Монголын үндэсний сагсан бөмбөгийн холбоо хэмээх хоёр байгууллага зэрэгцэн үйл ажиллагаагаа явуулж, бие биенээ үгүйсгэсэн байдлаар асуудалд хандах болсон билээ. Манай сурвалжлагч тус хоёр холбооны ерөнхий нарийн бичгийн дарга нартай уулзаж, явуулж буй үйл ажиллагаа, бодлого чиглэл, цаашдын зорилтын талаар ярилцлаа.

Б.Дашдорж (МСБХ-ны генсек): Төрийн зүгээс ТББ-ын ажилд дэндүү их орсонд харамсаж байна

-2012 онд танай холбоо түүхт ойн жилээ багагүй ажил амжуулж, спортын өндөр амжилт гаргасан байх аа?

-Өнгөрсөн онд уламжлалт “Пэпси” дээд лигийн тэмцээнээ амжилттай зохион байгуулсныг спортын хүрээнийхэн мэдэх байх аа. 16 дахь удаагаа зохиогдсон тус тэмцээнд долоон багийн тамирчид өрсөлдсөний дээр гадаадын 14 легионер оролцсон нь тэмцээнийг улам сонирхолтой, өрсөлдөөнтэй болгосон. Манай тамирчид ч хилийн чанадад зохиогдсон томоохон хоёр ч тэмцээнд амжилттай оролцож, хоёр хүрэл медаль хүртсэн. Ирэх жил ч манай сагсан бөмбөгчдийг цөөнгүй томоохон тэмцээн хүлээж байна.

Наньжин хотноо Зүүн Азийн аварга шалгаруулах тэмцээн зургадугаар сард болно. Эхний дөрвөн байр эзэлсэн багууд наймдугаар сард Ливан улсад болох Азийн АШТ-д өрсөлдөх эрх хүртэх юм. Мөн аравдугаар сард БНХАУ- ын Тяньжин хотноо Зүүн Азийн спортын VII их наадам зохиогдоно. Энэ бүхэнд манай холбоо шигшээ багаа бүрдүүлэн оролцуулна.

Зүүн Азийн аварга шалгаруулах тэмцээнд анх удаа монгол шүүгчтэйгээ оролцоно доо. Дээрх тэмцээнүүдэд Монголын сагсан бөмбөгийн холбооноос их ач холбогдол өгч байна. Тэмцээний өмнө манай шигшээ баг Кыргызстаныг зорино. Тавдугаар сард АНУ-ын NCAA-гийн хоёр багтай туршлага солилцсон тоглолт хийнэ. Монголын сагсан бөмбөгийн холбоо нь Ази тив болон олон улсын сагсан бөмбөгийн холбоо (FIBA)-нд албан ёсны гишүүнчлэлтэй тул улс эх орноо төлөөлж, олон улсын тэмцээнд баг тамирчдаа оролцуулах эрхийг эдлэх болно.

-Энэ жил танай холбооны “Пэпси” дээд лигиин тэмцээн зохиогдохгүй боллоо. Гол шалтгааан юундаа байна вэ?

-1994 оноос зохиогдож ирсэн Монголын сагсан бөмбөгийн холбооны “Пепси” дээд лигийн тэмцээн цуцлагдах болсон нь туйлын харамсаптай. Бид дээд лигийн тэмцээнийхээ нээлтийг энэ сарын 10-нд “Буянт-Ухаа” цогцолборт хийсэн. Гэвч заал, танхимын хүндрэлтэй асуудалтай тулгарч үргэжлүүлэн явуулах боломжгүй боллоо. “Буянт-Ухаа” ордны хоногийн төлбөр хоёр сая төгрөг гээд бод доо.

Манай холбооны зүгээс заал танхимын асуудлыг шийдвэрлэж өгөх асуудлаар анхны бичгээ өнгөрсөн оны аравдугаар сарын 16- ны өдөр Спортын бэлтгэлийн төвийн дарга, гавьяат тамирчин Б.Наранбаатарт хүргүүлсэн. Дараа нь уг бичгийг хоёр удаа давтан илгээсэн. Б.Наранбаатараас арваннэгдүгээр сарын 19- ний өдөр заал танхимаар 5-6 cap хүртэл хангах боломжгүй гэсэн албан бичиг ирсэн.

Уг нь журам зааврын дагуу бол хөнгөлөлттэй үнээр Спортын ордныг ашиглах ёстой юм билээ. Наранбаатар даргатай энэ асуудлаар нэг л удаа уулзсан. Тэгэхэд эхлээд Спортын төв ордны “А” танхимаа ашиглуулахыг зөвшөөрсөн. Тэгээд өдрийн хураамж 50 мянган төгрөг, Төрийн саналд орчихвол мөнгөнөөс хүртэж чадахгүй шууд тушаачих гэхээр нь нэг сая 500 мянган төгрөгийг бэлнээр тушаачихаад байлаа.

Зохион байгуулагч Бямбаа хэмээх нөхөр энэ талаар сайн мэдэж байгаа. Товчдоо хэлэхэд төрийн байгууллагын зүгээс төрийн бус байгууллагын ажилд дэндүү илтээр орж, хутган үймүүлэх болсонд харамсалтай байна даа. Тухайлбал, ССАЖЯ-ны сайд Ц.Оюунгэрэл, тус яамны Биеийн тамир, спортын бодлогын хэрэгжилтийг зохицуулах газрын дарга Д.Жаргалсайхан, Бэлтгэлийн төвийн дарга Б.Наранбаатар нар бидний санал хүсэлт, зохиож буй ажлыг үл ойшоож, нэг талыг барин

Монголын үндэсний сагсан бөмбөгийн холбоо гэгч байгууллагыг бүх талаар дэмжин тусалж, хамтран ажиллах болсныг юу ч гэж тайлбарламаар юм бэ дээ? Хэдийгээр “Пэпси” лигийн 17 дахь удаагийн тэмцээн зохиогдохгүй ч манай холбоо тив, олон улсын холбооныхоо өмнө хүлээсэн үүргээ биелүүлж, бусад уралдаан тэмцээнээ чанартай зохион байгуулж, сургалтад хүмүүсээ оролцуулах болно.

С.Тулга (МҮСБХ-ны генсек): Хоёр лигийн үйл ажиллагааг хүмүүс хараад өөрсдийн дүгнэлтээ хийх боломжтой

-Сагсан бөмбөгийн үндэсний супер лигийн тэмцээн зохион байгуулах болсон шалтгаан юу байв?

-Монголын үндэсний сагсан бөмбөгийн холбоо энэ оноос эхлэн Монголын сагсан бөмбөгийн үндэсний лигийн тэмцээнийг анх удаа зохион байгуулах гэж байна. Манай холбооноос Монголын сагсан бөмбөгийн холбооны “Пэпси” дээд лигийн тэмцээнийг зохион байгуулахад ямар ч хэлбээрээр саад болоогүй. Хоёр лигийн үйл ажиллагааг хүмүүс хараад өөрсдийн дүгнэлтээ хийх боломжтой.

Бид нэг түвшнээс ижил тэмцээн зохиож, уралдаан тэмцээнийхээ гарааг эхэлье л гэж бодсон. Бид хэнийг ч хуураагүй, Монгол Улсын хуулийн хүрээнд л үйл ажиллагаа явуулж байгаа гэдгийг баттайгаар хэлмээр байна. Монголын сагсан бөмбөгийн хөгжлийг шинэ шатанд гаргаж, Монгол үндэсний супер лигийг гадаадын томоохон лигүүдтэй дүйцэхүйц хэмжээнд хүргэх, үзэгчдийн үзэх дуртай сагсан бөмбөгийн шоу арга хэмжээ болгон хөгжүүлэх, сагсан бөмбөгийн спортыг үндэсний хэмжээнд хөгжүүлэхэд гол зорилго оршиж байна.

-Зохион байгуулалтын талаар онцлог зүйл юу байна вэ?

-УИХ, Засгийн газрын гишүүн, ССАЖ-ын сайд Ц.Оюунгэрэл хоёр холбооны удирдлагыг хүлээн авч уулзан, тодорхой ярилцаж, хоёр холбооноос лигийн тэмцээнийг зохион байгуулж, явуулахыг зөвшөөрсөн. Монголын сагсан бөмбөгийн үндэсний лигийн тэмцээн даваа гаригт (өнөөдөр) Спортын төв ордонд албан ёсоор эхэлнэ. Энэ удаа лигт долоон баг өрсөлдөнө.

Холбооноос лигийн тэмцээний стандартыг тогтоож, баг, тоглогчдын өмсгөл, лого, тэмцээний дүрэм, лигийн ивээн тэтгэчдийн дүрмийг шинээр боловсрууллаа. Лигийн тэмцээнийг маркетинг, менежементийн өндөр түвшинд явуулах бүх нөхцөлийг бүрдүүлэн ажилалаа. Лигийн маркетингийн зөвлөхөөр TOP PR агентлаг ажиллана.

Тэмцээний тойргийн тоглолтууд Спортын төв ордны “А” танхимд болох бол шигшээ тоглолтуудыг “Буянт-Ухаа” спорт цогцолборт зохион явуулна. Шударга эрүүл шүүлттэй, тоглолт олон улсын сагсан бөмбөгийн холбоо “FIВА“-гийн дүрмээр явагдана. Лигийн тоглолт 4 үе, 12 минутаар 48 минут үргэлжилнэ.

-Багийн бүрэлдэхүүний хувьд ямар байх вэ?

-Багийн бүрэлдэхүүн дээд тал нь 15 хүнтэй байх бөгөөд гурав хүртэлх легионер тоглогчтой байж болох юм. Легионер тоглогчдын ихэнх нь манай эх оронд ирээд байна. Тэд лигийн II тойргоос оролцоно. Бид лигийн дэлгүүрийг байгуулж, баг, тамирчдын өмсгөл, бие халаалтын хувцас гэх мэт зүйлсийг худалдахаар төлөвлөж байна.

-Лигийн тэмцээний шагналын сан өндөр гэсэн байх аа?

-Энэ удаагийн лигийн тэмцээний нийт шагналын сан 200 сая төгрөг. Түрүүлсэн баг 40 сая, хоёрт орсон нь 20, гуравдугаар байр эзэлсэн баг 10 сая төгрөг хүртэнэ. Энэ тэмцээний нэг онцлог нь үзэгчдийн тасалбарын орлогын 40 хувийг багуудад урамшуулал хэлбэрээр олгоно. Мөн багууд хожил бүртээ нэг сая төгрөгийн урамшуулал хүртэх бол хожигдсон баг 450 мянган төгрөгийн урамшуулалтай. Түүнчлэн тусгай шагналуудыг хүртээнэ.

-Монголын үндэсний сагсан бөмбөгийн холбооноос энэ онд өөр ямар томоохон тэмцээн зохиох вэ?

-“Спрайт” лигийн тэмцээнийг зохион явуулна. Тус тэмцээн хоёрдугаар сарын 2-3-нд Дархан, Эрдэнэт хотноо зохиогдоно. Үндэсний лигийн тэмцээнээс Монголын сагсан бөмбөгийн үндэсний шигшээ багийг бүрдүүлж, олон улс, тивийн хэмжээний тэмцээнд оролцуулах болно. Шигшээ багийн бүрэлдэхүүнийг ССАЖЯ-ны Биеийн тамир, спортын хэрэжилтийг зохицуулах газраар баталгаажуулна. Бид хэрүүл хийхийг урьтал болгосонгүй.

Гагцхүү Монголын сагсан бөмбөгийн спортын хөгжлийг шинэ түвшинд хүргэхийг зорьж байна. Бидний тухай яаж ч муу хэлж болно Гэхдээ Монголын сагсан бөмбөгийг хэзээ ч муулж болохгүй гэдэг шүү гэдгийг Монголын сагсан бөмбөгийн холбооныхондоо ахин хэлмээр байна. Монголын сагсан бөмбөгийн хөгжлийг хэн ч өөдрөгөөр харж, бидэнтэй хамтран ажилаж болно шүү. Сагсан бөмбөгийн хөгжил, шинэчлэлийн асуудлаар манай холбоо хэний ч санал бодлыг хүлээн авч ажиллах болно.

Д.Гэнээ

Эх сурвалж: “Таван цагариг”

Монголын сагсчид яагаад хоёр хуваагдав?
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
хуучирсан пянз бас мэдрэл нь цэгцрээгїй шинэковууд,Ардчилсан нам мэдлэг тоододггїй юм аа гэхэд мэдлэгийн мэдрэмжтэй баймаар Дэндїї Харлаад байна шїї АРдчилагчид аа

2013-01-21 | 16:43:23 | 202.72.245.122 |

Зочин
хоёрдахь зураг дээрх нєхдїїд бол хуучирсан пянзнууд

2013-01-21 | 16:41:40 | 202.72.245.122 |

Мэдээ
Гадаад мэдээ
Видео