Дэлхийн бөхийн холбоод эсэргүүцлээ илэрхийлсээр байна

2013-02-19

Эртний, тэрчлэн орчин үеийн анхны олимпийн наадмын 5 төрлийн нэг болох

бөхийн спортыг зуны олимпийн наадмын төрлөөс хасах тухай Олон улсын олимпийн хороо-ОУОХ-ны Гүйцэтгэх хорооны зөвлөмжийг дэлхийн олон оронд дургүйцэн хүлээн авч байна. Бөхийн спорт өндөр хөгжсөн Азербайжан, Америк, Беларусь, Болгар, Грек, Иран, Казахстан, Канад, Орос, хоёр Солонгос, Турк, Украин, Энэтхэг, Япон гээд олон орны бөхийн холбоо байр сууриа илэрхийлж дээрх шийдвэрийг буруу, өөрчлөх шаардлагатай гэжээ.

ОУОХ-ны Гүйцэтгэх хорооны хуралдааны дараа Олон улсын бөхийн төрлүүдийн холбоо-ФИЛА-гийн ерөнхийлөгч Р.Мартинэтти дэлхийн бөхийн хамтын нийгэмлэгт хандан илгээлт гаргаж, “Эх дэлхийд амьдран сууж байгаа дийлэнх ард түмнүүдийн соёлын чухал хэсэг болж байгаа эртний, эр зоригийн спортын төрлийг дэмжихээс ОУОХ-ны Гүйцэтгэх хороо татгалзаж байгаа шалтагууд нь миний санаад багтахгүй байна. Сүүлийн жилүүдэд бид бөхийн спортыг хөгжүүлэх, түгээн дэлгэрүүлэх талаар маш их зүйл хийж түүний үр дүнд томоохон тэмцээнүүдэд спортын ордон, танхим үзэгчдээр пиг дүүрдэг болж бөхийн спортоор хичээллэгчдийн газар зүй улам тэлж Лондоны олимпийн наадмаас 25 орны бөхчүүд медаль зүүлээ. Эдүгээ дэлхийн 180 гаруй оронд бөхийн спорт хөгжиж бөхийн спортын дэлхийн газрын зурагт Африк, Латин Америк гэсэн шинэ тивүүд бий болоод байна” гэж онцлон дурджээ.

Орос
Оросын бөхийн төрлүүдийн холбооноос бөхийн үндэсний холбоодод хандан нээлттэй захидал гаргаж “2020 оны зуны олимпийн наадмын хөтөлбөрт бөхийн спортыг оруулахгүй байх зөвлөмжийг ОУОХ-ноос гаргасныг ОБТХ бөхийн ертөнцийн адил мэл гайхан цэл хөхрөн хүлээн авлаа. Орчин үеийн спортод бөхийн спортын эзэлж байгаа байр суурь, түүх, уламжлалын үүднээс авч үзэхэд дээрх зөвлөмжийг бид зөвшөөрөхгүй байгаа төдийгүй олимпийн наадмыг бөхийн спортгүйгээр төсөөлж чадахгүй байна. Иймд олимпийн гэр бүлд бөхийн спортын байр суурийг бэхжүүлэх, хэвээр үлдээх санаачилгуудыг дэмжих үүднээс бүх үндэсний холбоонд хандан байр сууриа идэвхтэй илэрхийлж үндэсний олимпийн хороод, танай улсад ОУОХ-г төлөөлж суугаа гишүүд тэрчлэн спортын өргөн олон нийт, олон нийтийн мэдээллийн хэрэгслүүдэд хандахыг уриалж байна. Бидний хамтын хүчин чармайлт тавьж байгаа нийтлэг зорилгодоо хүрнэ гэдэгт итгэж байна” гэжээ.

Турк
Туркийн бөхийн холбооны ерөнхийлөгч, сонгомол барилдааны олимпийн хошой аварга Хамза Ерликая хэлэхдээ “ОУОХ нь 2020 оны зуны олимпийн наадмын хөтөлбөрөөс бөхийн спортыг хасаж түүхэн алдаа гаргах гэж байна. ОУОХ-ны Гүйцэтгэх хороо гэдэг чинь хэдхэн хүн, 5-6 хүний саналаар бөхийн төрлөөс татгалзаж хэрхэвч болохгүй. Бөх бол олимпийн наадмын ноён нуруу, ноён нуруугүйгээр аливаа бие хөл дэээрээ зогсож чадахгүй. Бөхийн спортыг олимпийн төрөл хэвээр үлдээхийг хүсэж байгаа орнууд бүгд нэгдэн тэмцэх хэрэгтэй, тэгж байж бид ялалт байгуулна” гэлээ.

Америк
АНУ-ын спортын “ESPN” суваг 2020 оны зуны олимпийн наадамд бөхийн спортыг хэвээр үлдээх асуудлаар санал асуулга явуулахад нэг өдрийн дотор 41 565 хүн оролцож 86.3 хувь нь бөхийн спортыг олимпийн наадамд хөтөлбөрт байх ёстой гэсэн саналыг дэмжжээ. Тэрчлэн АНУ-ын Бөхийн төрлүүдийн холбоо фэйсбүүк хуудас нээж санал асуулга авч байна.

Иран
Ираны үндэсний олимпийн хорооны ерөнхийлөгч Мухаммад Али-Абади бас мэдэгдэл гаргаж “Бөхийн спортыг олимпийн төрлөөс хасвал Ираны спортод маш хүчтэй цохилт болно. Лондоны олимпийн наадамд иранчууд бөхийн төрлөөр гурван алт, тус бүр хоёр мөнгө, хүрэл медаль авсан” гэжээ.

Грек
Грекийн үндэсний олимпийн хороо мэдэгдэл гаргаж “ОУОХ-ны Гүйцэтгэх хорооны энэ шийдвэр нь олимпийн наадам төдийгүй спортын түүхтэй зөрчилдөж байна. Нарийвчлан судалж энэ шийдвэрийг өөрчилнө гэдэг нь ойлгомжтой. Манай эриний өмнөх ҮIII зуунд олимпийн тоглолт үүссэн үеэс л бөхийн барилдаан олимпийн хөтөлбөрт нь байсан төдийгүй 1896 оноос орчин үеийн олимпийн наадамд багтсаар ирсэн” гэжээ.

Украин
Украиний чөлөөт бөхийн үндэсний шигшээ багийн дасгалжуулагч Руслан Савлахов гаргасан шийдвэрийн талаар санал бодлоо илэрхийлэхдээ “Бөхийн спорт нь бейсбол, софтбол, каратэ, роллер-спорт, хаданд авиралт, сквош, вейкбординг, ушу зэрэг нэрийг нь ч бараг үл мэдэх спортын төрлүүдтэй өрсөлдөж зуны олимпийн наадмын “нэмэлт” төрөл болох юм гэнэ. Бид яасан ч дуугүй суухгүй, олимпийн гэр бүл дэх байр сууриа хадгалан үлдэхийн тулд дэлхий даяар тэмцэнэ. “Хөвгүүд ээ, танай бөхийн спорт чинь арилжааны спорт биш, амарч бай” гэнэ үү. Үгүй ээ, бид бүгдээрээ эсэргүүцэн тэмцэнэ” гэлээ.

Беларусс
Беларуссийн үндэсний олимпийн хорооны дэд ерөнхийлөгч, олимпийн гурван удаагийн аварга Александр Медведь мөн санал бодлоо илэрхийлж “ОУОХ бидний үндэслэлийг анхааралтай сонсож зөв шийдвэр гаргана гэдэгт итгэж байна. Ийм нөхцөл байдалд ФИЛА зөв алхам хийх ёстой. Бид бүгдээрээ хамтран бөхийн спортоо олимпийн төрөл хэвээр байлгахын төлөө тэмцэнэ. Би олимпийн наадмыг олон үзсэн, зүлгэн дээр хоккей гэж нэг спорт байна. Бараг үзэгчгүй шүү дээ. Үзэгчгүй спорт нэгээр тогтохгүй байна” гэж өгүүлжээ.

Канад
Канадын бөхийн холбооны ерөнхийлөгч Дон Руинээс ФИЛА-гийн ерөнхийлөгч Р.Мартинэттэд хандан захидал илгээж “ОУОХ-ны Гүйцэтгэх хорооноос бөхийн спортыг 2020 оны олимпийн наадмаас хасах тухай зөвлөмж гаргасныг Канадын бөхийн олон нийт дургүйцэн хүлээн авлаа. Олимпийн наадмын ариун зорилго, мөрөөдөлд харшилсан энэ зөвлөмж нь Канад төдийгүй дэлхийн олон орны бөхийн спорт сонирхогчдод том цохилт боллоо. ФИЛА-гийн удирдлага, Товчооны гишүүд хамтран бөхийн хамтын нийгэмлэгийг нэгтгэн бөхийн спортыг олимпийн төрөл хэвээр байлгахын төлөө бүхнийг хийх ёстой” гэж өгүүлсэн байна.

Египет
Египетийн бөхийн холбооны ерөнхийлөгч Эль Хададаас ФИЛА-гийн ерөнхийлөгч Р.Мартинэттэд хандан захидал илгээж “ОУОХ-ны Гүйцэтгэх хорооны зөвлөмжийг сонсоод дэлхийн бөхийн гэр бүл бухимдаж байна. Олимпийн наадмыг бөхийн спортгүйгээр төсөөлөх аргагүй. Бид бөхийн спортоо аварч хамгаалахын төлөө бүхнийг хийхэд бэлхэн байна” гэж өгүүлсэн байна.