Bolod.mn сайт өнгөрсөн долоо хоногт болж өрнөсөн онцлох үйл явдлыг тоймлон хүргэж байна. Монголчууд гуравдугаар сарын 1-ны өдрийг Эх орончдын өдөр хэмээн зарлан тунхагласан байдаг бөгөөд мөн энэ өдөр МАН-ын 100 жилийн ойн баяр тохиосон билээ. Түүнчлэн улс даяар вакцинжуулалтын ажил үргэлжлэн явагдаж байгаа бөгөөд хөдөө орон нутгийн цэцэрлэг, сургуулийн үйл ажиллагаа эхэлсэн онцлох үйл явдал бүхий ДОЛОО ХОНОГ байв.

- Орон нутгийн сургууль, цэцэрлэгийн хичээл эхэллээ

Аймаг, сум, тосгон, багийн цэцэрлэг, сургуулийн хичээл, сургалтын үйл ажиллагаа гуравдугаар сарын 1-ны өдрөөс халдвар хамгааллын дэглэм баримтлан эхэлж байна. Танхимын сургалтыг зөвхөн хоцрогдол арилгах чиглэлээр хэсэгчилсэн байдлаар явуулна. Хүүхэд, эцэг, эх, асран хамгаалагч нь танхим, теле болон цахим сургалтын алинд нь хамрагдахаа сонгох юм.

Харин орон нутаг дахь их, дээд сургууль, коллеж, мэргэжил сургалт, үйлдвэрлэлийн төв хичээллэхгүй. Боловсрол, шинжлэх ухааны яам нийслэлийн ерөнхий боловсролын сургуулийн хичээлийг 2021 оны гуравдугаар сарын 10-ны өдрөөс эхлүүлэхээр бэлтгэлээ хангажээ.

Нэг хичээлийн жилд сурагч 165-180 хоног хичээллэх ёстой бол өнгөрсөн жил сурагчид 80 хоногт нь цахим, теле хичээлд хамрагджээ. Ингэснээр, сурагчдын 70-80 хувь нь хичээлийн хоцрогдолд ороод буйг Боловсрол, шинжлэх ухааны сайд Л.Энх-Амгалан хэлж байв. Үүнээс гадна цахим, теле хэлбэрээр хичээл орох үед 174 мянган хүүхэд гар утас, компьютергүй, эсхүл интернэт, сүлжээгүй газар байгаа гэсэн судалгаа гарчээ.

- Эх орончдын өдөр тохиолоо

Монгол Улс жил бүрийн гуравдугаар сарын 1-нийг Эх орончдын өдөр болгон тэмдэглэдэг. Энэ өдөр Монгол Улсад улс төрийн ууган хүчин болон Монгол Ардын нам үүсэн байгуулагдсаны 100 жилийн ой тохиож байна. 1921 оны энэ Монгол Ардын намыг албан ёсоор байгуулж 1921 оны Ардын хувьсгалаас хойш уг нам Монголын төрийг 70 жил удирдсан юм.

2004 онд УИХ Нийтээр тэмдэглэх баяр болон тэмдэглэлт өдрүүдийн тухай хуульд нэмэлт өөрчлөлт оруулж, жил бүрийн 3 дугаар сарын 01-ний өдрийг “Эх орончдын өдөр” болгон тэмдэглэх шийдвэр гаргасан билээ.

2010 оны 11 дүгээр сард МАХН хуучин нэрээ сэргээж, МАН болох шийдвэр гаргасан. Үүнийг эсэргүүцсэн тус намын хэсэг нөхөд нэгдэн МАХН-ыг бие даан байгуулсан юм. 2016 оны хоёрдугаар сарын 25-нд МАН болон МАХН-ын удирдлагууд “Эх орончдын өдөр”-ийг хамтран тэмдэглэх Санамж бичигт гарын үсэг зуржээ.

Түүнчлэн энэ өдөр Жанжин Д.Сүхбаатарын хөшөөнд цэцэг өргөж, хүндэтгэл үзүүлдэг уламжлалтай билээ.

- Дубайн гэрээг Ерөнхийлөгчийн сонгуулиас өмнө өөрчилнө

"Рио Тинто" болон Монгол Улсын Засгийн Газар "Дубайн гэрээ" буюу Оюутолгойн Далд уурхайн бүтээн байгуулалт, Санхүүжилтийн төлөвлөгөө болох Дубайн гэрээг цуцалж, шинэ гэрээ байгуулахаар тохиролцсон тухай Японы хэвлэл энэ сарын 2-ны өдөр мэдээлсэн билээ.

Тодруулбал Засгийн Газрын Хэрэг Эрхлэх Газрын Дэд дарга Японы хэвлэлд тайлбар өгөхдөө: "Талууд 2015 оны хэлэлцээрийг цуцалж, шинээр байгуулахаар тохиролцсон. Энэ хүрээнд "Рио Тинто" зээлийн хүү болон менежментийн төлбөрийг бууруулахад бэлэн байгаагаа илэрхийллээ" хэмээсэн юм.

"Рио Тинто" талаас тус компаний Зэсийн группийн захирал Б.Болд удирдан, Монгол Улсын Засгийн газартай яриа хэлэлцээ хийж буй аж. Эх сурвалжуудын өгүүлж буйгаар Монгол Улсын Засгийн Газар "Дубайн гэрээ"-г Монгол Улсын Ерөнхийлөгчийн 2021 оны сонгуулиас өмнө цуцалж, өөрчлөх төлөвлөгөөтэй ажиллаж байгаа юм байна.

- УИХ-ын гишүүд “AstraZeneca” вакциныг хийлгэнэ

Монгол Улсад Covid-19-ийн эсрэг вакцинжуулалтыг ажлыг өнгөрсөн сарын 23-аас эхлүүлсэн бөгөөд Ерөнхий сайд Л.Оюун-Эрдэнэ Covid-19-ийн эсрэг дархлаажуулалтын "AstraZeneca" вакцины анхны тунг хийлгэсэн. Эхний удаад зорилтот бүлгийн 16 байгууллагын 14092 хүнийг хамруулахаар төлөвлөсөн. Үүнээс гуравдугаар сарын 2-ны өдрийн байдлаар 9531 хүн вакцинжуулалтад хамрагдаад байна.

Эхний ээлжинд эмч, онцгой байдал, цагдаа нарыг вакцинжуулах хуваарьтай ч УИХ-ын гишүүд энэ сарын 9-нөөс 14-ны хооронд "AstraZeneca" вакцины эхний тунг хийлгэхээр болжээ. Одоогоор Эрүүл мэндийн салбарын нийт ажилчдад хийх вакцинжуулалт дуусаагүй байгаа юм. Гишүүдийн дараа УИХ-ын Тамгын газрын ажилтнуудад вакцин хийхээр төлөвлөжээ.

- “Мартын 8”-ныг хавтгайруулан тэмдэглэхгүй байхыг Шадар Сайд С.Амарсайхан уриаллаа

Монгол Улсын Шадар Сайд, Улсын Онцгой Комиссын дарга, УИХ-ын гишүүн С.Амарсайхан уриалга гаргалаа. Хөл хорио тогтоож, өрх бүрээс шинжилгээ авч, аж ахуйн нэгжүүдээ 95% хүртэл нээж ажил амьдралын хэвийн горимд шилжээд удаагүй байна.

Олон улсын эмэгтэйчүүдийн эрхийг хамгаалах өдөр" буюу “Мартын 8”-ны баярыг ХАВТГАЙРУУЛАН тэмдэглэж, өөрийгөа болон гэр бүлээ эрсдэлд оруулахгүй, хариуцлагатайгаар татгалзахыг ЭРЧҮҮД, ЭМЭГТЭЙЧҮҮДЭЭСЭЭ уриалж байна.

Байгууллага, хамт олон, иргэн, аж ахуйн нэгжүүд шар түвшинд ухамсартайгаар халдвар хамгааллын дэглэмийг мөрдөж ажиллах нь үйл ажиллагаагаа цаашдаа хэвийн явуулах, ажил амьдрал хэвийн үргэлжлэх, улбар шар, улаан түвшинд шилжихгүй байх боломжийг бүрдүүлнэ." гэжээ.

- “Оюутолгой” ХХК нь татварын албанаас ногдуулсан 649.4 тэрбумын торгууль алдангийг барагдууллаа

Татварын алба “Оюутолгой” ХХК-ийн 2016-2018 оныг дуусталх хугацааны албан татварын ногдуулалт, төлөлтийн байдалд татварын хяналт шалгалт хийж, нөхөн ногдуулалтын актаар 649.4 тэрбум төгрөгийн нөхөн татвар, торгууль, алданги ногдуулсан. “Оюутолгой” ХХК-аас 2021 оны 02 дугаар сарын 25-ны өдөр эхний 229.8 тэрбум төгрөгийн татварын орлогыг төрийн сангийн дансанд байршуулсан бол, 03 дугаар сарын 04-ний өдөр үлдэгдэл 419.2 тэрбум төгрөгийн үлдэгдлийг шилжүүлсэн байна. Ингэснээр Монголын Татварын Ерөнхий Газраас тус компанид 2020 оны 12 дугаар сарын 24-ний өдөр 228 сая ам.доллар буюу 648.9 тэрбум төгрөгийн татварын акт тавьсныг барагдуулж дууслаа.

Татварын ерөнхий газраас 2020 онд ногдуулсан актуудын үндэслэлээс заримыг нь дурдвал

Менежментийн төлбөрт суутгалын татвар ногдуулаагүй 164.7 тэрбум төгрөг,
Туркойз Хилл Ресурс компанид төлсөн зээлийн хүүд суутгалын татвар бүрэн ногдуулаагүй зөрчилд 179.4 тэрбум төгрөг,
Ашигт малтмалын тухай хууль, Хөрөнгө оруулалтын гэрээний заалтыг дагаж мөрдөөгүй зөрчилд 46.7 тэрбум төгрөг зэргийг тооцож, ногдуулжээ.

Оюутолгой төслийн хөрөнгө оруулагч, менежментийг хэрэгжүүлэгч "Рио Тинто" компанид Монгол Улсаас гадна Австрали улсын Татварын ерөнхий газраас мөн 320 орчим сая ам.долларын татварын акт ногдуулаад байгааг "Рио Тинто" энэ сарын 2-ны өдөр мэдээлсэн байна.

- Долларын ханш 86.56 төгрөгөөр өсчээ

2021 оны эхний байдлаар Монголбанкнаас зарласан сарын дундаж валютын ханш 2,849.82 төгрөг байсан бол өнгөрөгч хоёрдугаар сард 2,849.73 төгрөгтэй тэнцэж байна. 2021оны гуравдугаар сарын 1-ны Монголбанкнаас гаргасан ханшаар:

АНУ-ын доллар 2,849.27

Евро 3,458.02

Английн фунт 3,964.33

ОХУ-ын рубль 38.29

БНХАУ-ын юань 440.63

Тус тус байгааг өмнөх оны мөн үе болох 2020 оны гуравдугаар сарын 01-ны өдрийн ханштай харьцуулбал:

АНУ-ын доллар 2,762.71

Евро 3,039.26

Английн фунт 3,555.19

ОХУ-ын рубль 41.16

БНХАУ-ын юань 394.75

Буюу АНУ-ын доллар 86.56, Евро 418.76, Английн фунт 409.14, БНХАУ-ын юань 440.63 төгрөгөөр тус улсуудын мөнгөн тэмдэгттэй харьцах төгрөгийн ханш суларсан бол ОХУ-ын рубльтэй харьцах төгрөгийн ханш -2.87 төгрөгөөр чангарсан байна.

- “Аавыгаа зарна” зарыг нийтэлсэн “Шуурхай зар” сонинг 5 сая төгрөгөөр торгожээ

“Шуурхай зар” сонины ... дугаарт “Аав зарна” гэсэн зар тавигдсан. Тухайн зар тавиулсан иргэн “Асарч чадахгүй болсон тул аавыгаа зарна. Элдэв өвчингүй” гэсэн байсан юм. Уг зарыг кино контентын сурталчилгаа гэх тайлбар байгаа боловч хүн зарах талаар хэвлэл мэдээллийн хэрэгслээр гаргаж байгаа нь хууль зөрчсөн үйлдэл болж байгаа юм.

Тодруулбал, Хүн худалдаалахтай тэмцэх тухай хуульд хүн худалдаалах гэмт хэрэг үйлдэгдэхэд хүргэхүйц бүх төрлийн хэвлэл мэдээллийн хэрэгсэл, холбоо, цахим сүлжээ ашигласан ил буюу далд зар сурталчилгаа тавихыг хориглоно гэж заажээ.

Мөн Зар сурталчилгааны тухай хуулийн 7.7.Хууль бус зар сурталчилгаа захиалах, бүтээх, түгээхийг хориглох бөгөөд энэ ангилалд хүнлэг ёс, ёс суртахуун, Монгол хүний эрхэмлэн дээдэлдэг зан заншлын ёс горимыг зөрчсөн бол хууль бус зар сурталчилгаа болно хэмээн заажээ.

Тэгвэл гуравдугаар сарын 4-ны өдөр буюу пүрэв гарагт Шударга өрсөлдөөн, хэрэглэгчийн төлөө газраас иргэд, олон нийтээс ирүүлсэн гомдлын дагуу хяналт, шалгалт хийж "Аав зарна" зарыг нийтэлсэн "Шуурхай зар" сонинг Зар сурталчилгааны хуулийг зөрчсөн тул 5.000.000 төгрөгөөр торгосоноо мэдэгдлээ.

Мөн санаачлага гарган хэвлэн нийтлүүлсэн байгууллагыг үргэлжлүүлэн шалгаж байгаа аж. Мөн уг киног олон нийтэд түгээх эсэх асуудлаар Соёлын яаманд хандахаа Шударга өрсөлдөөн, хэрэглэгчийн төлөө газраас мэдэгдсэн байна.

- МУГЖ Т.Ариунаа нөхрийн хамт суулт зарлалаа

МУГЖ Дуучин Т.Ариунаа энэ сарын 3-ны өдөр хэвлэлийн хурал зарлаж, хууль шүүхийн байгууллагын бүлэглэлүүд хэрхэн хүчгүйдүүлж байгаа талаар мэдээлэл өгсөн. Энэ үеэр Г.Буяндорж прокурорын байгууллага болон мөрдөн байцаах албанд ажиллаж байсан өмгөөлөгч нарын зохион байгуулалттай хууль бус үйлдэл, үйл ажиллагааны улмаас бүлэг этгээдүүдэд компаниа дээрэмдүүлэн алдсан талаар онцоллоо. Тэрээр залилуулсан гэдгээ мэдсэн даруйдаа хууль хяналтын байгууллагад хандсан ч өнөөдрийг хүртэл шалгуулсаар байгаа аж. Иймээс тэрээр Монгол Улсын Ерөнхий Прокурорт хандаж гурван албан шаардлага хүргүүлж, албан ёсоор өлсгөлөн зарлаж байгаагаа мэдэгдсэн юм. Түүнчлэн энэхүү шаардлагыг биелүүлтэл миний гэр бүл суулт зарлаж, миний бие өлсгөлөн зарлаж байна хэмээсэн юм.

BOLOD ДОЛОО ХОНОГИЙН ТОЙМ: МАН-ын 100 жилийн ой тохиож, орон нутгийн сургууль, цэцэрлэгийн үйл ажиллагаа эхэлсэн ДОЛОО ХОНОГ
Tweet
Bolod.mn