Хүйтний эрч бага багаар суларч, хавар цаг хаяанд ирснийг илтгэнэ. Хавар болоод ч тэрүү сэтгэл нэг л гэгэлзээд….

Би бол Монголын ихэнхи эмэгтэйчүүдийн адил ажил гэрийн хооронд шогшиж, нөхөр, хүүхдүүдээ асарах “хүндэй” үүрэг хүлээдэг энгийн л нэг эмэгтэй. Ажлын өдөр дуусахад ар гэрийн ажил хойно хойноосоо урган гарч ирдэг хойно. Өнгөрсөн Бямба гарагт сурсан заншилаараа гэртээ их цэвэрлэгээ хийж, нөгөө хэдийнхээ хувцсыг угаах ажилд “ханцуй шамлан орлоо”. Нөхрийнхөө өмсдөг цайны хэдэн брюкийг түрүүлээд угаачих санаатай өлгүүрээс нь гарган халаасан дахь зүйлийг нь шалгалаа. Гэтэл ээ бурхан минь. Бэлгэвч. Би яах ч учираа ололгүй дэмий баахан харж суув. Энэ юу юм бэ гээд асуух уу. Хэнд хэрэглэх гэж хадгалаав гээд хэрэлдэх үү.

Тэгээд хэсэг тайвшраад нэг найз хүүхнийхээ “Бэлгэвч нь соёлтой хүний биедээ зайлшгүй авч явбал зохих 10 зүйлд багтдаг. Заавал секс хийх эсэх нь хамаагүй. Энэ чинь тухайн хүний өөрийгөө болоод бусдыг хүндэлж байгааг харуулдаг чухал зүйл” гэсэн яриаг саналаа. Үнэхээр нөхөр маань бусдын адил соёлтой загнаж байгаа хэрэг үү. Нөхөр бид 2 оюутан байхдаа танилцаж, төгсөх жилдээ том хүүгээ гаргасан юм. Анх юугаа ч мэдэхгүй хүүхдүүд анхны харцаар дурлалцаад л…

Өвлийн хүйтэн жаврыг ч тоолгүй хамтдаа алхдаг байлаа. Хэн хэнийхээ хувьд анхны гэсэн бүхэн нь байсан болохоор бидний хооронд хардалт гэдэг ойлголт бараг байдаггүй юм. Яахав анх танилцаж байхад залуу ч байж дээ. Бие биедээ туньж, хардах аяс гаргадаг байсан ч 2 хүүхдийн эцэг эх болоод амьдралынхаа төлөө зүтгээд ирхэхээр тийм юм бодох ч завгүй болдог юм билээ. Нөхөр маань нэгэн яамны дэс түшмэл хийдэг. Харин би нэгэн хувийн сургуульд багшилдаг. Амьдралд маань бүх юм болж бүтэж байгаа юм шиг л санаж явтал…

Юу ч болоогүй байхад дэмий өөрийгөө зовоогоод яахав гэж хэчнээн тайвшрахыг хичээвч цаанаасаа л сэтгэл хөндүүрлээд тэр шөнө нойр хүрсэнгүй, нааш цааш хөрвөөж, арай гэж өглөөтэй золголоо. Ням гараг болохоор 2 хүүгээ нөхөртөө өгөн хадам ээжийнх рүү явуулаад, гэртээ ганцаараа үлдэж, амины ганц найз хүүхнээ утсаар гэртээ дуудав. Найз маань ч удсангүй манайд ирж миний сониныг сонслоо. Тэгсэн тэр ер гайхсан шинжгүй шүү.  Найзыг минь Сувдаа гэдэг. Ёстой л нэрэндээ таарсан сувд шиг сайхан бүсгүй байдаг юм.

Сувдаа “Би бүүр яаж хэлье дээ гээд хэл загатнаад байсан юмаа. Танай нөхөр чинь яаман дээрээ дадлага хийж байгаа нэг оюутан охинтой л сүжрээд сүйд байгаа шдээ. Хаа сайгүй л хамт гүйлдээд байдаг юм. Чи л гэж нүдийг нь хар даавуугаар боочихсон юм шиг хүн, мэдэж байгаа ч юмгүй” гэдэг байгаа. Ийм юм сонсоно чинээ санаагүй миний дотор давчдаад явчилаа. Нэг л өдөр нөхөр маань өөр хүүхэн дагаад явлаа гэвэл би яах юм бэ. 2 хүүхдээ тэврээд өнчрөөд хоцорвол яанаа гэхээс сэтгэл харанхуйлаад хоолой зангираад нүдэнд нулимс дүүрээд ирлээ.

Найз маань за юун сүртэйн. Муусайн эрчүүд чинь угаасаа л ийм балиар байдгийн ш дээ. Хоолыг нь бэлдээд, хүүхдийг нь өсгөөд хамаг юмаар нь хангаад байх тусам тэнэгтээд өөр юм руу өлөв дөлөв гээд явж байдаг юм. Ёстой жаргалтай газар хүн тогтохгүй, өвстэй газар мал тогтохгүй гэдэг чинь л энэ байхгүй юу. Миний найз юундаа сэтгэлээр унаад байгаан бэ гэлээ. Нөхрөө өөр хүүхэнд алдаад явуулна гэдэг миний сэтгэлд ер багтахгүй байлаа. Насаараа ганцхан чамайг хайрлана гэж тангараг тавьж байсан хүн шүү дээ. Тэгтэл юу сонсох нь энэ вэ. Найзаасаа тайтруулж тайвшруулсан үг сонсоно гэж найдсан маань ингээд талаар өнгөрлөө. Сувдаа бол Германд сургууль төгссөн намайг бодвол амьдралыг арай өөр өнцгөөс хардаг бүсгүй л дээ.

Би өөрөөсөө байн байн л яагаад намайг хуурч байгаа юм болоо гэж асуусаар л. Энэ тухайгаа Сувдаад хэлтэл баахан шоолж инээж байснаа -Энэ эрчүүд чинь жаргалтай байгаагаа мэддэггүй тэнэг байхгүй юу. Заавал зовж байж амьдралд нь хэн хэрэгтэй вэ гэдгийг мэдэрдэг улс. Миний найз үнэхээр яагаад гэдгийг нь мэдмээр байвал маргааш ажлаа тараад манай ажил дээр хүрээд ир гэлээ. Би юу гэхэв дээ. За л гэлээ. Харин орой нь нөхрөө харсан чинь Сувдаагийн хэлсэн арай л хэтрүүлэг юм шиг. Үр хүүхэддээ хайртай хааяадаа л оройтож ирдэг хүн чинь ямар завандаа намайг хуурах юм бэ гэж бодохоор нэг л итгэж өгөхгүй байсан ч асууж бас зүрхлэхгүй байв.

Ингээд даваа гарагийн орой ажлаа тараад нөхөртөө найзийнхаа төрсөн өдөрт явлаа гээд Сувдаагийн ажил дээр очлоо. Бид 2 яриа өрнүүлээд сууж болохоор аятайхан газар хайж 50 дугаар дэлгүүрийн зүүн талд нэг дажгүй япон хоолны газар орлоо. Сувдаа утсаар хэн нэгэнтэй ярьж байв. Би найзтайгаа хамт байна. Тэгвэл хүрээд ир л дээ гээд л аальгүйтээд байх юм. Би анхнаасаа л нөхрөөсөө өөр эр хүн мэддэггүй болохоор Сувдаагийн олон залуутай аальгүйтээд байдаг энэ занг нь нэг их таашааадаггүй байлаа.

Удсан ч үгүй бидэн дээр 2 залуу нэмэгдэн ирвээ. Бас л ажлаасаа шууд ирсэн бололтой костюм өмссөн, өндөр нуруутай, махлагдуу ч тарган биш ер нь аятайхан залуус байв. Гэхдээ харваас бид 2-оос насаар дүү гэдэг нь илт байлаа. Сувдаа намайг нөгөө 2 залуутайгаа танилцуулж 4-үүлээ нийлээд найрлаж гарлаа. Зочин 2 залуу маань юуны ч гэлээ нэг компаны хувь нийлүүлэгчид гэнээ. Найз хүүхэнтэйгээ аминчхан ярих гэтэл өөр хүн дуудсанд нь жаахан гомдож байсан ч нэг мэдэхэд л мартаж орхижээ. Дэргэд маань насаар дүү аятайхан залуу суучихсан, миний ярихыг анхааралтай чагнаж, байн байн хундага дүүргэж байхад сэтгэлд таатай санагдаж байваа. Цаг ч нэлээн орой болж харих болоход нэг залуу нь намайг хүргэж өгөхөөр болж жолоочоо дуудлаа. Гэрийн үүдэнд ирэхэд Эрдэнээ (танилцсан залуу) машинаас бууж миний талын хаалгыг онгойлгож өгөөд гараас минь атгаж, ахин уулзаж болох уу гэж асуулаа. Би чимээгүйхэн толгой дохиод л гэр лүү орлоо. Зүрх хүчтэй цохилж амаар гарчих шахан булгилж байв. Сонин юм шүү. Энэ мэдрэмжийг хамгийн анх нөхөртөө үнсүүлэхэд л мэдэрч байсан юм.

Ингээд Эрдэнээ бид 2 хааяа уулзаж хоолонд ордог, хамтдаа зугаалж элдэвийг ярин суудаг боллоо. Орой бүр сайхан амраарай миний хонгор, өглөө бүр сайхан амарсан уу. Өглөөний мэнд гэсэн мэссэжийг утас руу минь илгээдэг боловоо. Би ч өөрөө өөртөө тавих анхаарал улам ихэссэн. Саяхан л нөхөртөө хаягдахаас айж сандарч байсан сэтгэл нэг л мэдэхэд үгүй болжээ. Миний өөрөө өөртөө итгэх итгэл маань цаг тутам нэмэгдэж, илүү эрч хүчтэй болж байлаа. Эрдэнээ бол ухаалаг, өөрийн гэсэн бодолтой нийгэмд эзлэх тодорхой байрь суурьтай эмэгтэй хүнийг маш ихээр хүндэлдэг байв. Хаалга байнга онгойлгож өгнө. Бас миний таалагддаг зүйлийг л хийдэг, үнэхээр халамжтай залуу байсан болохоор би ч дасаж эхэллээ. Сүүлдээ миний энэ байдлыг нөхөр маань гадарлаж байгаа бололтой хаачаад ирснийг минь байнга асууж, утсыг нь шалгадаг болов. Нэг өдөр тэвчилгүй чи өөрийнхөө замаар би өөрийнхөө замаар, хал балгүй л явъя. Чи л өөрөө эхэлсэн. Би чамтай чамгүй сайхан амьдарч чадна гэж хэлээд орхилоо. Нөхөр маань гайхаж байгаа бололтой нүдээ том болгож ирээд, ам нь хий ангалзаад л өнгөрлөө. Үүнээс хойш нөхөр маань намайг аргадаж гүйх болсон доо. Өдөр бүр миний хайртай хань юу хийж байна. Хамт хооллох уу гэж утсаар ярьна. Орой унтах болохоор миний биеийн сайхныг магтаад л…

Зун амрахаараа Бали руу явж амрана шүү гээд л. Хамт амьдраад 10 жил болж байхад нэг ч удаа тэгж нялуун үг хэлж байсныг нь санахгүй юм. Нөхөр маань төрөл арилжчихсан юм шиг болчихов. Энэнийг нь харахаар өрөвдөөд байдаг боллоо.

Нэг өдөр Сувдаа манай ажил дээр ирлээ. 2-уулаа өнөө газраа орж жаахан ярьж сууваа. Би ч өөрт тохиолдоод байгаа бүхнээ ний нуугүй л ярилаа. Эрдэнээд сайн болсноо, нөхрөө харахаар өрөвдөөд байгаа гээд л бүгдийг нь. Сувдаа харин энэ удаад их анхааралтай сонсож байв. Тэгээд “Миний найзаа одоо ингээд зогссон нь дээр байхаа. Найз нь чамд нууц амраг гэдэг амьдралд яагаад гарч ирээд байдгийг ойлгуулж, нөхрийг чинь ч ухааруулах гэсийн. Харин хүүхдүүдийг чинь өнчрүүлж гэр бүлийг чинь салгах гээгүй юм шүү ” гэлээ.

Энэ ярианы дараа би их зүйл эрэгцүүлж бодлоо. Нээрээ л хүн гэдэг нэг хэвийн амьдралаас өөрөө ч мэдэхгүй залхаж л байдаг юм байна. Тэгээд нэг л өдөр өөр шинэ содон зүйл тааралдахаар түүнд амархан татагдаж сэтгэл алдраад л… Тиймээ би үүнийг өөрөө туулаад өнгөрлөө шүүдээ. Эрдэнээ бол миний хувьд өөртөө итгэх итгэлийг нь төрүүлж, санаанд оромгүй романтик болзоогоор зүрх сэтгэлийг минь цэнэглэж чадсан хүн байлаа. Би ч гэсэн Эрдэнээг энэ сайхан залуу чигээр нь л дурсахыг хүсэж байна. Тиймээ би Эрдэнээд ухаан алдан дурласан ч эр нөхрөө болгож гэр бүлийн нэгэн хэвийн харилцаанд орохыг хүсээгүй. Яагаад нөхөр маань намайг хуурсныг би одоо маш сайн ойгож байлаа. Нууц амраг гэдэг хэзээ ч эхнэрээс илүү төгс сайхан мэт санагддаг. Учир нь тэр чамайг хараад ялдам инээмсэглэдэг, хэзээ ч хүүхдүүдийн сурлага хүмүүжлийн талаар гомдолдоггүй, гэрт хэрэгтэй байгаа хүнс ногоо болон бусад зүйлсийн талаар ярьж залхаадаггүй болохоор л. Бас мартагдах шахсан хайр дурлалын тэр сайхан мэдрэмжүүдийг ахин төрүүлдэгболохоор…

Мэдээж айл бүр ийм байх албагүй л дээ. Гэхдээ бүсгүйчүүддээ л гэж хэлэхэд бид л өөрсдөө амьдралаа сайн сайхан болгож чадах увидастай байдаг юм байна шүү дээ.

sekc.mn