Өнөөгийн телевизийн нэвтрүүлгүүд хүүхдийн оюун ухаан, хэл ярианы хөгжилд сөргөөр нөлөөлж байна

2012-12-27

Яагаад зарим хүүхдүүд зогсоо зайгүй ярьж чалчиж байхад бусад нь үг

дуу цөөнтэй, бүрэг хүүхэд болж өсөж байгаа тухай та урьд нь бодож байсан уу ?
Багад нь эцэг эх нь өдөр бүр үлгэр ярьж өгч, ном их уншиж өгдөг байсан хүүхдүүд хожим уран цэцэн үг яриатай хүн болж төлөвшдөг бол өдөржин телевизорын дэлгэцний өмнө сууж өнгөрүүлж байсан хүүхдүүд хожим нэг үг хэлүүлэхэд ч хэцүү мохоо хүн болдог байна.
Энэ бол телевизор их үздэг хүүхдийн оюун ухаан, хэл ярианы хөгжил нь сааталд орсон байна гэсэн үг юм.

Нэгэнт ийм болж өссөн хүүхдүүдийг чанга дуугаар ном уншуулах, нэг зүйлийн тухай бодол санааг нь яриулах зэргээр хэл ярианы хөгжил, оюун ухааны саатлыг нь бага багаар засаж болох боловч энэ бол өнөөгийн айл бүрт тохиолдож байгаа бодит том асуудал – аюул занал юм. Сүүлийн үеийн судалгаагаар бага насны хүүхэд телевизор эсвэл компьютероос бус харин амьд хүмүүсийн хэлж ярьж, үзүүлж байгааг (өөр бусад олон зүйлийг) хамаагүй илүү ойлгож, хүлээн авдаг болохыг судалгаагаар тогтоосон байна. Өнөөдөр олон айлд “завгүй” эцэг эхийн байдлаас болж ихэнх хүүхэд сургууль дээр хичээллэж байгаа цагтайгаа бараг тэнцүү хугацаагаар телевизорын өмнө цагаа өнгөрөөж байна. Хүүхэд телевизороор гарч бүх зүйлийг шууд үзээд суухгүй ч гэсэн зүгээр л телевизор нь залгаатай байхад л үзүүлж байдаг бүх сөрөг нөлөөллийг хангалттай тусгаж авдаг. Хүүхдийн эмч нар, хүүхдийн хөгжлийг судлаач-эрдэмтэд бяцхан иргэд өдөрт 2-оос илүү цагаар телевизорын өмнө эсвэл интернетэд суух нь тэдний оюуны болон хэл ярианы хөгжилд маш муугаар нөлөөлж байна гэдэг дээр бүрэн санал нэгтэй болсон юм. Үүний хожмын сөрөг үр дагаврууд нь зарим нэг эцэг эхчүүдэд “санагдаж” байгаагаас нь хамаагүй их ноцтой илэрдэг болно.

Унтлагын өрөөндөө телевизортэй хүүхдүүд дэлгэцнээс цацардаг радио цацрагийн хортой нөлөөлөлд бусдаас илүү өртөж байдгийг эрдэмтэд судалгаа явуулж олж тогтоосон байна. Энэ зуршил нь хүүхдийн тархины зөв хөгжилд саад болдог ба өдөржингөө унтаа байдлын синдромтой, үдэш орой юм идэх хорхойтой болгож, илүүдэл жинтэй болоход ч нөлөөлдөг. Үүнээс гадна телевизорын донтой болсон хүүхдүүд гудамжинд гарч зугаалах дүргүй болдог ба бусад хүүхдүүдтэй тоглож, хүн нийгэмтэй харилцах дадлага туршлага суудаггүй байна.

Иймээс эцэг эхчүүд та бүхэн хүүхдэдээ телевиз үзүүлэхийн оронд үнэн, зөв, сайн номууд уншиж өгч, хоорондоо ярилцаж, дуулж хөгжимдөж, гэр бүлээрээ хөөрч баярлаж байх хэрэгтэй юм.

Бичсэн Enkhtuya

WWW.BOLOD.MN