Барилгын материалын үйлдвэрлэлийг дэмжих хөтөлбөрийг баталлаа

2012-12-15

Монгол Улсын Засгийн газрын 71 дүгээр хуралдаан болж 20 гаруй асуудал хэлэлцэн шийдвэр гаргалаа.

Барилгын материал үйлдвэрлэлийн хөгжил нь барилгажилтаас хоцорч байгаагаас нийт хэрэгцээний 60 гаруй хувийг импортоор авдаг. 2010-2011 онд л гэхэд импортын барилгын материал, тоног төхөөрөмжид 500 гаруй сая ам.доллар зарцуулжээ. Иймээс импортыг орлуулах нэмүү өртөг шингэсэн барилгын материалын үйлдвэрлэлийг дэмжих шаардлагатай гэж Шинэчлэлийн Засгийн газар үзэж байна.

Засгийн газрын 2012-2016 оны үйл ажиллагааны хөтөлбөрт барилгын материалыг эх орондоо үйлдвэрлэдэг болох зорилт дэвшүүлж, цемент, төмөр хийц, шил, дулаалгын материалаар дотоодын үйлдвэрлэлийнхээ хэрэгцээг хангах зорилт тавьсан. Энэ зорилтыг хэрэгжүүлэх үндэс болсон Барилгын материалын үйлдвэрлэлийг дэмжих хөтөлбөрийг Засгийн газрын өнөөдрийн хуралдаанаар баталлаа.

“Шинэ бүтээн байгуулалт” дунд хугацааны зорилтод хөтөлбөрийн хүрээнд “Шинэ Улаанбаатар” төслөөр орон сууцны иж бүрэн 17 хороолол, гэр хорооллыг барилгажуулах, ашиглалтын шаардлага хангахгүй болсон орон сууцыг дахин төлөвлөх төслүүд, аймагт бүрт барих 1000 айлын орон сууц, төмөр зам, хатуу хучилттай автозамын төслүүд, Хөшигтийн хөндийн олон улсын нисэх онгоцны буудлыг түшиглэн байгуулах 100 мянган оршин суугчтай суурин, усан болон дулааны цахилгаан станц зэрэг Шинэчлэлийн Засгийн газрын үйл ажиллагааны хөтөлбөрт туссан бүтээн байгуулалтын барилга байгууламжийн ажлуудыг гүйцэтгэхэд шаардагдах барилгын материалыг эх орондоо үйлдвэрлэх, үндэсний үйлдвэрлэгчдийг дэмжих зорилгоор энэхүү хөтөлбөрийг боловсруулсан байна.

Хөтөлбөр хэрэгжсэнээр 2016 он гэхэд Монгол Улс барилгын материалынхаа 70-аас дээш хувийг үндэсний үйлдвэрлэлээрээ хангах боломжтой болно гэж Засгийн газар үзэж байна.

Болзошгүй хүндрэлийн эсрэг дараах арга хэмжээг авна

Санхүү, эдийн засгийн болзошгүй хүндрэлийн эсрэг авах зарим арга хэмжээний төлөвлөгөөг баталж, дараах арга хэмжээг авахаар шийдвэрлэжээ.

Гадаад валютын эх үүсвэрийг нэмж, дотоодын мөнгөний хомсдолыг арилгах арга хэмжээ авна. Ингэснээр экспорт, гадаадын шууд хөрөнгө оруулалт, төсвийн орлогын уналтаас шалтгаалан дотоодын зах зээлд үүссэн цоорхой нөхөгдөж, эдийн засгийн өсөлтийн эрч удаашралгүй, хямралыг хохирол багатай даван туулах боломжтой болно гэж үзэж байна.

Мөн гадаад валютын шинэ эх үүсвэрийг дотоодын санхүүгийн системд эргэлтэд оруулж, инфляцид нөлөөлөхгүй хэмжээний төгрөгийн эх үүсвэрийг Төв банкнаас эдийн засагт нийлүүлэх, гадаад эх үүсвэрүүдээс босгосон валютын эх үүсвэрийг нэн даруй дотоодын санхүүгийн системд эргэлтэд оруулах, эдийн засгийн тэргүүлэх ач холбогдол бүхий төслүүдэд хөрөнгө оруулах зэрэг арга хэмжээ авах юм байна.

Үүний үр дүнд дотоодын санхүүгийн системд валютын нийлүүлэлт нэмэгдэнэ, санхүүгийн эх үүсвэргүй гацаад байгаа төслүүд хэрэгжиж эхэлнэ, ажлын байр нэмэгдэнэ, арилжааны банкны зээлийн хүү буурна, эдийн засаг эрчимжиж иргэд аж ахуйн нэгжүүд хөрөнгө оруулалтын илүү урт хугацааны хямд эх үүсвэртэй болно гэж үзэж байна.

Санхүү, эдийн засгийн болзошгүй хүндрэлийн эсрэг авах зарим арга хэмжээний хүрээнд шаардлагатай хууль тогтоомжийн төслийг холбогдох төрийн захиргааны төв байгууллагатай хамтран боловсруулах, энэхүү төлөвлөгөөг хэрэгжүүлэх ажлыг зохион байгуулах арга хэмжээ авч ажиллахыг Эдийн засгийн хөгжлийн сайд Н.Батбаярт даалгалаа.

Далайд гарцгүй хөгжиж байгаа орнуудын олон улсын судалгааны төв байгуулна

Улаанбаатар дахь далайд гарцгүй хөгжиж байгаа орнуудын олон улсын судалгааны төвд хандив өгөх тухай асуудлыг хэлэлцээд ирэх оны улсын төсөвт тодотгол хийх үеэр уг зардлыг тусгуулах арга хэмжээ авахыг Гадаад харилцаа болон Сангийн сайдад даалгалаа. Далайд гарцгүй хөгжиж буй 31 орон байдаг. Тээврийн өртөг өндөр, үүнээс үүдэлтэй өрсөлдөх чадвар сул, гадаад худалдааны эргэлт бага, экспортын барааны нэр төрөл цөөн, дэд бүтэц муу хөгжсөн зэрэг харилцан холбоо бүхий саад тотгор нэлээдгүй байдаг учраас эдгээр улс орны ихэнх нь буурай хөгжилтэй байдаг.

Далайд гарцгүй орнуудын олон улсын судалгааны төв байгуулан, дэлхийн нэртэй эрдэмтэд, эдийн засагчдын оюуны чадамжийг төвлөрүүлэн ажиллах санаачилгыг манай улс анх 2006 онд гаргаж байсан бөгөөд энэ төвийг Улаанбаатар хотноо байгуулах юм. Уг төвийг Улаанбаатарт байгуулах нь манай орны эдийн засаг, нийгмийн хөгжилд тустайн дээр манай улсад үйл ажиллагаагаа явуулах олон улсын Засгийн газар хоорондын анхны байгууллага болно.

Товч мэдээ

· Байгаль орчин, ногоон хөгжлийн сайдын эрхлэх асуудлын хүрээнд үйл ажиллага явуулах Уур амьсгалын өөрчлөлтийн ажлын албаны орон тооны дээд хязгаарыг 7, Монголын амьтан, ургамлыг хамгаалах үндэсний хорооны ажлын албаныхыг 3, Хөрс хамгаалах, цөлжилттэй тэмцэх болон Биоаюулгүй байдлыг хангах үндэсний хорооны ажлын албаны орон тооны дээд хязгаарыг тус бүр 1 байхаар тус тус тогтоолоо.

· Монгол Улсын Ерөнхийлөгчийн санаачлан боловсруулсан Монгол Улсын шүүхийн тухай, Шүүгчийн эрх зүйн байдлын тухай, Шүүхийн захиргааны тухай , Хуульчийн эрх зүйн байдлын тухай, Шүүхийн иргэдийн төлөөлөгчийн эрх зүйн байдлын тухай, Эвлэрүүлэн зуучлалын тухай хуульд нэмэлт, өөрчлөлт оруулах тухай хуулийн төслүүд болон Шүүхийн багц хуулийг дагаж мөрдөх журмын тухай хуулийн төслийг хэлэлцээд зарчмын хувьд дэмжлээ.

· УИХ-ын гишүүн Ш.Түвдэндорж нарын санаачлан боловсруулсан Шүүх байгуулах тухай хуулийн шинэчилсэн найруулгын төсөл, “Шүүгчийн орон тоо батлах тухай” УИХ-ын тогтоолын төслийг хэлэлцээд зарчмын хувьд дэмжсэн саналыг төсөл санаачлагчдад нь уламжлахаар тогтлоо.

· Олон улсын хэмжээнд хэмжлийн үнэн зөв, нэгдмэл байдлыг хангах асуудлыг авч хэлэлцэж, мэргэжлийн шийдвэр гаргах чиг үүрэг бүхий олон улсын Засгийн газар хоорондын байгуулллага-Жин ба Хэмжүүрийн Ерөнхий бага хуралд Монгол Улс сурвалжлагч гишүүнээр элсэх нь зүйтэй гэж үзэж, тус байгууллагад элсэх хүсэлтийг албан ёсоор уламжлан шийдвэрлүүлэхийг Монгол Улсын Шадар сайд Д.Тэрбишдагва, Гадаад харилцааны сайд Л.Болд нарт даалгалаа.

· Монгол Улсаас ОХУ-ын Эрхүү хотод Базаргарьдын Болд, Улаан-Үдэд Цэрэндоржийн Ганболд, БНХАУ-ын Хөххотод Баттөмөрийн Бямбадорж, Гонконгт Цогсүрэнгийн Ганболд, Япон улсын Осака хотод Чонойн Куланда нарыг эдгээр хотод суух ерөнхий консулаар тус тус томиллоо.

· Монгол Улсын Засгийн газар ба Япон Улсын Засгийн газар хооронд байгуулах “Нүүрстөрөгч багатай хөгжлийн түншлэл” тогтоох тухай баримт бичигт гарын үсэг зурах бүрэн эрхийг Байгаль орчин, ногоон хөгжлийн сайд С.Оюунд олголоо.

· Газрын тосны газрын дэд даргаар ажиллаж байсан Г.Өлзийбүрэнг тус газрын даргын үүргийг түр орлон гүйцэтгэгчээр томиллоо.