Энэ удаагийн чуулганаар шинэ Ерөнхийлөгчөө сонгоно. Тэгвэл энэ удаад МҮОХ-ны одоогийн ерөнхийлөгч, Эрүүлийг хамгаалахын гавьяат ажилтан, анагаах ухааны доктор Д.Загдсүрэн, МҮОХ-ны дэд ерөнхийлөгч, Монголын оюутны спортын холбооны ерөнхийлөгч, Олон улсын оюутны спортын холбооны Гүйцэтгэх зөвлөлийн гишүүн, ерөнхий санхүүч Д.Баясгалан, Монголын жүдо бөхийн холбооны дэд ерөнхийлөгч, Монгол Улсын ерөнхий прокурор Д.Дорлигжав нар нэрээ дэвшүүлээд байгаа.

Тэгвэл чуулган болоод МҮОХ-ны шинэ Ерөнхийлөгч сонгохын өмнө Монгол Улсын гавьяат тамирчин, “Барселон-92” олимпийн наадмын хүрэл медальт, Ази тивийн хошой аварга, Олимпийн боксын холбооны дэд ерөнхийлөгч Н.Баярсайхантай ярилцлаа.

-МҮОХ-ны ээлжит чуулган маргааш болно. Энэ хурлаар Олимпийн хорооны Ерөнхийлөгчийн сонгууль болох юм билээ. Чуулганы өмнө та санал бодлоо илэрхийлээч?
-МҮОХ-ны Ерөнхийлөгчийн сонгууль болох гэж байна. Би үүнийг дэмжиж байгаа. Шинэ хүн сонгогдоосой гэж хүсч байна. Энэ сонгуульд Д.Загдсүрэн даргаас гадна “Голомт” банкны захирал Д.Баясгалан, Ерөнхий прокурор Д.Дорлигжав хоёр өрсөлдөж байгаа юм. Энэ хоёр хүний аль нь ч ялсан бай хамаагүй. Би хувь хүнийхээ үүднээс, олимпийн медальтнуудынхаа өмнөөс энэ хүмүүсийг дэмжиж байгаа. Д.Загдсүрэн дарга бид хоёр нэг нутгийн хүмүүс, олон жил хамтарч ажилласан. Гэхдээ аливаа зүйлд цаг хугацаа, ээлж дараа гэж бий. Бид ямар Хойд Солонгосын жишгээр явж байгаа биш дээ. Д.Загдсүрэн дарга бүхэл бүтэн 20 жил олимпийн хороог тэргүүллээ. Сайн муу олон ч ажил хийлээ.

Одоо зайгаа тавьж өгөөд, Олимпийн хороонд шинэчлэлийн уур амьсгал ороосой гэж хүсч байна. Ялангуяа гадаад дотоодын олон компаниас тамирчдаа дэмжих зорилгоор асар их хэмжээний мөнгө өгсөн. Энэ мөнгийг яаж зарцуулсан, юунд зориулсан нь тодорхой биш байгаа. Тиймээс шинэчлэл хэрэгтэй болсон гэж үзээд байгаа юм.

-Шинэчлэл хэрэгтэй ч гэсэн ажлаа хийж чаддаг, спортод элэгтэй хүн сонгогдвол сайн. Тамирчид ч тэгж хүсч байгаагаа илэрхийлж байгаа шүү дээ?
-Надад хэн нь ч байсан хамаагүй. Энэ албан тушаалын төлөө хэн ч өрсөлдөж болно шүү дээ. МҮОХ-ны дарга гэдэг тийм айхтар хүнд, хүн хийж чадахгүй ажил биш. Хэн ч хийж чадна. Тийм учраас шинэ хүн сонгогдвол хамтарч ажиллахад бэлэн байна.

-Спортын төлөө цохилох зүрхтэй, энэ салбарын хүн өрсөлдөөд, сонгогдсон нь дээр байсан юм биш үү?
-Мэдээж хэрэг тийм. Гэхдээ спорт гэдэг чинь бүх нийтийн зүйл шүү дээ. Жишээ нь, Английн премьер лигийн “Челси” багийг дэмждэг фанат Монголд олон байгаа. Түүн шиг хэн ч Олимпийн хорооны ажлыг хийж чадна. Хамгийн гол нь хийхдээ спортын төлөө сэтгэлтэй, Монголын тамирчдын эрх ашгийг хамгаалсан, тэдний эрх ашигт нийцэж ажиллавал болох нь тэр. Тийм учраас тэр байх байсан юм, энэ нь чадахгүй байх гэх хэрэг байхгүй. Гэхдээ шинэчлэл хийх шаардлага байгаа. Би Д.Баясгалан, Д.Дорлигжав гэдэг хоёр хүний хэн нь ч сонгогдсон тийм сэтгэл, зүтгэл гаргах байх гэж итгэж байна.

-Олимпийн хорооны Ерөнхийлөгч сонгох сонгууль гэж нэг үйл ажиллагаа болно. Энэ үйл ажиллагаа ямар зарчмаар явагддаг юм бол. Нэг хүн 20 жил Олимпийн хороог удирдсан гэхээр сонирхолтой санагдаад байна?
-Яагаад Д.Загдсүрэн дарга 20 жил Хойд Солонгосын Ерөнхийлөгч шиг Монголын олимпийн хороог удирдсан бэ гэдгийн учир нь ердөө сонгуулийн зарчимдаа л байгаа юм. Гол зангилаа нь энэ. 21 аймаг, хотын дүүргүүдэд Олимпийн өөрсдөө хүн томилдог. Жишээлбэл, Сүхбаатар дүүрэг байлаа гэхэд тэнд дүүрэг хариуцсан Олимпийн зөвлөл байгуулдаг. Гэх мэтээр ажиллаж байгаа юм. Тэр хүмүүс буцаад Олимпийн хорооныхныг дэмждэг. Өмнө нь олон хүн Д.Загдсүрэн даргатай өрсөлдөж байсан. Ерөөсөө ялж үзээгүй. Яагаад гэвэл дандаа өөрсдийнхөө хүмүүсийг энд тэнд тавьж, тэд нь буцаад томилж байгаа нөхдүүдээ дэмждэг зарчимтай. Энэ нь өөрөө ардчилсан зарчим биш. Тийм учраас би энэ удаагийн сонгууль ардчиллын зарчимд оруулаасай гэж бодож байна. Өөрөөр хэлбэл, спортын холбоодууд, спортын өндөр амжилт гаргасан тамирчид, ахмадууд гээд бүх хүнийг орууцуулаад, санал хураамаар байна. Тэгэхгүй бол хайрцагласан, танил талаа оруулсан хурал хийж, сонгууль явуулаад 20 жил боллоо шүү дээ. Би тэр хуралд нь олон удаа сууж үзсэн. Яаж ч Д.Загдсүрэн даргыг шүүмжлээд, алдаа дутагдлыг нь хэлээд нэмэр болдоггүй.

-Энэ удаагийн хурал яг тийм жишгээр болох юм биш биз дээ?
-Тийм зүйл болохыг үгүйсгэх аргагүй. Би маргааш болох хуралд оролцож чадахгүй болчихоод байна. Тийм учраас би сонин, хэвлэлээр өөрийнхөө үзэл бодлыг илэрхийлж байгаа юм. Өмнө нь ч илэрхийлж л байсан. Одоо ч илэрхийлнэ. Би ИТХ-ын гишүүнээр сонгогдсон. Маргааш төсөв хэлэлцэх юм. Тэгэхээр Олимпийн хорооны хуралд оролцох чадахгүй. Тэгэхээр санаа бодлоо сониноор дамжуулж илэрхийлэхээс өөр арга алга.

-Энэ удаагийн хуралд оролцоод, саналаа өгөх тамирчид, спортын хороодын удирдлагууд байгаа юм болов уу?
-Бараг л байхгүй дээ. Миний түрүүний хэлсэн гар хөл болсон хүмүүс ороод, саналаа өгөөд явчихдаг байхгүй юу. Хэн ч орж өрсөлдсөн ялахад бэрх нөхцөл байдал үүсчихээд байна. Бүр тодорхой хэлбэл, би олимпийн хорооны гишүүн байлаа гэхэд тухайн аймаг, дүүрэгт олимпийн хорооны гишүүнээр сонгогдоход өрсөлдөөн явагддагүй. Шууд томилчихдог. Тэр нь хуралдаа орж ирээд, Д.Загдсүрэнгээ сонгочихдог. Тэндээ ардчилалтай болоод, ардчилсан зарчмаар явбал ажил огт өөрөөр явна. Тэгэхгүй Сүхбаатар дүүргийг тэр, Хан-Уулыг энэ хариуцана гээд томилчихоор ямар ч нэмэргүй шүү дээ. Тэр хүмүүс нь Д.Загдсүрэн даргадаа үнэнч гэж жигтэйхэн. Одоо бүр хязгааргүйгээр Ерөнхийлөгч болж болно гэсэн асуудал оруулаад байгаа. Үхэн үхтэлээ тэнд байх гээд байгаа юм уу, хаашаа юм. Би ойлгохгүй байна.

-Д.Загдсүрэн даргатай холбоотой асуудлууд ар араасаа цуварч гарсаар байгаа шүү дээ. Та ч энэ талаар ярьж л байсан?
-МҮОХ гэдэг Монголын тамирчдын нийгмийн асуудлыг шийдэж ажиллах, спортыг хөгжүүлэхийн төлөө ажиллах ёстой байгууллага. Олон улсын олимпийн хорооноос асар их хэмжээний тусламж ирж байна. Азийн олимпийн хорооноос тусламж ирж байгаа. Тэр бүгд нь эзэндээ хүрдэггүй. Санхүүгийн зөрчил маш их байдаг. МҮОХ-ны алтан түнш гэгдэх олон байгууллага, компани асар их хэмжээний тусламж өгч байна. Тэр мөнгийг хаана, юунд зарцуулагдаж байгаа нь тодорхойгүй. Олимпийн хорооноос мөнгө гаргаад байгаа юм уу, Засгийн газраас гаргасан уу, юунд зарцуулж байгаа нь ч мэдэгддэггүй. Спортынхон өнөөдөр хоёр байгууллагын дунд яахаа мэдэхгүй л явна. Гэр бүлээр ярьвал хойт, урд аав, ээжтэй юм шиг л байгаа. Аль байгууллагад хандахаа мэдэхгүй л явж байна. Энэ бүгдийгээ засаасай, орж ирж байгаа мөнгө төгрөг, тусламжаа юунд зарцуулснаа тайлагнадаг байгаасай гэж хүсч, шинэ удирдлагатай болохыг дэмжиж байгаа юм, би.

Өнөөдөр “Улаан загалмай” нийгэмлэг, МҮОХ хоёрт гадаад, дотоодын асар их тусламж орж ирдэг. Гэтэл тэр их мөнгийг юунд зарцуулаад байгаа нь мэдэгдэхгүй, өөрсдөө баяжаад байна гэж би хувьдаа хардаад байгаа юм. Б и нэг жишээ хэлье. Олон улсын олимпийн хорооноос манай дөрвөн боксчинд олимпийн эрх авсных нь төлөө мөнгө өгч байгаа юм. Өөрөөр хэлбэл, “Та олимпийн эрх авлаа. Энэ мөнгийг танай олимпийн хороогоор дамжуулаад өгье. Энэ мөнгийг өөртөө зарцуулж, бэлтгэл сургуулилтдаа зориулаарай” гэж өгдөг. Би Лондонд очоод Боксын холбооны тэргүүн Ерөнхийлөгч дарга Бат-Энхээс “Олимпийн хорооноос мөнгө өгсөн гэж байна. Манай дөрвөн тамирчинд өгсөн юм уу” гэж асуусан. Гэтэл олимпийн хорооноос нэг ч төгрөг аваагүй гэж хэлж байгаа. Гэтэл жүдогийнхонд өгсөн байсан. Ингээд бодохоор манай дөрөвт өгсөн мөнгийг юунд ашигласан нь тодорхой биш. Өөрсдөө авсан юм уу, хэдэн ам.доллар өгсөн юм бүү мэд. Иймэрхүү асуудал маш их гардаг. Энэ бол зүгээр нэг жишээ. Хууль хяналтын байгууллага гэж байдаг бол энэ асуудлыг шалгаад шийдэх хэрэгтэй.

Н.Болд