Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд нүүрсний хулгайн хэргийг эсэргүүцсэн иргэдийн жагсаал зургаа дахь өдрөө үргэлжилж өчигдрөөс буюу 12-р сарын 10-ны эхлэн зарим иргэд өлсгөлөн зарлаж суулт зарласнаа мэдэгдсэн. Мөн Засгийн газраас уг хэрэгтэй холбоотой зарим хүмүүсийн холбоо хамаарал бүхий этгээдүүдтэй нь шалгаж эхэлжээ. Эдгээр болон бусад онцлох үйл явдлуудыг тоймлон хүргэдэг уламжлалтай.

Шатахууны саванд түймрийн улмаас үүссэн лагийг соруулах үеэр хайж байсан хоёр иргэний цогцосыг олжээ

Дархан-Уул аймгийн Дархан сумын 3 дугаар багийн нутаг “Тэс петролиум” ХХК Шатахуун агуулах нөөцийн сав /резервуар/ дэлбэрсний улмаас гал гарч нэг ажилтан амиа алдсан бол хоёр ажилтныг хайж байгаа тухай ОБЕГ-аас мэдээлж байв. Тухайн саванд гал түймрийн улмаас үүссэн лагийг соруулах үйл ажиллагаа явуулсан. Энэ үеэр сав руу унасан байх магадлалтай хоёр иргэнийг эрэн хайх ажиллагаанд онцгой байдлын, цагдаа, эмнэлгийн байгууллага, “Тэс петролиум” компанийн ажилтнууд ажиллаж 49 настай, эрэгтэй, 43 настай, эмэгтэйн цогцсыг гарган Цагдаагийн газрын жижүүрийн бүрэлдэхүүнд шилжүүлэн өгчээ.

ОБЕГ-ын Гал түймэртэй тэмцэх хэлтсийн алба хаагчид “Тэс петролиум” ХХК-ийн шатахуун агуулах нөөцийн саванд үлдсэн АИ-92 бензинийг соруулах ажиллагааг гал гарсан өдрийн 23:25 цагаас эхлэн арванхоёрдугаар сарын 2-ны 20:00 цаг хүртэл 372 тонныг 40 тоннын есөн авто цистернээр соруулж, тухайн компанийн хашаанаас гарган, цагдаагийн хамгаалалтад авсан байна.

Нүүрсний хулгайн асуудлаар нээлттэй сонсгол хийхээр болжээ

УИХ-ын дарга Г.Занданшатар нүүрсний хулгайн асуудлаар олон нийтийн нээлттэй сонсгол зохион байгуулах захирамж гаргажээ. Тодруулбал, нээлттэй сонсголыг явуулахдаа Хилийн боомтын асуудлаарх УИХ-ын хянан шалгах түр хорооны дүгнэлтэд үндэслэн, олон улсын болон иргэний нийгмийн байгууллагууд, салбарын мэргэжилтнүүд, судлаачдын төлөөллийг багтаан, яаралтай зохион байгуулах чиглэлийг өгчээ. УИХ-ын дарга онцлохдоо “Уул уурхайн олборлолт явагддаг аймаг бүрийн төлөөллийг багтааж, нүүрсний хулгайн эсрэг нийтийн оролцоотойгоор тэмцсэнээр хөшигний цаана, халаасан дотор өрнөдөг олон асуудлуудыг ил тод болгоно” гэв. Олон нийтээс дэвшүүлсэн, нийгэмд анхаарал татсан асуудлуудаар нээлттэй сонсгол явуулж, улмаар гэрч дуудах эрх бүхий тусгай хяналтын дэд хороог байгуулан, баримтуудыг ил болгож, хяналт тавих эрх УИХ-ын Хяналт шалгалтын тухай хуулиар баталгаажсан.

Уг хуулийн хүрээнд анхлан Хөгжлийн банкны асуудлаар УИХ-аас нээлттэй сонсгол зохион байгуулж байсан нь саяхан. Гэвч Хөгжлийн банкны дээрмээс хэд дахин том тоо яригдах нүүрсний луйврын эсрэг тэмцэл ийнхүү нээлттэй сонсголоор үргэлжилбэл бодит үр дүнд хүрэхэд ойртоно гэж үзэж буй. Тиймээс УИХ, Засгийн газар нийт иргэдийн мэдэх эрхийг хангаж, нүүрсний хулгайн асуудлаар нээлттэй сонсгол явуулснаар авлигачдад хариуцлага тооцож, нийтийн оролцоотойгоор шударга ёс, шинэ жишиг тогтоох чухал алхам болох юм.

Эрдэнэс таван толгой компанийн захирал асан Б.Ганхуягийг саатуулжээ

Авлигатай тэмцэх газар "Эрдэнэс-Тавантолгой" компанийн гүйцэтгэх захирал асан Б.Ганхуягийг өнөөдөр үүрээр саатуулжээ. Тэрбээр 2017 оноос эхлэн "Эрдэнэс Тавантолгой" компанийн гүйцэтгэх захирлаар томилогдон ажиллаж байгаад Засгийн газраас 2022 оны 10 сард тус компанид Бүрэн эрхт төлөөлөгч томилогдон ажиллах болсноор чөлөөлөгдсөн юм. Түүнийг АТГ нүүрсний гэх хэрэгт холбогдуулан шалгаж 48 цагийн хугацаатай саатуулжээ. Мөн Авлигатай тэмцэх газар, Цагдаагийн ерөнхий газар хамтран өчигдөр шөнө нүүрсний хэрэгтэй холбоотойгоор томоохон гүйцэтгэх ажиллагаа явуулсан байна. Энэ үеэр найман хүнийг баривчилж, Цагдан хорих 461 дүгээр ангид саатуулсан гэдэг мэдээлэл байна. "Эрдэнэс силвер ресурс" ХХК-ийн захирал асан Т.Мөнхбаяр, "Эрдэнэс Тавантолгой" ХК-ийн захирал асан Б.Ганхуяг, түүний эхнэр, мөн эгч Б.Нарантуяа, хүргэн Д.Пүрэвдорж, "Эрдэнэс Тавантолгой" ХК-ийн албаны дарга С.Энхтөр, "Сагсайс Редер" ХХК-ийн захирал С.Энхтүвшин, "Хишиг арвин индустрал" ХХК-ийн эзэн Б.Хишигдорж, тус компанийн гүйцэтгэх захирал М.Хүрэлбаатар нарыг баривчилжээ. Тэдний гэр оффист хийсэн нэгжлэгээр онц их хэмжээний мөнгө, бусад хориотой хэрэгсэл илэрчээ. Мөн тэдний нэг нь жагсаал зохион байгуулахад гол үүрэн гүйцэтгэсэн нь урьдчилсан байдлаар тогтоогдоод байгаа тухай мэдээлэл байна.

Дэлхийн хүн амын найман тэрбум болсон өдөр Австралид мэндэлсэн монгол хүү төрсний гэрчилгээгээ авчээ

Дэлхийн хүн ам 2022 оны арваннэгдүгээр сарын 15-нд найман тэрбумд хүрсэн билээ. Тухайн өдөр Австрали улсын Канберра хотод мэндэлсэн А.Мэргэн хүү Монгол Улсын Элчин сайдын яаманд аав, ээж, эмээгийнхээ хамт очиж төрсний гэрчилгээгээ авчээ.

"Дэлхийн найман тэрбум дахь иргэнийг нарийн тодорхойлох боломж байдаггүй учир энэ өдөр төрсөн хүмүүсийг хамруулдаг юм байна" хэмээн хүүгийн аав Б.Ананд хэвлэлд өгсөн ярилцлагадаа хэлж байв. Австрали дахь Монгол Улсын Элчин сайдын яам Нэмэлт мэдээлэл хүргэхэд, 2030 онд дэлхийн хүн амын тоо 8.5 тэрбум, 2050 онд 9.7 тэрбум, 2080 онд 10.4 тэрбумд хүрч, 2100 он хүртэл энэ хэмжээндээ байх тооцоог НҮБ гаргасан байдаг.

Монгол Улс Чингис бондын 1.5 тэрбум ам.долларын өрийг бүрэн төлснийг Ерөнхий сайд мэдэгдэв

Монгол Улсын Ерөнхий сайд Л.Оюун-Эрдэнэ цаг үеийн асуудлаар мэдээлэл хийж байна. Мэдээллийн эхэнд тэрбээр "Миний бие дөнгөж сая Сангийн сайдад Чингис бондын өрийн үлдэгдэл болох 136 сая ам.долларын гүйлгээ шилжүүлэх эрх олгосон захирамжид гарын үсэг зурлаа. Ингэснээр Монгол Улс өнөөдөр Чингис бондын 1.5 тэрбум ам.долларын өрийг бүрэн төлж барагдууллаа. Хөгжлийн Банканд үүссэн чанаргүй зээлийн эргэн төлөлт 805 тэрбум төгрөгт хүрч шийдэгдэж, Самурай бондын 223 сая ам.долларын өрийг төлөхөд бэлэн болж, Монголбанканд байршуулснаар Хөгжлийн Банк дампуурах эрсдэлээс аврагдаж байна. Өөрөөр хэлбэл, Хөгжлийн Банкны өрийн нэг хэсэг өнөөдөр ингээд төлөгдөж байна" гэлээ.

Үүнтэй холбоотойгоор Хөгжлийн Банкнаас "Монгол Улсын Хөгжлийн банк нь 2013 онд Засгийн газрын баталгаатай, 10 жилийн хугацаатай, жилийн 1.5%-ийн хүүтэй 30 тэрбум иенийн “Самурай” бондыг олон улсын зах зээлд арилжаалсан. Тус бондын үндсэн төлбөрийг ирэх онд буюу 2023 оны арванхоёрдугаар сарын 25-ны өдөр төлөх хуваарьтай. Хөгжлийн банкнаас олгосон зээлийн эргэн төлөлтийг 2022 оны нэгдүгээр улирлаас эхлэн Монголбанкан дахь Төрийн сангийн иений тусгай дансанд байршуулаад байна. “Самурай” бондын үндсэн төлбөр болох 30 тэрбум иен нь өнөөгийн ханшаар нийт 751.5 тэрбум төгрөг бөгөөд Хөгжлийн банкны зээлийн эргэн төлөлтөөр бондын үндсэн төлбөрийг бүрэн төлөх боломжтой боллоо" гэв.

УИХ-ын гишүүн асан Ж.Батзандан хорих 461 дүгээр ангиас суллагдлаа

УИХ-ын гишүүн асан Ж.Батзандан, түүний туслах Г.Аюулгүй нарыг цагдан хорих хугацаа дуусаж байгаа учир яллагдагч Ж.Батзандан, Г.Аюулгүй нарыг үргэлжлүүлэн хорих эсэхийг өчигдөр Чингэлтэй дүүргийн Эрүүгийн хэргийн анхан шатны шүүх хэлэлцэж, прокуророос тэднийг үргэлжлүүлэн хорих санал гаргасныг хүлээж авахаас татгалзаж шийдвэрлэсэн.

Тэгвэл УИХ-ын гишүүн асан Ж.Батзандангийн цагдан хоригдох хугацааг өнөөдөр дуусаж байгаа юм. Тиймээс тэрбээр ШШГЕГ-ын харьяа хорих 461 дүгээр ангиас өнөөдөр суллагдах юм.

BOLOD ДОЛООГИЙН ТОЙМ: Нүүрсний хулгайг эсэргүүцсэн иргэдийн жагсаал 6 ДАХЬ өдрөө үргэлжилж, хэргийн холбогдогчдыг шалгаж эхэллээ
Tweet
Bolod.mn