Монгол улс 2014 онд тоон системийн өргөн нэвтрүүлэгт шилжинэ

2012-12-25

Мэдээллийн технологи, шуудан харилцаа холбооны газар шинэчлэлийн Засгийн газрын бодлогын хүрээнд Мэдээллийн

технологи шуудан харилцаа холбооны салбарт 2012 онд есөн том ажил хийжээ.

Нэгд, Монгол Улсын Мянганы хөгжлийн зорилтод суурилсан Үндэсний хөгжлийн цогц бодлого, Засгийн газрын 2012 -2016 оны үйл ажиллагааны хөтөлбөрийг хэрэгжүүлэх ажлын хүрээнд “Монгол Улсын Үндэсний хиймэл дагуул” хөтөлбөрийг батлууллаа. Уг хөтөлбөрт сансрын болон тандан судалгааны хиймэл дагуулыг 2016 он гэхэд хөөргөх том зорилтыг тусгаад байна. Энэ нь сансрын технологийг хөгжүүлэн, хэрэглээг нутагшуулж, улс орны бүхий л салбарт өргөн хүрээтэй ашиглах боломж бүрдүүлэх, үндэсний аюулгүй байдлыг бэхжүүлэх, нийгэм, эдийн засгийн өсөлтийг дэмжих, Монгол Улсын нутаг дэвсгэрийг бүрэн хамарсан тандан судалгааны мэдээгээр хангах тогтвортой эх үүсвэрийг бий болгох, өргөн уудам нутаг дэвсгэрт тархан суурьшсан өрх бүрт цаашлаад иргэн бүрт харилцаа холбооны бүхий л төрлийн үйлчилгээг орон зайнаас үл хамааран хүргэнэ.

Хоёрт, “Мэдээлэл холбооны үндсэн сүлжээний өргөтгөл, шинэчлэл” төслийн хүрээнд энэ онд 6652 км шилэн кабель татаж нийт 133 аймаг, сумдад тоног төхөөрөмжийг шинээр суурилуулсан. Одоогийн байдлаар 21 аймаг, 160 сум сууринд нийт 19257 км шилэн кабелийн сүлжээтэй болсон.

Гуравт, интернэтийн үнийг гурав дахин хямдруулж, хурдыг нь хоёр дахин нэмэгдүүлэх талаар Засгийн газрын шийдвэр гарсан. Үүний үр дүнд цахим үйлчилгээний хувьд хот, хөдөөгийн ялгаа арилж, орон нутагт мэдлэг тулгуурласан чиг баримжаа бүхий ажлын байрууд шинээр бий болох, түгжрэлгүй төрийн цахим үйлчилгээнүүдийг иргэд байршлаасаа үл хамааран цаг алдалгүй, түргэн шуурхай хүртэх боломж нээгдлээ.

Дөрөвт, хөдөө орон нутагт хэрэглэгчийн интернэтийн доод хурдыг 300 к бит/ сек, үнэ тарифыг 17600 төгрөг болголоо. Мөн утасгүй интернэтийн/ WI-FI / үйлчилгээг 38 суманд тус компанийн хөрөнгө оруулалтаар УБ хот, 14 суманд интернэт, суурин утасны хосолмол үйлчилгээг нэвтрүүлсэн.

Тавдугаарт: Төрийн байгууллагын цахим мэдээллийн санг ҮДТ-д шилжүүлэн байршуулж, үйлчилгээг үнэ төлбөргүй явуулж эхэлсэн. Ингэхдээ домэйн нэрийн үйлчилгээ, цахим хуудас, цахим шуудан байршуулах үйлчилгээ, сервер, мэдээллийн технологийн тоног төхөөрөмжийг зориулалтын серверийн өрөөнд байршуулах үйлчилгээг төрийн байгууллагуудад үнэ төлбөргүй үзүүлнэ.

Зургаад, мэргэжлийн боловсон хүчнийг өндөр түвшинд бэлтгэх, ажлын байрыг нэмэгдүүлэх ажлыг амжилттай гүйцэтгэлээ. Долоод, тоон системийн өргөн нэвтрүүлэгт Монгол Улс,2014 онд бүрэн шилжих бөгөөд туршилтын ажлыг аль хэдийн амжилттай эхлээд байна.

Наймд, олон улсын түвшинд хүрсэн шуудангийн үйлчилгээтэй болохын тулд гадаад харилцаанаас эхлүүлсэн. Есд, Монгол Улс-БНХАУ хооронд шуудангийн салбарт хамтран ажиллах тухай санамж бичигт гарын үсэг зурсан. Мөн “Монгол шуудан” ТӨК нь шуудангийн зах зээлд Бизнес захидал буюу бизнесийн аж ахуйн нэгж байгууллагуудын дугтуйлж, хаягалсан сурталчилгааг хаягаар хүргэх үйлчилгээг шинээр нэвтрүүлсэн. Шуудангийн бүртгэл, хяналтын системийг нэвтрүүлж, шуудангийн технологид шинэчлэлт хийсний үр дүнд хэрэглэгч өөрөө шуудангаа хянадаг болсон. ХХЗХ нь зохицуулалтын эрх зүйн орчныг шинэчлэх, зохицуулалтын үйл ажиллагааны хэрэгжилт, үр дүнг сайжруулах, шинэ шатанд гаргах чиглэлээр сүүлийн үед идэвхитэй ажиллаж байна. Үүнд шинэчилсэн Засгийн Газраас санаачлан хэрэгжүүлж буй Аж ахуйн үйл ажиллагааны тусгай зөвшөөрлийн тогтолцоог шинэчлэх арга хэмжээний хүрээнд харилцаа тусгай зөвшөөрлийн олголт, түүнтэй холбогдох асуудлаар судалгаа хийж, дүгнэлт санал боловсруулан Засгийн газарт хүргүүлэн ажиллаж байна. УИХ-ын сонгуулийн тухай хуулийн хэрэгжилтийг хангах зорилгоор телевиз, радиогоор явуулсан сонгуулийн сурталчилгаанд дүн шинжилгээ хяналт, шалгалт хийж УИХ-ын Сонгуулийн тухай хуулийг зөрчсөн арилжааны телевизэд хууль тогтоомжийн дагуу торгууль оногдуулж, хариуцлага тооцсон.

Оюуны өмчийн газар, Шударга өрсөлдөөн Хэрэглэгчийн төлөө газартай хамтран оюуны өмч, зохиогчийн эрхийн тухай холбогдох хууль тогтоомжууд болон Өрсөлдөөний тухай хуулийг зөрчсөн 17 вэб сайтын Монгол Улсаас хандах хандалтыг зогсоох арга хэмжээ авсан гээд энэ бүх ажлыг богино хугацаанд амжилттай хэрэгжүүлсний гол түлхүүрийг орон тооны бүтцээс гадна орон тооны бус мэргэжлийн зөвлөлүүдийг ажиллуулсан явдал гэж үзэж байна.