр удаа амжилттай зохион байгууллаа. Дараагийн тоглолтын төлөвлөгөөгөө гаргасан уу?
-Ний нуугүй хэлэхэд яг өнөөдөр дэлхийд моданд орж байгаа хамтлаг, дуучдыг Монголд авчрахад үнэхээр хүндрэлтэй. Бид холбогдож үзсэн. Тэдний шаардлага, хөлс мөнгийг дийлэхгүй юм билээ. “Битлз”-ийн хөшөөг босгож байхдаа Пол Макартнид хүсэлт тавьж байсан. Зах зээлийн ханш нь 2-3 сая ам.доллар байдаг. Манай зах зээл жаахан учир тэр ханшийг нь өгч дийлэхгүй. Гэхдээ гадны зуучлалын байгууллагууд “Хөгжиж буй орон болох Монголын залуусыг дэмжээч” гэсэн хүсэлтийг явуулж байгаа.
“Michael Learns to Rock” хамтлаг ч өндөр үнэтэй. Харин тэд бидэнд боломж олгож, хөнгөлөлт үзүүлсэн. Дараагийн хамтлаг дуучид ч хөнгөлөлт үзүүлэх байх гэж найдаж байна.
Бид ирэх жил Бруно Марс, Брайн Адамс зэрэг дуучдыг ирүүлэхээр ярьж байна. Энэ хамтлаг дуучид манай “UB Palace”-ийг тоож тоглохгүй нь мэдээж. Тиймээс урин дулаан цагт Төв цэнгэлдэх хүрээлэнд ч юм уу, олон нийтийг хамарч болох газар хийх боломжийг судалж байна.
-Манайд дээд зэрэглэлийн шоу тоглолт хийх ордон байхгүй. Бусад улс орны жишгээр том ордонтой болох боломж байна уу?
-Би шалихгүй ч гэсэн улс төрөөр нэлээд хэдэн жил оролдлоо. 3-4 сонгуульд орж үзсэн. Энэ жил анх удаа ялалт байгуулж, Нийслэлийн Иргэдийн төлөөлөгчдийн хурлын төлөөлөгчөөр сонгогдлоо. ИЗН-аас ганцаараа сонгогдсон ч бусад 44 гишүүн маань миний саналыг дэмждэг. Тэр утгаараа би нэг санал оруулсан маань гишүүдийн 100 хувийн саналаар дэмжигдэж, Улаанбаатар хотод рок попын төвийг байгуулахаар болсон. Энэ нь дэлхийн стандартад нийцсэн дуугаралттай тоглолтын танхим төдийгүй залуу уран бүтээлчдээ дэмжсэн, хүүхэд багачуудад зориулсан урлагийн сургалтууд явуулах цогцолбор төв болох юм.
Улаанбаатар хотын захирагч болон Нийслэлийн иргэдийн төлөөлөгчид зөвөөр ойлгон дэмжиж 2013 оны төсөвт орууллаа. Ирэх жил газар, зураг төслөө шийдээд, 2014 оноос барилга байгууламжаа барьж эхлэх төлөвлөгөөтэй байна. Тэгэхээр 3-4 жилийн дараа хэний ч өмнө нүүр улайхааргүй төвтэй болно.
Харамсалтай нь хотын төвийн 3000 га газарт ямар ч барилга байгууламж барих зай байхгүй. Тиймээс бид газрыг нь худалдаж авсан компаниудтай ярьж байна. Тэд ерөнхийдөө нааштай хүлээн авч байгаа учраас удахгүй шийдэгдэх байх.
-Хотын залуус, хотын соёл, хотын хөгжим гэж сүүлийн үед их ярих болжээ. Гэтэл Улаанбаатар хотод энэ бүхэн байна уу?
-Хотын соёл гэж ярихаар хөдөөгийнхнөө үгүйсгээд байгаа юм биш. Энэ бол маш энгийн. Нэг хүний эрх чөлөө нөгөө хүнийхээр хязгаарлагддаг юм гэдгийг л маш сайн ойлгох ёстой. Монголчууд нүүдэлчин уламжлалаасаа гүйцэд салаагүй учраас хотын соёлд дасахгүй байна. Яваандаа төлөвших нь ойлгомжтой, цаг хугацаа шаардсан асуудал.
Нөгөө талаас хотын хөгжим гэдэг зохиолын дуу, ардын хөгжмөө үгүйсгээд байгаа зүйл биш. Зах зээлийнхээ жамаар бүх төрөл жанр өөрийн гэсэн үзэгч, сонсогчтой. Үнэхээр хотын хөгжилд дутагдаж байгаа зүйл бол хотын хөгжим. Хотын хөгжимд заал танхим дутагдалтайгаас гадна уран бүтээлчид нь өсч хөгжих, уран бүтээлээ чөлөөтэй туурвих боломжийг олон зүйлээр боомилох болсон.Эх сурвалж:chuhal.mn
-Шөнийн клубыг ОО цагт хаалгаж байгаа нь нэг талаар уран бүтээлчдийг боомилж байгаа хэрэг гэж үзэж байна уу?
-Шөнийн клуб, ресторан, pub-д тоглох боломжийг хязгаарлаж, шөнийн 00 цагт бүгдийг хааж байгаа нь уран бүтээлчдэд сөргөөр нөлөөлдөг. Өнөөдөр шөнийн амьдралгүй метрополис хот дэлхий дээр ганцхан Улаанбаатар л байна. Тиймээс би энэ цагийн хязгаарлалтын талаар Иргэдийн төлөөлөгчдийн хуралд болон Хууль зүйн сайд Х.Тэмүүжинд хэлсэн. Нааштайгаар шийдвэрлэх байх. Бид энэ жил 500 мянган жуулчин хүлээн авсан бол ирэх жил нэг сая болгохоор төлөвлөж байна. Шөнийн амьдралгүй хотод жуулчид ирэхгүй шүү дээ.
-Хотын хөгжим гэхээр шөнийн клуб, бааранд явдаг гэж ойлгодог хүмүүс бий. Гэтэл бааранд дуулна гэдэг дуучдын нэр хүндэд муугаар нөлөөлдөг юм шиг?
-Хотын хөгжим гэхээр зөвхөн шөнө эгшиглэдэг гэж ойлгож болохгүй. Баар, ресторан, шөнийн клубт орохоор чөлөөт цагаа буруу өнгөрөөж байгаа гэж бодож болохгүй. Өнөөгийн залуус бааранд орохоороо л ухаан мэдрэлээ алдталаа архи уудаг зүйл байхгүй болсон. Найз нөхөдтэйгөө ярилцаж, хөгжим сонсох, сайхан бүжиглэж кайф авах хүсэлтэй залуус бий. Тэр бүхнийг нь хүчээр хааж, эрх чөлөөг нь боож болохгүй. Дэлхий нийтийн хандлага хаашаа явж байна түүнийг бид дагах ёстой. Зарим нэг зүйлийг шууд хуулаад авахад гэмгүй. Заавал бүтээж зохиосон зүйлсийг дахин хийх шаардлагагүй шүү дээ. Дэлхийд олон орны метрополис хотууд шөнө унтдаггүй. Энэ нь эдийн засгийн болоод нийгэм.
-Манайд аль талаас нь хотын соёлыг хөгжүүлж, шөнийн амьдралыг бий болгох ёстой юм бэ?
-Би Иргэдийн төлөөлөгчдийн хуралд хоёр зүйл дээр түлхүү анхаарч ажиллаж байна. Нэг нь нийтийн тээврийн асуудал болох метро. Замын бөглөрөл түгжрэлийг арилгах хамгийн зөв гарц бол метро гэдгийг би аль 2003 онд хотын хүн ам сая хүрч байхад бичиж, ярьж байсан. Тэр үед хүмүүс намайг шоолж, нэг инээж, мөрөөдөл гэж байсан бол өнөөдөр ажил хэрэг болж байна.
Хоёр дахь асуудал бол Улаанбаатар хотын шөнийн амьдрал. Энэ цагийн хязгаарлалтыг цуцлах ёстой гэдэг дээр ажиллаж байна. Шөнө гарсан залуучууд л буруу хүмүүс байдаг шиг ойлголт манайд түгээмэл байна. Үнэндээ өрнөдийн улс орнуудад шөнийн амьдрал энгийн зүйл. Тухайлбал, Испанийн Барселано хотод хүмүүс шөнийн 23 цагт оройн хоолоо идэж 3-4 цагт унтдаг. Энэ бол энгийн амьдралын хэмнэл. Зах зээлийнхээ журмаар зохицуулах ёстой зүйл. Эрэлт нь байхад нийлүүлэлтийг нь хүчээр боож болохгүй. Хүний эрхийн асуудал ч яригдах юм. Шөнийн ОО цагт Улаанбаатар хотын бааруудыг хүчээр хааснаар архидалт далд хэлбэрт орж, авилгал хээл хахуулийг гааруулж байна. Зах зээлийн хуулиар бол аливаа зүйлийг чөлөөлөөд байх тусам эмх журмандаа ордог юм.
-Гэхдээ энэ шийдвэрээ архидалтыг багасгах зорилготой гэдэг шүү дээ?
-Ардчилсан нийгэмд хамгийн чухал зүйл сонголт байдаг. Хувь хүнийг хүчээр ор гар, ид уу гэж болохгүй шүү дээ. Хүний ухамсрын, соёлын асуудал. Одоо архийг хэтрүүлэн хэрэглэдэг хүмүүс Улаанбаатар хотод хамаагүй багассан шүү дээ. Хүмүүс зөв хэрэглэж, тааруулаад ууж иддэг, соёлтой болж байна. Тиймээс хүний сонголтыг хүндэтгэж элдэв хорио цээр тавих нь буруу юм.
“Буян” Жагаа намайг баарны дуучин гэж хэлж байсан. Би бол түүгээрээ бахархдаг. Надад бааранд дуулах шиг кайф, бахархал байдаггүй. Би Носталже нэвтрүүлэг хөтөлдөг, дэлхийн хөгжмийн урлагийн үүх түүхийг судалдаг. Бааранд дуулаагүй нэг ч дуучин, хамтлаг байдаггүй. Дэлхийн болон монголын дуучид хамтлагууд бүгд баарнаас гараагаа эхэлсэн байдаг. Залуу хамтлаг дуучдад өөрсдийгөө таниулах боломж бага байна. “UB palace”-ийн өндөр үнийг төлөөд тоглолт хийх боломж тэдэнд байдаггүй учир баар шөнийн клубт дуулж эхлэхээс өөр аргагүй. Бидний яриад байгаа Рок попын төвийг байгуулчихвал залуу уран бүтээлчдээ дэмжих тал дээр илүү ажиллана. Тэгэхээр цагийн хязгаарлалт тогтоож бааруудыг хүчээр хааснаар уран бүтээлчдийн өсч дэвших, олонд танигдах боломжийг хаахаас гадна орлогыг үгүй хийж байгаа юм.
-”Шар айраг” хамтлагийн сонин сайхнаар ярилцлагаа өндөрлөе. Та бүхэн ямар шинэ уран бүтээл хийж байна?
-Бид намар “Bootleg Beatles” хамтлагтай хамтарч тоглосон. Маш сайхан найзууд болсон, и-мэйлээр байнга холбоотой байна. “Michael Learns to Rock” хамтлагийн өнөөдөр, маргааш болох тоглолт дээр манайх хамтран тоглоно. “Он цагийн урсгал” дуу маань тэдэнд таалагдсан, стиль ижилхэн юм байна гэж үнэлсэн байна лээ.
Дэлхийн нэртэй хамтлагууд аль нэг зүйлээрээ номер нэг байдаг. Гэтэл “Michael Learns to Rock” хамтлаг залуучууд дэлхий даяар хамгийн их караокед дуулагдсаны юм билээ. Тиймээс хоёр өдөрт залууст маань тэдэнтэй хамтдаа дуулах боломж байгаа шүү гэж хэлмээр байна.
Манай хамтлаг 20 гаруй жил дууллаа. Уржнан анхны цомгоо гаргасан. Цомог маань борлогдоод дууссан учир дахин хэвлүүлсэн. Үүндээ урамшаад бид хоёр дахь цомгийнхоо ажилд орсон. Шинэ цомгийнхоо хоёр шинэ дууг энэ тоглолт дээр сонирхуулна. Цомог уран бүтээлчдийн түүх болон үлдэж, харин тоглолт орлого болдог. Тиймээс энэ тал дээр төр засгаас ч анхаарах цаг болсон.
(1)(1)(1)(2)(2).jpg "Томруулж харах")
.jpg "Томруулж харах")
