2013-02-21

Нэг. Нийтлэг үндэслэл

 

1.Энэхүү журам нь тухайн нутаг дэвсгэрээс ачиж байгаа хогны хэмжээгээр биш хоггүй байгаа эсэхээр эцсийн гүйцэтгэлийг үнэлж, айл өрх, байгууллага аж ахуйн нэгжийн хогийг ачиж цуглуулах, тээвэрлэх байгууллага, аж ахуйн нэгжийг сонгон шалгаруулах, уг үйлчилгээг санхүүжүүлэх, хог хаягдлын үйлчилгээний хураамжийг төвлөрүүлэх үйл ажиллагааг зохицуулахад  чиглэгдэнэ.

Хоёр. Ерөнхий зүйл

2.1.Журам Нийслэлийн 9 дүүргийн нутаг дэвсгэрт хэрэгжинэ.

2.2.Хог ачиж цуглуулах, тээвэрлэх эрх бүхий этгээдийг Дүүргийн Засаг даргын захирамжаар байгуулагдсан ажлын хэсэг шалгаруулна.

2.3.Ажлын хэсгийг дүүргийн Засаг даргын орлогч ахлах ба гэр хороолол дахь Захирагчийн ажлын алба, дүүргийн ЗДТГ-ийн Санхүү, төрийн сангийн хэлтэс, Дэд бүтэц, тохижилтын хэлтэс, дүүргийн Мэргэжлийн хяналтын хэлтэс, хорооны Засаг дарга, иргэдийн  төлөөллөөс бүрдэнэ.

2.4.Дүүрэг бүр харьяа хороодоо нэгтгэж, бүсүүдэд хуваах бөгөөд бүсчлэлийг хог тээвэрлэгчийг сонгон шалгаруулах ажлын хэсэг тогтооно.

2.5.Нэг бүсэд нэг тээвэрлэгч байгууллага байна.

2.6.Дүүргийн харьяа хог тээвэрлэгч байгууллагын хог тээвэрлэх бүсийг сонгон шалгаруулах ажлын хэсэг тогтооно.

2.7.Дүүргийн харьяа хог тээвэрлэгч байгууллага нь дүүргийн Засаг даргатай “Хог ачиж, цуглуулах, тээвэрлэх шууд гэрээ”-г байгуулна.

2.8.Бусад бүсийн сонгон шалгаруулалтад зөвхөн хувийн хэвшлийн байгууллага оролцох ба сонгон шалгаруулалтад оролцох хүсэлтэй иргэн, аж ахуйн нэгж, байгууллага нь дангаараа болон бусад этгээдтэй хамтарч оролцож болно.

2.9.Хог хаягдлын үйлчилгээний хураамжийг дүүргийн татварын хэлтэс дээр төвлөрүүлж, бүсийн хог ачиж цуглуулах, тээвэрлэх үйлчилгээг дүүргийн Засаг даргын Тамгын газраас санхүүжүүлнэ.

2.10.Тухайн бүс, хорооны нутаг дэвсгэр хог хаягдалгүй цэвэр байгаа эсэхээр эцсийн гүйцэтгэлийг үнэлж санхүүжилтийг олгоно.

Гурав. Оролцогч талуудын эрх, үүрэг

3.1.Улаанбаатар хотын Захирагчийн ажлын алба:

3.1.1.Дүүргүүдийн хог ачиж цуглуулах, тээвэрлэх үйл ажиллагаанд хяналт тавих, мэргэжил арга зүйн удирдлагаар хангах;

3.1.2.Дүүргийн Засаг дарга, хог тээвэрлэгч байгууллага хоёрын хооронд байгуулсан “Хог ачиж цуглуулах, тээвэрлэх гэрээ”-г тухайн дүүргийн Засаг даргын Тамгын газартай хамтран дүгнэх;

3.1.3.Хог ачиж цуглуулах, тээвэрлэх үйлчилгээний төсвийг хянах, санхүүжүүлэх, суурь үнэлгээ гаргах зааварчилгаа бэлтгэх;

3.1.4.Сонгон шалгаруулах ажлын хэсэгт орж ажиллах.

3.2.Дүүргийн Засаг даргын Тамгын газар:

3.2.1.Хог тээвэрлэгч байгууллагыг сонгон шалгаруулах, хог тээвэрлэгч байгууллагатай “Хог ачиж цуглуулах, тээвэрлэх гэрээ”, “Хог ачиж цуглуулах, тээвэрлэх шууд гэрээ”  байгуулах, хог ачиж, цуглуулах, тээвэрлэх үйл ажиллагааг санхүүжүүлэх, хяналт тавих;

3.2.2.Хог тээвэрлэгчтэй байгуулсан гэрээг Улаанбаатар хотын Захирагчийн ажлын албатай хамтран дүгнэх, сунгах, цуцлах;

3.2.3.Хог ачиж цуглуулах нэгдсэн хуваарь, маршрутыг баталж, мөрдүүлэх, хяналт тавих

3.2.4.Хангалтгүй ажилласан хог тээвэрлэгч байгууллагад гэрээг цуцлах тухай мэдэгдлийг хүргүүлэх;

 3.2.5.Хог ачиж цуглуулах, тээвэрлэх үйлчилгээтэй холбоотой иргэдийн санал, гомдол, хүсэлтийг шуурхай шийдвэрлэх;

3.2.6.Хог хаягдлын талаар хүлээсэн үүргээ биелүүлээгүй байгууллага, аж ахуйн нэгж, иргэдэд хууль, журмын дагуу хариуцлага хүлээлгэх;

3.2.7.Хорооны Засаг даргатай хамтран хорооны нутаг дэвсгэр хоггүй байгаа эсэхэд сард 1-2 удаа үзлэг хийх;

3.2.8.Барилгын болон үйлдвэрлэлийн хог хаягдлыг ил задгай хаях байдалд хяналт тавих.

3.3. Хорооны Засаг дарга:

3.3.1.Дүүргийн Засаг даргын Тамгын газрын холбогдох мэргэжилтэнтэй хамтран хорооны нутаг дэвсгэр хоггүй байгаа эсэхэд сард 1-2 удаа үзлэг хийж, тодорхойлолт гаргах;

3.3.2.Хорооны хог ачиж цуглуулах, тээвэрлэх үйлчилгээнд хяналт тавих;

3.3.3.Хог ачиж цуглуулах хуваарь, маршрутыг хог тээвэрлэгч байгууллагатай хамтран гаргаж, дүүргийн Засаг даргын тамгын газарт хүргүүлэх, хуваарь, маршрутын дагуу ажиллаж байгаа байдалд өдөр тутмын хяналт тавих;

3.3.4.Хангалтгүй ажилласан хог тээвэрлэгч байгууллагын гэрээг цуцлах саналыг дүүргийн Засаг даргад хүргүүлэх;

3.3.5.Хог хаягдлын чиглэлээр мөрдөгдөж байгаа хууль, эрх зүйн актуудыг байгууллага, аж ахуйн нэгж, иргэдэд сурталчилж, таниулах;

3.3.6.Хог хаягдлын талаар хүлээсэн үүргээ биелүүлээгүй байгууллага, аж ахуйн нэгж, иргэдэд хууль, журмын дагуу хариуцлага хүлээлгэх;

3.3.7.Айл өрх, байгууллага, аж ахуйн нэгжийн хог ангилан ялгах үйл ажиллагаанд хяналт тавих;

3.3.8.Хорооны нутаг дэвсгэрийн гудамж, зам талбайн цэвэрлэгээ, үйлчилгээг хариуцсан байгууллага, аж ахуйн нэгжээр хийлгэх, зам талбайн хог хаягдлыг хог тээвэрлэгчээр ачуулах.

3.4. Хог тээвэрлэгч байгууллага:

3.4.1.Тухайн бүсийн айл өрх, байгууллага, аж ахуйн нэгж, нийтийн эзэмшлийн зам талбайн хог хаягдлыг ачиж, тээвэрлэх;

3.4.2.Хог тээвэрлэх бүсэд үүссэн ил задгай хог хаягдлыг тээвэрлэх;

3.4.3.Дүүрэг, хороотой хамтран хог ачиж цуглуулах, тээвэрлэх хуваарь, маршрутыг батлуулах;

3.4.4.Хог ачиж цуглуулах батлагдсан хуваарь, маршрутын дагуу хог цуглуулж, тээвэрлэх үйлчилгээг үзүүлэн, хог хаягдлыг хогийн төвлөрсөн цэгт хүргэх;

3.4.5. Хогийн төвлөрсөн цэгийн дотоод журмыг чанд сахих;

3.4.6.Айл өрх, байгууллага, аж ахуйн нэгжүүдэд хог ачиж цуглуулах, хуваарийг тарааж, мэдээлэх;

3.4.7.Тухайн хорооны байгууллага, аж ахуйн нэгжүүдтэй “Хог тээвэрлэх гэрээ” байгуулах;

3.4.8.Машин техникийн бүрэн бүтэн байдлыг хангаж, машин техник эвдэрсэн тохиолдолд хог ачиж цуглуулах хуваарийг алдагдуулахгүй байлгах зорилгоор сэлгэн ажиллуулах машин техникийн бэлэн байдлыг хангах;

3.4.9.Жолооч, ачигчийн ур чадвар, харилцааны соёлыг дээшлүүлэх;

3.4.10.Журмын 4.2.2-д заасан хог ачиж, цуглуулах, тээвэрлэх үйлчилгээнд тавигдах шаардлагыг биелүүлэх.

Дөрөв. Сонгон шалгаруулалтыг зарлах

4.1.Сонгон шалгаруулалтын зар мэдээг шалгаруулалт болох өдрөөс хуанлийн 14 хоногийн өмнө өдөр тутмын 2-оос доошгүй сонин хэвлэл, www.ulaanbaatar.mn болон дүүргийн вэбсайтаар нийтэд мэдээлнэ.

4.2.Сонгон шалгаруулалтын зар мэдээнд дараах зүйлийг тусгана:

4.2.1.Тухайн бүсэд хамрагдаж байгаа хорооны дугаар, тухайн бүсийн хүн ам, айл өрх, аж ахуйн нэгж, байгууллагын тоо, үүсэх хогны хэмжээ, нийслэлийн нэг иргэнээс өдөрт үүсэх хогны хэмжээ, хог хаягдлыг тээвэрлэх автомашины тоо тухайн бүсийн хог хаягдлыг тээвэрлэн хүргэх хогийн төвлөрсөн цэгийн нэр, байршил, тухайн бүсээс алслагдсан зай;

4.2.2.Хог ачиж цуглуулах, тээвэрлэх үйлчилгээнд тавигдах шаардлага:

а) Хог тээвэрлэх тусгай зөвшөөрөлтэй байх /“Аж ахуйн үйл ажиллагааны тусгай зөвшөөрлийн тухай хууль”-ийн 15.14.5-р заалт/

б)Тухайн бүсийн нутаг дэвсгэрт үүссэн ил задгай хог хаягдлыг бүрэн цэвэрлэх, ил задгай хоггүй байлгах;

в) Гэр хорооллын хог хаягдал тээвэрлэх автомашин нь хог бүтээх бүтээлэгтэй байх;

г) Орон сууцны хог хаягдал тээвэрлэх автомашин нь зориулалтын шахдаг тэвштэй байх;

д) Байгууллага, аж ахуйн нэгж, үйлдвэрийн хог хаягдлыг хог хаягдлын бүтэц онцлогт тохирсон хог тээврийн зориулалттай автомашинаар тээвэрлэх;

е) Хог ачиж, цуглуулах, тээвэрлэх үйлчилгээг үзүүлэхдээ харилцааны соёлтой байх;

ж) Хог хаягдлыг ачиж, цуглуулахдаа ил задгай хог хаягдал үүсгэхгүй байх;

з) Хог хаягдлыг тээвэрлэхдээ хог хаягдлыг ил гаргахгүй, цэвэр байдлыг хангах;

з) Хог тээврийн автомашиныг ажил дууссаны дараа угааж цэвэрлэн, ариутгалд оруулж байх;

и) Хог ачиж цуглуулах, тээвэрлэх үйлчилгээнд ажиллахдаа хөдөлмөр хамгааллын хувцас хэрэглэл, багаж хэрэгслэлийг бүрэн бүрдүүлж ажиллах /хамгаалалтын малгай, цацруулагч, байгууллагын лого, ажилтны нэр бүхий ажлын хувцас, бээлий, маск, хамгаалалттай ажлын гутал, хамгаалалтын нүдний шил, хүрз г.м/

4.2.3.Бүрдүүлэх материал, боловсруулах баримт бичгийн жагсаалт:

а) Хөрөнгийн баталгаа, төлбөрийн чадварын талаарх мэдээлэл;

б) Тухайн бүсийн хог ачиж цуглуулах, тээвэрлэх менежментийн санал /хороо, дүүрэг, иргэдийн хамтын ажиллагаа, тухайн бүсийг хоггүй байлгах арга хэлбэр гэх мэт/ ;

в) Хог ачиж цуглуулах, тээвэрлэх хуваарь, маршрут;

г) Машин техникийн дэлгэрэнгүй мэдээлэл, одоогийн нөхцөл байдал, сэлгэн ажиллуулах хуваарь ;

д) Машин техникийн засвар үйлчилгээний талаарх мэдээлэл;

е) Сонгон шалгаруулалтад оролцогчийн туршлагын мэдээлэл;

4.2.4.Сонгон шалгаруулалтад оролцогчдыг бүртгэх болон сонгон шалгаруулалтын баримт бичиг ирүүлэх эцсийн хугацаа;

4.2.5.Сонгон шалгаруулалтын баримт бичиг хүлээн авах газрын хаяг, харилцах утасны дугаар

4.3.Сонгон шалгаруулалтад оролцогч нь сонгон шалгаруулалтад ирүүлсэн баримт бичгийн мэдээллийн үнэн зөвийг бүрэн хариуцна.

Тав.Сонгон шалгаруулалтын баримт бичгийг хүлээн авч, нээх

5.1.Сонгон шалгаруулалтын баримт бичгийг зар мэдээнд дурдсан хаягаар хүлээн авах ба заасан хугацаанд ирүүлсэн бүх сонгон шалгаруулалтын баримт бичгийг ирсэн дарааллаар нь он, сар, өдөр, цаг, минутаар бүртгэн авч, тэмдэглэл үйлднэ.

5.2.Ажлын хэсэг сонгон шалгаруулалтад ирүүлсэн сонгон шалгаруулалтын баримт бичиг бүрийн бүрдлийг шалгаж хүлээн авна.

5.3.Сонгон шалгаруулалтын баримт бичгийг зар мэдээнд дурдсан цаг минутад ажлын хэсгийн гишүүд, сонгон шалгаруулалтад оролцогчдыг байлцуулан нээнэ.

5.4.Ажлын хэсэг сонгон шалгаруулалтын баримт бичиг тус бүрийг задалж, зар мэдээнд тусгагдсан мэдээлэл, тавигдах шаардлагын дагуу боловсруулж ирүүлсэн эсэхийг шалгаж, сонгон шалгаруулалтын нээлтэнд оролцогчдод мэдээлнэ.

5.5.Сонгон шалгаруулалтын баримт бичгийн бүрдэл дутуу, хангалтгүй бол ажлын хэсэг сонгон шалгаруулалтад оролцогчид мэдээлж, дутуу ирүүлсэн үзүүлэлтээр үнэлгээ өгөхгүй байх, эсвэл сонгон шалгаруулалтаас хасна.

Зургаа. Сонгон шалгаруулалт

6.1.Сонгон шалгаруулалтын өдрөөс хойш ажлын 5 хоногийн дотор сонгон шалгаруулалтыг зохион байгуулна.

6.2.Ажлын хэсэг сонгон шалгаруулалтын баримт бичиг тус бүрийг журмын 4.2.3-т заасан баримт бичгийн бүрдлийн дагуу 0-5 гэсэн оноо өгч, сонгон шалгаруулалтын баримт бичиг тус бүрийн давуу болон сул талыг тодорхойлон, харьцуулалт хийж, шалгаруулна.

6.3.Ажлын хэсэг сонгон шалгаруулалтын баримт бичгийг тус бүрээр дүгнэлт гаргаж, шалгаруулалтын явцын талаар тэмдэглэл үйлдэнэ.

6.4.Ажлын хэсгийн дүгнэлтэд дараах зүйлүүдийг тусгана:

6.4.1.Гишүүдийн өгсөн оноог нэгтгэн тусгах;

6.4.2.Сонгон шалгаруулалтын баримт бичиг тус бүрийн давуу болон сул талуудын тодорхойлолт;

6.4.3.Ажлын хэсгийн гишүүдээс тусгайлан гаргасан санал;

6.4.4.Шалгарсан этгээдийн нэр.

6.5.Ажлын хэсгийн дүгнэлтийг бичгээр үйлдэх ба гишүүн бүр мэргэжил, албан тушаалаа тэмдэглэн, гарын үсэг зурж баталгаажуулна.

6.6.Ажлын хэсэг шалгарсан этгээдтэй гэрээ байгуулах зөвлөмжийг дүгнэлтийн хамт дүүргийн Засаг дарга болон Улаанбаатар хотын Захирагчийн Ажлын Албанд  албан бичгээр хүргүүлнэ.

Долоо. Гэрээ байгуулах, санхүүжүүлэх

7.1.Дүүргийн Засаг дарга шалгарсан этгээдтэй “Хог ачиж цуглуулах, тээвэрлэх гэрээ”, дүүргийн харьяа хог тээвэрлэгчтэй “Хог ачиж цуглуулах, тээвэрлэх шууд гэрээ”-г тус тус байгуулна.

7.2.Улаанбаатар хотын Захирагчийн ажлын албанаас гаргасан зааварчилгааны дагуу хог ачиж цуглуулах, тээвэрлэх үйлчилгээний төсвийг хянах, санхүүжүүлэх суурь үнэлгээг ажлын хэсэг тогтооно.

7.3.Дүүргийн Засаг даргын Тамгын газар дараа сарын 5-ны дотор хог тээвэрлэгчээс ирүүлсэн гүйцэтгэлийг хянаж, санхүүжилтийг олгоно.

7.4.Дараах баримтыг бүрдүүлэн хянаж санхүүжилтийг олгоно:

7.4.1.Хогийн төвлөрсөн цэгийн диспетчерийн бүртгэл;

7.4.2.Өдөр бүр тухайн хорооны хэсгийн ахлагч, хогоо ачуулсан байгууллага, аж ахуйн нэгж, айл өрхийн баталгаажуулсан гарын үсэг, утасны дугаар, тамга, тэмдэг бүхий баримт;

7.4.3.Хуваарийн дагуу айл өрх, байгууллага, аж ахуйн нэгжийн хог хаягдлыг ачиж цуглуулан, тээвэрлэсэн бүртгэл;

7.4.4.Ил задгай зөвшөөрөлгүй газар үүссэн хогийн цэгүүдийг ачиж, тээвэрлэсэн бүртгэл;

7.4.5.Хорооны Засаг даргын “Хорооны ил задгай болон, айл өрх, байгууллага аж ахуйн нэгжийн хог хаягдал бүрэн ачиж, тээвэрлэгдсэн” тухай тодорхойлолт

Найм. Гэрээг дүгнэх ба цуцлах

8.1.Хог тээврийн гэрээг дараах шалгуур үзүүлэлтээр дүгнэнэ:

8.1.1.Хоггүй эсэх, хог тээвэр, цэвэрлэгээний талаарх байгууллага, аж ахуйн нэгж, иргэдийн сэтгэл ханамж;

8.1.2.Байгууллага, аж ахуйн нэгж, иргэдээс ирсэн санал, гомдол;

8.1.3.Хорооны Засаг даргын тодорхойлолт;

8.1.4.Хог ачиж цуглуулах, тээвэрлэх хуваарь, маршрутыг мөрдөж ажилласан байдал;

8.1.5.Ил задгай үүсмэл хогийн цэгүүдийг устгасан байдал;

8.1.6.Машин техникийн эвдрэл, гэмтэл;

8.1.7.Жолооч, ачигчийн ур чадвар;

8.1.8.Үйлчилгээний соёл.

8.2.Шалгуур үзүүлэлтийн дагуу гэрээг дүүргийн Засаг даргын Тамгын газар, Улаанбаатар хотын Захирагчийн ажлын алба хамтран дүгнэж, гэрээг сунгах, урамшуулах, цуцлах эсэх асуудлыг дүүргийн Засаг дарга шийдвэрлэнэ.

8.3.Дүүргийн Засаг даргаас гэрээг цуцлах мэдэгдлийг хог тээвэрлэгчид хүргүүлж, ажлын хэсэг дараагийн гүйцэтгэгчийг шалгаруулна. 

8.4.Ажлын хэсэг үүрэг даалгавар хүлээн авсан өдрөөс хойш нэн даруй тухайн бүс дээр дахин сонгон шалгаруулалтыг зохион байгуулна.

8.5.Гэрээ цуцлах мэдэгдэл хүлээн авсан хог тээвэрлэгч дараагийн хог тээвэрлэгч сонгон шалгарах хүртэл хог тээвэрлэх үйлчилгээг үргэлжлүүлнэ.

Ес. Хог хаягдлын үйлчилгээний хураамжийг төвлөрүүлэх

9.1.Хог хаягдлын тухай хуулийн дагуу нийслэлийн иргэн, аж ахуйн нэгж, байгууллага бүр тогтоосон тарифын дагуу хог хаягдлын үйлчилгээний хураамж төлнө.

9.2.Хог хаягдлын үйлчилгээний хураамжийн орлогыг төлөвлөх, хянах, гүйцэтгэлийн мэдээ тайланг гаргах ажиллагааг Төсвийн тухай хууль тогтоомжид заасны дагуу хэрэгжүүлнэ.

9.3.Дүүргийн Татварын хэлтэс нь хог хаягдлын үйлчилгээний хураамжийг төсөвт төвлөрүүлэх ажлыг зохион байгуулж, гүйцэтгэлд хяналт тавьж, хуулинд заагдсан хугацаанд Санхүү төрийн сангийн хэлтэст тайлагнана.

9.4.Хог хаягдлын үйлчилгээний хураамжийн орлогыг төсөвт төвлөрүүлэхэд Цахилгаан түгээх сүлжээ компани, Орон сууц нийтийн аж ахуйн компаниуд хамтран ажиллана.

9.5.Айл өрхийн хог хаягдлын үйлчилгээний хураамжийг орон сууц нийтийн аж ахуйн компани, цахилгаан түгээх сүлжээ компаниар, байгууллага, аж ахуйн нэгжийн хог хаягдлын үйлчилгээний хураамжийг банкаар дамжуулан дүүргийн төсөвт төвлөрүүлнэ.

9.6.Тухайн дүүргийн байгууллага, аж ахуйн нэгж нь дүүргийн Засаг даргатай гэрээ байгуулсан хог тээвэрлэгч байгууллагатай “Хог тээвэрлэх гэрээ” байгуулах ба гэрээнд хог хаягдлын үйлчилгээний хураамжийн хэмжээ, хог хаягдлын үйлчилгээний хураамж төлөх дансны дугаарыг зааж өгнө.

9.7.Байгууллага, аж ахуйн нэгж нь хог хаягдлын үйлчилгээний хураамжийг улирал бүр төлнө.

Арав. Хүлээлгэх хариуцлага

10.1.Сонгон шалгаруулалтад илт худал мэдээлэл ирүүлсэн, сонгон шалгаруулалтыг санаатайгаар будлиантуулсан этгээдийг 2 жилийн хугацаанд дахин сонгон шалгаруулалтад оролцуулахгүй.

10.2.Хог тээвэрлэгчтэй байгуулсан гэрээнд талуудын үүрэг, хариуцлагыг тодорхой тусгана.

          10.3.Журмыг зөрчсөн тохиолдолд холбогдох хууль тогтоомжийн дагуу хариуцлага тооцно.