•Эрдэнэт хотыг камержуулах ажлын хүрээнд 1.3 тэрбум төгрөгийн өртөгтэй камержуулалтын ажлыг "Мэйжик нет” ХХК гүйцэтгэж Эрдэнэт хотын хэмжээнд нийт 110 цэгт 125 ширхэг камер суурилуулан хүлээлгэн өглөө. Цаашид энэ оны 5-р сард нэмж 33 камер суурилуулах бөгөөд нийт 158 камераар эхний ээлжинд хотын аюулгүй байдлыг хангах, гэмт хэрэг зөрчлөөс урьдчилан сэргийлэх ажилд хяналт тавин ажиллах болно. Мөн аймгийн Цагдаагийн газрыг бүрэн тоноглогдсон зөөврийн камертай автомашинтай болгов.

•Орхон аймаг,Уулын баяжуулах "Эрдэнэт” үйлдвэр ХХК 2013-2017 онд хамтран ажиллах гэрээг байгууллаа. Тус гэрээний хүрээнд Орхон аймаг Эрдэнэт хотоо хөгжүүлэх, иргэдийн амьдрах ая тухтай орчныг бүрдүүлэхэд "Эрдэнэт” үйлдвэрийг түшиглэн үйлдвэрлэл хөгжүүлэх, ажлын байр бий болгох, иргэдийнхээ орлогыг нэмэгдүүлэх зорилгоор Эрдэнэт үйлдвэрлэл технологийн парк байгуулахад хамтран ажиллах, Эрдэнэт үйлдвэрийн санхүүжилтээр баригдаж байгаа олон улсын жишигт нийцсэн эрүүл мэндийн Оношлогооны төвийг хамтран ашиглалтад оруулснаар иргэдийн гадаад улс оронд хийлгэдэг оношлогоог Эрдэнэт хотдоо хийдэг болох, Эко хороолол байгуулах болон Эрдэнэт хотын Цэвэрлэх байгууламжийн өргөтгөлийн ажилд хамтран оролцох зэрэг олон асуудлуудыг дээрх гэрээнд тусгалаа.

•2013 оны 03-р сарын 20-ны өдрөөс эхлэн аймгийн Засаг даргын Тамгын газар "Иргэд санал хүсэлтийг хүлээн авах төв” байгуулж иргэдийн саналыг бичгээр болон цахим хэлбэрээр авч байна. Иргэдийн санал хүсэлтийг авах 70353511 дугаарын шууд утсыг өргөжүүлэн албан ёсны 2 дуудлага хүлээн авагч ажилтантайгаар ажиллуулж эхлээд байгаа ба иргэдийг хоногийн 24 цагийн турш санал хүсэлтээ илэрхийлэх боломжоор хангалаа.

•Аймгийн Засаг даргын Тамгын газар Мobicom-ын салбартай хамтран "Эрдэнэт хотын гэр хороолол, орон сууцны дундах дэлгүүрүүдэд архи, согтууруулах ундаа худалдаж байгаа нь зөв үү? буруу юу?” гэсэн асуудлаар аймгийн нийт иргэдийн дунд судалгааг явуулсан бөгөөд судалгаанд 9125 хэрэглэгч саналаа илэрхийлснээс 71.3 хувь нь гэр хороолол, орон сууцны дундах дэлгүүрүүдэд архи согтууруулах ундаа худалдаалахыг хориглох нь зөв гэсэн хариулт өгсөн байна. Энэхүү санал асуулгын дүнг цаашид орон нутгийн хэмжээнд гарах холбогдох шийдвэрүүдэд тусгахаар ажиллаж байна.

•Орхон, Булган аймгийн Засаг дарга 2013-2016 онд хамтран ажиллах гэрээ байгууллаа. Энэхүү гэрээгээр хоёр аймгийн хэмжээнд тулгамдаж байгаа газар нутаг бэлчээр, байгаль орчин, иргэдийн түлшний мод бэлтгэлийн асуудал, аж ахуйн нэгж байгууллагуудын хамтын ажиллагааг зохицуулах, нийгмийн салбарын үйлчилгээнд тулгамдаж байгаа асуудлуудыг үе шаттайгаар шийдвэрлэхээр болж байна.

2. Удирдлага, зохион байгуулалт, эдийн засгийн бодлогын хүрээнд:

Аймгийн ИТХ-ын ээлжит VI хуралдаанаар аймгийн хэмжээнд гэмт хэргээс урьдчилан сэргийлэх, нийгмийн дэг журам, сахилга хариуцлагыг сайжруулах 2009-2012 оны ажлын төлөвлөгөөний биелэлт, энэ талаар 2013-2017 онд баримтлах бодлогын талаарх асуудлыг хэлэлцүүллээ. Дээрх бодлогыг хэрэгжүүлэхийн тулд нийт 4 зорилтын хүрээнд 38 арга хэмжээг авч хэрэгжүүлэхээр төлөвлөв.

Мөн 3-р сард хуралдсан аймгийн Засаг даргын зөвлөлийн 2 удаагийн хуралдаанаар нийт 5 асуудлуудыг хэлэлцэн, холбогдох байгууллага, албан тушаалтанд үүрэг даалгавар өгч ажиллаж байна.

Аймгийн Засаг даргын 2012 оны үйл ажиллагаанд хяналт шинжилгээ үнэлгээ хийж, тайланг ЗГХЭГ-ын Хяналт шалгалт, үнэлгээ, дотоод аудитын газарт хүргүүллээ. 2012 оны байдлаар Засгийн газрын үйл ажиллагааны хөтөлбөрийн хэрэгжилт 98.0, аймгийн Засаг даргын үйл ажиллагааны хөтөлбөрийн хэрэгжилт 93.8, Мянганы хөгжлийн зорилтод суурилсан үндэсний хөгжлийн цогц бодлогын хэрэгжилт 75.0 Үндэсний хөтөлбөрийн хэрэгжилт 82.8, Засгийн газрын тогтоол шийдвэрийн хэрэгжилт 87.9 хувьтай биелсэн байна.

Эхний 3 сарын байдлаар аймаг, сумдын Засаг даргын Тамгын газар болон хэлтэс, албадууд, төрийн чиг үүрэг бүхий байгууллага, ажилтанд нийт 2713 өргөдөл, гомдол ирсний 212 нь шийдвэрлэх хугацаа болоогүй, 2510 буюу 92.1 хувь нь хуулинд заагдсан хугацаанд шийдвэрлэгдлээ. Нийт ирсэн өргөдөл гомдол нь өмнөх оны мөн үетэй харьцуулахад 63,8 хувиар өссөн байна. Ирсэн өргөдөл, гомдлыг агуулгын хувьд авч үзвэл барилга, хот байгуулалт, худалдаа үйлчилгээ, төрийн үйлчилгээний чанар, доголдолын талаарх гомдол, санал 1-4 дахин өссөн байна. Энэ нь аймгийн хэмжээнд төрийн байгууллагууд иргэдийн өргөдөл, гомдлыг хүлээн авах шууд утаснууд ажиллуулсан болон аймгийн Засаг даргын Тамгын газарт иргэдийн санал хүсэлтийг утсаар, цахим болон биечлэн хүлээн авах "Иргэн таныг сонсож байна” төвийг нээн ажиллуулсантай холбогдон иргэд утсаар өргөдөл, гомдлоо ихээр ирүүлсэнтэй холбоотой гэж үзэж байна. Иргэд төрийн байгууллагын ажлын байранд очиж санал хүсэлтээ гаргахаас илүүтэйгээр утсаар болон цахим хэлбэрээр илэрхийлэх нь иргэдийн цаг хугацаа, зардал мөнгийг хэмнэж, тэдний сэтгэлд нийцсэн үйлчилгээ болсон гэж дүгнэж байна.

Төрийн үйлчилгээний шат дамжлагыг цөөрүүлэх, үйлчилгээг шуурхай, нээлттэй хүргэх зорилгоор аймгийн хэмжээнд 8 байгууллагын үйлчилгээг хамруулан ажиллаж байгаа Нэг цонхны үйлчилгээгээр нийт 14867 иргэн үйлчлүүлсэн бөгөөд "Иргэн таныг сонсож байна” /70353511 утас/ төвд 567 өргөдөл, гомдол ирсний 103 нь шийдвэрлэх хугацаа болоогүй, 373 нь хуулийн хугацаанд шийдвэрлэгдлээ. Үүний 68 нь гомдол, 55 нь санал, 16 нь талархал байна.

3-р сарын 21-22-ны өдрүүдэд Улсын Их Хурлын дэд дарга Л.Цог, Улсын Их Хурлын гишүүн, Эдийн засгийн байнгын хорооны дарга Б.Гарамгайбаатар тэргүүтэй ажлын хэсэг манай аймагт ажиллан аймгийн Засаг дарга, ИТХ, ЗДТГ-ын удирдлагуудтай уулзаж орон нутагт тулгамдаж буй асуудлын талаар санал бодлоо солилцов. Уулзалтын үед аймгаас УИХ-ын ажлын хэсгийн бүрэлдэхүүнд хандаж Эрдэнэт хотын статусыг сэргээх, газар нутгийн хэмжээг нэмэгдүүлэх, хилийн цэсийг шинэчлэн тогтоох, Эрдэнэт үйлдвэрлэл технологийн паркийн дэд бүтцэд улсын төсвөөс хөрөнгө оруулалт хийх, орон нутагт үйл ажиллагаа явуулж байгаа томоохон компаний салбаруудыг орон нутгийн төсөвт татвар төлдөг байх хууль эрх зүйн зохицуулалт хийх талаар асуудал тавилаа.

Аймгийн Засаг дарга 13 төрийн байгууллагуудын үйл ажиллагаатай танилцаж тулгамдаж буй асуудлын талаар санал бодлоо солилцлоо.

Аймгийн Засаг даргын дэргэдэх газар, хэлтэс, албад, сумдын ЗДТГ-ын 2012 оны үйл ажиллагаанд хяналт, шинжилгээ үнэлгээ хийж, үр дүнг үнэлэх ажлыг зохион байгуулж байна.

Төрийн албан хаагчдад мэдээллийн технологийн чиглэлээр үе шаттай сургалтыг зохион байгуулж байгаа бөгөөд тус сургалтанд нийт 74 албан хаагч хамрагдсан байна.

Булган, Орхон аймгийн Засаг дарга, Тамгын газар 2013-2016 онд хамтран ажиллах гэрээ байгууллаа. Уг гэрээний хүрээнд газрын харилцаа, түүний төлөвлөлт олголт, байгаль орчин, ой хөгжүүлэх сангийн асуудал, хөдөө аж ахуй, гамшиг осол болон гал түймэр, гэмт хэрэгтэй тэмцэх, авто зам, дэд бүтцийн асуудал, нийтийн зорчигч тээвэр, иргэний бүртгэл, биеийн тамир спорт, хил залгаа сумдын хамтын ажиллагаа, мэргэжлийн хяналт, эрүүл мэнд, хүүхэд гэр бүлийн хөгжил, татварын хяналт зэрэг чиглэлээр хамтран ажиллах төлөвлөгөөг батлав.

Баян-Өндөр сумын багуудын Иргэдийн Нийтийн хурлыг 3-р сарын 23-нд зохион байгуулж, ИНХ-ын дарга, Тэргүүлэгчдийг сонгох, багийн Засаг даргад нэр дэвшүүлэх асуудлыг хэлэлцсэн байна.

3-р сарын 29-ний байдлаар орон нутгийн төсвийн орлогын төлөвлөгөөний биелэлт 162.7 хувьтай ба орон нутгийн хөгжлийн нэгдсэн санд 1.5 тэрбум төгрөгийг төвлөрүүлээд байна. Нийгмийн даатгалын сангийн орлогод 6.5 тэрбум төгрөг төвлөрүүлж, төлөвлөгөөний биелэлт 110.1 хувьтай ба бүх сангуудын орлогын төлөвлөгөө 8.8-11.0 хувиар давж биелж, сангийн орлого өнгөрсөн оны мөн үеэс 52.8 хувиар өссөн байна.

3.Хууль, эрх зүйн бодлогын хүрээнд:

Хууль зүйн яам, Монголын хуульч эмэгтэйчүүдийн холбоотой хамтран "Захиргааны ерөнхий хууль”-ийн төсөлд санал авах хэлэлцүүлгийг зохион байгууллаа. Уг хэлэлцүүлэгт аймаг, сумын ЗДТГ-ын ажилтнууд болон шүүгч, өмгөөлөгчид төрийн байгууллага, иргэний нийгмийн байгууллага, иргэдийн 80 гаруй төлөөллийг хамруулж, гарсан саналуудыг нэгтгэж холбогдох газарт хүргүүлэв.

3-р сарын 27-нд Хүний эрхийн үндэсний комисстой хамтран нийт 50 гаруй төрийн албан хаагчдад "Төрийн үйлчилгээн дэх хүний эрхэд суурилсан хандлага” сэдэвт сургалтыг зохион байгуулж, хүний эрхийн талаар төрийн хүлээх үүрэг, хариуцлага, иргэдэд чиглэсэн төрийн үйлчилгээ ба хүнд суртал, иргэдийн мэдээллээр хангагдах эрхийн талаар ярилцаж санал бодлоо солилцсоны зэрэгцээ Цагдаагийн газрын эрүүлжүүлэн баривчлах байр, Шүүхийн шийдвэр гүйцэтгэх албаны цагдан хорих байр, дотоодын цэргийн 816, зэвсэгт хүчний 186-р анги, хүүхдийн асрамжийн "Энэрэл” төвийн үйл ажиллагаатай танилцав.

Нийгмийн халамж үйлчилгээний хэлтэс, Хөдөлмөрийн хэлтэс, Нийгмийн даатгалын хэлтэс, Баян-Өндөр сумын ЗДТГ, Хүүхэд гэр бүл, хөгжлийн хэлтэс, Цагдаагийн газартай хамтран Захиргааны хяналтанд байгаа 150 иргэдийн дунд сургалт, ярилцлага зохион байгуулж, тэднийг нийгэмшүүлэх, хөдөлмөр эрхлэлтийг дэмжих, мэргэжлийн сургалтанд хамруулах зэрэг ажлуудыг зохион байгуулахаар шийдвэрлэв.

Цагдаагийн газрын мэдээгээр 3 сарын эхний байдлаар 127 хэрэгт 76 хүн холбогдон шалгагдаж, хэргийн илрүүлэлт 28.8 хувьтай байна. Гэмт хэргийн улмаас иргэд, байгууллага, аж ахуйн нэгжид 124.5 сая төгрөгийн хохирол учирсан бөгөөд нийт хохирлын 23.6 хувийг нөхөн төлүүлсэн байна. Согтуугаар тээврийн хэрэгсэл жолоодсон 230 жолоочийг илрүүлэн, 212 жолоочийн эрхийг хасчээ.

4.Боловсрол, эрүүл мэнд, урлаг, спорт, нийгмийн хамгааллын бодлогын хүрээнд:

Боловсрол, шинжлэх ухааны сайд Л.Гантөмөр 3-р сарын 9-10-ны өдрүүдэд манай аймагт ажиллаж, боловсролын шинэчлэлийн бодлогын талаар багш нарын дунд цуврал хэлэлцүүлгүүд зохион байгууллаа.

Эдийн засгийн хөгжлийн яам, Барилга хот байгуулалтын яам, Үйлдвэр хөдөө аж ахуйн яам, Хөдөлмөрийн яамны хамтарсан ажлын хэсэг Баян-Өндөр, Жаргалант сумдад 2012 онд хийгдсэн хөрөнгө оруулалт, их засварын ажлын гүйцэтгэлийг газар дээр нь үзэж шалган, 2014-2016 онд хийгдэх хөрөнгө оруулалтын ажлын талаар 730 гаруй иргэдийн дунд хэлэлцүүлэг зохион байгуулж улсын төсвийн хөрөнгөөр хийгдэх нэн тэргүүнд шаардлагатай ажлуудыг эрэмбэлүүлэх ажлыг зохион байгууллаа. Уг арга хэмжээний хүрээнд Баян-Өндөр суманд 84, Жаргалант суманд 14 ажлын жагсаалт гаргав.

Боловсрол соёлын газартай хамтран "Боловсролын шинэчлэл-Эрдэнэт-2013” зөвлөгөөнийг угтаж салбар хэлэлцүүлгүүдийг зохион байгуулж байна. УИХ-ийн гишүүн Н.Батчимэг манай аймагт ажиллан төрийн албан хаагч, иргэдтэй уулзсан ба сургуулийн өмнөх боловсролын тухай хуульд нэмэлт, өөрчлөлт оруулах, монгол хэлний тухай шинэ хуулийн төслийн үзэл баримтлалыг танилцуулж санал авах зорилгоор ерөнхий боловсролын сургуулийн багш нар болон сургуулийн өмнөх боловсролын байгууллагын удирдлага, арга зүйч, эцэг эхийн төлөөллүүдийн дунд хэлэлцүүлэг зохион байгуулж, боловсролын шинэчлэлийг орон нутагт хэрэгжүүлэхэд тулгамдаж буй асуудал, түүнийг шийдвэрлэх арга зам, сургалтанд гарч байгаа эерэг болон сөрөг асуудлуудын талаар санал бодлоо солилцлоо.

Боловсрол соёлын газартай хамтран түүх, нийгмийн ухаан, газар зүй, биеийн тамирын багш нарын дунд "Орон нутагт аялал, жуулчлал хөгжүүлэхэд таны оролцоо”, "Биеийн тамирын сургалтын үр өгөөжийг нэмэгдүүлэх нь” сэдэвт хэлэлцүүлэг, бага ангийн багш нарын дунд "Залуу заах аргач багш” шалгаруулах ур чадварын уралдаан, ерөнхий боловсролын 17 сургуулийн 2, 3-р ангийн 2800-аад сурагчдын дунд монгол хэл болон математикийн хичээлээр уралдаан, "Баян-Өндөр" цогцолбор сургуулийн мэргэжлийн "Тэргүүлэх" зэрэгтэй гадаад хэлний багш нарын ажлыг сурталчлах өдөрлөг, цэцэрлэгийн багш нарт "Бага насны хүүхдийн хөгжлийн стандартын зөвлөмж” сургалт зэрэг арга хэмжээнүүдийг зохион байгуулав.

Эрүүл мэндийн газартай хамтран "Эрүүл мэндийн шинэчлэл ба иргэний оролцоо” хэлэлцүүлгийг нийт 16 багийн 500 гаруй иргэдийн дунд зохион байгуулсан бөгөөд "Амьдралын зөв хэвшилд алхам алхмаар” сэдэвт мэдээлэл, сургалт сурталчилгааны аяны хүрээнд зарим аж ахуйн нэгж, байгууллага, багуудад "Дархлаажуулалт”, "Халдварт өвчнөөс сэргийлье”, "Усаар дамжих халдварт өвчин, ундны усны эрүүл ахуй”, "Ажлын байранд эрүүл мэндийг дэмжих нь”, "Анхны тусламжийг хэрхэн үзүүлэх”, "Зохистой хооллолт–идэвхитэй хөдөлгөөн” сэдэвт сургалтууд, "Ахмад настны эрүүл мэндийг дэмжье” өдөрлөг зэрэг арга хэмжээнүүдийг зохион байгууллаа.

Бүсийн оношлогоо, эмчилгээний төвд үйлчлүүлэгчдийн хүлээгдлийг ихээр үүсгэдэг дүрс оношлогооны тасагт рентген зураг авалт, ЭХО оношлогооны ачааллыг бууруулах зорилгоор 3-р сарын 19-ний өдрөөс эхлэн нэг их эмчийг нэмж ажиллуулж байгаа ба 4-р сарын 1-нээс эхлэн амбулаторийн шүдний кабинетийг 2 ээлжээр ажиллуулахаар шийдвэрлэсэн байна.

Олон улсын дүрмээр зохицуулагдах өвчний үеийн мэдээлэл ба орон нутгийн багийг чадавхижуулах эрсдэлийн үеийн харилцаа холбоо сургалтыг орон нутагт анх удаа зохион байгуулсан ба ажлын байранд эрүүл мэндийг дэмжих сургалт, "Анхны тусламжийг зөв үзүүлэх нь” зэрэг сургалтуудыг зохион байгуулж 15 аж ахуйн нэгжийн ажиллагсад, ерөнхий боловсролын сургуулийн 90 гаруй сурагчдыг хамруулав.

Аймгийн ЗДТГ-аас хорт хавдартай 13 иргэний эмийн зардалд дэмжлэг үзүүлж 1300,0 мянган төгрөгийн тусламж үзүүлсний зэрэгцээ нийгмийн халамж шаардлагатай эхчүүдэд зориулсан 9600 ширхэг аминдэмийг өрхийн эрүүл мэндийн төвүүдэд хуваарилж, А гепатитын вакцинд 4997 хүүхдийг хамрууллаа.

Цус цусан бүтээгдэхүүний чанар, хангамж, аюулгүй байдал, эмнэлгийн хоног болоогүй нас баралт, мэс заслын хүндрэл, үндсэн оношийн зөрүүний шалтгаан, эмнэлгийн тусламж үйлчилгээний чанар, аюулгүй байдалд хяналт үнэлгээ хийж байна.

Аймгийн хэмжээнд тулгамдаж буй асуудал цусны донорын талаархи үнэн зөв мэдээллээр хангах, донор элсүүлэх ажлыг эрчимжүүлэх, донор хадгалах идэвхи санаачлагыг өрнүүлэх чиглэлээр аймгийн Засаг даргын нэрэмжит "Цусаа бэлэглэж бусдыгаа аварья” аян зохион байгуулж байна.

3-р сарын 7–нд "Соёл, спорт, аялал жуулчлал-2013” аймгийн зөвлөгөөнийг зохион байгуулсан ба аймгийн соёл, урлаг, биеийн тамир, спорт, аялал жуулчлалын салбарын онцлог, өнөөгийн байдал, хөгжлийн чиг хандлага, тулгамдаж буй асуудлын талаар тус салбарын удирдлага, мэргэжилтнүүд илтгэл тавьж, салбар хэлэлцүүлгүүд зохион байгуулсны зэрэгцээ уг зөвлөгөөнөөс тус салбарын тэргүүлэх чиглэл, Соёлын зөвлөлийг батлах, тэргүүлэх чиглэлийг хөгжүүлэх дугуйлан секц хичээллүүлэх, алслагдсан гэр хорооллын салбар номын сан ажиллуулах зардлыг жил бүр аймгийн эдийн засаг, нийгмийг хөгжүүлэх үндсэн чиглэлд тусгуулах, томоохон хөрөнгө оруулалтын ажлын саналыг холбогдох яамдуудад уламжлах шийдвэрүүдийг гаргалаа.

"Зөв Монгол хүүхэд байхын учир” сэдэвт хүүхдийн XV чуулганд хүүхдийн оролцооны байгууллагын 180 төлөөлөгчид оролцож, аймгийн хүүхэд багачууд аймаг, сум, сургууль, анги, өсвөр үеийнхнийхээ төлөө ямар бүтээлч ажил хийж чадахаа тодорхойлох, хүүхдүүдийн дутагдал, муу зуршлыг хэрхэн арилгах, хотын ногоон байгууламжийг нэмэгдүүлэхэд хүүхдүүд хэрхэн оролцох талаар ярилцаж, саналаа шийдвэр гаргах түвшний хүмүүст хүргүүлж, хамтран ажиллахаар төлөвлөлөө.

Аймгийн хүүхдийн оролцооны байгууллагаас санаачилсан "Хар, цагаан" сэдэвт уулзалтанд 120 хүүхэд, зорилтот бүлгийн сайн дурын идэвхитнүүдийн дунд зохион байгуулсан "Хүүхэд хамгаалал” АСТ-ын тэмцээнд гэр хорооллын 9 багийн 80 гаруй хүүхэд оролцлоо.

Баян-Өндөр сумын ЗДТГ, Хүүхэд, гэр бүлийн хэлтэстэй хамтран "Сургуулийн болон багийн нийгмийн ажилтны хамтын ажиллагаа” сэдэвт сургалт, "Нийгмийн ажилтны чиг үүрэг, хэм хэмжээ”, "Бүлгээр хэрхэн хамтран ажиллах вэ?” гэсэн чиглэлээр ярилцлага зохион байгуулж, уг ажлын хүрээнд сурагчдын судалгаа, хамран сургах тойрог, халамжийн үйлчилгээний чиглэлээр хамтран ажиллах чиглэл, арга замаа тодорхойлов.

Олон улсын Театрын өдрийг тохиолдуулан Хүүхэд залуучуудын театр Роберт Томасын зохиол "Урхи” жүжиг, дуу бүжгийн "Эрдэнэт” чуулга "Зүүдний Соннамбула” сонгодог концертыг олны хүртээл болголоо.

Соёл, спорт аялал жуулчлалын яамны харъяа Спортын бэлтгэлийн төв, аймгийн Биеийн тамир, спортын газартай хамтран Орхон, Булган, Архангай, Баянхонгор, Хөвсгөл аймгийн БТСГ-ын дарга, мэргэжилтэн, ерөнхий боловсролын сургуулийн биеийн тамирын багш, шигшээ багийн дасгалжуулагчдын дунд "Биеийн тамир, спортын үйл ажиллагааг эрчимжүүлэх нь” сэдэвт Хангайн бүсийн сургалтыг зохион байгуулав.

Мөн БТСГ-ын мэргэжилтэн, цэцэрлэг, сургуулийн багш, эмч, аж ахуйн нэгж, байгууллагуудын спортын арга зүйч нарын дунд "Хүн амын бие бялдрын хөгжилт, чийрэгжилтийн түвшин тогтоох сорил”-ын программд нэвтрэх, мэдээлэл боловсруулах талаар сургалт явууллаа.

Усанд сэлэлтийн насанд хүрэгчдийн улсын аварга шалгаруулах тэмцээн, Бадминтоны өсвөр үеийн аймгийн аварга шалгаруулах тэмцээн зэрэг арга хэмжээнүүдийг зохион байгуулж 200 гаруй тамирчид оролцсон байна.

3 сарын эхний байдлаар аймгийн дүнгээр давхардсан тоогоор 23.5 мянган хүнд 6.4 тэрбум төгрөгийн тэтгэвэр, тэтгэмж, тусламж, хөнгөлөлт олгосноос 1945 хүнд 406.3 сая төгрөгийн халамжийн тэтгэвэр, 1497 хүнд 142.9 сая төгрөгийн нөхцөлт мөнгөн тэтгэмж, нийгмийн дэмжлэг туслалцаа шаардлагатай 1233 хүнд 86.9 сая төгрөгийн хөнгөлөлт, тусламж, 366 ахмад настан болон хөгжлийн бэрхшээлтэй иргэдэд 58.9 сая төгрөгийн тусламж, хөнгөлөлт олгосон ба тэтгэвэр тогтоолгосон хүний тоо өнгөрсөн оны мөн үеэс 2.2 хувиар нэмэгдсэн байна.

Нийгмийн халамж үйлчилгээний хэлтэс, Хөдөлмөрийн хэлтэс, Нийгмийн даатгалын хэлтэс, Баян-Өндөр сумын ЗДТГ, Хүүхэд гэр бүл, хөгжлийн хэлтэс, Цагдаагийн газартай хамтран захиргааны хяналтанд байгаа 150 иргэдийн дунд сургалт, ярилцлага зохион байгуулж, тэднийг нийгэмшүүлэх, хөдөлмөр эрхлэлтийг дэмжих, мэргэжлийн сургалтанд хамруулах зэрэг ажлуудыг зохион байгуулахаар шийдвэрлэв.

Хүнс хоол тэжээлийн хөтөлбөрийг хэрэгжүүлэх ажлыг үргэлжлүүлэн хэрэгжүүлж байгаатай холбогдуулан зорилтот бүлгийн хамрагдах өрхүүдэд хүнсний талон олгох, түүгээр үйлчлэх дэлгүүрүүдийн сонгон шалгаруулалт явагдаж байна.

Хөдөлмөр, Барилга хот байгуулалт, Эдийн засгийн хөгжил, Үйлдвэр хөдөө аж ахуйн сайд нарын баталсан удирдамжийн дагуу "Ажлын байр, ажилтны мэдээлэл”, "Аймаг, сумын хэмжээний компани, нөхөрлөл, иргэн, төрийн бус байгууллага, төсвийн байгууллагын үйл ажиллагааны өнөөгийн байдал” сэдэвт судалгаанд 960 гаруй аж ахуйн нэгж, байгууллага, иргэдийг хамрууллаа.

Хөдөлмөр эрхлэлтийг дэмжих сангийн санхүүжилтээр манай аймгийн Технологийн сургууль, "Энх-2” сургалтын төв, Албан бус боловсролын төв, Мэргэжлийн сургалт үйлдвэрлэлийн төв, Ирмүүн далай, Монгол дизайнер төвүүд сүлжигч-кительчин, тогооч, үсчин, ногоочин, талх-нарийн боов, экскаватор, бульдозер, гагнуурчин, тоног төхөөрөмж, худалдагч, ноос боловсруулах, эсгий бүтээгдэхүүн, оёдол-эсгүүр, буриад гутал, гар урлал, фермерийн аж ахуй зэрэг 15 мэргэжлээр сургалт явуулах эрх авсан байна.

5.Хүнс, хөдөө аж ахуй, байгаль орчны бодлогын хүрээнд:

Мал хаваржилтийн байдалтай газар дээр нь танилцах, хүн, мал эмнэлгийн үйлчилгээ үзүүлэх зорилгоор аймаг, сум, баг, холбогдох байгууллагын удирдах ажилтан, МАА-н мэргэжилтэн, малын эмч, хүний эмч зэрэг 27 хүний бүрэлдэхүүнтэй ажлын хэсэг 2 сумын хөдөөгийн багуудад ажиллаж хөдөө аж ахуйн салбарын бодлого, зорилт, цаг үеийн ажил, цаг агаарын төлөв байдлын талаар танилцуулан 99 малд үзлэг хийж, 168 иргэнийг эрүүл мэндийн үзлэгт хамруулж, 370.0 гаруй мянган төгрөгийн эм олгосон бөгөөд малчдын санал бодлыг сонслоо. Төл бойжилт 99,8 хувьтай бөгөөд мал онд оролт 99,9 хувьтай байна.

2013 оны 03-р сарын 18-наас 04-р сарын 12-ны хооронд "Чацарганы суулгац зээлээр олгох”, "Жимс, жимсгэний суулгац зээлээр олгох” төслийн тендер шалгаруулалтанд иргэд, аж ахуйн нэгжүүдийг хамруулах ажлыг зохион байгуулж байна.

6.Үйлдвэрлэл үйлчилгээ, байгаль орчин, дэд бүтцийн салбарын бодлогын хүрээнд:

3 сарын эхний байдлаар аж үйлдвэрийн салбарт 206.8 тэрбум төгрөгийн бүтээгдэхүүн үйлдвэрлэн, 213.9 тэрбум төгрөгийн бүтээгдэхүүн борлуулж өмнөх оны мөн үеэс үйлдвэрлэлт 3.3 хувиар, борлуулалт 6.3 хувиар өссөн байна. Худалдаа, нийтийн хоолны 760 цэг салбарт 11.8 тэрбум төгрөгийн бараа гүйлгээ хийж, бараа гүйлгээний нийт хэмжээ өмнөх оны мөн үеэс 38.8 хувиар өсчээ.

Аймгийн ЗДТГ, Монголын үндэсний худалдаа аж үйлдвэрийн танхим, Орхон Булган аймгийн Худалдаа, аж үйлдвэрийн танхимтай хамтран зохион байгуулсан "Ногоон хөгжлийн үзэл баримтлал, зарчмууд” сэдэвт семинарт холбогдох мэргэжилтнүүдийг хамруулж, орон нутгийн хэмжээнд ногоон хөгжлийг хэрхэн бий болгох талаар харилцан санал солилцлоо.

3-р сарын 27-ны өдөр "Бизнес эрхлэгчдийг дэмжих санхүүгийн боломжит хувилбарууд” хэлэлцүүлэг, үзэсгэлэнг аймгийн Хоршооллын сургалт мэдээллийн төв, Германы олон улсын хамтын ажиллагааны нийгэмлэгийн Бүс нутгийн эдийн засгийг дэмжих хөтөлбөртэй хамтран зохион байгуулж тус хэлэлцүүлэгт 200-аад бизнес эрхлэгчид оролцлоо.

03-р сарын 23-24-ны өдрүүдэд "Мишээл экспо” төвд Аялал жуулчлалын үндэсний төв, Монголын аялал жуулчлалын холбооноос зохион байгуулсан "Mongolia International Travel Mart-2013” үзэсгэлэнд аялал жуулчлал, зочид буудлын "Эрдэнэт” холбоо, "Эрдэнэт клуб”, "Монгол аялал” компанийн Эрдэнэт хот дахь салбар, Сэлэнгэ амралтын бааз оролцож аймаг орон нутгаа сурталчлав.

Аймгийн ИТХ-ын Тэргүүлэгчдийн ээлжит хуралдаанаар Эрдэнэт хотын агаарын бохирдлыг бууруулах чиглэлээр хэрэгжүүлж буй "Гэр хорооллоос үүсэх агаарын бохирдлыг бууруулах богино хугацааны хөтөлбөр, төлөвлөгөө”-ний биелэлтийг хэлэлцүүлэв.

Авто тээврийн болон өөрөө явагч хэрэгслийн үзлэг, оношлогоонд 1491 тээврийн хэрэгсэл хамрагдсан ба 72.0 сая төгрөгийн татвар хураамжийг төвлөрүүлээд байна. Зорчигч тээврийн үйлчилгээнд 289 микро автобус, 494 такси гарч, тэдгээрт 1000 гаруй хүн ажиллаж байна.

WWW.BOLOD.MN