Хуримынхаа бал сарын аялалаар Лас Вегасыг зорьсон шинэхэн хос нэгэн зочид буудалд өреө авчээ. Аз жаргалдаа умбасан тэд өрөөнд орж ирээд хачин жигтэй гэмээр үнэрийг мэдэрсэн байна. Нөхөр нь хүлээн авах руу нь утас цохиж өрөөний хаа нэгтэйгээс эвгүй үнэр гарч байгаа тухай хэлж өөр өрөөнд орох хүсэлтэй байна гэвэл менежер нь захиалга ихтэй байгаа тул өөр өрөө байхгүй бөгөөд өрөөг цэвэрлүүлж, ресторанд үнэгүй оройн зоог барихыг санал болгосон байна. Хосууд оройн амтат зоогны дараа өрөөндөө иртэл өнөөх эвгүй үнэр нь ханхалсаар байтал нөхөр нь дахин зочид буудлын менежерт хандлаа. Тэрээр дахин өөр өрөө гаргаж өгөх эсвэл өөр зочид буудалд буудаллахыг хүссэн нь бас л бүтэмжгүй болж тэд эндээ үлдэх болжээ. Менежер өрөөг дахин цэвэрлүүлэхээр болж, хосууд тэдэнд хоёр цагийн хугацаа өгөөд зочид буудлын казиног зорьлоо.
Зочид буудлын үйлчлэгч өрөөг бүхэлд нь нэгжээд ямар ч эвгүй үнэртэй зүйл олоогүй бөгөөд хөшигнөөс эхлээд өрөөний бүх эд хэрэглэлийг шинээр сольж сайтар цэвэрлээд явав. Ингээд хоёр цагийн дараа хосууд өрөөндөө иртэл бас л жигтэй үнэр ханхалсаар байсанд нөхөр нь уурсаж өөрөө тэр эвгүй үнэртэй ямар нэг зүйлийг хайхаар шийдэж элдвийг онгичиж гарлаа. Гэнэтхэн тэрээр орны матрассыг түлхэн унагаатал доороос нь үхсэн эмэгтэйн цогцос олджээ. Энэ явдлын тухай Америк даяараа шуугиж түүнээс хойш хэд хэдэн хувилбараар ярих болжээ.

Ийм тохиолдол үүнээс гадна 1999 ба 2010 онд хэдэнтээ тохиолджээ. Тэдний нэг нь Германиас жуулчилж ирсэн хосын буудалласан өрөөнд эвгүй үнэр үнэртэж байсан бөгөөд хосууд тэндээ хонохоор болсон хачирхалтай тохиолдол юм. Гэтэл маргааш нь хосууд 64 настай Сауль Хернандез гэгчийн цогцсон дээр нойрссоноо мэдсэн гэдэг.

4. Бие борлуулах лосьон...

Мөрөөдлийн залуутайгаа гэр бүл болж, хуримын ёслолоо үйлдэхэд тун ойрхон болсон залуухан нэгэн эмэгтэй өөрийн гоо үзэсгэлэндээ ихэд анхаарч, амьдралдаа ганцхан тохиох баярт өдрөөрөө хамгаас сайхан нь байхыг хүсэх болжээ. Хүмүүс түүнийг хэтэрхий үхмэл, цав цагаан арьстай гэлцдэгийг санасан бүсгүй хуримынхаа өдрөөр жигд борлосон сайхан арьстай болохоор шийдэж гоо сайхны салонуудад хандсан байна.
Гоо сайхны мэргэжилтнүүд түүнд нэг удаадаа 30 минутаар орох зориулалт, үйлчилгээ бүхий бүтэн биеийн арьс борлуулах аппаратыг санал болгосон нь түүнд ганцхан удаад хангалтгүй хэмээн үзэж хэд хэдэн гоо сайхны салонуудад хандан нэгийг нь дуусахаар нөгөөд нь очиж үйлчлүүлж эхэлжээ, Бие нь бага зэрэг борлож эхэлсэнд сэтгэл ханалгуй илүү их борлуулна гэж зүтгэсэн бүсгүй дэлгүүрт очиж бие борлуулах шингэн худалдаж авчээ. Ингээд биеэ чийгшүүлж түрхсэнийхээ маргааш нь дахин өнөө бүтэн бие борлуулах аппаратандаа ортол санаанд оромгүй явдал тохиов. Төрөлх гоо сайхандаа сэтгэл ханалгуй илүү сайхны төлөө шунасан эмэгтэй өөрийгөө амьдаар нь "болгосон" байжээ. Гоо сайхны мэргэжилтнүүд гэнэтхэн жигтэйхэн хиншүү хярвас гарч эхлэхийг анзаараад түүн дээр очтол тэрээр аль хэдийнэ гал авалцсан аппаратандаа нас барсан байсан бөгөөд шүүх эмнэлгийн задлан шинжилгээгээр бүсгүйн дотор эрхтнүүд гадны нөлөөтэйгөөр шарагдаж "болсон" байсныг илрүүлсэн байна. Хуримынхаа өдрөөр алтлаг бор өнгийн сайхан арьстай болохыг хүссэн бүсгүйн худалдаж авсан лосьон нь маш ховор тохиолдолд хэрэглэх заалттай байснаас гадна арьсны нарны туяанд мэдрэг чанарыг нэмэгдүүлдэг байсан гэнэ.

5. Цуст Мэри

1994 оноос хойш интернэтээр тархсан энэ түүх ам дамжсан ийм төрлийн домог яриануудаас олонд хамгийн их түгсэн нь. Туүхийг хүүрнэгч нь: "Би 9 настайдаа найзынхаа терсөн өдрийн баярт уригдаж очсон юм. Тэнд бараг 10 охин байсан санагдаж байна. Шөнө дунд болоход бид "Мари Вөрт" гэдэг тоглоом тоглохоор шийдсэн. Бидний зарим нь энэ тоглоомыг мэдэхгүй байсан учир нэг охин маань энэ тоглоомын түүхийг ярьж өглөө.

Охин: "Мэри Вөрт гэгч эмэгтэй балар эртний нэгэн цагт амьдардаг байсан юм. Тэр бол үнэхээрийн гоо үзэсгэлэнтэй бүсгүй байсан гэдэг. Нэг өдөр тэрээр золгуй осолд өртөж хэн ч түүнийг харж зүрхлэхээргүй үзэшгүй муухай царайтай болов. Мэри ч гэсэн өөрийнхөө ямар төрхтэй болсныг толинд харахаас ч эмээдэг, магад харвал галзуурлын байдалд орохоор байсан юм. Ийм харамсалтай явдал болохоос өмнө Мэри өдөржин шахуу толиныхоо өмнө суугаад хөөрхөн царайгаа хэдэн ч цагаар хамаагүй бишрэн суудаг байлаа. Нэг өдөр гэрийнхнийгээ унтсаны дараа Мэри сониуч зандаа хөтлөгдөн өрөөнийхөө толь өөд сэм гэтэж очлоо. Гэнэтийн ослын дараа ямар төрхтэй болсноо харахыг хүссэн тэрээр өөрийнхөө үзэшгүй муухай царайтай болсныг харсан даруй аймшигтай хашгирч, толио хагалчихжээ. Энэ бол түүний сэтгэл эмтэрч эрхгуй бачимдсан хар өдөр байсан ба осолд орохоос өмнөх узэсгэлэнт төрхөө эрэхээр хагарсан толины ширхэг бүрт нэвчин орж, хэзээ нэгэн цагт хэн нэгэн түүнийг аль нэг толиноос эрж, харахыг хүсэх аваас тэр нь хэн ч байсан ершөөлгүй зэрэмдэглэгдэх болохыг тангараглаад харанхуйн ертөнцөд одсон юм гэдэг..." гэсэн яриаг сонссон бид ихэд айсан ч түүнийг толинд хайхаар зориглон шийдэж билээ. Ингээд гэрлээ унтраагаад найзынхаа өрөөнд байсан толийг тойрч "Мари Вөрт, Мэри Вөрт... Бид Мэри Вөртэд итгэж байна..." гэж хэлж эхэлсэн юм. Төд удалгүй бид энэ өгүүлбэрийг долоо дахь удаагаа хэлэхэд толины өмнө зогсож байсан нэг охин учиргуй бархирч эхэлсэн ба өөрийгөө толиноос холдуулахаар ямар нэг юмтай тэмцэж эхэлсэн... Тэр охин маш чанга хашгирч байсан болохоор доод давхарт сонсогдож найзын маань ээж өрөөнд орж ирснээр энэ явдал дууссан юм. Ээж нь орж ирээд гэрэл асаасан ба айж сандарсан тэр охиныг буланд шигдээд учиргуй уйлж байгааг олсон юм. Тэгээд юу болсныг харахаар очсон ээж нь түүний баруун хацар дээрх хэн нэгэнд маажуулсан урт шархыг олж харсан гэдэг. Би энэ явдлыг, тэр охины царайг амьд ахуйдаа хэзээ ч мартахааргүй тийм их цочирдож билээ.

Шар мэдээ