Өөрөөр хэлбэл, өнөөдрөөс хойш ажлын таван өдөрт багтаан Ерөнхийлөгч хуульд хэсэгчлэн болон бүхэлд нь хориг тавих, үгүйгээ шийднэ.

Хэрвээ Ерөнхийлөгч хориг тавилбал хоригийг УИХ-аар хэлэлцэж, чуулганд оролцсон нийт гишүүний гуравны хоёр нь хүлээж авахгүй бол уг хууль хүчин төгөлдөр хэвээр үлдэнэ. Гэхдээ Н.Учрал гишүүн дур мэдэн, энэ хуулийг батлуулаагүй. Өөрөөр хэлбэл, Засгийн газрын хуралдаанд танилцуулж, хэлэлцэж байж хуулийн төслийг Их хуралд өргөн барьдаг. Н.Учрал сайд Олон нийтийн сүлжээнд хүний эрхийг хамгаалах тухай хуулийг Их хуралд өргөн бариад гуравхан хоногийн дотор батлуулсан. Тэр бяртайдаа, эрх мэдэлтэйдээ бус намын дарга нар санал нэгдэж, чиглэл болгосон учраас л энэ богинохон хугацаанд хуулиа батлуулж чадсан. Өөрөөр хэлбэл, Н.Учрал гэж хувь сайдаас илүү энэ хууль МАН-ын бодлогоор батлагдсан хууль.

Тэрээр Олон нийтийн сүлжээнд хүний эрхийг хамгаалах тухай хуулийг ҮАБЗ-ийн зөвлөмжөөр оруулж ирсэн гэж тайлбарласан ч Ерөнхийлөгчийн Тамгын газраас үүнийг үгүйсгэсэн. Тиймээс хуульд Ерөнхийлөгч хориг тавьж чадах, эсэх нь олон нийтийн анхаарлын төвд байна. Олон нийтийн сүлжээнд хүний эрхийг хамгаалах тухай хуульд Ерөнхийлөгч хориг тавихыг дэмжиж өргөдөл гаргасан иргэдийн тоо хоёрхон хоногийн дотор 3400 орчим болжээ.

Нөгөө талаар Н.Учрал гишүүн Их хуралд нэр дэвшихээсээ өмнө одоогийн Ерөнхийлөгчийн багт ажиллаж байсан. Шуудхан хэлэхэд, тэрээр улстөрд У.Хүрэлсүхийн хүн. Ерөнхийлөгчийг Шадар сайдаар ажиллаж байхад хэвлэлийг нь хариуцан ажилладаг байсан. Ийм хамааралтай хоёр хүн олон нийт асар их эсэргүүцэж байгаа хууль дээр таарлаа. Ерөнхийлөгч өөрийн нэр хүндийг бодож, олон нийтийн эсэргүүцээд байгаа хуульд хориг тавих уу, эсвэл намынхаа бодлогоор баталсан хуулиа хамгаалах уу гэдгийг харъя.