МЭДЭЭЛЭЛ ӨГСӨН ИРГЭДИЙГ 2-5 ХҮРТЭЛ САЯ ТӨГРӨГӨӨР УРАМШУУЛНА

2013-04-07

Сүхбаатар аймгийн Цагдаагийн хэлтсийн дарга, цагдаагийн дэд хурандаа Г.Цэргийнхүүтэй ярилцлаа.

   -Та өөр аймагт ажиллаж байгаад төрөлх нутгийнхаа цагдаагийн байгууллагыг удирдахаар ирээд удаагүй байна. Ажлаа юунаас эхэлж байна даа?
   -Миний хувьд Цагдаагийн дээд сургуулийг 1997 онд төгсч, аймгийнхаа Цагдаагийн хэлтэст мөрдөн байцаагч, ахлах мөрдөн байцаагч, Мөрдөн байцаах тасгийн даргаар ажиллаж байгаад 2010 оны 1 дүгээр сард Хэнтий аймгийн Цагдаагийн газрын МБТ-ийн даргаар шилжиж ажилласан. Ингээд ЦЕГ-ын даргын 2012 оны 12 дугаар сарын 6-ны өдрийн 762 тоот тушаалаар Сүхбаатар аймгийн Цагдаагийн хэлтсийн даргаар томилогдон ажлаа хүлээж аваад байна.
         Ажлаа юунаас эхэлж байгаа талаараа дараах гурван зүйлийг онцлон хэлье. Нэгд аймгийн эрүү, хэв журмын нөхцөлийг үнэн зөв тодорхойлж, иргэдээс ирүүлж байгаа өргөдөл гомдол, мэдээлэл бүрийг бүртгэж, шалгаж хариу өгөх, хоёрт цагдаагийн байгууллагын үйл ажиллагааг иргэдэд нээлттэй, ил тод байлгаж, гэмт хэргээс урьдчилан сэргийлэх ажилд иргэдийн оролцоог нэмэгдүүлэх, гуравт цагдаагийн байгууллагаас аливаа үйлчилгээг иргэддээ түргэн шуурхай үзүүлж, албан хаагч нарын харилцааны соёлыг сайжруулахад анхаарч байна.
   -Өнгөрсөн оны ажлын тайлангаа олон нийтэд тавьсан байдлаас харахад тус аймагт гэмт хэргийн гаралт өсөх хандлагатай байна. Энд ямар дүгнэлт хийж ажиллахаар төлөвлөж байна вэ?
   -Энэ оны эхний улирлын байдлаар гэмт хэрэг 43.5 хувиар, захиргааны зөрчил 4 дахин өссөн дүн мэдээ гарлаа. Энэ нь нэг талаас гэмт хэрэг, зөрчлийн илрүүлэлт сайжирч байгаатай уялдаатай юм. Гэмт хэрэг, зөрчлийг бууруулах, урьдчилан сэргийлэхэд иргэдийн оролцоо маш чухал. Иймд бид аймгийн ИТХ, Засаг даргад энэ талаар хийх ажлы тодорхой саналыг хүргүүлж, зарим шийдвэрийг гаргуулан ажиллаж байна.
          Баруун-Урт сумын төвийг үе шаттайгаар камержуулах, замыг гэрэл дохиотой болгон, хөдөлгөөнт болон цагдаа, олон нийтийн хамтарсан эргүүлийг ажиллуулж эхлээд байна. Аймгийн ИТХ-ын тэргүүлэгчдийн хурлаар гэмт хэргийн мэдээ мэдээллийг төлбөртэй авах болон мал, малын гаралтай мах, түүхий эдэд хяналт тавих журмыг батлуулж, аж ахуйн нэгж, байгууллагыг камержуулах шийдвэр гаргуулан хэрэгжүүлээд эхэллээ.
   -Цагдаагийн байгууллагын ажлыг шинэ шатанд гаргах, гэмт хэрэгтэй тэмцэхэд иргэдийн оролцоо маш чухлыг та сая хэллээ. Энэ талаар санаж сэдэж байгаа зүйл юу байна бэ?
   -Иргэдийн оролцоог нэмэгдүүлэхийн тулд Цагдаагийн байгууллагын үйл ажиллагаа иргэддээ эхлээд нээлттэй, ил тод болсон байх ёстой. Юуны өмнө иргэдийг хүлээн авдаг тусгай байртай болж, тэндээ иргэдэд эрх зүйн зөвлөгөө туслалцааг үзүүлж, хүсэл сэтгэлд нь нийцсэн чирэгдэлгүй үйлчилгээ үзүүлэхэд анхаарч байна. Ингэхийн тулд байгууллагынхаа техник технологийн дэвшилтэд байдлыг ашиглах, мөн албан хаагч нарт тавих хяналтыг сайжруулах нь чухал байна.
   -Манай аймагт малын хулгай нэлээд гардаг. Гэтэл сүүлийн үед авто осол өсөх хандлагатай боллоо. Эдгээр хэргийг бууруулах талаар ямар ажил зохион байгуулж байна даа?
   -Малын хулгайн гэмт хэрэгтэй тэмцэхийн тулд зах зээл дээр худалдан борлуулж байгаа мал, малын гаралтай мах, түүхий эдэд тавих хяналтыг сайжруулах шаардлагатай юм. Мөн үйлдэгдсэн гэмт хэргийг богино хугацаанд илрүүлж буруутай этгээдэд хуулийн хариуцлага хүлээлгэх нь чухал. Үүнд иргэдийн мэдээ мэдээлэл маш чухал үүрэгтэй. Бид гэмт хэргийн талаар үнэн зөв мэдээ, мэдээлэл өгсөн иргэдийг 2.0-5.0 сая хүртэл төгрөгөөр шагнаж урамшуулах боломжтой боллоо.
               Зам тээврийн осол, гэмт хэргээс урьдчилан сэргийлэхийн тулд Баруун-Урт сумын замыг гэрэл дохиотой болгож, камераар хяналт тавих боломжийг хангаж, замд тавих хяналтыг сайжруулах тал дээр анхаарч байна. Энд ч бас иргэдийн оролцоо хамгаас чухал байна.
   -Сумдад ажиллаж байгаа тасаг, нэгжээ чадваржуулах, хүчин чадлыг нь нэмэгдүүлэхэд юуг хийхээр төлөвлөөд байна бэ?
   -Сумдад ажиллаж байгаа тасгийн дарга, хэсгийн төлөөлөгч, цагдаа нарыг аймгийн Цагдаагийн хэлтсийн дарга, сумын засаг даргаас хосолсон удирдлагаар хангаж ажиллах нөхцөл боломж, нийгмийн асуудлыг нь сайжруулахад тусгай бодлого барьж хамтарч ажиллаж байна. Эхний ээлжинд албан хаагч нарын санал, үүрэг гүйцэтгэх чадавхийг үндэслэн хэд хэдэн суманд шинээр томилгоо хийгээд байна. Сумын ИТХ-ийн дарга, Засаг дарга нартай гурвалсан гэрээ байгуулж, хоёр талаасаа хамтраад ажиллах нөхцөл боломжийг бүрдүүлэхэд анхаарч байна. Энэ үүднээс сумдад ажиллаж байгаа хэсгийн төлөөлөгч, цагдаа нараа унах унаатай, бензин, түлшээр гачигдаад байдаггүй болгоно.
   -Аймгийн Цагдаагийн байгууллагад тулгамдаж буй гол асуудал гэвэл.... ?
   -Аймгийн Цагдаагийн хэлтсийн барилга ашиглалтад ороод дөч гаруй жил болж төвийн шугам сүлжээнд холбогдоогүй, хуучирч муудлаа. Манай эрүүлжүүлэх, баривчлах байр стандартын шаардлага хангахгүй болсон тул үйл ажиллагаа явуулахад нэлээд хүндрэлтэй байна. Мөн камерын хяналт, дотоод сүлжээний хүчин чадал ч муу байна. Хөрөнгө мөнгө шаардсан эдийн засгийн шинжтэй тулгамдсан асуудлаа аймаг орон нутгийн удирдлагууддаа танилцуулан богино хугацаанд хамтран шийдэхээр хөөцөлдөж байна. Хамгийн гол нь албан хаагч нарынхаа мэдлэг чадвар, харилцаанд хандлагын өөрчлөлт гаргах, иргэдээс тавьж байгаа зүй ёсны шаардлагад нийцүүлэн үйл ажиллагаагаа явуулах нь чухал байна.
   -Цагдаагийн албан хаагчдын тохилог орчин, нийгмийн асуудлыг шийдэх талаар...?
           -Хамгийн түрүүнд албан контортоо их засвар хийж, дээвэр нь гоождоггүй, дотроо 00-той, угаалгын өрөө, тохилог орчинтой болгохоор төсөв тооцоо хийж, хөрөнгө оруулалтыг шийдвэрлээд байна. Байгууллагадаа орчин үеийн хийц, загвар бүхий цайны газартэй болох, албан хаагч нартаа нэгдсэн журмаар газар олгож тэндээ аж ахуйн аргаар орон сууц, хашаа барих ажлыг төлөвлөөд байна. Энэ онд байгууллагынхаа дотоод аюулгүй байдлыг хангах зорилгоор камержуулах, дотоод сүлжээний хүчин чадлыг нэмэгдүүлэх, нууц хадгалалт хамгаалалтыг сайжруулахын тулд тусгай код, картаар нээгддэг хаалгатай болох, бүх телефон утсыг тусгай дугаарт шилжүүлж, иргэдэд зөвлөгөө өгөх техникийн нөхцөлийг бий болгохоор ажиллаж байна.

Сүхбаатар аймаг   Г.Сүхээ