Шүүх эрх мэдэл, их мөнгөний хөлд итгэл сэтгэлээ дэвслүүлсэн ард түмэн цурхирахаас ч өөр яах билээ. "АПУ"-ийн их мөнгөний өмнө сум дундын шүүхийн тарчигхан амьдралтай шүүгчид сөхрөө л биз гэж бодъё.

Улсын дээд шүүхийн мөнгөнд дуртай зарим шүүгч нүд унагаа л биз гэж саная. Бүхэл бүтэн гүрэн улсын хууль тогтоох дээд байгууллага, Үндсэн хуулийн цэц спирт зарж мөнгө олсон хөрөнгөтний өмнө толгой гудайхын чинээ даанч санасангүй. Тэр тусмаа үндэсний эв нэгдлийг илэрхийлж, бэлгэ тэмдэг нь болох ёстой Ерөнхийлөгч Ц.Элбэгдоржийг "АПУ"-ийн мөнгөний өмнө амаа үдүүлнэ чинээ ард түмэн лав санаагүй байх.

Тун удахгүй Ерөнхийлөгчийн сонгууль болно. Эрхэм Ерөнхийлөгч маань өвөрхангайчуудаар чулуу нүүлгүүлээд зогсохгүй олон аймагт ийн адлуулах нь ч тодорхой боллоо. "Шинэчлэл" хэмээх хуурамч хөшигний цаана "Шударга үнэн хэмээх хуурамч багтай дарангуйлагч их "хаад" морилж байгааг гэрчилж өгсөн зүйл бол "АПУ"- ийн Г.Батхүү хууль бусаар УИХын гишүүний тангараг өргөсөн явдал юм.

Эндээс үзэхэд Монгол Улсын шүүх, хүчний байгууллага улстөрийн илт захиалгаар ажиллах болсон нь ганцхан энэ үйл явдал ч биш, маш олон зүйлээс харагдах болжээ. Ардчилал нэрийн дор дарангуйллын шинжтэй төр улс оршин тогтнож, ард иргэд хууль тогтоох байгууллагад итгэхээ больсон нь юм болгоноос харагдах болсон нь үнэхээр аймшигтай.

"Шударга үнэн" хэмээх хуурамч багтай дарангуйлагчдын хувьд "шинэчлэл" хэмээх хуурамч хөшигнийхөө араас Д.Зоригтыг Г.Батхүүтэй хамт тангараг өргүүлэх бодлого явуулсан нь хөдлөшгүй үнэн. Тэр тусмаа Г.Батхүүгийн хувьд УИХ-ын гишүүнд бүр ч их санаархаж байлаа.

Тэр ард түмэнд ганцаараа "нүдүүлэхээс" айж, Д.Зоригтыг хань татаж, өнгөрсөн хугацаанд түүнийг асуудал үүсэх бүрт чирч байв. Сүүлдээ нэрийг нь ч ашиглав. Нэг талаас Г.Батхүү Д.Зоригтоор бамбай хийж, нөгөө талаас Ардчилсан намынхан УИХ дахь суудлынхаа тоог нэгээр нэмэх гэсэн хүслийг Д.Зоригт няцаав.

Ингэснээр Д.Зоригт чухам ямар хүн бэ гэдгээ ард олонд харуулж чадлаа. Түүнээс өчигдөр хэвлэлийнхэн яагаад тангараг өргөхөөс татгалзсан талаар лавлахад "Ард түмнийхээ сонголтыг хүндэтгээд УИХ-ын гишүүний тангараг өргөхөөс өөрийн хүсэлтээр өргөдөл гаргаж татгалзсан.

Өвөрхангай аймгийн иргэд УИХ-д төлөөлөлтэй болох, УИХ-ын үйл ажиллагааг ч гацаахгүй үргэлжлүүлэх үүднээс нэрээ татсан" гэжээ. Энэ бол улстөрд карьер хөөж яваа ч ард түмэн, улс орноо гэсэн сэтгэлтэй хүний үг. Хамтрагч Г.Батхүү болон намын зүгээс дэмжлэг үзүүлж байгаа ийм үед боломжоос татгалзана гэдэг түүнд хүнд л байсан болов уу.

Тэрбээр Г.Батхүүг дагаж навсаганаад, ганц нэг шүүгчид мөнгө төгрөг атгуулж явсан бол өчигдөр тангаргаа өргөх боломжтой байв. Тиймээс Д.Зоригтыг бид ичих нүүртэй монгол эр хүн гэж үнэлэхээс өөр аргагүй. Үнэн хэрэгтээ Г.Батхүү архиа үйлдвэрлэж, монголчуудаа хордуулж байхын тулд л УИХ-ын гишүүний суудалд шунасан хэрэг.

Сүүлийн үед буюу түүнийг УИХын гадна байхад юм юм л өрнөв. Түүх дурсгалын музейн газрыг дээрэмдсэн нь илчлэгдэв. Хүүхдийн парк, Яармагийн дэнжээс газар хумсалсан нь илрэв. Шүүхийн эрх мэдэл бүхий нөхрийг өөрийнхөө архины үйлдвэрт өндөр цалинтай хуулийн зөвлөх болгосон нь, тэдэнд бас мөнгө өгсөн нь ч дуулдав.

Сүүлдээ эрүүл ахуйн шаардлага хангахгүй орчинд дарс үйлдвэрлэж байсныг мэргэжлийн хяналтын байгууллага тогтоож, ҮХАА-н сайд Х.Баттулгын санал болгосноор уг тусгай зөвшөөрлийг Засгийн газар цуцлав. Түүнчлэн архиных нь тусгай зөвшөөрлийг гурван сараар түдгэлзүүлэх асуудлыг Шударга өрсөлдөөн хэрэглэгчийн төлөө газрын дарга О.Магнай тавьсан ч яваандаа нам жим болсон.

Үүний зэрэгцээ шинэ УИХ архи, тамхины онцгой албан татварыг нэмж, түүний бизнест гай тарив. Өөрөөр хэлбэл, өнгөрөгч зургадугаар сараас хойш Г.Батхүүг тэвдүүлсэн, барьц алдуулсан, мөнгө зарцуулсан ийм "хар" сарууд өнгөрчээ. Бүр тодруулбал, түүний бизнес захаасаа хумигдаж эхлэв.

Тиймээс тэр өчигдөр алдсан бүхнээ олж авахаар УИХ-ын гишүүний сэнтийд хууль бусаар заларлаа. Өнгөрөгч хугацаанд ийнхүү багагүй бартаа туулсан тэрбээр УИХ-д хурдхан шиг сууж, дээрх бүх булхайгаа нуухаар шийдсэн нь энэ бололтой. Уг нь ард түмний нүдэн дээр ил болж байгаа энэхүү бусармаг үйлдлээс хэн ч зайгаа авч ичмээрсэн дээ.

Үнэн хэрэгтээ Г.Батхүү ийнхүү багагүй хэмжээний мөнгө зарж УИХ-ын гишүүний тангараг өргөөгүй бол олон зүйл ил болох байлаа. Олон хууль бус үйлдлүүд илчлэгдэх учиртай байв. Түүнчлэн Д.Зоригт цааш өгүүлэхдээ "Энд улстөрийн наймаа, намын даалгавар, тохироо байхгүй. Би зөвхөн өөрийн хүсэлтээ гаргасан.

Шүүхийн процессийн дагуу явагдаж байгаа С.Чинзоригт холбогдох хэрэг үнэн зөвөөр шийдэгдвэл тэр УИХ-ын гишүүн болох боломжтой болж байгаа. Г.Батхүү гишүүний өмнөөс би юм ярихгүй. Энэ бол цэвэр миний хувийн сонголт" гэж хэлсэн байна. Тиймдээ ч Д.Зоригт нутагтаа эргээд нүүр бардам очих сонголт хийлээ. Тэрбээр ард түмнийхээ өөдөөс бүтэн харах нүүртэй үлдлээ.

Харин Г.Батхүүгийн улстөрийн зам ингээд дуусч байгаа гэсэн үг. Одоо тэр Өвөрхангай аймагт УИХ-ын гишүүн гээд очих ямар ч нүүргүй. Алдарт уяач гэсэн цол гуншинтай заларсан ч чулуугаар шидүүлэх зүйлээ өөрийнхөө гараар хийлээ. Өвөрхангайчууд бүү хэл Монголын ард түмэнд адлагдаж амьдрах замаа тэр өөрөө ийнхүү сонгосон. Түүнд эдгээр зүйлээс илүүтэй архины бизнес үнэтэй байсныг л баталлаа. Д.Зоригтын хувьд "Г.Батхүү бид хоёр сонгуульд ялагдсан.

Тиймээс ялагдлаа хүлээх ёстой" гэж үзэж буйгаа тойруу замаар ч гэсэн илэрхийлээд байхад Г.Батхүү "Нэр дэвшиж байгаа хүмүүс нь ч, сонгогчид ч сонголтдоо хариуцлагатай ханддаг ийм цаг үе ирээд байна" гэж хэлсэн нь өвөрхангайчуудыг Г.Батхүү гэдэг хүнд санал өгсөнгүй хэмээн уурссанаас ялгаагүй сонсогдоно.

Цааш нь хэлэхдээ "Ер нь гишүүний бүрэн эрхийг баталгаажуулах асуудал АН-д суудал нэмэх, магадгүй Г.Батхүү УИХын гишүүн болохоос огт өөр асуудал. Энэ бол ард түмний сонголт, төлөөлөл жинхэнэ утгаараа УИХд орж ирж тусдаг, тэр сонголтын үр дүнд УИХын гишүүн сонгогддог, луйвраар авсан 6000 санал хүчингүй болдог шударга нийгэм бий болж байгааг харуулж байна" хэмээн тэс өөр зүйл тойруулж ярьсан нь дээрх хариултаас ил харагдаж байна.

Угтаа бол С.Чинзоригийн илүү авсан 4500 санал, Н.Төмөрхүүгийн илүү авсан 1500 саналыг нэгтгэж яриад байгаа нь бүр ч инээдтэй. Зөвхөн энэ хоёр эрхмийн яриаг дүгнэж харахад Г.Батхүү ямар сул дорой, өөртөө итгэлгүй яваа нь илт мэдрэгдэнэ.

Харин Д.Зоригтын хувьд бардам, ам дүүрэн хариулт өгчээ. Юутай ч Монголын архи үйлдвэрлэгчдийн тэргүүн магнай Г.Батхүү хууль бусаар УИХ-ын гишүүний суудалд заларсан нь шүүх эрх мэдлийн байгууллага ямар болсныг харуулсан хэрэг. Тэр тусмаа хууль тогтоох дээд байгууллага, төрийн эрх баригчид, Ерөнхийлөгчөөсөө эхлээд улстөрийн захиалгаар ажлаа хийдэг болсныг гэрчилсэн хэрэг боллоо.

Жич: Бид дараа дараагийн дугаартаа энэхүү хууль бус үйлдэл болон хахуульд идэгдсэн шүүх эрх мэдлийн байгууллагынхны талаар ноцтой баримтууд дэлгэх болно.

С.УУГАНБАЯР

Энд ”АПУ”-ийн Г.Батхүү ялалтын хундага тулгаж, тэнд Өвөрхангайчууд цурхирч байна
Tweet
Bolod.mn