З.Энхболдын ангийнхан нэг л хойрго. Гишүүд нь үндсэн ажлаа ч хийхээ больж, “гудамж метр”-лэх болсон дог уу, үзэгдэхээ болив. Өнгөрсөн долоо хоногт л гэхэд чуулганы хуралдаан ирц хүрээгүй шалтгаанаар цуцлагдаж, долоо хоногоор хойшиллоо. Гишүүд төрийн ажлаа ийн цалгардуулж, дур зоргоороо авирлах зуур орон нутагт өвөлжилт хүндэрч, байдал эвгүйтсэн талаар Ерөнхий сайд мэдээлэл хийв.

15 аймагт өвөлжилт хүндэрлээ

Гүйцэтгэх засаглалын тэргүүний хэлж байгаагаар манай орны нийт нутгийн 80 орчим хувьд цастай, 15 аймгийн 55 суманд 20-60 см зузаан, хунгарлаж шуурсан газраа 130 см хүртэл нягтаршжээ. Өвөлжилт хүндэрсэн 55 сумын 27189 малчин өрхөд 5.5 сая мал өвөлжиж буй. Цаашид цас нэмж орж хүйтэрвэл 17 аймгийн 91 суманд өвөлжилт хүндэрч болзошгүй гэнэ.

Цасанд боогдсон автозам, давааны цасыг цэвэрлэж зайлуулах, хальтиргаа гулгааг арилгах үүрэгтэй Шуурхай ажлын хэсэг 24 цагийн хугацаатай ажиллаж байгаа бөгөөд Засгийн газрын хуралдаанаар уг ажилд тэрбум гаруй төгрөг зарцуулах шийдвэр гаргажээ. Түүнчлэн эрчим хүчний хүчин чадал хүрэлцэхгүй байснаас зарим үед цахилгааны хязгаарлалт хийж байсан ч шаардлагатай арга хэмжээг авч IV цахилгаан станцын хүчин чадлыг нэмэгдүүлж, дэд станцуудыг сэлбэн сайжруулснаар дээрх бэрхшээлийг гэдгийг ч тэрбээр танилцуулгадаа дурьдлаа.

Дээрх мэдээлэлтэй холбогдуулан өвөлжилт хүндэрсэн аймгийн малчдад тусламж үзүүлэх уриалга гаргаж, өмнөх сарын 21-ний дуулианаар цуглуулсан лаа, шүдэнзийг бөөгнүүлж, малчдад хүргэх хэрэгтэй хэмээн гишүүд саналаа илэрхийлсэн юм. Мөн өвс тэжээлийн үнийг хямдруулж борлуулах боломж бий эсэхийг ч лавлаж байлаа.

Ерөнхий сайд өвөлжилт хүндэрсэн аймгуудад өвс тэжээлийг хэрхэн хүргэх талаар Засгийн газрын хуралдаанаар ярилцаж, шийдвэрлэх болно хэмээн ам гарсан. Түүнчлэн Орон нутгийн сонгууль дуусч, дүн нь гарсан ч шүүхийн маргаантай хэд хэдэн газар бийг энэ үеэр онцолсон. Өнөөдрийн байдлаар 15 аймгийн Засаг даргыг томилоод байгаа аж. Үлдсэн зургаан аймагт хууль, шүүхийн маргаантай асуудлууд бий учир нягтлан шалгаад ойрын үед томилох болно гэж Засгийн газрын тэргүүн мэдэгдлээ.

Засгийн газар “ӨР”-нд ороогүй гэнэ

Мөн өдрийн Засгийн газрын цагаар “Чингис” бондын зориулалт, зарцуулалтын талаар мэдээлэл сонссон. Ерөнхий сайдын танилцуулснаар “Чингис” бондыг нийтийн эрх ашигт хамгийн их үр өгөөжтэй байх томоохон бүтээн байгуулалтуудын хөрөнгө оруулалтад зарцуулахаар төлөвлөж байгаа гэнэ. Харин бондын хүүгийн төлбөрт Засгийн газар өдөр тутам их мөнгө төлж, өрөнд орж байгаа гэдэг нь худал хэмээн няцаахаа мартсангүй.

Өөрөөр хэлбэл, гүйцэтгэх засаглалын тэргүүн Засгийн газар өрөнд орж, өтөнд идэгдээгүй хэмээн мэдэгдсэн юм. Энэ тухайгаа бондын хүүгийн алдагдлыг багасгахаар бондын эх үүсвэр зарцуулагдах хүртэлх санхүүгийн менежментийн гэрээг Монголбанктай хийсэн хэмээн тайлбарласан. Бондын эх үүсвэрийн зориулалт, зарцуулалтыг оновчтой, үр дүнтэй байлгахын тулд Ерөнхий сайдаар ахлуулсан бодлогын зөвлөл байгуулан ажиллаж буй.

Бодлогын зөвлөлөөс тэргүүн ээлжинд хэрэгжүүлж болохуйц төсөл, хөтөлбөрүүдийг тогтоосон. Эдгээрт 1800 км шинэ төмөр зам барих, 2013 онд зургаан аймгийн төвийг нийслэл хоттой хатуу хучилттай замаар холбох, нийслэлийн дундуур хөндлөн гарч буй төмөр замыг Богд уулын урдуур шинээр тавих, нефть боловсруулах үйлдвэр барих,

“Эрдэнэс Тавантолгой” болон “Багануур” ХК-д шаардлагатай хөрөнгө оруулалт хийх, цементийн хэрэглээг дотоодын үйлдвэрүүдээс 100 хувь хангадаг болох, төмөрлөгийн үйлдвэрийн цогцолбор барих, “Сайншанд” аж үйлдвэрийн парк байгуулах, Усан цахилгаан станц болон сэргээгдэх эрчим хүчний нөөц бололцоог түшиглэн цахилгаан станц барих гэхчлэн нэрлэж болох аж.

Тэргүүн ээлжинд хэрэгжүүлэхээр санал болгож буй дээрх төсөл тус бүрийг Бодлогын зөвлөл нарийвчлан авч хэлэлцэх юм байна.

Орон сууцны үнийг бууруулна

Эх үүсвэргүй, ард түмнээ мэхэлсэн өмнөх Засгийн газрын амлалт шинэчлэлийнхэнд чөдөр тушаа болж байгаа тухай Н.Алтанхуяг сайд Засгийн газрын дотоод үнэт цаасны үлдэгдлийн 2012 оны урьдчилсан гүйцэтгэлийн талаар танилцуулахдаа тодотголоо. Тодруулбал, “100 мянган айлын орон сууц” хөтөлбөрийг хэрэгжүүлэхэд хүндрэлтэй гэнэ.

Үүнээс болж шинэчлэлийн Засгийн газрын нуруун дээр асар их ачаалал, дарамт болж буйг Н.Алтанхуяг сайд онцлов. Учир нь Засгийн газрын дотоод үнэт цаасны өрийн үлдэгдлийн 70 орчим хувийг 2012 оны төсвийн алдагдал, тэр дундаа Хүний хөгжил санд зориулж гаргасан бондын үлдэгдэл эзэлж буй. Гэтэл үүнээс дутахгүй “100 мянган айлын орон сууц” хөтөлбөрийн хүрээнд гаргасан зургаан хувийн хүүтэй зээлийн хөтөлбөр Засгийн газарт том дарамт авчрах болсон гэнэ.

Эх үүсвэргүй, алсын хараагүй энэ шийдвэрээс болж 2000 орчим залуус хохирох болоод байгаа аж. Иймд цаашид дээрх хөтөлбөрийг үргэлжлүүлэхдээ бага, дунд орлоготой иргэддээ боломжийн метр квадраттай, үнэ хямдтай, зээлийн эргэн төлөлт нь иргэдийн нуруун дээр сар тутам бага дарамт үзүүлэх хэлбэрээр хэрэгжүүлэхээр төлөвлөж буйг Ерөнхий сайд танилцууллаа.

Мөн Шинэчлэлийн Засгийн газрын баримтлах нэг бодлого нь орон сууцны үнийг бууруулах хүрээнд квадратынх нь үнийг бууруулах аж. Тухайлбал, жилийн зургаан хувийн хүүтэй орон сууцыг нэг метр квадратыг нь 1.5 сая төгрөгөөр үнэлэн худалдан авах, жилийн 12 хувийн хүүтэй орон сууцыг нэг метр квадратыг нь нэг сая төгрөгөөр худалдан авах хоёр ялгаагүй. Тиймээс квадратын үнийг бууруулахад анхаарч ажиллах аж.

Түүнчлэн 150 тэрбум төгрөгийн бонд гаргасан 4000 айлын орон сууц хөтөлбөр эргэж төлөгдөөд хэвийн явагдаж байгаа бол Зоос банкны бүтцийн өөрчлөлтөд зориулж гаргасан 100 тэрбум төгрөгийн бонд 60 тэрбум төгрөгийн өрийн үлдэгдэлтэй гарчээ. Мөн ноос, ноолуурын салбар Жижиг, дунд үйлдвэрийг дэмжих санд зориулж гаргасан 286 тэрбумын бондын үлдэгдэл 200 орчим тэрбум төгрөг сангийн эргэлтэд зарцуулагдаж байна.

Өндөр настан, хөгжлийн бэрхшээлтэй иргэдэд сонгуулийн өмнө олгосон нэг сая төгрөгийг Монголбанкнаас зээл авч олгосон нь Хүний хөгжил санд өр болон үлдсэн гэхчлэн дурьдав.

Л.Нинж

Эх сурвалж: "Нийгмийн толь"