Монгол хүнд Үндсэн хуулиар олгогдсон эрх, эрх чөлөө, шударга ёс зөрчигдөж байгааг сануулж, айдас хүйдэс дагуулсан шинэ цагийн хэлмэгдүүлэлтийг зогсоохын төлөө ээжүүдийн өлсгөлөн үргэлжиж байна.

Манай сурвалжлах хэсэг өчигдөр 12.00 цагт МАХН-ын байранд өлсч буй долоо, Сүхбаатар дүүргийн эмнэлэгт эмчлүүлж буй таван эмэгтэйтэй уулзсан юм. Дүүргүүдийн эмэгтэйчүүдийн байгууллагаас өлсгөлөн зарласан ээжүүдийг эргэж тойрч, үүдэнд нь ээлжээр жижүүрлэн тэднийг эргэж ирсэн, уулзаж сэтгэлийн дэм өгсөн хүмүүсийг бүртгэх, хандив цуглуулж амны хаалт, улавч, нөмрөгөөр үйлчлэх ажлыг зохион байгуулж байгаа юм байна.

Өчигдөр өглөөнөөс хойш 820 гаруй хүн ээжүүдтэй уулзаж, сэтгэлийн дэм өгсөн бол нийслэлийн есөн дүүрэг, хөдөө орон нутгаас 100 гаруй захидал илгээж, утсаар байнга холбогдож байгааг үүдний жижүүр тэмдэглэсэн байлаа.

Ээжүүд нэгдүгээр сарын 9-ний 09.00 цагаас өлсгөлөнгөө эхлүүлсэн бол биднийг очиход “11 хоног буюу 272 цаг нойтон, 26 цаг хуурай өлсч байна” гэсэн бичгийг хаалган дээр өлгөсөн байв. Өлсгөлөнг анх таван бүсгүй эхлүүлсэн бол нэг хоногийн дараа долоо, гурав хоногийн дараа ес болж хүрээгээ тэлсэн. Өдгөө 13 ээж өлсч байна. Тэдний найм нь МАХН-ын байранд өлсгөлөнгөө үргэлжүүлж байгаа бол хуурай өлсгөлөн зарласнаас хойш зүрхний хэм алдагдаж, даралт нь буурсан учир таван хүнийг Сүхбаатар дүүргийн эмнэлэгт шилжүүлжээ.

Ээжүүд Монголд бий болсон хэлмэгдүүлэлт, хилс хэрэгт тулгагдаж хохирсон хүмүүсийн хамгийн тод жишээ нь МАХН-ын дарга, Монгол Улсын гуравдахь Ерөнхийлөгч Н.Энхбаярыг хэмээн онцолж буй. Энэ ч үүднээс түүнийг болон хоригдож буй хүмүүсийн эрүүл мэндээ хамгаалуулах эрхийг зөрчихгүй байх, улс төрийн хэлмэгдүүлэлтийг таслан зогсоохыг шаардаж байгаа. Өнөөдөр ч тэр байр суурь хэвээр байгаагийн зэрэгцээ хэвлэл, мэдээллийн зарим хэрэгслээр өөрсдийг нь мөнгөөр өлссөн, улс төр хийсэн хэмээн гүтгэж, нэр төрийг нь гутаан доромжилж байгаад гомдолтой байгаагаа ярив.

Төр, засаг нүд чихгүй мэт авирлаж, ээжүүдийн дуу хоолойг сонсохгүй байгаад өлсгөлөн зарлагсдын олонх нь гомдоллож байв. Мөн Ерөнхийлөгч Ц.Элбэгдоржид хандан түүний ээж Б.Хонинхүү гуайгаар дамжуулан захидал илгээсэн ч хариу ирэхгүй, Төрийн тэргүүн эх хүнийг дорд үзэж буйд харамсч байгаагаа илэрхийллээ. Амьдарч буй нийгэм маань Үндсэн хуульдаа заасанчлан хүмүүнлэг энэрэнгүй бус, ардчилсан Ерөнхийлөгч ч ардчилсан биш авирлаж байгаад ээжүүд сэтгэл дундуур байгаа гэв. Харин өлсгөлөнд оролцож байгаа Баянзүрх дүүргийн иргэн Н.Отгон “Ээжүүдийн тэмцэл эцэстээ тулж хуурай өлсгөлөн зарласнаас хойш шоронд хоригдож буй иргэд болон Н.Энхбаярыг эмнэлэгт шилжүүлэх тухай нааштай мэдээлэл дуулдаж эхэлсэн”-ийг онцоллоо. Хэдий тийм ч ээжүүд өлсгөлөнгөө зогсоох бодолгүй гэнэ. Учрыг асуувал “Шоронд байгаа хүнд өвчтэй хүмүүс болон Н.Энхбаярыг эмнэлэгт хэвтүүлнэ хэмээн хуурч ээжүүдийг гэрт нь хариулчихаад бахь байдгаараа байхыг үгүйсгэхгүй. Яагаад гэвэл ШШГЕГ-ын дэд дарга Д.Хосбаяр Н.Энхбаярыг нэгдсэн II эмнэлэгт шилжүүлэхээ өнгөрсөн пүрэв гаригт мэдэгдсэн ч өнөө хүртэл шийдвэрээ биелүүлэхгүй байна” гэлээ. Тэдний байр суурийг хүргэе.

А.Одончимэг /Баянхонгор аймгийн төлөөлөл/ :

БИДНИЙ АМЬ НАС ХУТГАНЫ ИРЭН ДЭЭР БАЙГАА

-Эхчүүдийн биеийн байдал ямар байна?

-Бид 11 хоног, 272 цаг өлсч байна. Анх нойтон өлсгөлөн зарласан. Харин дунд нь хуурай өлсгөлөн зарласны дараа таван хүний бие муудаж эмнэлэгт хүргэгдсэн. Хэдий тийм ч бидний тэмцэл ШШГЕГ-ын журамд өөрчлөлт оруулж чадлаа. Н.Энхбаяртай хоригдож байгаа олон хүн эмнэлгийн үйлчилгээ авах эрхтэй болсонд ар гэрийнхэн нь баярласнаа илэрхийлж бидэнтэй утсаар холбогдсон. Мөн хуурай өлсгөлөнгөө зогсоохыг эх орны өнцөг булан бүрээс олон ээж учирлаж гуйсан учраас эргээд нойтон өлсгөлөнд шилжээд байна. Бидний тав нь эмнэлэгт, найм нь МАХН-ын байранд, бие сайнгүй, амь нас хутганы ирэн дээр байна. Өлсгөлөн зарласан хүмүүст хамгийн аймшигтай зүйл хүлээлт байдгийг энэ дашрамд хэлье. Бид хүлээж, цөхөрч байна.

Д.Дэлгэрмөрөн /Дархан-Уул аймгийн төлөөлөл/: ШААРДЛАГЫГ ХҮЛЭЭЖ АВТАЛ ТЭМЦЭНЭ

-Өлсгөлөнгөө зогсоохыг олон хүн хэлж зөвлөж байгаа гэсэн. Та бүхний байр суурь ямар байна?

-Өлсгөлөн зарлах тухай сонсоод ирсэн ч шаардлагын хариу нааштай гарах болов уу гээд нутаг буцсан. Гэтэл үр дүн гарахгүй байхаар нь эргэж ирээд өлсгөлөнд оролцож байна. Бидний шаардлагыг хэзээ хүлээж авна, тэр цагт тэмцлээ зогсооход бэлэн байна.

Б.Чимгээ /Сэлэнгэ аймгийн Мандал сумын төлөөлөл/:

ЭЭЖДЭЭ ХАЙРТАЙ ГЭДЭГ НЬ Ц.ЭЛБЭГДОРЖИЙН ШОУ БАЙЖЭЭ

-Ээжүүдийн үгийг төр, засаг хэр сонсч байна вэ?

-Сохор, дүлий төр засагтай байгаадаа эмгэнэн гашуудаж яалт ч үгүй тэмцлийн хурц хэлбэрийг сонгосноор бидний тав нь эмнэлэгт хүргэгдсэн. Ээждээ хайртай гэж сонгуулийн сурталчилгаагаа хийдэг Ерөнхийлөгч Ц.Элбэгдорж биднийг эх хүн гэж бодохгүй байж болох ч, төр засаг биднийг хүн гэдэг үүднээс хандаач гэж хэлмээр байна. Бидний итгэлийг алдаж байгаа нь өөрсдөөс нь болж байгааг хэлье. Ээждээ хайртай гэдэг нь Ц.Элбэгдоржийн шоу байжээ гэж бодож байна. Монголчууд “Төрийн сүлд минь өршөө” гэж залбирдаг ард түмэн. Гэтэл өнөөдөр залбиръя гэвч төрийнх нь сүлд хазгайдчихсан, төрд ажиллаж байгаа хүмүүс нь гажуудчихжээ.

Д.Амарбаясгалан “Баянзүрх дүүргийн төлөөлөл/:

ТӨР, ЗАСАГТАА ИТГЭНЭ

-Шударга бус харгис хэлмэгдүүлэлтийг эсэргүүцэж өлсгөлөнд нэгдсэн. Төр, засаг бидний гуйлт, хүлээлт, горьдлогыг харж үзнэ гэдэгт итгэж байна.

Б.Хандсүрэн СХД-ийн төлөөлөл/:

ЭНЭ БОЛ ЭХЧҮҮДИЙН АРИУН ТЭМЦЭЛ

-Таваас зургаан хүүхэд өсгөж хүмүүжүүлсэн Алдарт эхчүүд үрээ гэсэн сэтгэл, эхийн цагаан сүүгээрээ нэгдэж өлсгөлөн зарласан. Энэ бол эхчүүдийн ариун тэмцэл юм. Эх орны газар шороо, ард түмнийхээ төлөө тэмцэж явсан Н.Энхбаярын төлөө, эдийн засгийн алуурчдын эсрэг бид хэр чадлаараа тэмцэж байна. Бидний тэмцлийн сум нь үг, чадах юм нь өлсөх юм даа. Цаг өнгөрч, нөхцөл байдал хүндрэх тусам Ерөнхийлөгч Ц.Элбэгдоржид үг хэлмээр санагдаж байна. Яачихсан төр, засаг вэ, яачихсан төрийн тэргүүн бэ гэж хамгийн түрүүнд бодогдох юм. “Ард түмэнтэйгээ амь нэг Ерөнхийлөгч байна” гэж анх хэлэхэд нь “Бидний амь таны амь, таны амь бидний амь” гэж ойлгож хүлээж авсан. Ямар ч хүн, сайд дарга байсан ч алдаа гаргадаг, хүүхэд хүртэл аяга алдаад хагалдаг. Буруугаа засах, эргэж харах боломж байна шүү дээ. Өрсөлдөгчөө дарж авах гэж хэт улайрч байгаагаа бодооч гэмээр байна. Н.Энхбаярыг хилс хэргээс нь цагаатгаж болмоор санагдах юм. Эс тэгвээс эмнэлэгт нь шилжүүлчихэж яагаад болдоггүй юм бэ. Тэр чинь ард түмэндээ хүндлэгдсэн, улс орныхоо төлөө их зүйлийг хийж бүтээсэн, Ерөнхийлөгч байсан хүн шүү дээ. Тийм ч учраас “Та бүхний өлсөхийг тэвчиж чадахгүй, тэмцлээ зогсоогооч” гээд бидэнд захидал ирүүлсэн. Ард түмнээ хайрлаж, ээжүүдээ хүндэлж байна гэдгийг нь бид ойлгосон. Ямар ч хүн өр нимгэн ээжээс унадаг. Дэлхийн зүрх нь Монгол байдаг. Монгол Улсын шөрмөс, эд эс нь иргэн нь байдаг. Гэтэл тэр бүхэн алдагдаж, амьдрал өдрөөс өдөрт дордож байна, бидний бие эрүүл мэнд өдрөөс өдөрт муудаж байна. Тиймээс Ц.Элбэгдорж оо, Н.Алтанхуяг аа, Х.Тэмүүжин сайд аа, та бүхэн бодооч, бидэнтэй уулзаач гэж дамжуулъя. Бид эх орондоо хэрэггүй ээж байж болох ч үр хүүхэд, тэднийнхээ найз нөхдөд хэрэгтэй байх аа. Бас хэвлэл, мэдээллийнхэнд хэлэхэд биднийг гүтгэж, муухайгаар бичихээ болиоч. Бид тэгээгүй шүү, улс оронд минь ус чандмань эрдэнэ шиг хэрэгтэй бол түүн шиг улс орондоо хэрэгтэй олон сайхан хүмүүсийг, төр засгийн удирдагч, ном эрдэмтэй хүмүүсийг хэлмэгдүүлж цаазалсан 1937 он шиг ирээдүй биднийг хүлээж байгааг ээжүүд нь хүлээн зөвшөөрөхгүй байгаа юм шүү гэдгийг хэлье. Та бүхэн мэдэж байгаа, 2009 оны сонгуулиар Ц.Элбэгдорж ээжтэйгээ хамт уйлж байсныг. Тэр хүний ээжийн зэвсэг тэр үед нулимс байж. Тэгвэл бид адилхан эх хүмүүс. Бид ард түмний ээж. Хүүхдүүдээ өмөөрөөд бид уйлж байна. Бид авлигад өгөх мөнгөгүй, нааш цааш гүйх тэнхэлгүй ч үрээ гээд үгээ хэлэх, үрийг минь гээд уйлах сэтгэлтэй ийм л хүмүүс шүү дээ.

Ээжүүд 11 хоног 272 цаг өлсч байна
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
элбэгдорж ээждээ хайртай байхгүй тэгээд яах юм, дандаа сумтангууд өлсөж байна даа одоо яанаа, ингэж өлсөхөөр энхбаяртайгаа хамт байвал яасан юм бэ

2013-01-21 | 12:55:33 | 202.179.23.117 |

Зочин
одоо болиоч, та нар хэдэн төгрөг аваад ингээд байгаа юм бэ, өөрсдөө л хохирно өөр хэнч биш, та нарыг шоронд хийвэл энхбаяр өлсөх болов уу хийх ажил алга уу, ямар сайхан зав, бие вэ

2013-01-21 | 12:46:43 | 202.179.23.117 |

Мэдээ
Гадаад мэдээ
Видео